ABAHEBURANIYA 9

1KANDI nekiragano ekyokubanza kikaba kiyina engeso ezaragirwe ezokuramyaga Ruhanga, nekiikaro ekirukwera ekikaba kiri kyensi enu. 2Baitu hakaba hakozirwe hema, niyo yokubandizamu, nambere hakaba harumu ekikondo kyetabaza, nemeza, nemigati eyokwoleka; nuho hayeserwe barukwera. 3Kandi omunda yenyigamo eyakabiri, hakaba harumu ehema erukwetwa erukukira okwera; 4enyakurumu ekiswa ekya zabu, nesanduko eyekiragano enyakuswekerwe ezabu embaju zona; ekaba erumu ekibindi ekya zabu, nambere harumu emanu, nomuigo gwa Aroni ogwamezere, namabale agekiragano; 5kandi eruguru wayo bakerubi abekitinisa nibasikiriza entebe eyokuganyira; ebitutarukusobora okugamba hati bunu kimu kimu. 6Kandi ebi bitegekerwe biti,banyakatagara batahaga obutosa omu hema eyokubandizamu, nibahikiriza emirimo eyokuhereza; 7baitu omwegi eyakabiri hatahamuga nyakatagara omukuru wabu wenka, omurundi gumu omwaka gwona, baitu nesagama eyahonga habwe wenka ha habwekyokutamanya kyabantui: 8Omwoyo Ogurukwera namanyisa ati omuhanda ogwokutaha omu kiikaro ekirukwera tigukolekerwe, ehema eyokubanza ekyemerire; 9ebigambo ebinikyo kisisani omu biro bya hati bunu: nikyo bahongera ebisembo nebyonzira ebitarukusobora okuhikiriza arukuramya omu bigambo ebyomu mutima, baitu 10nizo engeso eziragirwa ezomubiri kwonka, (hamu nezokulya, nezokunywa, nezokwoga okwemiringo nyingi) ezatairweho okuhikya ebiro ebyokusemerezamu obuhyaka.

11Baitu Kristo obuyaizire nyakatagara omukuru owebigambo ebirungi ebirukugenda okuija, kandi erabire omu hema erukukira obukuru nokuhiki'ra etakozirwe nemikono, nukwo kugamba ngu etali yensi enu, 12kunu tibuli obwesagama eyembuzi nenyana, baitu obwesagamaye wenka, uwe akataha omurundi gumu namara omu kiikaro ekirukwera, obuyamazire okutunga okucungura okutahwaho. 13Baitu esagama eyembuzi, nente enimi, niju eryente erusi, ebimisirwa abo abasisikaire, obubiraba nibyeza okwogya omubiri: 14esagama ya Kristo ayayahaireyo wenka, ataloho kamogo, Obwomwoyo ogutahwaho hali Ruhanga, terikira muno okwogya emitima yanyu omu ngeso ezifire okuhereza Ruhanga omwomezi? 15Kandi nikyo aberire omutonganizi owekiragano ekihyaka nukwo okufa kumazire okubaho obwokucungura omu byokusisa ebyomu kiragano ekyokubanza, abo abayeserwe bahabwe omurago ogwobugwetwa obutahwaho. 16Baitu nambere hali ekiragano ekyobugwetwa, hahikirire okubaho okufa kwogu ayakiraganize. 17Baitu ekiragano ekyobugwetwa kiyina obusobozi nambere hali okufa: baitu tikinyina obusobozi arukuraganiza akiri omwomezi. 18Nukwo nekiragano ekyokubanza kitaraganizibwe hataroho sagama. 19Baitu ebiragiro byona obubyamazire okugambwa Musa hali abantu bona, nkebiragiro okubiri, yatwara esagama yenyana nembuzi, hamu namaizi nebyoya byentama ebirukutukura na hezobu, yamisira ha kitabu kyonyini na ha bantu bona, nagamba ati 20Enu niyo sagama eyekiragano Ruhanga ekiyabaraganize. 21Kandi nehema nebintu byona ebyokuhererezamu nukwo yabimisireho ati esagama. 22Kandi omu biragiro rundi mbaire ninsobora okugamba nti ebintu byona byogibwa esagama, kandi hatali okusesa esagama busaho okulekera ebibi.

23Nukwo kikahiki'ra kiti ebisisani ebyomu iguru okwogibwa ebi; baitu ebyomu iguru byonyini okwogibwa ebyonzira ebirukukira ebi. 24Baitu Kristo atatahe omu kiikaro ekirukwera ekyakozirwe nemikono, ekirukusisana nkeki ekyamazima; baitu omu iguru honyini, okwolekwa hati bunu omu maiso ga Ruhanga habwaitu; 25okutehayo wenka emirundi mingi, nka nyakatagara omukuru wabu okwataha omu kiikaro ekirukwera omwaka nomwaka, akwasire esagama etaliye wenka: 26baitu kuba kitalikyo, kyakumuhikirire okusalizibwa emirundi mingi okuruga ha kuhangwa kwensi: baitu hati bunu ha mpero yobusinge ayolekerwe omurundi gumu, okuihaho ebibi, nayehonga wenka nkekyonzira. 27Kandi nkabantu okubahulirwe okufa okwomurundi gumu, kandi hanyuma yakwo okucwerwa omusango; 28nukwo Kristo obuyamazire okuhebwayo omurundi gumu okwetweka ebibi bya baingi, aliboneka omurundi ogwakabiri, hataloho ekibi, hali abo abamutegereza, naleta okujunwa.

Currently Selected:

ABAHEBURANIYA 9: BRR64

Highlight

Copy