Ap'ost'olxo 2

Ǐvel Urufi tadesun

1Əllimci Ğine axsibayey, #2:1 - Grek'i muzin "P'ant'ek'ost", yəni "Əllimci ği" uk'ala axsibay C'ovaksuni axsibayaxun əlli ği oşane baksa. Me ğinast'a iudeyxon içoğoy taxıla girbi çarksunat'un axsibay bi c'ovakest'a. İsusi běyinbaki göynul ěqeśit'uxun oşa ap'ost'olxo q'a İsusi t'iyə̌mi şagirdxo Ǐvel Urufi tadesunal hame ğinene bakey. Metərluğen, İsusi tapşurbit'oğo bex p'ap'esp'i Şot'ay şu baksuna dirist' dünyəne ak'est'alorox süft'ə me amdarxone baki. Běğa: C'eys. 12; 23:16; 34:22; Lev. 23:15-21; K'an. 16:9-12 şoroxal bito sagala gireśet'uniy. 2Bürdən göynuxun ost'aar muşe guğultina oşq'ar sa səse hari, me səsen içoğoy arśi k'oja dirist' haneq'i. 3Hame vədine şot'oğon bok'ala aruğoxun c'eğala yalova oşq'ar sa şeyt'un ak'i. Me yalov cöybaki hari içoğoy hər sunt'ay loxol çurepi. 4Miya bakalt'oğoy bitot'u Ǐvel Urufe tadeśi, şot'oğonal cürbəcür muzin əyitpsat'un burqi. Ǐvel Urufene əyitp'est'ay şot'oğo içoğoy memaçağ nu avabakala muzin.

5Me vədine Yerusalim dünyəni bip' t'ǒğǒlxun gireśi hari iudeyxon buyey, morox bito Moiseyen laxi k'anunen tağala iudeyxoney. 6Me səsə ibakiyal kala sa top amdare gireśi t'iya, axıri bitot'in içoğoy hari ölkin camaaten əyitk'ala muzane ibaksay. Mat mandet'uniy bito. 7Məət't'əl mandi xavart'un haq'say: «Me əyitk'alt'oğoy bito galileyalu tene ki? 8P'oy hetəre baksa ki, beş ǔmǔğo beşi nanaxun baki ölkin camaaten əyitk'ala muze lafst'a? 9Beş boş isə p'arfiyaluval bune, midiyalu q'a elamluval bune, Mesop'ot'amiinaxun, İudeyinaxun, K'ap'p'adok'iinaxun q'a P'ont'inaxun bakaloroxal bune, Rime imp'eriin Aziya bölginəxun bakalorox, 10Frigiinaxun, P'amfiliinaxun, Misirəxun, Liviin K'irenina ı̌ša bakala bölgoğoxun q'a Rimaxun bakalorox, 11nanaxun bakat'an iudeylu nanaxun bakiyorox q'a iudeyluğa oşa q'abulbiyoroxal bune. Hələ k'rit'luyox q'a ərəbxoval bune. Mone, bitot'inal beş nanaxun baki ölkin camaaten əyitk'ala muzayan ibaksa! Beş muzinyan ibaksa yan Buxačuğoy biq'ala əşurxoy kalaluğaxun»! 12Bito mat mandet'uniy, içoğoy bul tene c'eysay ki, mo k'ə upsune. 13Ama lağa haq'i metər uk'aloroxal buney: «İçoğoy ǔği noč'ene ava! Finağoyt'un morox»!

P'yot'ri c'eri camaati běš əyitpsun

14T'e vədə P'yot'r mandi sas's'e ap'ost'olxoxun sagala camaati běš c'eri ost'aar pine: «Ay iudeyxo q'a Yerusalima yəşəyinşalorox bito, isə yönbəri ǔmǔxlaxanan, ibakanan k'əz nex! 15Düz tenan nexe, me amdarxo finağoy tet'un! Ğine xibimci saadast'a #2:15 ğine xibimci saadast'a - yəni savaxt'an saadin vuy. het'ay finağoyluğa? 16Mo bito Yoel xavareçalen saturběš ak'i piyoroxe, hari bexe c'eysa. 17Axıri şot'in peney:

"Běğanan Buxačuğon k'ə nex:

Me dünyəni axıreynak' mal mandi sa vədine Bez Ǐvel Urufaxun tadeğale amdarxo bitova!

Efi ğarmoğon q'a xuyərmoğonal gələcəye bakalt'oğo saturběš ak'i uk'alt'un,

Efi cəyilxoy piyes ak'esunxo bakale,

Q'ojoğoy nep'en ak'iyorox hari bex c'eğale!

18Bezi k'ul bakala ham işq'arxo, ham çupuxxo tadoz Zu Bez Ǐvel Urufaxun,

Şot'oğonal gələcəye bakalt'oğo saturběš ak'i me ak'it'oğo car sakalt'un.

19Ala, göynul běğat'anal Bezi kiyexun ayeğalorox ak'eğale,

Oq'a, oç̌ali ç̌oyel nu ak'eśi əşurxo bat'anal,

P'i, arux, pula c'ek'ala k'üün ak'eğale amdarxoynak'.

20Běğ fırıpi mə̌yin,

Xaşal p'iye irəngen bakale

Q'ončuğoy laxi tamtarağlu,

İzi şu baksuna bitot'u ak'est'ala t'e ği eğalt'uxun běš.

21 Q'ončuğo xoyinšp'i izi çark'esuna Şot'ost'a ak'aloval çark'eğale". #2:16-21 Yol. 2:28-32

22Ay israilluyox, bezi həysə uk'alt'oğo ǔmǔxlaxanan! Nazaret'lu İsusi Buxačuğon yaq'abiyo baksuna və̌nal anank'i. Şot'ay biq'i nu ak'eśi əşurxon, şuk'k'ali kiyexun nu ayeğalt'oğo bsunen q'a İçu alaxun tadeśi sa zoren bit'oğon ak'esedi ki, mot'oğo bitova Buxačuğone Şot'o best'a. Efi piin běše baki morox bito! 23Taşeriyal Şot'o buxačuxsuzt'oğoy kiin xaça t'ə̌q't'est'i besnanbi. Buxačuğon mot'oğo bit'ova Şot'aynak' t'e belxune śampey, İzi piyorox hari bex c'eyseynak'e bakey morox bito. #2:23 Mat'. 27:35; Mrk'. 15:24; Luk'. 23:33; İoan. 19:18 24Ama Buxačuğon Şot'o zapi taşala bisuni kiyexun ext'i běyinebi, şot'o görə ki, bisunenal Şot'o efes batenekoy. #2:24 Mat'. 28:5-6; Mrk'. 16:6; Luk'. 24:5 25Davidenal Şot'ay barada metəre pey:

"Q'ončuğoy həmişə bez t'ǒğǒl baksuna avazu,

Za tək nu barst'una görəl bələ zaxun ə̌xile tarak'on.

26Mone, bez ük' mǔq, ç̌oyenal axšumene,

Bez ük'ə buz k'inək'ez efe, q'ı̌ butene zaynak'.

27Axıri Hun bezi p'uri oç̌ali oq'a taysuna,

Vaxun ç̌o nu taradalt'ay bašaybaki əfçibaksuna imkan ten tadon.

28Za yəşəyinş tadala yaq'en ak'est'i Hun,

Va aksunen mǔqt'ale za.

Vi t'ǒğǒl baksune zaynak' həmişəluğ bakala mǔqluğ". #2:25-28 Ǐvel mə̌ğ. 16:8-11

29Ay viçimux, şuk'k'alaxun c'ap' tene ki, beş bava David p'urene, oç̌alaxalśene. İzi oç̌alaxeśi ganuval ğeyin ğinal śirik' avayan ki maya. 30Ama David sa xavareçaley, Buxačuğon elasp'i əyit tadit'oğo, iz taxt'a iz nəsiləxun bakalt'u arśest'una avaney şot'in. #2:30 2 Şam. 7:12-13; 1 Padç. 17:11-12; Ǐvel mə̌ğ. 132:11 31Şot'o görəl

"Buxačuğon bezi p'uri oç̌ali oq'a taysuna,

Bašaybaki əfçibaksuna imkan tene tadon" #2:31 Ǐvel mə̌ğ. 16:10

əyitmoğo uk'at'an İsusi p'uri běyinbaksunaxune saturběš xavar tast'ay. 32İsə mone, Buxačuğon İsusa həgigiyal běyinebi, bitot'inal mot'o beşi ak'i exlətp'it'oğoxun avanan. 33Buxačuğon Şot'o göynul ěqevk'i İzi yön tərəf, ən hörmətlu galane arśevk'i, Şot'inal İçu əyit tadeśi Ǐvel Urufaxun ext'i beşi loxole śipi. Mone efi həysə ak'i ibakalorox! 34Axıri David iç göynul ěqeśiteney, mo şo upsune ki, göynul ěqeśi İsusi baradaney şot'ay pi me əyitmux:

"Q'ončuğon bez Q'ončux bakalt'u pine:

35Zu Vi düşmənxo Vi turin oq'a sakamin

Bez yön tərəf arśa". #2:34-35 Ǐvel mə̌ğ. 110:1

36Şot'o görəl barta israilluğoy bitot'in sa şeya şaat'q'an avabaki: Buxačuğon hame efi xaçe loxol t'ə̌q't'est'i İsusane yaynak' ham Q'ončux, hamal Xrist'os #2:36 Xrist'os - yəni Buxačuğoy tərəfəxun C'ək'eśiyo. bi yaq'abey».

37Me əyitmoğon t'iya bakalt'oğo gelene təsirbi, pěšmanbaki burt'unqi P'yot'raxun q'a t'iyə̌mi ap'ost'olxoxun xavar haq'sa: «Ay viçimux, p'oy yan isə k'ə ben?»

38P'yot'ren şot'oğo metəre coğab tadi: «Günax əşp'est'unaxun kulhaq'i düz yaq'en takinan! İsus Xrist'osi Çark'est'al baksuna q'abulbiyal xenen k'unuk'bakanan ki, efi günaxxo bağışlayinşakeq'an. T'e vədə Ǐvel Urufaxun və̌xal pay k'inək' tadeğale. 39Axıri mo bitot'une əyit tadeśe: və̌xal, və̌xun bakit'oğoval, və̌xun nu bakit'oğoval, beşi Buxačux bakala Q'ončuğon c'ək'p'it'oğoy bitot'u». 40P'yot'ren şot'oğo düz yaq'a laxseynak' hələ q'erəzəl gele əyitmux pi metəre tapşurbi: «İçoğoy cazina zap'k'ale me düz yaq'axun c'eri nəsilen, běğanan ki, və̌nal şot'oğoy aruğo nu baft'anan!»

41Hametər, t'e ği t'iya bakalt'oğoxun şot'ay pit'oğo ibaki q'abulbiyorox k'unuk't'unbaki, sa xib hazar tana ı̌ša amdaral İsusa Çark'est'al k'inək' q'abulbit'oğoy cörginəne baft'i.

İsusi yaq'en tağalt'oğoy sunaxun ser baksun

42Mot'oxun oşa, me amdarxo İsusi laxi yaq'en tağala ap'ost'olxon içoğo zombala k'inək't'un yəşəyinşbsay. İsusen İz şagirdxoxun sagala gireśi šum bot'ala k'inək', #2:42 Věbakalxon gireśi šum kəyit'uxun oşa gele vədə İsusi axırınci biyəsin ukunast'a içoğo pi əyitmoğot'un eyex bast'ay. Sa k'ot'or šum cöybi uksunen q'a sa q'urt't'um fi ǔğsunen İsusen içoğoy günaxxo bağışlayinşakseynak' İz bədənə q'urbanbsuna q'a İz p'iya śipsunat'un eyex bast'ay. Běğa: Luk'. 22:17-20 mot'oğonal sagala gireśi šumt'un bost'ay, afırıt'unney. 43Bitot'inal Buxačuğoy zora q'a Şot'ay bes bakalt'oğo ak'i məət't'əlt'un manst'ay, şot'o görə ki, Buxačuğon ap'ost'olxo nu ak'eśi, şuk'k'ali kiyexun nu ayeğala gele əşure biq'est'ay.

44Me amdarxo dim sagalat'un baksay, içoğoy k'ə buneysa, bito sagalaney. 45İçoğoy k'ojurxo, var-dövlətə, k'ə bunesa bitova toydi tənginə içoğoy boş eht'iyəc bakalt'oğot'un paybsay. 46Xrame məəlneyal hər ği sagalat'un giresay, içoğoy k'ojurxo šumal gireśi sagalat'un bost'ay. Mǔqt'unbaksay, içoğoy ük'e qayesay k'alpi suna šum tadat'an, 47arśi sagala Buxačuğoy s'iya alabat'an. Amdarxon bitot'in şot'oğo çurt'unsay, Q'ončuğonal İsus Xrist'osaxun eğala çark'esuna q'abulbit'oğo gelebsunen şot'oğo gərbakalt'oğoy saya avuzebsay.

Currently Selected:

Ap'ost'olxo 2: udi

Highlight

Copy