LUKA 23

1KANDI ekitebe kyona kyaimuka, bamutwara hali Pirato. 2Nibabanza okumulega nibagamba ngu Tukarora omuntu onu nahabisa ihanga lyaitu: nabatanga okuzinira Kaisali, nayegamba wenka okuba Kristo, Omukama. 3Pirato yamukaguza ati Niwe Omukama wa Bayudaya? Yamugarukamu nagamba ati Nukwo ogambire. 4Pirato yagambira banyakatagara abakuru nebitebe ati Timboine musango gwona ha muntu onu. 5Baitu bagarukira muno okugamba ngu Ayemeseze abantu, nayegesa omu Buyudaya bwona, akabandiza Galiraya okuhika na hanu. 6Baitu Pirato obuyahulire, yakaguza rundi omuntu onu Mugaliraya. 7Kandi obuyahulire ali womu isaza lya Herode, yamutuma hali Herode, baitu nogu akabali ha Yerusalemu omu biro ebi. 8Kandi Herode obuyaboine Yesu yasemererwa muno: baitu ebiro bingi yayegombaga okumurora, baitu akahu’ra haluwe; kandi akanihira okumurora nakora akokuro’raho. 9Yamukaguliza ebigambo bingi: baitu uwe atagarukemu kigambo. 10Kandi banyakatagara abakuru nabahandiki bakeme’ra nibamuhambiriza muno. 11Kandi Herode nabaserikalebe bamugaya, nibamute’ra enaku. Bamujwaza ebyokujwara ebyomutoro, bamuga’rayo hali Pirato. 12Kandi ha kiro eki Herode na Pirato nuho baganjagaine kara. 13Kandi Pirato yasoroza hamu banyakatagara abakuru nabalemi nabantu, 14yabagambira ati Mundetirege omuntu onu ngu Ahabisa abantu: kandi dora nyowe obu’mukagulirizege muno omu maiso ganyu, tinboine musango ha muntu onu omwebi ebimumulegere: 15nangwa, nobwakuba Herode: baitu uwe amugaruirehoga hali itwe; kandi dora, takozire kintu ekisemerire okumuisa. 16Nikyo ndamute’ra ’mulekere. 17(Baitu kikaba kimuhikirire okubaleke’ra omunyankomo omu ha bugenyi). 18Baitu bona bakatokera haiguru ngu Omuiheho omuntu onu, otuleke’re Baraba: 19nuwogu yayemeseze abantu ha rubuga naita, oubatire omu nju yenkomo. 20Pirato yagaruka okubagambira, nayenda okulekera Yesu; 21baitu bakatoka nibagamba ngu Bamba ha muti, mubambe ha muti. 22Yabagambira obwakasatu ati Mara ekibi kiraha ekyakozire omuntu onu? Timboine omuluwe musango ogwokufa: nikyo ndamute’ra, ’mulekere. 23Baitu barahuka namaraka amahango nibasaba okumubamba ha muti; namaraka gabu gasingura. 24Na Pirato akacwa omusango ati Ekibasabire nikyo bakikole. 25Yalekera ogu ayanagirwe omu nju yenkomo obwokwema nokuita, oubasabire; baitu Yesu akamuhayo halibo okumukora nkokubayenzire. 26Kandi obubakaba nibamutwara, bakwata Omukulene Simoni, arugire omu nsi kwonka, bamutweka omuti, agwetweke enyuma ya Yesu. 27Kandi ekitebe kingi kikamuhondera ekyabantu nekyabakazi abakaba nibamuli’ra nibamute’ra empamo. 28Baitu Yesu akabahindukira nagamba ati Abaisiki ba Yerusalemu, mutansi’ra nyowe, baitu mweriri’re inywenka nabana banyu. 29Baitu, dora ebiro nibiija ebibaligambiramu ngu Bayina omugisa engumba, nenda ezitakazaraga, namabere agatakonkyaga. 30Nubwo balibanza okugambira ensozi ngu Tugwere; nobusozi ngu Tusweke’re. 31Baitu obubaraba nibakora binu omuti mubisi, balikora bata omuti gwomere? 32Kandi hakaba haloho abandi babiri abakozire kubi, abatwairwe hamu nauwe okuitwa. 33Bakahika hali ekiikaro eki ekyetwa oruhanga, nuho bamugambire ha muti, nabakozire kubi nabo, omu ha mukono ogwobulyo nondi ha mukono ogwemoso. 34Kandi Yesu yagamba ati Isenyowe obaganyire; baitu tibamanyire ekibarukukora. Kandi bakabagana ebyokujwarabye, nibatoma. 35Nabantu bakeme’ra nibasunga. Kandi nabalemi bakamute’ra enaku nibagamba ngu Akajuna abandi; ayejune wenka, obwaraba ali Kristo wa Ruhanga, omukomewe. 36Abaserikale nabo bakamute’ra enkau nibamuizira nibamuha amarwa agasalire 37nibagamba ngu Obwaraba oli Mukama Wabayudaya oyejune wenka. 38Kandi hakaba haloho nekihandiko ha ruguruwe ngu NUWONU MUKAMA WABAYUDAYA. 39Kandi omu hali abo abakozire kubi abahanikirwe, akamute’ra enaku nagamba ati Tiniwe Kristo? Oyejune wenka, ojune naitwe. 40Baitu ondi yagarukamu namuhana nagamba ati Na Ruhanga torukumutina? Baitu oteraine nauwe omu musango gumu? 41Kandi naitwe tugusemerire; baitu tuhairwe empera esemerire engeso zaitu: baitu omuntu onu takasisaga. 42Yagamba ati Yesu olinyijuka obwoliizira omu bukama bwawe. 43Yamugambira ati Mananukwo ninkugambira nti Hati oraba nanyowe omu nsi ya Ruhanga. 44Kandi esaha zikaba ziri nkomukaga, omuirima mwingi gwasweke’ra ensi yona okuhika ha saha eyomwenda, izoba nirireka okujwa: 45nenyigamo eyomu yekaru ekatemukamu hagati. 46Kandi Yesu obuyamazire okwamuza iraka erihango yagamba ati Isenyowe, omu mikono yawe mpaireyo omwoyo gwange: kandi obuyamazire okugamba eki yahayo obwomezi. 47Kandi omunyakihanda Omurumi obuyaboine ebyabaireho, yanyumiza Ruhanga nagamba ati Mananukwo onu abaire omuntu ahikirire. 48Kandi ebitebe byona ebyagomere ahamu okwero’ra, obubaboine ebyabaireho bagarukayo nibeteratera omu kifuba. 49Nabatahibe bona, nabakazi abamukuratire okuruga Galiraya, bakeme’ra hara, nibarora ebi. 50Kandi dora, omusaija ibaralye Yusufu, akabali omuhanuzi, omuntu asemire ahikirire 51(ogu ataikirize kuhanura kwabu nobuzakuba engeso zabu) owa Alimasaya, orubuga orwa Bayudaya, akaba nategereza obukama bwa Ruhanga: 52omuntu ogu akagenda hali Pirato, yaseba omutumbi gwa Yesu. 53Yaguhanura, yagukuba omu rugoye orwa bafuta, yamuta omu kituro ekyalimirwe omu mwandara, ekitakatebwamuga muntu. 54Kandi kikaba kiri kiro Kyokutekaniza, Sabiti ne’sana okukya. 55Nabakazi abarugire Galiraya hamu nauwe bakuratira enyuma, barora ekituro nomutumbi okugwatairweho. 56Kandi bagarukayo, batekaniza ebiboya namagita ageseta. Kandi ha kiro kya Sabiti bakahumura nkekiragiro okukiri.

Currently Selected:

LUKA 23: BRR64

Highlight

Copy