Popular Bible Verses from Génesis 39

Share

Pero lac Yum añ yic'ot José, uts'at tsa' loq'ui majlel i ye'tel José ya' ti yotot i yum chumul bʌ ti Egipto.

Potifar tsi' yʌc'ʌ ti' wenta José pejtelel i chu'bʌañ, ma'añix tsi' chʌn ña'ta Potifar i chu'bʌañ come añ ti' wenta José, cojach tsi' ña'ta i c'ux i bʌl i ñʌc'. José wen i t'ojol jax, wen uts'atax ti q'uelol.

Jiñi xcʌnta mʌjquibʌl tsi' yotsa José ti' wenta pejtelel xmʌjquelob ya' bʌ ñup'ulob; pejtelel chuqui mu' bʌ i mejlel ya' ti mʌjquibʌl, añʌch ti' wenta José.

Tsi' chucu José, tsi' yotsa ti mʌjquibʌl, ya' ba' mʌcʌlob i wiñicob jiñi rey; ya' tsa' ajñi José ti jiñi mʌjquibʌl. Pero lac Yum tsa' ajñi yic'ot José, tsi' pʌsbe i yutslel i pusic'al, tsi' yʌc'ʌ ti q'uelol ti uts'at ti' tojlel jiñi xcʌnta mʌjquibʌl.

Ti jump'ejl bʌ q'uiñ, i yijñam i yum tsa' caji i mulan José, tsi' su'be: —La' ti wʌyel quic'ot. Pero José ma'añic tsi' jac'be, tsi' su'be i yijñam i yum: —Jiñi c yum ma'añic mi' mel i pusic'al cha'añ pejtelel chuqui añ quic'ot ti yotot, come tsi' yʌc'ʌ pejtelel i chu'bʌañ tic wenta. Ma'añic yam bʌ ñuc bʌ ti ili otot, cojach joñon; ma'añic chuqui tsi' mʌctʌbeyon c yum, cojach jatet come i yijñamet. ¿Bajche' mi' mejlel c cha'len ñuc bʌ jontolil yic'ot mulil ti' contra Dios?

Pero ti jump'ejl bʌ q'uiñ che' bʌ tsa' ochi José ti yotot cha'añ mi' mel i ye'tel, che' ma'añic majqui ya'añ ti yotot. Jiñi x'ixic tsi' wats chucu ti' bujc José, tsi' su'be: —La' ti ñoltʌl quic'ot. Pero José tsi' cʌyʌ i bujc ti' c'ʌb jiñi x'ixic, tsa' puts'i loq'uel.