MARK 10

Kapitlu 10

Id-divorzju

(Mt 19,1-9; Lq 16,18)

1Telaq minn hemmhekk u mar fl-art tal-Lhudija u ’l hemm mill-Ġordan, u n-nies mill-ġdid inġabret madwaru; u hu, kif kienet id-drawwa tiegħu, raġa’ qabad jgħallimhom. 2Resqu xi Fariżej lejh, u biex iġarrbuh staqsewh jekk raġel jistax jitlaq lil martu. 3Weġibhom u qal: “X’ordnalkom Mosè?” 4Qalulu: “Mosè ta l-permess li wieħed jagħmel il-kitba tad-divorzju, u jibgħatha.”#Dt 24,1-3; Mt 5,31; 19,7. 5Imbagħad weġibhom Ġesù: “Minħabba l-ebusija ta’ qalbkom kitbilkom dan l-ordni. 6Iżda sa mill-bidu tal-ħolqien Alla għamilhom raġel u mara.#Ġen 1,27; 5,2. 7Għalhekk mela raġel iħalli lil missieru u ’l ommu u jingħaqad ma’ martu,#Ġen 2,24; Ef 5,31. 8u t-tnejn isiru ġisem wieħed. Għalhekk mhumiex iżjed tnejn, imma ġisem wieħed. 9Mela dak li għaqqad Alla ma għandux jifirdu l-bniedem.” 10Xħin daħlu d-dar id-dixxipli reġgħu staqsewh fuq dan, 11u hu qalilhom: “Min jitlaq lil martu u jiżżewweġ oħra jkun ħati ta’ adulterju kontra l-ewwel waħda;#Mt 5,32; Lq 16,18; 1 Kor 7,10-11. 12u jekk mara titlaq lil żewġha u tiżżewweġ ieħor tkun ħatja ta’ adulterju.”

Ġesù jbierek it-tfal iż-żgħar

(Mt 19,13-15; Lq 18,15-17)

13Ġabulu quddiemu xi tfal ċkejknin biex iberikhom#10,13: Biex iberikhom: litteralment biex imisshom., iżda d-dixxipli tiegħu qabdu jgħajtu magħhom. 14Ġesù, meta ra hekk, inkorla u qalilhom: “Ħalluhom it-tfal żgħar jiġu għandi; iżżommuhomx, għax ta’ min hu bħalhom hija s-Saltna ta’ Alla. 15Tassew ngħidilkom, li min is-Saltna ta’ Alla ma jilqagħhiex bħal tifel ċkejken ma jidħolx fiha.”#Mt 18,3. 16Imbagħad ħaddanhom miegħu u qiegħed idejh fuqhom u berikhom.

Ir-raġel għani

(Mt 19,16-22; Lq 18,18-23)

17Kien se jaqbad it-triq, meta mar fuqu wieħed jgħaġġel, niżel għarkupptejh quddiemu u qallu: “Mgħallem tajjeb, x’għandi nagħmel biex nikseb il-ħajja ta’ dejjem?” 18“Għaliex qiegħed issejjaħli ‘tajjeb’?” qallu Ġesù, “ħadd ma hu tajjeb ħlief Alla biss. 19Inti l-kmandamenti tafhom: la toqtolx, la tiżnix, la tisraqx, la tixhidx fil-falz, la tiħux bil-qerq dak li hu ta’ ħaddieħor; weġġaħ lil missierek u ’l ommok.”#Eż 20,12-16; Dt 5,16-20; Ġak 5,4. 20U dak wieġbu u qallu: “Mgħallem, jiena dan kollu ili nħarsu minn żgħożiti.” 21Imbagħad Ġesù xeħet fuqu ħarsa ta’ mħabba u qallu: “Ħaġa waħda tonqsok: mur bigħ li għandek, agħtih lill-fqar, u jkollok teżor fis-sema; imbagħad ejja u imxi warajja.”#Mt 6,20; Lq 12,33. 22Imma għal dan il-kliem ir-raġel qarras wiċċu u telaq b’qalbu sewda, għaliex kellu bosta ġid.

23Ġesù mbagħad ħares ħarsa madwaru u qal lid-dixxipli tiegħu: “Kemm hi iebsa għall-għonja li jidħlu fis-Saltna ta’ Alla!#Mk 4,19. 24Id-dixxipli stagħġbu għal din il-kelma, imma Ġesù raġa’ qalilhom: “Kemm hi iebsa#10,24: Kemm hi iebsa: Xi manuskritti wara iebsa jżidu għal dawk li jafdaw fl-għana., uliedi, li wieħed jidħol fis-Saltna ta’ Alla! 25Eħfef li ġemel jgħaddi minn għajn ta’ labra milli wieħed għani jidħol fis-Saltna ta’ Alla!” 26Huma stagħġbu wisq aktar, u bdew jgħidu wieħed lil ieħor: “Mela min jista’ jsalva?” 27Ġesù ħares lejhom u qalilhom: “Għall-bnedmin dan ma jistax ikun, imma għal Alla iva; għax għal Alla kollox jista’ jkun.”#Ġen 18,14; Ġob 42,2; Mk 14,36. 28Qabeż Pietru u qallu: “Tajjeb! Aħna ħallejna kollox u ġejna warajk.” 29Qallu Ġesù: “Tassew ngħidilkom, li fost dawk kollha li minħabba fija u l-Evanġelju jħallu lil darhom jew lil ħuthom jew lil ommhom jew lil missierhom jew lil uliedhom jew l-għelieqi tagħhom, 30ma hemm ħadd fosthom li minn issa, f’din id-dinja stess, ma jirċevix, għal mitt darba iktar, djar, aħwa, subien u bniet, ommijiet, ulied u għelieqi flimkien ma’ persekuzzjonijiet, u l-ħajja ta’ dejjem fiż-żmien li ġej. 31U ħafna li huma tal-ewwel jiġu l-aħħar, u tal-aħħar jiġu l-ewwel.”#Mt 20,16; Lq 13,30.

It-tielet taħbira tal-mewt u tal-qawmien

(Mt 20,17-19; Lq 18,31-33)

32Kienu mexjin fit-triq, telgħin lejn Ġerusalemm, u Ġesù kien miexi quddiemhom; u huma kienu mgħaġġbin, u l-oħrajn li kienu mexjin warajhom kienu mbeżżgħin. Raġa’ sejjaħ it-Tnax ħdejh, u beda jgħidilhom x’kien se jgħaddi minn għalih: 33“Ara, issa aħna telgħin Ġerusalemm, u Bin il-bniedem se jingħata f’idejn il-qassisin il-kbar u l-kittieba, li jaqtgħuhielu għall-mewt u jerħuh f’idejn il-pagani;#Mt 17,22-23; Mk 8,31; 9,31; Lq 24,7. 34dawn imbagħad jiddieħku bih, jobżqulu fuqu, jagħtuh is-swat u joqtluh, u wara tlitt ijiem iqum mill-mewt.”

It-talba ta’ Ġakbu u Ġwanni

(Mt 20,20-28)

35Ġakbu u Ġwanni, ulied Żebedew, resqu lejh u qalulu: “Mgħallem, dak li se nitolbuk irriduk tagħtihulna.”#Mt 4,21; 10,2; 17,1; Mk 1,19-29; 5,37; 9,2; 10,41; 13,3; 14,33; Lq 5,10; 6,14; 8,51; Atti 1,13. 36“Xi triduni nagħmlilkom?” staqsiehom.#Mt 20,32; Mk 10,51; Lq 18,41. 37U huma weġbuh: “Ħallina noqogħdu wieħed fuq il-lemin tiegħek u l-ieħor fuq ix-xellug fil-glorja tiegħek.”#Mt 19,28; Lq 22,30. 38Imma Ġesù qalilhom: “Ma tafux x’intom titolbu. Għandkom ħila tixorbu l-kalċi li se nixrob jien, u titgħammdu bil-magħmudija li biha se nitgħammed jien?”#Lq 12,50; Ġw 18,11. 39“Għandna,” qalulu. Imbagħad qalilhom Ġesù: “Il-kalċi li se nixrob jien tixorbuh, iva, u titgħammdu wkoll bil-magħmudija li biha se nitgħammed jien;#Atti 12,2. 40imma li wieħed joqgħod fuq il-lemin jew fuq ix-xellug tiegħi, din mhijiex ħaġa tiegħi li nagħtiha jien, imma hi għal dawk li għalihom kienet imħejjija.”

41L-għaxra l-oħra, meta semgħu dan, saħnu għal Ġakbu u għal Ġwanni. 42Imma Ġesù sejħilhom u qalilhom: “Tafu intom, dawk in-nies, li l-bnedmin jgħodduhom bħala kapijiet tal-pagani, jaħkmu fuqhom, u l-kbarat tagħhom iħaddmu s-setgħa tagħhom fuqhom.#Lq 22,25. 43Fostkom ma għandux ikun hekk, imma min irid ikun kbir fostkom, għandu jkun qaddej tagħkom,#Mt 23,11; Mk 9,35; Lq 22,26. 44u min irid ikun l-ewwel fostkom, għandu joqgħod ilsir ta’ kulħadd. 45Għax hekk ukoll Bin il-bniedem, hu ma ġiex biex ikun moqdi, imma biex jaqdi u biex jagħti ħajtu b’fidwa għall-kotra.”#1 Tim 2,5-6.

Ġesù jfejjaq lil Bartimew l-agħma

(Mt 20,29-34; Lq 18,35-43)

46U waslu Ġeriko#10,46: Ġeriko: ara nota Mt 20,29.. Hu u ħiereġ minn Ġeriko flimkien mad-dixxipli tiegħu u ma’ kotra kbira ta’ nies, kien hemm wieħed tallab agħma, jismu Bartimew, bin Timew, bilqiegħda mal-ġenb tat-triq. 47Dan, meta sama’ li kien Ġesù ta’ Nazaret, qabad jgħajjat u jgħid: “Ġesù, bin David, ikollok ħniena minni!”#Mt 9,27; 15,22. 48Kien hemm ħafna li bdew jgħajtu miegħu biex jiskot imma hu aktar beda jgħajjat: “Bin David, ikollok ħniena minni!” 49Ġesù waqaf u qal: “Sejħulu.” Huma sejħu l-agħma u qalulu: “Agħmel il-qalb! Qum, qiegħed isejjaħlek.” 50Dak tajjar il-mantar minn fuqu, qabeż fuq riġlejh u mar ħdejn Ġesù. 51U Ġesù kellmu u qallu: “Xi tridni nagħmillek?” “Li nerġa’ nara, Rabbuni#10,51: Rabbuni: kelma Aramajka li tfisser “Mgħallem tiegħi.”,” wieġbu l-agħma.#Mk 10,36. 52“Mur,” qallu Ġesù, “il-fidi tiegħek fejqitek.” U minnufih raġa’ beda jara, u baqa’ miexi warajh fit-triq.#Mt 9,22; Mk 5,34; Lq 7,50; 8,48; 17,19.

Currently Selected:

MARK 10: MB20

Highlight

Copy