Génesis 39

José yic'ot i yijñam Potifar

1Jiñi ismaelob#Gn 25.12-18; 37.25-28 tsi' pʌyʌyob majlel José ti Egipto, tsi' chombeyob Potifar am bʌ i ye'tel ti' tojlel faraón yic'ot jiñʌch i capitán jiñi xcʌntayajob. 2Pero lac Yum añ yic'ot José, uts'at tsa' loq'ui majlel i ye'tel José ya' ti yotot i yum chumul bʌ ti Egipto. 3I yum José tsi' q'uele añ lac Yum yic'ot. Lac Yum tsi' wen colta ti pejtelel chuqui tsi' mele. 4José tsi' tajbe i yutslel i pusic'al Potifar, tsi' melbe i ye'tel. Potifar tsi' yʌq'ue i ye'tel ti xq'uel e'tel ti yotot, tsi' yʌq'ue ti' wenta pejtelel i chu'bʌañ. 5Ti jim bʌ ora che' bʌ tsa' aq'uenti i ye'tel José ti xq'uel e'tel cha'añ pejtelel am bʌ ti yotot yic'ot i chu'bʌañ Potifar, lac Yum tsi' p'ojlesʌbe i chu'bʌañ ti yotot yic'ot ti' lum cha'añ ti' caj José. 6Potifar tsi' yʌc'ʌ ti' wenta José pejtelel i chu'bʌañ, ma'añix tsi' chʌn ña'ta Potifar i chu'bʌañ come añ ti' wenta José, cojach tsi' ña'ta i c'ux i bʌl i ñʌc'.

José wen i t'ojol jax, wen uts'atax ti q'uelol. 7Ti jump'ejl bʌ q'uiñ, i yijñam i yum tsa' caji i mulan José, tsi' su'be:

—La' ti wʌyel quic'ot.

8Pero José ma'añic tsi' jac'be, tsi' su'be i yijñam i yum:

—Jiñi c yum ma'añic mi' mel i pusic'al cha'añ pejtelel chuqui añ quic'ot ti yotot, come tsi' yʌc'ʌ pejtelel i chu'bʌañ tic wenta. 9Ma'añic yam bʌ ñuc bʌ ti ili otot, cojach joñon; ma'añic chuqui tsi' mʌctʌbeyon c yum, cojach jatet come i yijñamet. ¿Bajche' mi' mejlel c cha'len ñuc bʌ jontolil yic'ot mulil ti' contra Dios?#39.9 ¿Bajche' mi' mejlel c cha'len ñuc bʌ jontolil yic'ot mulil ti' contra Dios?: Isujm pejtelel mulil jiñʌch ñuc bʌ mulil ti' contra Dios (Sal 51.4).

10Ti jujump'ejl q'uiñ jiñi x'ixic tsi' pejca José cha'añ mi' ñoltʌl yic'ot, pero ma'añic tsi' jac'ʌ i pʌyol cha'añ mi' yajñel yic'ot. 11Pero ti jump'ejl bʌ q'uiñ che' bʌ tsa' ochi José ti yotot cha'añ mi' mel i ye'tel, che' ma'añic majqui ya'añ ti yotot. 12Jiñi x'ixic tsi' wats chucu ti' bujc José, tsi' su'be:

—La' ti ñoltʌl quic'ot.

Pero José tsi' cʌyʌ i bujc ti' c'ʌb jiñi x'ixic, tsa' puts'i loq'uel. 13Che' bʌ tsi' q'uele jiñi x'ixic cha'añ tsi' cʌyʌ i bujc José ti' c'ʌb, che' puts'emix loq'uel ti jumpat, 14tsi' pʌyʌ tilel x'e'telob ti yotot, tsi' su'beyob:

—Awilan, c ñoxi'al tsi' yotsa juntiquil hebreo#39.14 Hebreo: Ili t'añ tsa' c'ʌjñi cha'añ i wajlentel José. Q'uele nota am bʌ ti Gn 14.13. ti lac tojlel cha'añ mi' wajleñonla. Tsa' tili ba'añon cha'añ yom i pi'leñon pero joñon tsa' c cha'le c'am bʌ t'añ. 15Che' bʌ tsi' yu'bi woliyon ti c'am bʌ oñel, tsi' cʌyʌ i bujc tic t'ejl, tsa' puts'i loq'uel.

16Jiñi x'ixic tsi' lotbe i bujc José jinto tsa' c'oti i ñoxi'al ti yotot. 17Jiñi cha'añ tsi' su'be jiñi jach bʌ t'añ i ñoxi'al, tsi' yʌlʌ:

—Jiñi x'e'tel hebreo tsa' bʌ a pʌyʌ tilel, tsa' tili i ñop i pi'leñon cha'añ mi' yʌc'on ti quisin. 18Pero che' bʌ tsa' c cha'le c'am bʌ oñel, tsi' cʌyʌ i bujc tic t'ejl, tsa' puts'i loq'uel.

19Che' bʌ tsi' yu'bibe i t'añ i yijñam i yum José, che' bʌ tsi' yʌlʌ: “Che'ʌch tsi' meleyon a wiñic,” tsa' wen mich'a. 20Tsi' chucu José, tsi' yotsa ti mʌjquibʌl, ya' ba' mʌcʌlob i wiñicob jiñi rey; ya' tsa' ajñi José ti jiñi mʌjquibʌl. 21Pero lac Yum tsa' ajñi yic'ot José, tsi' pʌsbe i yutslel i pusic'al, tsi' yʌc'ʌ ti q'uelol ti uts'at ti' tojlel jiñi xcʌnta mʌjquibʌl. 22Jiñi xcʌnta mʌjquibʌl tsi' yotsa José ti' wenta pejtelel xmʌjquelob ya' bʌ ñup'ulob; pejtelel chuqui mu' bʌ i mejlel ya' ti mʌjquibʌl, añʌch ti' wenta José. 23Jiñi xcʌnta mʌjquibʌl ma'añix tsi' chʌn q'uele chuqui tac añ ti' wenta José come uts'at tsi' mele, come lac Yum ya'añ yic'ot José,#Hch 7.9 pejtelel chuqui tsi' mele, lac Yum tsi' yʌc'ʌ ti loq'uel ti uts'at,

Currently Selected:

Génesis 39: NTCH

Highlight

Copy