Məsəloox 19
19
1Kəsib, ama iz ük' təmiz amdar,
Əfçi əyitk'ala q'ammazaxun şaat'e.
2Avabaksun nu bakayin, saycə həvəsen
Hik'k'al bes tene bakon.
Kapk'alt'ay turel lamanedon.
3Amdaren iz səfeyluğa görəne yaq'a aç̌esp'on,
Ük'e boş isə Q'ončuğoy loxole əcuğon biq'on.
4Var-dövləten dost'urxo avuzebon,
Kəsiben isə iz sa dost'al aç̌esebon.
5Əfçi əyitk'ala şahid cazasuz tene mandon,
Əfçiduğalen çark'esun tene bə̌ğə̌bon.
6Gelet'oğone s'ila amdarxoy piyes ak'esun çureğon,
Pay tadalt'aynak'al dost' həmişə bə̌ğə̌neğon.
7Kəsibəxun iz viçimoğoyal zəhləne baron,
Lap dost'urxoval şot'oxun ə̌xilt'un tarak'on,
Xoyinšbi bač'anexun bafaldayin, içu ı̌ša tet'un biton.
8İz elmoğo çureğalt'in müdrikluğe qə̌věğon,
Q'amişaksuna ğaç̌eğalt'in oore q'azayinşon.
9Əfçi əyitk'ala şahid cazasuz tene mandon,
Əfçinen ç̌oyel çurk'alo biyone.
10Q'ammaza tamtarağlu yəşəyinş nu yarayinşala k'inək',
K'ula ağay loxol kalaluğbsunal tene yarayinşbsa.
11Amdari q'amişaksunen əcuğa bask'esedon,
T'iyə̌mint'ay içu incitmişbsuna fikir nu tast'unen içeynak' şərəfe eçon.
12Padçaği əcuğ aslani ğırılti,
İz irəziluğ isə oye loxol bakala xo k'inək'e.
13Axmağ ğar bavaynak' bələne,
Dava qə̌věğala çuux isə nu bot'bakala xene k'at'psun k'inək'e.
14K'oj, var-dövlət bavoğoxun,
Müdrik çuux isə - Q'ončuğoxune.
15Tənbəlluğen bə̌ğə̌loy nep'e eçon,
Avaraluğen amdara busane efon.
16Əmirə əməlbalt'in iz elmoğone efon,
İz yaq'a nu fikir tadalo isə biyone.
17Kəsibə kul boxodalt'in Q'ončuğone borc tadi baksa,
Şot'aynak' ki, Q'ončuğon için me əşlin əvəzə tadale.
18Heq'ədər ki c'əyi tene vi ğara tərbiyə tada,
Şot'ay əfçibaksuna hun taxsırkər ma baka.
19İçuxun usum c'eǧala amdaren iz cazina zap'k'alane,
Şot'o ç̌o tadayin, ast'aral çureğale.
20Nəsyətə ǔmǔxlaxa, tərbiyinəl q'abulba,
Metər bsunen müdriken bakon.
21Amdaren iz ük'e boş gele şeye fikirbon,
Axırınci əyit isə Q'ončuğoxune.
22Amdara iz ext'ibərlu baksunene çureśest'a,
Kəsib baksun fırıldağçi baksunaxun şaat'e.
23 Q'ončuğo çalxsunen amdara yəşəyinşesedon,
Şot'o şər ı̌ša bakes tene bakon, şo arxayine bask'on.
24Tənbəlen iz kula q'ave boş banedon,
İz ǰomo taşt'una isə ərikmişebakon.
25Ç̌oboç̌una t'ap'enk'on - q'ammazene içeynak' dərs ext'on,
Ə̌xilak'ala töhmətbsunen isə, şot'ay müdrikluğane avuzbon.
26Bavay ç̌oyel qaybaki iz nana şəp'eğala ğar,
S'i biyaburbala, şot'oğoy ç̌oya mə̌yinbala ğare.
27Bez ğar, nəsyətə nu ǔmǔxlaxayin,
Müdrik əyitmoğoxun ə̌xil bakalnu!
28Rüşvət ext'ala şahiden düzgünluğa lağane haq'on,
Pist'oğon şərent'un nəfəs haq'on.
29T'iyə̌mint'oğo masq'arabalt'oğoynak' caza,
Axmağxoy bač'aneynak'al t'ape həzirbaksa.
Currently Selected:
Məsəloox 19: udi
Highlight
Share
Copy
Want to have your highlights saved across all your devices? Sign up or sign in
© Translation Services International Ltd.
