ĠENESI 14

Kapitlu 14

L-Invażjoni tas-slaten tal-Lvant

1Ġara li fi żmien Amrafel sultan ta’ Singħar, Arjok sultan ta’ Ellasar, Kedorlagħomer sultan ta’ Għelam, u Tidgħal sultan ta’ Gojim, 2dawn is-slaten għamlu gwerra kontra Bera sultan ta’ Sodoma u Birsa sultan Gomorra, Sinab sultan ta’ Adma u Semeber sultan ta’ Sebojim, u s-sultan ta’ Bela, li hi Sogħar. 3Dawn kollha nġemgħu fil-wied ta’ Siddim, li hu l-Baħar il-Mielaħ#14,3: Il-Baħar il-Mielaħ: illum il-Baħar il-Mejjet fuq il-Lvant ta’ Kangħan.. 4Għal tnax-il sena kienu jaqdu lil Kedorlagħomer, u fit-tlettax-il sena rvillaw. 5Fl-erbatax-il sena ġie Kedorlagħomer bis-slaten li kellu miegħu u ħabtu għar-Refajin f’Għastarot-karnajm u għaż-Żużin f’Ħam, u għall-Emin f’Sawekirjatajm,#Dt 1,28; Ġoż 14,3; 13,8. 6u għall-Ħorin fuq il-muntanji tagħhom ta’ Segħir sa El-faran, ħdejn id-deżert.#Dt 2,12. 7U reġgħu lura lejn Għajnmisfat, li hi Kades, u ħabtu għall-art tal-Għamalakin, u wkoll għall-Amurrin li kienu jgħammru f’Ħasson-tamar.#Eżek 17,18; Dt 7,1.

8U ħarġu s-sultan ta’ Sodoma, u s-sultan ta’ Gomorra, u s-sultan ta’ Adma, u s-sultan ta’ Sebojim, u s-sultan ta’ Bela, li hi Sogħar, u tqassmu għall-battalja kontrihom fil-wied ta’ Siddim, 9jiġifieri kontra Kedorlagħomer sultan ta’ Għelam, u Tidgħal sultan ta’ Gojim, u Amrafel sultan ta’ Singħar, u Arjok sultan ta’ Ellasar, erba’ slaten kontra ħamsa.

10Il-wied ta’ Siddim kien miżgħud bil-bjar tal-qatran, u huma u jaħarbu, is-slaten ta’ Sodoma u Gomorra waqgħu fihom, u l-bqija ħarbu lejn il-muntanji. 11U l-għadu qabad il-ġid kollu ta’ Sodoma u Gomorra u l-ikel tagħhom kollu, u telqu. 12Huma u sejrin ħadu lil Lot ukoll, bin ħu Abram, b’ġidu kollu, għax hu kien joqgħod f’Sodoma.#Ġen 13,10-12.

Abram isalva lil Lot

13U ġie wieħed mill-maħrubin u ta l-aħbar lil Abram, l-Għebrew, li kien joqgħod ħdejn il-ballut ta’ Mamri, l-Amurri, ħu Eskol u ħu Għaner; għax dawn kienu mseħbin b’patt ma’ Abram.

14Malli Abram sema’ li ’l ħuh kienu ħaduh ilsir, ħareġ bin-nies imħarrġa tiegħu, nies imwielda f’daru, tliet mija u tmintax-il ruħ, u għamel għal warajhom sa Dan. 15Hemm qassam in-nies tiegħu billejl, hu u l-qaddejja tiegħu, u baqa’ jiġri warajhom sa Ħoba, fuq it-Tramuntana ta’ Damasku, 16u ħa lura l-ġid kollu; ġieb lura lil Lot, ħuh, u l-ġid tiegħu, in-nisa u n-nies l-oħra.

Melkisedek jilqa’ lil Abram

17U ħareġ is-sultan ta’ Sodoma jiltaqa’ miegħu hu u ġej lura mit-taqtigħa ma’ Kedorlagħomer u s-slaten li kienu miegħu lejn il-wied ta’ Sawi, li hu Wied is-Sultan.#Lhud 7,1-10. 18U Melkisedek, sultan ta’ Salem, li kien qassis ta’ El-għeljon, Alla l-għoli, ħareġ bil-ħobż u l-inbid.#S 110,4; Lhud 5,6; 7,1. 19U bierku u qallu:

“Imbierek Abram minn El-għeljon,

li għamel is-sema u l-art.

20U mbierek El-għeljon

li reħa f’idek l-għedewwa tiegħek.”

U Abram tah l-għexur minn kollox.

21U s-sultan ta’ Sodoma qal lil Abram: “Agħtini n-nies, u l-ġid żommu għalik.” 22U Abram wieġeb lis-sultan ta’ Sodoma: “Ngħolli idejja lejn il-Mulej, El-għeljon, li għamel is-sema u l-art, 23u naħlef li la ħajta u anqas qafla ta’ qorq, xejn ma nieħu minn kulma hu tiegħek biex ma tgħidx: ‘Jien għanejt lil Abram.’ 24Xejn ma nieħu ħlief dak li kielu ż-żgħażagħ u sehem in-nies li ġew miegħi: Għaner, Eskol u Mamri. Dawn jieħdu sehemhom.”

Currently Selected:

ĠENESI 14: MB20

Highlight

Copy