ᒪᑎᔪᐤ 4
4
ᒋᓴᔅ ᑲ ᑯᒂᒋᐊᑭᓄᐅᑦ ᒐᒋ ᐅᓂᑐᑕᐧᒃ
ᒪᕐᒃ 1.12,13; ᓗᒃ 4.1-13
1ᐊᑯ ᒋᓴᔅ ᒂ ᐃᑐᑕᐃᑯᑦ ᑲ ᐸᔭᒋᓯᔨᒋ ᐊᒐᒂ ᐊᓐᑕ ᐸᐧᑯᑎᔅᑭᒥᑲᒡ ᒐᒋ ᑯᒂᒋᐃᑯᑦ ᒥᒋᒥᓂᑐᐛ᙮ 2ᐃᔅᐱ ᒪᒃ ᐊᑲ ᐅᒋ ᒥᒋᓱᑦ ᓇᐎᔪᐛ ᒋᓯᑲᐛ ᑭᔭ ᓇᐎᔪᐛ ᑎᐱᔅᑲᐛ ᐊᓐᑕ ᑲ ᑕᑦ, ᒋ ᓯᐛᔪᐤ ᒋᓴᔅ᙮ 3ᐊᑯ ᒥᒋᒥᓂᑐᐛ ᒂ ᐸᒋ ᓂᑐᐛᐱᒥᑯᑦ, ᐊᑯ ᐊᑎᑯᑦ, “ᑕᑈ ᒋᓴᒪᓂᑐᐤ ᐛᑯᓯᓯᒥᑐᑕᔎ, ᐃᓯᒡ ᐅᒡ ᐊᓯᓂᔨᒡ ᒐᒋ ᐸᒂᓯᑭᓄᐎᒡ᙮”
4ᒥᒄ ᒪᒃ ᒋᓴᔅ ᒋ ᐃᓯ ᐎᑎᒧᐛᐤ ᐊ ᐃᑕᑦ, “ᒋᓴᒪᓂᑐᐤ ᐅᑦ ᐃᔨᒧᐅᓐ ᐃᑎᔅᑕᔪᐤ,
ᓇᒪ ᒥᒄ ᐸᒂᓯᑭᓇ ᐊ ᒧᐛᑦ ᐊᐛᓐ ᒋᑭ ᒋ ᐅᒋ ᐱᒪᑎᓯᐤ, ᒥᒄ ᐊᓂᔭ ᒥᓯᐛ ᑲ ᐃᔅᒋᔄᑦ ᒋᓴᒪᓂᑐᐤ ᐊᓐᑕ ᐅᑦ ᐃᔨᒧᐅᓂᒡ ᐊᔪᐅᒄ ᐊᓂᔭ ᒐ ᐱᒪᒋᐃᑯᑦ᙮”
5ᐊᑯ ᒥᒋᒥᓂᑐᐤ ᐊᑐᑕᐊᑦ ᒋᓴᓴ ᐊᓐᑕ ᒋᕈᓯᓕᒥᒡ, ᐊᑯ ᒂ ᓴᑭᒋᐛᑕᐊᑦ ᐊᓐᑕ ᒪᐅᒡ ᐊ ᐃᔅᐸᓇᔨᒡ ᒋᓴᐊᔭᒥᐊᐅᒋᐛᐱᔪᐤ᙮ 6ᐊᑯ ᐊᑕᑦ, “ᑕᑈ ᒋᓴᒪᓂᑐᐤ ᐛᑯᓯᓯᒥᑐᑕᔎ, ᐊᒥᒂᔅᑯᑎ᙮ ᐛᔅ ᐃᑎᔅᑕᐤ ᒋᓴᒪᓂᑐᐤ ᐅᑦ ᐃᔨᒧᐅᓂᒡ,
ᒋᓴᒪᓂᑐᐤ ᒋᑭ ᐃᑎᓱᐛᑕᐤ ᐅᑦ ᐊᓐᒋᓂᒪ ᒐᒋ ᒥᔪ ᑭᓄᐛᔨᒥᔅᒋᔨᔅᒋ, ᒋᑭ ᑕᐧᑯᓂᑯᒡ ᐊᓐᒋᓐᒡ ᒐ ᐊᑲ ᐛᐛᒡ ᒐᒋ ᐅᑕᒥᑕᔨᓐ ᒋᓯᑕ ᐊᓯᓂᒡ᙮”
7ᒋᓴᔅ ᒪᒃ ᒋ ᐃᑕᐤ, “ᒥᒄ ᒪᒃ ᐃᑎᔅᑕᐤ ᑭᔭ ᒋᓴᒪᓂᑐᐤ ᐅᑦ ᐃᔨᒧᐅᓂᒡ,
ᐊᑲᐎᔾ ᒋᑭ ᑯᒂᒋᐊᐤ ᐅᑎᐸᔨᒋᒐᐤ ᒋᒋᓴᒪᓂᑐᒻ᙮”
8ᐊᑯ ᒥᓐ ᒂ ᐎ ᑯᒂᒋᐊᑦ ᒥᒋᒥᓂᑐᐤ ᐊᓂᔭ ᒋᓴᓴ, ᒂ ᐃᑐᑕᐊᑦ ᐊᓐᑕ ᓇᔅᒡ ᐊ ᐃᔅᐸᓇᔨᒡ ᐱᔅᑯᑎᓇᔪᐤ, ᒂ ᐛᐸᑎᔭᑦ ᒥᓯᐛ ᒋᓴᐅᒋᒪᐅᓇ ᑲ ᑎᑯᓂᔨᒋ ᐅᑕ ᐊᔅᒋᒡ ᑭᔭ ᑕᓐ ᐊ ᐃᓯ ᑎᑯᓂᔨᒋ ᐛᔪᑎᓯᐅᓇ᙮ 9ᐊᑯ ᐊᑕᑦ, “ᒥᓯᐛ ᐅ ᒋᑭ ᒥᔨᑎᓐ ᐸᒋ ᓂᐱᔅᑯᐱᔨᓇ ᐊ ᑕᔭᓐ, ᐊ ᐊᔭᒥᐊᔅᑐᐎᔨᓐ᙮”
10ᒥᒄ ᒪᒃ ᒋᓴᔅ ᒋ ᐃᓯ ᐎᑎᒧᐛᐤ ᐊ ᐃᑕᑦ, “ᒋᔾ ᒥᒋᒥᓂᑐᐤ, ᒪᒋ ᐃᒐᑕ ᓇᑕ᙮ ᐃᑎᔅᑕᐤ ᒋᓴᒪᓂᑐᐤ ᐅᑦ ᐃᔨᒧᐅᓂᒡ,
ᒥᒄ ᐅᑎᐸᔨᒋᒐᐤ ᒋᒋᓴᒪᓂᑐᒧᐛᐤ ᐊᔭᒥᐊᔅᑐᐛᐧᒄ ᑭᔭ ᒥᒄ ᐎᔾ ᐊᑐᔅᑯᐛᐧᒄ᙮”
11ᒐᒃ ᒪᒃ ᒥᒋᒥᓂᑐᐤ ᒂ ᓂᑭᑕᑦ ᐊᓂᔭ ᒋᓴᓴ, ᐊᑯ ᐊᓐᒋᓇ ᐛᑎᑎᑯᑦ ᒋᓴᔅ ᒐ ᐎᒋᐃᑯᑦ᙮
ᒋᓴᔅ ᑲ ᒋᒋᐱᔨᑦ ᐊ ᑭᒐᔅᒋᒧᑦ ᑲᓕᓕᒡ
ᒪᕐᒃ 1.14,15; ᓗᒃ 4.14,15
12ᐃᔅᐱ ᒋᓴᔅ ᑲ ᐸᑕᐧᒃ ᒠᓇ ᐅᓯᑲᐃᑕᒐᐛ ᐊᒋ ᒪᑯᓇᑭᓄᔨᒋ, ᓇᓴᕆᑎᒡ ᐊᓐᑕ ᑲᓕᓕᒡ ᒋ ᐃᑐᑕᐤ᙮ 13ᐊᑯ ᓂᑭᑕᐧᒃ ᓇᓴᕆᑎᔪᐤ, ᑭᔭ ᐊᓐᑕ ᑲᐳᕐᓇᐊᒻ ᑲ ᐃᓯᓂᐧᑲᑕᔨᒡ ᐅᑕᓇᔪᐤ, ᒥᒋᒪ ᑲᓕᓕ ᓴᑲᐃᑭᓂᒡ ᑲ ᑎᑯᓂᔨᒡ ᐊᑯᑕ ᑲ ᐎᒋᑦ, ᐊᓐᑕ ᓴᐳᓕᓐ ᑭᔭ ᓇᑉᑕᓕ ᑲ ᐃᓯᓂᐧᑲᑕᔨᒡ ᐊᔅᒋᔪᐤ᙮ 14ᒐᒋ ᑕᑈᒥᑭᓂᔨᒡ ᐊᓂᔭ ᐅᒋᔅᒋᐛᐃᒐᓱᐤ ᐊᐃᓴᔭ ᑲ ᐃᔅᒋᔄᑦ,
15ᓂᑐᑎᒧᒄ ᒋᔨᐛᐤ ᓴᐳᓕᓐ ᑭᔭ ᓇᑉᑕᓕ ᐊᔅᒋᒡ ᑲ ᑕᔭᒄ, ᑲᓕᓕ ᐎᓂᐸᑯᒡ ᐃᔅ ᑭᔭ ᒋᔨᐛᐤ ᒂᔅᑕᒐᑲᒻ ᒠᕐᑕᓐ ᓯᐱᒡ ᑲ ᐎᒋᔭᒄ᙮ ᓂᑐᑎᒧᒄ ᑭᔭ ᒋᔨᐛᐤ ᑲᓕᓕᒡ ᑲ ᐎᒋᔭᒄ, ᐊᓐᑕ ᐛᒋᒡ ᐊᑲ ᒍᐤ ᐃᑎᔅᑲᓇᓯᒡ ᐃᔪᒡ᙮
16ᐊᑎ ᐅᓂᑎᐱᔅᒋᓯᐅᓂᒡ ᐊ ᐃᓯ ᐱᒪᑎᓯᒡ ᒋᑦ ᐃᔨᒧᐛᐅᒡ ᒋ ᐛᐸᑎᒧᒡ ᐊ ᒥᔅᑎ ᐛᔅᑕᔨᒡ᙮ ᒪᒂᒡ ᑲ ᑕᒡ ᐊᓐᑕ ᐊ ᐅᑲᔅᑕᔭᔨᒡ ᐊᓐᑕ ᐊ ᑎᑲᔅᑕᔅᑲᑯᒡ ᓂᐳᐅᓂᔪᐤ, ᒋ ᐅᑎᑎᐅᑯᒡ ᐛᔅᑕᐅᓂᔪᐤ᙮
17ᐊᑯᑕ ᒪᒃ ᑲ ᒋᒋᐱᔨᑦ ᒋᓴᔅ ᐊ ᑭᒐᔅᒋᒪᑦ ᐃᔪᐛ ᐊ ᐃᑕᑦ, “ᒂᔅᑲᑎᓯᒄ, ᓂᑭᑎᒥᒄ ᒋᒥᒋᑥᐅᓄᐛᐛ ᐛᔅ ᓴᔅ ᐸᓱᓇᑯᓐ ᒋᒋᒋᓯᒄ ᒋᓴᐅᒋᒪᐅᓐ᙮”
ᒋᓴᔅ ᑯᒂᒋᒪᐤ ᓇᐤ ᑲᓄᑎᒪᓴᓯᔨᒋ ᒐᒋ ᓇᓴᐅᑯᑦ
ᒪᕐᒃ 1.16-20; ᓗᒃ 5.1-11
18ᒪᒂᒡ ᒪᒃ ᒋᓴᔅ ᐊ ᐱᒧᑕᑦ ᐊᓐᑕ ᔭᔭᐤ ᑲᓕᓕ ᓴᑲᐃᑭᓂᔪᐤ, ᒋ ᐛᐱᒪᐤ ᑲᓄᑎᒪᓴᓯᔨᒋ ᐊ ᐎᐧᑲᓂᓯᑕᑐᔨᒋ ᓂᓱ ᓇᐸᐛ, ᓴᐃᒥᓇ ᐱᑕᕐ ᐃᔭᐱᒡ ᑲ ᐃᓯᓂᐧᑲᑕᑭᓄᐅᑦ ᑭᔭ ᐊᓂᔭ ᐎᐧᑲᓂᓯᔨᔪᐛ ᐊᓐᑎᕈᐛ, ᐊ ᐱᔅᑕᐛᔨᒋ ᐊᓐᑕ ᓴᑲᐃᑭᓂᒡ᙮
19ᐊᑯ ᒋᓴᔅ ᐊᑕᑦ, “ᐸᑐᑕᒄ ᐸᒋ ᐎᒐᐅᒄ, ᒋᑭ ᒋᔅᑯᑎᒪᑎᓇᐛᐤ ᒐᒋ ᐱᑕᐅᔭᔭᒄ ᐃᔪᒡ ᒧᔭᒻ ᐊ ᐃᓯ ᐱᑕᐅᔭᔭᒄ ᓂᒪᓯᒡ᙮” 20ᑎᐛᒡ ᒪᒃ ᒋ ᓂᑭᑕᐅᒡ ᐅᑦ ᐊᐃᐱᐛᐛ ᐊᑯ ᐛᒐᐛᒡ ᒋᓴᓴ᙮
21ᒥᓐ ᒪᒃ ᒋ ᐊᑎ ᔅᑐᑕᐤ ᒋᓴᔅ, ᐊᑯ ᒥᓐ ᐎᔭᐱᒪᑦ ᑯᑎᑲ ᓂᓱ ᓇᐸᐛ, ᒋᒥᓴ ᑭᔭ ᒠᓇ, ᐃᔭᐱᒡ ᐊ ᐎᐧᑲᓂᓯᑕᑐᔨᒋ, ᓴᐱᑎᔭ ᐅᑯᓯᔪᐛ᙮ ᐅᑦ ᐅᐤᑎᔨᒡ ᒋ ᑕᔪᐛ ᑭᔭ ᐊᓂᔭ ᐅᑕᐎᔪᐛ, ᐊᔭᔅᑯᐛᔨᒋ ᐅᑦ ᐊᐃᐱᔪᐛ᙮ ᒋᓴᔅ ᐃᔭᐱᒡ ᒋ ᐎᓴᒪᐤ ᒐᒋ ᐎᒐᐅᑯᑦ, 22ᑎᐛᒡ ᒪᒃ ᒋ ᓂᑭᑎᒧᒡ ᐊᓂᔭ ᐅᑦ ᐅᐤᑐᐛᐤ ᑭᔭ ᐊᓂᔭᔪᐛ ᐅᑕᐎᐛᐛ, ᐊᑯ ᑲ ᐊᑎ ᐎᒐᐛᒡ ᒋᓴᓴ᙮
ᒋᓴᔅ ᐊ ᒋᔅᑯᑎᒪᒐᑦ, ᐊ ᑭᒐᔅᒋᒧᑦ ᑭᔭ ᐊ ᒥᓏᒋᐊᑦ ᑲ ᐊᐧᑯᓯᔨᒋ
ᓗᒃ 6.17-19
23ᒋᓴᔅ ᒪᒃ ᒋ ᐃᑐᑕᐤ ᐊᓐᑕ ᒥᓯᐛ ᑲᓕᓕᒡ ᐊ ᐃᔅᐱᓴᔨᒡ ᐊ ᒋᔅᑯᑎᒪᒐᑦ ᐊᓐᑕ ᒍᐤ ᐊᔭᒥᐊᐅᒋᐛᐱᒡ, ᐊ ᐛᐎᑕᐧᒃ ᒥᔽᒋᒧᐅᓂᔪᐤ ᒋᓴᒪᓂᑐᐛ ᐅᒋᓴᐅᒋᒪᐅᓂᔪᐤ ᐊ ᐊᔨᒧᑕᐧᒃ, ᑭᔭ ᐊ ᒥᓏᒋᐊᑦ ᐊᐛᔪᐛ ᒥᓯᐛ ᓂᓇᐧᑯᐤ ᑲ ᐃᑕᔅᐱᓇᔨᒋ᙮ 24ᒋ ᑎᐸᒋᒪᑭᓄᐤ ᒪᒃ ᒥᓯᐛ ᐊᓐᑕ ᓯᕆᔭᒡ, ᒋ ᐸᓱᐛᐅᒡ ᒪᒃ ᒥᓯᐛ ᑲ ᐊᐧᑯᓯᔨᒋ ᐃᔪᐛ ᓂᓇᐧᑯᐤ ᑲ ᐃᑕᔅᐱᓇᔨᒋ, ᐊᓂᔭ ᑭᔭ ᐊ ᐎᓯᒐᔨᑎᒥᔨᒋ ᑭᔭ ᐊᓂᔭ ᑲ ᐱᒋᔅᑲᑯᔨᒋ ᒥᒋ ᐊᒐᒂ, ᑭᔭ ᐊᓂᔭᔪᐛ ᑲ ᐅᒋᐱᑎᑯᔨᒋ ᑭᔭ ᐊᓂᔭ ᐊᑲ ᓂᔅᑐᓯᔨᒋ᙮ ᒥᓯᐛ ᒪᒃ ᒋ ᒥᓏᒋᐊᐤ ᒋᓴᔅ ᐅᔭ ᐊᐛᔪᐛ ᑲ ᐸᑐᐛᑭᓄᐅᑦ᙮ 25ᒥᒐᑦ ᒪᒃ ᐊᐛᔪᐛ ᒋ ᐱᐸᒥᐎᒐᐅᑯᐤ ᒋᓴᔅ, ᐊᓐᑕ ᑲᓕᓕᒡ ᑲ ᐅᒋᔨᒋ ᑭᔭ ᐊᓐᑕ ᐊᔅᒋᔪᐤ ᐸᐃᑯᔪᐤ ᐅᑕᓇᐛ ᑲ ᐃᓯᓂᐧᑲᑕᔨᒋ, ᑭᔭ ᐊᓐᑕ ᒋᕈᓯᓕᒥᒡ, ᒍᑎᔭᒡ ᑭᔭ ᐊᓐᑕ ᒂᔅᑕᒐᑲᒻ ᒠᕐᑕᓐ ᓯᐱᒡ ᑲ ᑕᔨᒋ᙮
Currently Selected:
ᒪᑎᔪᐤ 4: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
