ᒪᑎᔪᐤ 3
3
ᒠᓐ ᐅᓯᑲᐃᑕᒐᐤ ᑲ ᑭᒐᔅᒋᒧᑦ ᐊᓐᑕ ᐸᐧᑯᑎᔅᑭᒥᑲᒡ
ᒪᕐᒃ 1.1-8; ᓗᒃ 3.1-18; ᒠᓐ 1.19-28
Matthew 3.1-12 (Advent-2 Year A)
1ᐊᑯᑕ ᒪᒃ ᐅᑕ ᒪᒂᒡ ᒠᓐ ᐅᓯᑲᐃᑕᒐᐤ ᑲᒋ ᐃᑐᑕᑦ ᐊᓐᑕ ᐸᐧᑯᑎᔅᑭᒥᑲᒡ, ᐊᓐᑕ ᒍᑎᔭ ᐊᔅᒋᒡ ᐃᑕᒐ, ᐊᑯ ᑲ ᒋᒋᐱᔨᑦ ᐊ ᑭᒐᔅᒋᒧᑦ᙮ 2ᐊ ᐃᔅᒋᔄᑦ, “ᒂᔅᑲᑎᓯᒄ, ᐛᔅ ᓴᔅ ᐸᓱᓇᑯᓐ ᐊᓐ ᒋᒋᒋᓯᒄ ᒋᓴᐅᒋᒪᐅᓐ᙮” 3ᐊᐅᒄ ᒪᒃ ᐅᔭ ᒠᓇ ᑲ ᐊᔨᒧᒪᑦ ᐊᓂᔭ ᐅᒋᔅᒋᐛᐃᒐᓱᐤ ᐊᐃᓴᔭ ᑲ ᐃᓯᓂᐧᑲᓱᑦ ᐃᔅᐱ ᑲ ᐃᔅᒋᔄᑯᐱᓇ,
ᑕᐤ ᐊᐛᓐ ᐊ ᑕᑈᑦ ᐊᓐᑕ ᐸᐧᑯᑎᔅᑭᒥᑲᒡ ᐊ ᐃᔅᒋᔄᑦ, ᐊᔭᔅᑯᐎᔅᑕᒺᐧᒄ ᐅᑎᐸᔨᒋᒐᐤ ᐅᒪᔅᑭᓇᒻ ᐊᓐᑕ ᒐ ᐱᒧᑕᑦ, ᑯᐃᔅᑯᒧᑕᐛᐧᒄ᙮
4ᐅ ᒪᒃ ᒠᓐ, ᑲ ᒥᔅᑎ ᐱᔎᐅᑯᓇᔨᒋ ᐊᐛᓯᓴ ᐅᐱᐎᐛ ᒋ ᐅᒋ ᐅᓯᑕᑭᓄᐅᔪᐛ ᐅᑦ ᐊᐱᒋᑕᐅᓇ, ᑭᔭ ᐱᓴᑭᓇᔭᐱᔾ ᒋ ᐃᑕᔨᑕᑯᓂᔪᐤ ᐊᓂᔭᔪᐤ ᒐᒂᔪᐤ ᑲ ᐅᐱᒂᑕᐅᓂᑦ ᑭᔭ ᒂᔅᑯᑎᓴ ᑭᔭ ᑲᓯᐛᓯᐛᐳᔪᐤ ᐊᒧᐎᒋᔅᑐᓂᔨᒡ ᑲ ᑎᑯᓂᔨᒡ ᐊᔪᐅᒄ ᐅᔭ ᑲ ᐅᒥᒋᒥᑦ᙮ 5ᒋ ᐸᒋ ᓂᑐᑕᑯᐤ ᒪᒃ ᒠᓐ ᐊᓂᔭᔪᐛ ᐊᐛᔪᐛ ᒋᕈᓯᓕᒥᒡ ᑲ ᐅᒋᔨᒋ ᑭᔭ ᐊᓐᑕ ᒥᓯᐛ ᒍᑎᔭ ᐊᔅᒋᒡ ᑲ ᐅᒋᔨᒋ, ᑭᔭ ᐊᓂᔭᔪᐛ ᐊᐛᔪᐛ ᒥᓯᐛ ᐊᓐᑕ ᐊᓂᔭᔪᐛ ᐅᑕᓇᐛ ᒥᒋᒪ ᒠᕐᑕᓐ ᓯᐱᒡ ᑲ ᑎᑯᓂᔨᒋ᙮ 6ᒧᓴ ᒋ ᐎᑎᒧᒡ ᑕᓐ ᑲ ᐃᓯ ᒥᒋᑐᑎᒧᐛᒂ ᑭᔭ ᒂ ᓯᑲᐃᑕᑯᒡ ᒠᓇ ᐊᓐᑕ ᒠᕐᑕᓐ ᓯᐱᒡ᙮
7ᐃᔅᐱ ᒪᒃ ᒠᓐ ᐎᔭᐱᒪᑦ ᒥᒐᑦ ᐸᕆᓯᐊ ᑭᔭ ᓴᑎᔪᓯᐊ ᐊ ᐸᒋ ᑎᑯᓯᓂᔨᒋ ᒐᒋ ᓯᑲᐃᑐᐛᑭᓄᔨᒋ, ᒋ ᐃᑕᐤ, “ᒧᔭᒻ ᑕᑈ ᒋᓇᐱᑯᒡ ᒂ ᐃᑕᔨᑕᑯᓯᔭᒄ᙮ ᐊᐛᓐ ᑲ ᐃᑎᑕᒄ ᒐᒋ ᒋᑎᓯᒧᑎᒺᒄ ᒋᓴᒪᓂᑐᐤ ᐅᑦ ᐊᐧᑯᔪᐛᓱᐅᓐ ? 8ᓄᑯᑕᒄ ᑕᑈ ᐊ ᒂᔅᑲᑎᓯᔭᒄ, ᐊ ᓂᑭᑎᒪᒄ ᒋᒥᒐᑎᓯᐅᓄᐛᐛ᙮ 9ᑭᔭ ᐊᑲᐎᔾ ᐃᑕᔨᑎᒧᒄ ᒐ ᐊᑲ ᐅᒋ ᐛᐛᓯᐃᑕᒄ ᒋᓴᒪᓂᑐᐤ ᐊ ᐅᓂᑐᑎᒪᒄ ᒥᒄ ᐊᑉᕋᐊᒻ ᐊ ᑕᑦ ᐊ ᐅᒋᔭᒄ᙮ ᒋ ᐎᑎᒪᑎᓇᐛᐤ, ᒋᓴᒪᓂᑐᐤ ᒋᑭ ᒋ ᐃᑐᑐᐛᐤ ᐅᔭᔪᐛ ᐊᓯᓂᔭ ᑲ ᐃᑎᐱᔨᒋ ᒐᒋ ᐅᒋ ᐅᓯᐊᑦ ᐊᐛᔪᐛ ᐊᑉᕋᐊᒪ ᒐ ᐅᑦ ᐊᐛᓯᒥᔨᒋ᙮ 10ᐛᔅ ᒧᔭᒻ ᓴᔅ ᐊ ᐊᔭᔅᑯᔅᑕᒡ ᐊᑭᑕᔅᒄ ᐊᐅᒄ ᒐ ᐃᓯᓇᒂᒡ ᒐ ᓇᑥᑲᐛᑭᓄᐅᑦ ᐊᓐ ᒥᔅᑎᒄ ᐊᓐᑕ ᐊ ᐅᑎᐱᔪᐅᑦ᙮ ᐛᔅ ᑕᑐᐤ ᒥᔅᑎᒄ ᐊᑲ ᒥᔪ ᒥᓂᓱᐅᑦ ᒋᑭ ᓇᑥᑲᐛᑭᓄᐤ ᑭᔭ ᒋᑭ ᒥᑐᔅᑕᐛᐱᓇᑭᓄᐤ ᐃᔅᑯᑕᒡ᙮”
11“ᓂᐱᔾ ᓂᔾ ᒋ ᓯᑲᐃᑕᑎᓇᐛᐤ ᐊ ᓄᒂᒡ ᐊ ᐎ ᒂᔅᑲᑎᓯᔭᒄ, ᒥᒄ ᒪᒃ ᑯᑎᒃ ᐊᐛᓐ ᒋᑭ ᑎᑯᓯᓄᐤ ᐊᔪᐛᒃ ᐊ ᒋᔅᑕᔨᑕᑯᓯᑦ ᐃᔅᐱᔅ ᓂᔾ᙮ ᓇᒪ ᒪᒃ ᐛᐛᒡ ᓂᑦ ᐃᔅᐱᑕᔨᑕᑯᓯᓐ ᒐᒋ ᐊᐱᐧᑯᓂᒧᒡ ᐅᒥᔅᒋᓇᔭᐱᔭ᙮ ᐎᔾ ᒪᒃ ᒋᑭ ᓯᑲᐃᑕᑯᐛᐤ ᑲ ᐸᔭᒋᓯᔨᒋ ᐊᒐᒂ, ᑭᔭ ᐃᔅᑯᑕᔪᐤ᙮ 12ᐅ ᒐ ᑎᑯᓯᐧᒃ ᒋᑭ ᐃᑕᔨᑕᑯᓱᐤ ᒧᔭᒻ ᓇᐸᐤ ᑲ ᐸᔭᒋᑕᑦ ᐸᒂᓯᑭᓂᒥᓇᑎᑯᔪᐤ ᐊᓐᑕ ᒐᒋ ᐅᑎᓇᑦ ᐸᒂᓯᑭᓇ ᑭᔭ ᑎᐸᓂᔅᑕᐤ ᐊᓂᔭᔪᐛ ᑲ ᒥᔽᔨᒋ ᐊᓐᑕ ᐊᔅᑕᓱᐅᒋᐛᐱᒡ᙮ ᐊᑯ ᐊᓂᔭᔪᐛ ᐊᑲ ᐎᔭᔅ ᐃᑕᐱᑎᓂᔨᒋ ᐃᔎᓯᒻ ᐊᓐᑕ ᐊᑲ ᓂᑕ ᐊᔅᑐᐛᔨᒡ ᐃᔅᑯᑕᔪᐤ᙮” ᐊᐅᒄ ᒪᒃ ᐅᔭ ᑲ ᐃᑕᑦ ᒠᓐ ᐅᓯᑲᐃᑕᒐᐤ ᐊᓂᔭᔪᐛ ᐃᔪᐛ ᑲ ᐸᒋ ᓂᑐᑕᑯᑦ ᐊ ᑭᒐᔅᒋᒧᑦ᙮
ᒋᓴᔅ ᑲ ᓯᑲᐃᑐᐛᑭᓄᐅᑦ
ᒪᕐᒃ 1.9-11; ᓗᒃ 3.21,22
13ᓇᓇᒐ ᒪᒃ ᒋᓴᔅ ᒋ ᑎᑯᓯᓄᐤ ᑲᓕᓕ ᐊᔅᒋᒡ ᐊ ᐅᑐᑕᑦ, ᒋ ᓂᑐᐛᐱᒪᐤ ᒠᓇ ᐊᓐᑕ ᒠᕐᑕᓐ ᓯᐱᒡ ᒐᒋ ᓯᑲᐃᑕᑯᑦ᙮ 14ᒥᒄ ᒪᒃ ᒠᓐ ᒋ ᐎ ᓂᑲᓇᐤ ᐊ ᐃᑕᑦ, “ᐃᓯᓇᑯᓐ ᒋᔾ ᒐᒋ ᐸᒋ ᓯᑲᐃᑐᐎᔨᓐ, ᒐᒂᓐ ᒪᒃ ᐛᒋ ᐸᒋ ᑯᒂᒋᒥᔨᓐ ᒐᒋ ᓯᑲᐃᑐᐛᑕᓐ ?”
15ᐊᑯ ᒋᓴᔅ ᐊᑕᑦ, “ᐊᓄᒡ ᐅ ᐃᑐᑕ ᑕᓐ ᐊ ᐃᑎᓱᒥᑕᓐ᙮ ᐛᔅ ᐅ ᐃᑐᑎᒪᒂ ᒋᑭ ᐃᑐᑎᒺᓇᓄᐤ ᒥᓯᐛ ᑕᓐ ᐊ ᐃᓯ ᓂᑐᐛᔨᑕᐧᒃ ᒋᓴᒪᓂᑐᐤ᙮” ᑭᑈ ᑲ ᓂᔅᑯᒪᑦ ᒠᓐ᙮
16ᐃᔅᐱ ᒪᒃ ᒋᓴᔅ ᑲ ᓯᑲᐃᑐᐛᑭᓄᐅᑦ, ᑎᐛᒡ ᐊ ᐊᑎ ᑭᐸᑦ ᒪᒃ ᒋ ᔪᑕᐱᔪᐤ ᒋᒋᒋᓯᒄ᙮ ᒋ ᐛᐱᒪᐤ ᒪᒃ ᒋᓴᒪᓂᑐᐛ ᐅᑦ ᐊᒐᐧᑯᔪᐛ ᐊ ᐸᒋ ᔭᓯᔨᒋ ᒧᔭᒻ ᐅᒥᒥᐛ ᐊ ᐃᓯᓇᑯᓯᔨᒋ ᑭᔭ ᐊ ᑥᐅᑕᑯᑦ᙮ 17ᐊᑯ ᒂ ᐸᑐᐛᒡ ᐊᐛᔪᐛ ᐊᓐᑕ ᒋᒋᒋᓯᑯᒡ ᐅᒡ ᐊ ᐃᔅᒋᔄᔨᒋ, “ᐊᐅᑯᐤ ᓂᑯᔅ ᑲ ᓴᒋᐃᒃ ᑭᔭ ᓇᔅᒡ ᑕᑈ ᑲ ᓂᓇᐊᔨᑎᒥᐃᑦ᙮”
Currently Selected:
ᒪᑎᔪᐤ 3: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
