Məsəloox 18
18
1Saycə içeynak' yəşəyinşalt'in k'ə çuresa bsane,
Şaat' maslaatal q'abul tenebsa.
2Q'ammazen q'amişaksun təə,
İz avabakalt'une ak'est'un çuresa.
3Şər əşlen hörmətsuzluğe eçon,
Habursuzluğen isə biyaburçuluğ.
4Amdari əyitmux bə̌ğə̌loy xeyurxone,
Müdrikluği orayin - tağala oq.
5Divanbat'an pis amdara tərəfkeşluğbi
Taxsırsuz amdara haq'suz c'evksun şaat' tene.
6Q'ammazi əyitmoğon içu bəlinəne badon,
İz muzen içu t'apesedon.
7Q'ammazi muzen içu əfçinebon,
İz əyitmuxcə içeynak' tələne bakon.
8Əyittaradalt'ay əyitmux ləzətlu tikoox k'inək'e,
Q'oq'exun hasande c'ovaksa.
9İz əşləst'a tənbəl bakalo
Śark'al bakalt'uxun viçine.
10 Q'ončux möhk'əm sa q'alane,
Düzgün amdareynak' bač'ane.
11Varlu amdareynak' iz dövlət sa q'alala şəhəre,
Şo iz piyes nu śareğala bari k'inək'e.
12Amdari içu ala biq'sunen iz acalane p'ap'espsa,
Oq'a biq'sunen isə hörmətə.
13İbakinut' coğab tast'un,
Səfeyluğ saal biyaburçuluğe.
14Ük'əxun ost'aar amdara azarenal tene saksa,
Ama ük' xə̌xə̌nesa, mot'o hetəre portbon?
15Ə̌xilak'alt'in iz ük'e boş biliye topbon,
Müdrik amdari ǔmǔx biliyeynak' qaye.
16Pay tast'unen amdareynak' yaq'e qayk'on,
Şot'o kakala amdarxoy běše taşon.
17T'iyə̌mi tərəfen hari əşlə silist'bamin,
Divanbala gala samci əyitk'alt'ay uk'alorox düze ak'eğon.
18Buxačuğoy çureğalt'u avabakseynak' boseğala çöpen davina bask'esedon,
Davabalt'oğo sun-sunaxun cöyebon.
19Viçimoğoy arane bakala dava ç̌omo şəft'əlü q'ala k'inək'e,
Oro viçəxun barişaksun q'alala şəhərə haq'sunaxun çətine.
20Amdaren iz uk'ala əyitmoğoy,
İz muze pit'oğoy nəticinəne ak'on.
21Muzen amdara yəşəyinşəl taneşon, bisunal,
Əyitpsun çureğalt'inal iz uk'alt'oğoy bara ak'ale.
22Çuux haq'sunen şaat'luğen bə̌ğə̌bon,
Q'ončuğoy irəziluğan haq'on.
23Kəsiben xoyinšene əyitk'on,
Varlunen isə sərt coğabe tadon.
24Dost'urxo gelebsunen amdara sanekon,
Ama əsil dost' viçəxunal ı̌šane.
Currently Selected:
Məsəloox 18: udi
Highlight
Share
Copy
Want to have your highlights saved across all your devices? Sign up or sign in
© Translation Services International Ltd.
