ᒪᑎᔪᐤ 2
2
ᒪᓐᑕᐅᒡ ᐛᐱᓄᑕᒡ ᑲ ᐅᑐᑕᒡ
Matthew 2.1-12 (Epiphany Year A, B, C)
1ᐸᑦᓕᔭᒻ ᑲ ᐃᓯᓂᐧᑲᑕᔨᒡ ᐅᑕᓇᔪᐤ ᐊᓐᑕ ᒍᑎᔭ ᐊᔅᒋᒡ ᑲ ᑎᑯᓂᔨᒡ ᐊᑯᑕ ᑲ ᐃᔪᑦ ᒋᓴᔅ᙮ ᐊᕈᑦ ᒪᒂᒡ ᒋ ᒋᓴᐅᒋᒪᐤ᙮ ᒋᕈᓯᓕᒥᒡ ᒪᒃ ᒋ ᑎᑯᓯᓄᐅᒡ ᑲ ᑭᒐᑕᐛᔨᑕᒡ ᓇᐸᐅᒡ ᐛᐱᓄᑕᒡ ᐊ ᐅᑐᑕᒡ᙮ 2ᐊᑯ ᑲ ᓇᓂᑐᐤ ᑯᒂᒋᒐᒧᒡ ᐊ ᐃᔅᒋᔄᒡ, “ᑕᓐᑕ ᐊ ᑕᑦ ᐊᓐ ᐊᐛᔅ ᑲ ᐃᔪᐅᑦ ᐊᓂᔭᔪᐛ ᒍᐤ ᐃᔪᒡ ᒐ ᐅᒋᓴᐅᒋᒪᒥᒡ ? ᐛᔅ ᐊᓐ ᓂᒋ ᐛᐱᒪᓇᓐ ᐅᑦ ᐅᒐᑭᑕᐧᑯᒪ ᐊᓐᑕ ᐛᐱᓄᑕᒡ᙮ ᐊᐅᒄ ᒪᒃ ᐊᓂᔭ ᒋᐸ ᓄᑯᓯᔪᐛ ᐃᔅᐱ ᐃᔪᒐ᙮ ᐊᑯ ᑲ ᐸᒋ ᑎᑯᓯᓂᔭᒡ ᒐᒋ ᐸᒋ ᐊᔭᒥᐊᔅᑐᐅᒋᒡ᙮”
3ᐃᔅᐱ ᒪᒃ ᒋᓴᐅᒋᒪᐤ ᐊᕈᑦ ᐱᔭᑕᐧᒃ ᐅᔭ, ᓇᔅᒡ ᒋ ᒥᑯᔅᑲᑕᔨᑎᒻ ᑭᔭ ᒥᓯᐛ ᐊᐛᓐᒋ ᐊᓐᑕ ᒋᕈᓯᓕᒥᒡ ᑲ ᑕᒡ ᑭᔭ ᐎᔨᐛᐤ ᒋ ᒥᑯᔅᑲᑕᔨᑎᒧᒡ᙮ 4ᐊᑯ ᐊᕈᑦ ᒂ ᐎᓴᒪᑦ ᒥᓯᐛ ᐊᓂᔭ ᑲ ᓂᑲᓂᐱᔨᒋ ᐊᔭᒥᐊᐅᒋᒪᐛ ᑭᔭ ᐊᓂᔭᔪᐛ ᑲ ᒋᔅᑯᑎᒪᒐᔨᒋ ᐎᓱᐛᐅᓂᔪᐤ, ᐊᑯ ᒂ ᐃᑕᑦ, “ᒐᒄ ᐅᑕᓇᔪᐤ ᒋᐸ ᐃᔪᐤ ᐊᓐ ᙭ ?”
5ᐊᑯ ᒂ ᐃᑎᑯᑦ, “ᒋ ᐃᓇᓄᐤ ᑭᑈ ᐊᓐᑕ ᐊᓂᔭᔪᐤ ᐅᑕᓇᔪᐤ ᐸᑦᓕᔭᒻ ᑲ ᐃᓯᓂᐧᑲᑕᔨᒡ ᐊᓐᑕ ᐃᑕᒐ ᒍᑎᔭ ᐊᔅᒋᒡ ᐊᑯᑕ ᒐ ᐃᔪᐅᑦ ᐊᓐ ᙭᙮ ᐛᔅ ᒪᐅᔭ ᑲ ᐃᓯ ᒥᓯᓇᑕᐅᒥᒂ ᐊᓐ ᐅᒋᔅᒋᐛᐃᒐᓱᐤ,
6ᒋᔨᐛᐤ ᐸᑦᓕᔭᒻ ᐃᔪᒡ ᐊᓐᑕ ᒍᑕ ᐊᔅᒋᒡ, ᓇᒪ ᐊᑲ ᒋᑭ ᐅᒋ ᒋᐧᑲᔭᔨᑕᑯᓐ ᒋᑦ ᐅᑕᓇᒧᐛᐤ ᐊ ᑕᑎᒋ ᐅᑕᓇᐛ ᐊᓐᑕ ᒍᑕ, ᐛᔅ ᐊᑯᑕ ᒐ ᐅᒋᑦ ᐊᓐ ᒐ ᓂᑲᓂᔅᑯᐛᑦ ᑭᔭ ᒐ ᒋᔅᒋᓄᑕᐊᑦ ᐃᔅᕋᐃᓪ ᓂᑦ ᐃᔨᒪ᙮”
7ᐃᔅᐱ ᐊᕈᑦ ᑲ ᐸᑕᐧᒃ ᐅᔭ ᒋᒧᑦ ᒋ ᐎᓴᒪᐤ ᐊᓂᔭ ᑲ ᑭᒐᑕᐛᔨᑎᒥᔨᒋ ᓇᐸᐛ, ᐊᑯ ᑲ ᑯᒂᒋᒪᑦ ᑕᐃᔅᐱ ᑲ ᐛᐱᒪᔨᒋ ᐊᓂᔭᔪᐛ ᐅᒐᑭᑕᒂ ᐊ ᓄᑯᓯᔨᒋ᙮ 8ᒋ ᐎᑎᒪᑯᐤ ᑲ ᐃᓯ ᑯᒂᒋᒪᑦ ᐊᑯ ᐊᕈᑦ ᑲ ᐃᑎᓴᐛᑦ ᐊᓂᔭᔪᐛ ᑲ ᑭᒐᑕᐛᔨᑎᒥᔨᒋ ᓇᐸᐛ ᐊᓐᑕ ᐸᑦᓕᔭᒥᒡ ᐊ ᐃᑕᑦ, “ᒪᒋᒄ ᓇᔅᒡ ᓇᓂᑐᐛᐱᒪᐧᒄ ᐊᓐ ᐊᐛᔅ, ᐃᔅᐱ ᒪᒃ ᒥᔅᑯᐛᒂ, ᒐ ᐸᒋ ᐎᑎᒧᔭᒄ ᒐᒋ ᓂᑐᐛᐱᒥᒃ, ᓂᔾ ᑭᔭ ᒐᒋ ᐊᔭᒥᐊᔅᑐᐅᒃ᙮”
9ᐃᔅᐱ ᒪᒃ ᑲᒋ ᐃᓯ ᐎᑎᒪᑯᒡ ᐊᓂᔭᔪᐛ ᒋᓴᐅᒋᒪᐛ ᑕᓐ ᒐ ᐃᑎᒡ ᐊᑯ ᒐ ᐃᑐᑕᒡ᙮ ᒪᒂᒡ ᒪᒃ ᐊᓂᔭᔪᐤ ᐊ ᐊᑎ ᐱᒧᑕᒡ ᒥᓐ ᒋ ᐛᐱᒪᐅᒡ ᐊᓂᔭᔪᐛ ᐅᒐᑭᑕᒂ, ᐊᓂᔭᔪᐛ ᑲ ᐛᐱᒪᒡ ᐊᓐᑕ ᐛᐱᓄᑕᒡ᙮ ᐃᔅᐱᒥᒡ ᒪᒃ ᐊᓐᑕ ᓂᑲᓄᒡ ᐊ ᑕᒡ ᐊᑯᑕ ᑲ ᐊᑎ ᑕᔨᒋ ᐊᓂᔭᔪᐛ ᐅᒐᑭᑕᒂ, ᒐᒃ ᒪᒃ ᑲ ᓂᑲᐱᔨᒋ ᐊᓐ ᑎᐱᔅᑯᒡ ᐊᓐᑕ ᐊ ᑕᔨᒋ ᐊᓂᔭᔪᐛ ᐊᐛᓴ᙮ 10ᓇᔅᒡ ᒪᒃ ᒋ ᒥᔽᔨᑎᒧᒡ ᐃᔅᐱ ᐎᔭᐱᒪᒡ ᐊᓂᔭᔪᐛ ᐅᒐᑭᑕᒂ᙮ 11ᐊᑯ ᒂ ᐱᒐᒡ ᐊᓂᔭᔪᐤ ᒥᒋᐛᐱᔪᐤ ᐊᓐᑕ ᑲ ᑕᔨᒋ ᐊᐛᓴ ᐊᓯᒡ ᐅᑲᐎᔪᐛ ᒪᕆᔨᒋ᙮ ᐃᔅᐱ ᒪᒃ ᐎᔭᐱᒪᒡ ᐊᓂᔭᔪᐛ ᐊᐛᓴ ᒋ ᐅᒋᒋᐧᑯᓂᐱᔪᐅᒡ ᐊ ᐊᔭᒥᐊᔅᑐᐛᒡ᙮ ᐊᑯ ᒂ ᑯᐃᑯᓇᒡ ᐊᓂᔭ ᒥᔨᐛᐅᓇ ᑲ ᐎ ᒥᔭᒡ ᐊᓂᔭᔪᐛ ᐊᐛᓴ, ᐎᔄᐅᓱᓇᔭᐱᔎ ᒋ ᒥᔭᐅᒡ, ᑭᔭ ᑲᒋ ᐃᔎᓯᑭᓄᔨᒋ ᑲᐎᒋᒪᑯᓯᔨᒋ ᑭᔭ ᑲ ᓱᓇᔭᐎᒡ ᑐᒥᓂᑭᓂᔪᐤ ᑲᐎᒋᒪᑯᑉᓴᓯᔨᒡ᙮ 12ᐃᔅᐱ ᒪᒃ ᒐ ᒋᐛᒡ ᓇᒪ ᐊᓐᑕ ᒋᕈᓯᓕᒥᒡ ᐃᑕᒐ ᐅᒋ ᐃᓯ ᒋᐛᐅᒡ ᒐᒋ ᐎᑎᒧᐛᒡ ᐊᕈᑕ ᑕᓐᑕ ᐊ ᑕᔨᒋ ᐊᓂᔭᔪᐛ ᐊᐛᓴ᙮ ᐛᔅ ᒋᓴᒪᓂᑐᐛ ᒋ ᐃᔭᒂᒥᒥᑯᐅᒡ ᐅᐳᐛᒧᐅᓄᐛᒡ ᒐ ᐊᑲ ᑲᐤ ᓂᑐᐛᐱᒪᒡ ᐊᕈᑕ ᐊᑯ ᒪᒃ ᐃᔭᒡ ᑲ ᐃᓯ ᒋᐛᒡ᙮
ᐃᒋᑉᑎᒡ ᐃᑐᑕᐤ ᒍᓯᑉ ᐊᓯᒡ ᒋᓴᓴ ᑭᔭ ᐅᑲᐎᔪᐛ
13ᐃᔅᐱ ᒪᒃ ᑲ ᔅᑐᑕᒡ ᐊᓐᒡ ᑲ ᑭᒐᑕᐛᔨᑕᑯᓯᒡ ᓇᐸᐅᒡ, ᐊᑯ ᐅᑎᐸᔨᒋᒐᐤ ᐅᑦ ᐊᓐᒋᓂᒪ ᒂ ᓄᑯᓯᔅᑕᑯᑦ ᒍᓯᑉ ᐅᐳᐛᒧᐅᓂᒡ ᐊ ᐃᑎᑯᑦ, “ᐊᕈᑦ ᒋᑭ ᐃᑎᓱᐛᐤ ᒐᒋ ᓇᓂᑐᐛᐱᒪᑭᓄᔨᒋ ᐊᓂᔭ ᐊᐛᓴ ᐊ ᐎ ᓂᐸᐊᑦ᙮ ᐅᓂ, ᒐ ᔅᑐᑕᐃᑥᐤ ᐊᓐ ᐊᐛᔅ ᑭᔭ ᐊᓂᔭᔪᐛ ᐅᑲᐎᔭ ᑭᔭ ᐃᒋᑉᑎᒡ ᒪᒃ ᐃᑎᓯᒧᒄ, ᐊᑯᑕ ᒐ ᑕᔭᒄ ᐸᑐᔅ ᐃᑎᑎᑯᒐ ᒐᒋ ᔅᑐᑕᔭᒄ᙮”
14ᒂ ᐅᓂᑦ ᒍᓯᑉ, ᒂ ᔅᑐᑕᐊᑦ ᐊᓂᔭᔪᐛ ᐊᐛᓴ ᑭᔭ ᐊᓂᔭ ᐅᑲᐎᔪᐛ ᐊ ᒪᒂᑎᐱᔅᑲᔨᒡ᙮ ᐃᒋᑉᑎᒡ ᐊᑯᑕ ᑲ ᐃᑐᑕᐊᑦ᙮ 15ᐊᑯᑕ ᒪᒃ ᐊᓐᑕ ᑲ ᑕᒡ ᐸᑐᔅ ᑲᒋ ᓂᐱᔨᒋ ᐊᕈᑕ᙮ ᐅ ᒪᒃ ᑲ ᐃᔅᐱᔨᒡ ᐊᐅᒄ ᑲ ᑕᑈᒥᑭᓂᔨᒡ ᐅᑎᐸᔨᒋᒐᐤ ᐅᒋᔅᒋᐛᐃᒐᓯᒪ ᑲ ᐃᔅᒋᔄᔨᒋ, “ᐃᒋᑉᑎᒡ ᐅᒡ ᓂᒋ ᐅᒋ ᑕᑈᑕᐤ ᓂᑯᔅ᙮”
ᑲ ᓂᐸᐊᑭᓄᐅᒡ ᑲ ᓇᐸᓯᐅᒡ ᐊᐛᓯᒡ ᐊᓐᑕ ᐸᑦᓕᔭᒥᒡ
16ᐊᔅᒄ ᒪᒃ ᒪᒂᒡ ᐊᒋ ᐱᒪᑎᓯᑦ ᐊᕈᑦ ᐃᔅᐱ ᒐᔅᒐᔨᑕᐧᒃ ᐊ ᒋᐎᔭᓯᒥᑯᑦ ᐊᓂᔭ ᑲ ᑭᒐᑕᐛᔨᑎᒥᔨᒋ ᓇᐸᐛ ᒋ ᒥᔅᑎ ᒋᔄᓱᐤ᙮ ᐊᑯ ᒂ ᐃᑎᓱᐛᑦ ᒐᒋ ᓂᐸᐊᑭᓄᔨᒋ ᒥᓯᐛ ᑲ ᓂᓱᐳᓇᓯᔨᒋ ᑭᔭ ᐊᐛᓯᐎᔨᒋ ᐊ ᓇᐸᓯᐎᔨᒋ ᐊᐛᓴ ᐊᓐᑕ ᐸᑦᓕᔭᒥᒡ ᑲ ᑕᔨᒋ ᑭᔭ ᐛᔅᑲ ᐊᓐᑕ ᑲ ᑕᔨᒋ, ᐊᐅᒄ ᐅᔭ ᐛᒋ ᐃᑐᑐᐛᑦ ᐛᔅ ᐊᐅᑯᓐ ᒂᔄᓐ ᑲ ᐃᔅᐱᔅ ᐎᑎᒪᑯᑦ ᐊᓂᔭᔪᐛ ᑲ ᑭᒐᑕᐛᔨᑎᒥᔨᒋ ᓇᐸᐛ ᓂᓱ ᐱᐳᓇ ᐊᓐᑕ ᐅᑕᒡ ᐊᑯᑕ ᓂᔅᑎᒻ ᑲ ᐛᐱᒪᔨᒂᓂ ᐊᓂᔭ ᐅᒐᑭᑕᒂ᙮
17ᐊᐅᒄ ᒪᒃ ᑲ ᐃᔅᐱᔨᒡ ᑕᑈ ᑕᓐ ᑲ ᐃᓯ ᓂᑲᓐ ᐎᑎᒧᒂ ᐊᓂᔭ ᐅᒋᔅᒋᐛᐃᒐᓱᐤ ᒐᕆᒪᔭ ᒐ ᐃᔅᐱᔨᒡ, ᑲ ᐃᔅᒋᔄᑦ,
18ᒋ ᐸᑕᑯᓐ ᐊ ᓂᓇᐧᑲᑥᐅᑕᑭᓄᐅᒡ ᐊᓐᑕ ᕋᒪ ᐅᑕᓇᒡ, ᐊᐅᒄ ᕋᐃᒍᓪ ᐊᒧᔎᑕᑦ ᐅᑦ ᐊᐛᓯᒪ, ᓇᒪ ᒪᒃ ᐅᒋ ᓂᑐᐛᔨᑎᒻ ᒐᒋ ᒥᔽᔨᒧᐃᑯᑦ ᐊᐛᔪᐛ ᐛᔅ ᒥᓯᐛ ᒋ ᓂᐱᔪᐛ ᐅᑦ ᐊᐛᓯᒪ᙮
ᑲ ᒋᐛᒡ ᒍᓯᑉ, ᒪᕆ ᑭᔭ ᒋᓴᔅ ᐃᒋᑉᑎᒡ ᐅᒋ
19ᐃᔅᐱ ᒪᒃ ᓇᐱᔨᒋ ᐊᕈᑕ, ᐊᔅᒄ ᒪᒂᒡ ᐊᓐᑕ ᐃᒋᑉᑎᒡ ᒋ ᑕᐅᒡ᙮ ᐊᑯ ᐅᑎᐸᔨᒋᒐᐛ ᐅᑦ ᐊᓐᒋᓂᒥᔪᐛ ᒂ ᓄᑯᓯᔅᑕᑯᑦ ᒍᓯᑉ ᐅᐳᐛᒧᐅᓂᒡ᙮ ᒋ ᐃᑎᑯᐤ ᒪᒃ, 20“ᐅᓂᔾ, ᔅᑐᑕᐃ ᐊᓐ ᐊᐛᔅ ᑭᔭ ᐊᓂᔭ ᐅᑲᐎᔭ, ᑲᐤ ᒐ ᒋᐛᔭᒄ ᐊᓐᑕ ᐃᔅᕋᐃᓪ ᐊᔅᒋᒡ ᐛᔅ ᓴᔅ ᓇᒪ ᐱᒪᑎᓯᐅᒡ ᐊᓐᒡ ᑲ ᐎ ᓂᐸᐊᒡ ᐊᓂᔭᔪᐛ ᐊᐛᓴ᙮”
21ᐊᑯ ᒍᓯᑉ ᐛᓂᑦ, ᒂ ᔅᑐᑕᐊᑦ ᐊᓂᔭ ᐊᐛᓴ ᑭᔭ ᐊᓂᔭᔪᐛ ᐅᑲᐎᔪᐛ, ᑲᐤ ᐊᓐᑕ ᐃᔅᕋᐃᓪ ᐊᔅᒋᒡ ᒂ ᐃᑐᑕᐊᑦ᙮
22ᒥᒄ ᐃᔅᐱ ᒍᓯᑉ ᐱᔭᑕᐧᒃ ᐊᕐᑭᓚᔭᓴ ᐊᒋ ᒥᔅᑯᑎᔅᑯᐛᔨᒋ ᐊᓂᔭ ᐅᑕᐎᔪᐛ ᐊᕈᑕ ᐊ ᒋᓴᐅᒋᒪᐅᓇᓄᐎᒋ ᐊᓐᑕ ᒍᑎᔭ ᐊᔅᒋᒡ, ᐊᑯ ᑲ ᑯᔅᑕᒋᑦ ᒐᒋ ᐎᒋᑦ ᐊᓐᑕ᙮ ᐊᑯ ᒥᓐ ᑲ ᐎᑎᒧᐛᑭᓄᐅᑦ ᐅᐳᐛᒧᐅᓂᒡ ᑕᓐ ᒐ ᐃᑎᑦ, ᐊᑯ ᐊᓐᑕ ᑲᓕᓕ ᐊᑯᑕ ᑲ ᐃᑐᑕᒡ᙮ 23ᐊᑯ ᐊᓐᑕ ᓇᓴᕆᑦ ᑲ ᐃᓯᓂᐧᑲᑕᔨᒡ ᐅᑕᓇᔪᐤ ᐊᑯᑕ ᑲ ᐎᒋᒡ᙮ ᑭᔭ ᒂ ᑕᑈᒥᑭᓂᔨᒡ ᐛᔅᑭᒡ ᑕᓐ ᑲ ᐃᔅᒋᔄᒡ ᐊᓂᔭᐧᑲ ᐅᒋᔅᒋᐛᐃᒐᓱᒡ, “ᓇᓴᕆᑎᒡ ᑲ ᐅᒋᑦ ᒋᑭ ᐃᓯᓂᐧᑲᑕᑭᓄᐤ ᐊᓐ ᐊᐛᔅ᙮”
Currently Selected:
ᒪᑎᔪᐤ 2: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
