Ap'ost'olxo 1

Girke burqesun

1T'eofil, bezi mot'oxun běš śampi girke boş #1:1 - Yəni «Luk'an śampi Mǔq Xavar» girkəxune exlət taysa. zu İsusen İzi me dünyəne eysuni s'iya ak'est'a burqi ğinaxun bit'oğo q'a zombit'oğo bitova belxun ošel śampezuy, 2İzi c'ək'p'i ap'ost'olxo #1:2 "Ap'ost'ol" əyit "yaq'abakiyo" upsune. Ǐvel Urufen tapşuruğxo tadi Buxačuğon İçu göynul ěqevk'i ğinal śirik' bakit'oğo bitova. #1:2 Luk'. 1:1-4

İsusi axırınci tapşuruğa tadi göynul ěqesun

3İzi koruği boş bisunaxun oşa Şo hələ q'ırx ği vədə-vədə t'e amdarxo ak'esay. Şot'oğo İzi p'uri ganuxun běyinbaksuna gele əşurxon subutbi şot'oğoynak' Buxačuğoy padçağluğaxune exlətpsay. 4Sa ği arśi šum ukala gala, İsusen şot'oğo "Yerusalimaxun ma c'ekinan" pi, me tapşuruğane tadi: «Bavan və̌x əyit tadi, Bezi və̌x pi t'e neyməti yaq'a běğanan. #1:4 Luk'. 24:49 5İoanen xenene k'unuk'bsay, və̌n isə sa hema ğinaxun oşa Ǐvel Urufen k'unuk'bakalnan». #1:5 Mat'. 3:11; Mrk'. 1:8; Luk'. 3:16; İoan. 1:33

6Mone, ap'ost'olxon İsusi bel gireśi xavar haq'sat'un burqi: «Ay Q'ončux, isə hevaxt' arśalnu me əyit tadeśi padçağluği taxt'a, hevaxt' kalaluğbale me israilluğon p'urum içoğoy k'ulnu?» #1:6 - İsrailluyox Rim İmp'eriin kiin oq'a baksun çurtet'unsay, içoğoynak' padçağ c'ək'p'i cöybaksunt'un çuresay. İsusenal Buxačuğoy padçağluğaxun əyitk'at'an gelet'in Şot'o düz tene q'amişaksay, fikirt'unbsay içoğo rimluğoxun çark'est'i padçağ bakseynak'e hare me dünyəne. 7İsusen coğabe tadi: «Bavay İz ext'iyəren laxeśi t'e vədinə q'a t'e vaxt'a avabaksun və̌x tene mandiyo! 8Ama mone, və̌x Ǐvel Uruf tadeğale! Və̌nal t'etər sa zore q'ončux bakalnan ki, Yerusalima, dirist' İudeyina, Samariina, lap dünyəni t'e belal Bezi barada şahidluğbi Bezi şu baksuna ak'est'es bakalnan!» #1:8 Mat'. 28:19; Mrk'. 16:15; Luk'. 24:47-48

9İsusen mot'oğo pit'uxun oşa Buxačuğon Şot'o göynule ěqevk'i. Şo ap'ost'olxoy piin běš asoyxoy boş ěqeśi piyexun aneç̌i. #1:9 Mrk'. 16:19; Luk'. 24:50-51 10Ama şot'oğon hələl içoğoy pula göynuxun tet'un zap'ey. Hame vədine, bürdən içoğoy t'ǒğǒl mas'i paltar lapi p'ə̌ amdart'un ak'i. 11Şot'oğon pit'un: «Ay galileyaluyox, k'ənan göynul běğsun çurpe? Me İsus ef piin běšt'an ěqeśi k'inək'əl qaybakale».

Mat't'iyay İuday gala c'ək'esun

12Mot'oxun oşa ap'ost'olxo Zeytuni burux uk'ala ganuxun Yerusalimat'un qaybaki. Me burux Yerusalima ı̌ša, sa Şamat' ğine yaq'e #1:12 - Yəni 1 k'ilomet'irəl śirik'. İudeyxon Şamat' ğine 1 k'ilomet'irəxun avuzin yaq' nu tağalat'uniy, mo Şamat' ğineynak' bakala əş nu biq'suni q'aydoğoxun soğoney. hamane. 13Şorox şəhəre hari içoğoy mandala k'ojin alin otağat'un laśi. Miya mandalorox moroxey: P'yot'r, İoan, İak'ov, Andrey, Filip', T'omas, Varfolomey, Mat'fey, Halfay ğar İak'ov, Kənançi #1:13 Kənançi - Buxačuğoy pit'oğo bex p'ap'espseynak' rimluğoxun davabi cöybaksun çureğala iudeyxoy millətçi təşk'ilata bakalt'oğo tadeğala s'i. Simon saal İak'ovi ğar İuda. #1:13 Mat'. 10:2-4; Mrk'. 3:14-19; Luk'. 6:13-16 14Şorox miya usum-usum gireśi afırıt'unney. İsusi Nana Mariya q'a İz viçimux, saal q'erəz sa hema çuuxal miya gireśi ap'ost'olxoxun sagala afırıt'unney.

15Hametər ğimxoy sunt'ust'a, sabaç̌ q'a tan gireśi sa ğine, P'yot'ren hayzeri pine: 16«Ay viçimux, Ǐvel Śamurxoy boş bakalorox bex p'ap'ine buq'oy. Axıri Ǐvel Urufen padçağ Davidi muzin əyitk'at'an İsusa biq'sa tağalt'oğo yaq' ak'est'i İuda k'inək't'oğoy axırane saturběš ak'est'i. 17Düze, İuda yaxun sagalaney, şot'inal yaxun barabar İsusen yax tapşurbi q'ulluğane bsay. 18Ama me amdaren günaxe əşp'est'i, izi biq'i t'e pis əşlə görə haq'i tənginenal taśi q'oruğt'un haq'i. Hat'e q'oruğane şo biin loxol biti śareśi, izi gödənxoval c'irap'eśi baredi. #1:18 Mat'. 27:3-8 19Dirist' Yerusalimene me barada ibaki, amdarxonal me gane s'iya "Ak'eldama"t'un laxi. Mo içoğoy muzin "P'iye q'oruğ" upsune. 20"Ǐvel mə̌ğurxo" girke boş śameśi k'inək':

K'ojin işiğq'an aç̌i şot'ay,

İzi çadırq'an xarabina mandi, #1:20 Ǐvel mə̌ğ. 69:25

saal

Barta iz əşlə q'ert'inq'an taşeri. #1:20 Ǐvel mə̌ğ. 109:8

21Kot'o görəl yan həysə q'erəz sa amdar c'ək'k'alayan. Q'ončux İsus me dünyəne bakat'an yaxun barabar Şot'ay bač'anexun tağalt'oğoxun sunt'u, 22İoanen Şot'o k'unuk'bi ğinaxun burqi Buxačuğoy Şot'o göynul ěqevk'i ğinal śirik' yaxun sagala baki, oşal Şot'ay běyinbaksuna ak'i amdarxo me barada exlətp'i car sakalt'oğoxun sunt'u». #1:21-22 Mat'. 3:16; Mrk'. 1:9; 16:19; Luk'. 3:21-22; 24:51

23Metərluğen, p'ə̌ tani s'iyat'un duği - Yust' s'i tadeśi İosifa, şot'o hələ Barsabbal next'uniy, saal Mat't'iya. 24Oşal me əyitmoğon afırıt'unpi: «Ay Q'ončux, Hun bitot'ay ük'ə avanu! Ak'est'a yax Vi c'ək'p'it'u, barta me p'ə̌ tani boşt'an 25İuday gala hari Vi yax tapşurbi əşlə bex p'ap'espseynak' c'ək'eśit'u ak'es baken. Axıri p'uri taneśi İuda, isəəl günaxkər maya bakalanesa t'iyane». 26Eçeriyal çöpt'un boseri, çöpəl hari Mat't'iyane koft'i. Sas's'e ap'ost'ola gərbaki p'as's'emci bakiyoval şone baki.

Currently Selected:

Ap'ost'olxo 1: udi

Highlight

Copy