LUKA 2

1KANDI kyahika omu biro ebi, ekiragiro kikaruga hali Kaisali Augusito, abensi zona okuhandikwa. 2Oku nukwo kuhandikwa okwabandizeho Kulenio obwakaba nalema Busuli. 3Kandi bona bakagenda okwehandika, omu omu omu maka gabu bonka. 4Na Yusufu akaruga omu Galiya natabara, arugire omu rubuga rwa Nazalesi, nataha omu Buyudaya hali orubuga rwa Baudi orwetwa Beterehemu, baitu akaba ali womu nju, kandi 5womu ruganda rwa Daudi; okwehandika weak ahamu na Malyamu, owakaba ajumbire, ali nenda. 6Kandi kyahika, obubakaba bali oku, ebirobye ebyokukuzara byahiki’ra. 7Kandi yazara omwanawe omuzigaijo; yamusweka omu ngoye ezobwana obwonkerembe, yamubyamya omu nju yenta, baitu batabone mwanya omu nju yabagonyi. 8Kandi omusni egi hakaba harumu abalisa abaikaire omu bwe’re nibalinda igana lyabu ekiro. 9Kandi maraika wa Mukama akeme’ra nambere bali, ekitinisa kya Mukama kyabehinguliriza nikyengengeta: batina muno. 10Maraika yabagambira ati Mutatina; baitu dora, mbaletire ebigambo ebirungi ebyokusemererwa okwingi okuliba hali abantu bona: 11baitu hati hazairwe habwanyu ha rubuga rwa Daudi Omujuni, nuwe Kristo Mukama waitu. 12Kanu kokuro’raho namberemuli ngu Murazora omwana wenkerembe aswekerwe omu ngoye ezobwana bwenkerembe, abyamire omu nju yenta. 13Ahonaho hakabaho abomu ihe eryomu irungu, nibakugiza Ruhanga, nibagamba ngu

14Ekitinisa kibe hali Ruhanga haiguru muno,

Nomu nsi obusinge omuli abantu abasemererirwe muno.

15Kandi kyahika, bamaraika obubabarugireho okugenda omu iguru, abalisa bakagambirangana ngu Tugende hati bunu Beterehemu, turole ekigambo kinu ekihikire, Mukama ekyatumanyisize, 16Barahuka nibaija, basanga Malyamu na Yusufu, nomwana wenkerembe abyamire omu nju yenta. 17Kandi obubaboine, batebeza ekigambo ekibagambirwe ha mwana ogu. 18Bona abahulire bakahuni’ra ebi abalisa ebibabatebize. 19Baitu Malyamu akerinda ebigambo ebi byona, nabitekereza omu mutimagwe. 20Abalisa bagarukayo, nibakugiza nibasima Ruhanga obwebigambo byona ebibahulire, ebibaboine nkokubagambirwe. 21Kandi ebiro munana obubyahikire ebyokumusa’ramu, bamuruka ibaralye Yesu, niryo lyagambirwe maraika obwakaba atakabaire omu nda. 22Kandi ebiro obuyahoireho ebyokusemezebwa kwabu nkebiragiro bya Musa okubiri, bamutwara nibamutembya hali Yerusalemu, okumurangira Mukama, 23[nkokunyahandikirwe omu biragiro bya Mukama, ngu Ekisaija kyona ekizigaijo kirayetwa ekirukwera hali Mukama] 24nokuhonga ekyonzira nko kukyahandikirwe omu biragiro bya Mukama ngu Enduka ibiri, rundi obuiba obuto bubiri. 25Kandi dora, hakaba hali omu Yerusalemu omuntu ibaralye Simeoni; kandi omuntu ogu akabali ahikirire, omwekengi, nategereza okuhumuzibwa kwa Isareri: kandi Omwoyo Ogurukwera akaba aikare haluwe. 26Kandi ogu akaba asukulirwe Omwoyo Ogurukwera ngu talibona okufa, okuhikya obwalikarora Kristo wa Mukama. 27Ogu akaizira omu Mwoyo omu yekaru: kandi abakaikurube obubatahizemu omwana Yesu, bamuko’re nkengeso yebiragiro 28okweri, nubwo yamukikire omu mikonoye, nakugiza Ruhanga nagamba ati

29Ai Mukama wange, hati noyohereza omuiru wawe rubale.

Omu businge, nkekigambo kyawe okukikaba kiri;

30Baitu amaiso gange gaboine okujuna kwawe.

31Okuwatekanize omu maiso gabantu bona:

32Okuba omusana ogwokumulikira abamahanga,

Nokuba ekitinisa kyabantu bawe Isareri.

33Ise na nyina bakaba nibahuni’ra ebigambo ebi ebyamugambirweho; 34kandi Simeoni yabasabira omugisa, nagambira Malyamu nyina ati Dora, onu ntairweho baingi omu Isareri bagwe, baimuke; nokuba akokuro’raho akajumwa; 35kandi na iwe empirima erikucumita omu mutima ebitekerezo ebyomu mitima mingi bisukurwe. 36Kandi hakaba haloho omu, Ana nabi, omukazi, omuisiki wa Fanueri, owomu ruganda rwa Asere (akaba ahikize emyaka mingi, kandi akaikara niba emyaka musanju okuruga omu buisikibwe, 37kandi akabali mufakati amazireho emyaka kinana mwema), atararugaga omu yekaru, naramya nokusiba nokwesengereza nyamusana nekiro. 38Kandi obuyaizire omu kasumi ako yasima Ruhanga, yatebeza ebigambobye hali bona abakaba nibategereza okucungurwa kwa Yerusalemu. 39Kandi obubamazire okuhikiriza byona ebinyakuli omu biragiro bya Mukama, bagarukayo Galiraya omu rubuga rwowabu Nazalesi. 40Kandi omwana akakura, yafoka wamani, yaijura amagezi: embabazi za Ruhanga niziikara haluwe. 41Kandi abakaikurube bagendaga Yerusalemu omwaka nomwaka ha bugenyi obwokuhingurwaho. 42Kandi obwakaba ahikize emyaka ikumi nebiri, bakatemba nkengso yobugenyi okweri; 43kandi obubamazire okuhikiriza ebiro byabu, obubakaba nibagarukayo, omwojo ogu Yesu yasigara enyuma ha Yerusalemu, nibakaikurube batakimanye: 44baitu obubatekerize ngu ali omu kitebe, bagenda orugendo orwekiro kimu; nibamuse’ra omu bene babu nabatahi babu: 45Kandi obubataramuzoire, bagarukayo Yerusalemu, nibamuse’ra. 46Kandi kyahika, ebiro bisatu bihinguireho, bamuzora omu yekaru, aikalire hagati yabegesa, nabahu’ra, nabakaguza ebigambo: 47bona abamuhulire bahuni’ra obwokwetegerezakwe nokugarukamukwe. 48Nabo obubamuboine, bahuni’ra; nyina yamugambira ati Mwana wange, kiki ekikugirize kiti nambere tuli? Dora,’so nanyowe tukakuse’ra tutuntuire. 49Yabagambira ati Mukanseru’ra ki? Mutamanye ngu kimpikirire okuikara omu bigambo bya Isenyowe? 50Kandi batamanye kigambo ekiyabagambire. 51Kandi akasirimuka hamu nabo, yaija Nazalesi; yabacule’ra: nyina yayerinda ebigambo ebi byona omu mutimagwe. 52Kandi Yesu yayeyongera okutunga amagezi nokukura, nomu mbabazi hali Ruhanga na hali abantu.

Currently Selected:

LUKA 2: BRR64

Highlight

Copy