ᒪᑎᔪᐤ 1
1
ᐊᓂᔭᔪᐛ ᐊᐛᔪᐛ ᐊ ᑕᔨᒋ ᑲ ᐅᒋ ᐊᓂᔅᒐ ᐱᒪᑎᓯᑦ ᒋᓴᔅ
ᓗᒃ 3.23-38
1ᒋᓴᔅ ᙭ ᓂᑭ ᐊᔨᒧᒪᐤ᙮ ᓂᔅᑎᒻ ᐅᑦ ᐊᓂᔅᒐᓯᒪ ᐊ ᑕᔨᒋ ᓂᑭ ᐅᒋ ᒋᒋᐱᔨᓐ ᐊ ᐊᔨᒧᒥᒃ᙮ ᐊᓂᔭᐧᑲ ᒋᓴᐅᒋᒪᐛ ᑎᐱᑕ ᑭᔭ ᐊᓂᔭᐧᑲ ᐊᑉᕋᐊᒪ ᐊ ᑕᔨᒋ ᒋ ᐅᒋ ᐊᓂᔅᒐ ᐱᒪᑎᓯᐤ᙮
2ᐊᑉᕋᐊᒪ ᒪᒃ ᐊᐃᓯᑲ ᒋ ᐅᑯᓱᐤ,
ᑭᔭ ᐊᐃᓯᒃ ᒐᑭᐸ ᒋ ᐅᑯᓱᐤ,
ᒐᑭᑉ ᒪᒃ ᒍᑕᔨᒋ ᒋ ᐅᑯᓱᐤ ᑭᔭ ᐊᓂᔭ ᐎᐧᑲᓂᓯᔨᔪᐛ,
3ᒍᑕ ᒪᒃ ᒋ ᐅᑯᓱᐤ ᐸᕋᓴ ᑭᔭ ᓯᕋᔨᒋ, ᑕᐃᒪᕆᔨᒋ ᒪᒃ ᒋ ᐅᑲᐎᐅᒡ᙮
ᐸᕋᔅ ᒪᒃ ᒋ ᐅᑯᓱᐤ ᐊᔅᕈᓇ,
ᐊᔅᕈᓐ ᒪᒃ ᒋ ᐅᑯᓱᐤ ᕋᒪᔨᒋ᙮
4ᕋᒻ ᒪᒃ ᒋ ᐅᑯᓱᐤ ᐊᒥᓂᑕᐸ,
ᐊᒥᓂᑕᑉ ᒪᒃ ᒋ ᐅᑯᓱᐤ ᓇᓱᓇ,
ᓇᓱᓐ ᒪᒃ ᒋ ᐅᑯᓱᐤ ᓴᓪᒧᓇ᙮
5ᓴᓪᒧᓐ ᒪᒃ ᒋ ᐅᑯᓱᐤ ᐳᐊᓴ, ᕋᐊᐸ ᒋ ᐅᑲᐎᐤ᙮
ᐳᐊᔅ ᒪᒃ ᒋ ᐅᑯᓱᐤ ᐅᐸᑕ, ᕈᑕ ᒋ ᐅᑲᐎᐤ᙮
ᐅᐸᑦ ᒪᒃ ᒋ ᐅᑯᓱᐤ ᒐᓯᔨᒋ,
6ᒐᓯᔾ ᒪᒃ ᒋᓴᐅᒋᒪᐛ ᑎᐱᑕ ᒋ ᐅᑯᓱᐤ᙮
ᑎᐱᑦ ᒪᒃ ᓴᓚᒥᓇ ᒋ ᐅᑯᓱᐤ, ᐅᕆᐊᔨᒋ ᐎᐎᔪᐛ ᒪᒃ ᒋ ᐅᑲᐎᐤ ᓴᓚᒥᓐ᙮
7ᓴᓚᒥᓐ ᒪᒃ ᒋ ᐅᑯᓱᐤ ᕋᐅᐳᒪ,
ᕋᐅᐳᒻ ᒪᒃ ᒋ ᐅᑯᓱᐤ ᐊᐸᐃᒐᔨᒋ᙮
ᐊᐸᐃᒐ ᒪᒃ ᒋ ᐅᑯᓱᐤ ᐊᓴᔨᒋ,
8ᐊᓴ ᒪᒃ ᒋ ᐅᑯᓱᐤ ᒐᐅᓴᐸᑕ,
ᒐᐅᓴᐸᑦ ᒪᒃ ᒋ ᐅᑯᓱᐤ ᒐᐊᕋᒪ᙮
ᒐᐊᕋᒻ ᒪᒃ ᒋ ᐅᑯᓱᐤ ᔪᓴᔭᔨᒋ,
9ᔪᓴᔭ ᒪᒃ ᒋ ᐅᑯᓱᐤ ᒠᑕᒪ,
ᒠᑕᒻ ᒪᒃ ᒋ ᐅᑯᓱᐤ ᐊᐊᓴ᙮
ᐊᐊᔅ ᒪᒃ ᒋ ᐅᑯᓱᐤ ᐊᓯᑲᔭᔨᒋ,
10ᐊᓯᑲᔭ ᒪᒃ ᒋ ᐅᑯᓱᐤ ᒪᓇᓴᔨᒋ᙮
ᒪᓇᓴ ᒪᒃ ᒋ ᐅᑯᓱᐤ ᐊᒧᓇ,
ᐊᒧᓐ ᒪᒃ ᒍᓴᔭᔨᒋ ᒋ ᐅᑯᓱᐤ᙮
11ᒍᓴᔭ ᒪᒃ ᒋ ᐅᑯᓱᐤ ᒐᑯᓇᔭ ᑭᔭ ᐊᓂᔭ ᐎᐧᑲᓂᓯᔪᐛ᙮ ᐊᐅᒄ ᐅᔭ ᒪᒂᒡ ᐊᓐᒡ ᐃᔅᕋᐃᓪ ᐃᔪᒡ ᐊᓐᑕ ᐸᐱᓗᓐ ᑲ ᐃᑐᑕᐊᑭᓄᐎᒡ ᐊ ᒪᑯᓇᑭᓄᐎᒡ᙮
12ᓴᔅ ᒪᒃ ᐊᓐᒡ ᐃᔪᒡ ᐊᓐᑕ ᐸᐱᓗᓐ ᒋ ᑕᐅᒡ ᐊᓐᑕ ᑲ ᐃᑐᑕᐊᑭᓄᐎᒡ,
ᐊᑯ ᒐᑯᓇᔭ ᑲ ᐅᑯᓯᑦ, ᓴᓪᑎᔭᓪ ᒋ ᐃᓯᓂᐧᑲᑕᐤ᙮
ᓴᓪᑎᔭᓪ ᒪᒃ ᓯᕈᐸᐸᓪ ᒋ ᐃᓯᓂᐧᑲᓱᔪᐛ ᐅᑯᓴ᙮
13ᓯᕈᐸᐸᓪ ᒪᒃ ᒋ ᐅᑯᓱᐤ ᐊᐱᔪᑕ,
ᐊᐱᔪᑦ ᒪᒃ ᒋ ᐅᑯᓱᐤ ᐃᓚᔭᑭᒪ,
ᐃᓚᔭᑭᒻ ᒪᒃ ᒋ ᐅᑯᓱᐤ ᐊᓴᕋ,
14ᐊᓴᕐ ᒪᒃ ᒋ ᐅᑯᓱᐤ ᓴᑕᑲ,
ᓴᑕᒃ ᒪᒃ ᒋ ᐅᑯᓱᐤ ᐊᑭᒪ,
ᐊᑭᒻ ᒪᒃ ᒋ ᐅᑯᓱᐤ ᐃᓕᔪᑕ,
15ᐃᓕᔪᑦ ᒪᒃ ᒋ ᐅᑯᓱᐤ ᐃᓕᐊᓴᕋ,
ᐃᓕᐊᓴᕐ ᒪᒃ ᒋ ᐅᑯᓱᐤ ᒪᑕᓇ,
ᒪᑕᓐ ᒪᒃ ᒋ ᐅᑯᓱᐤ ᒐᑭᐸ,
16ᒐᑭᑉ ᒪᒃ ᒍᓯᑉ ᒋ ᐃᓯᓂᐧᑲᓱᔪᐛ ᐅᑯᓴ, ᐊᐅᒄ ᒪᒃ ᐅᔭ ᒪᕆ ᑲ ᐅᓇᐸᒥᑦ᙮ ᐊᐅᒄ ᐅᔭ ᒪᕆᔨᒋ ᑲ ᐅᑲᐎᑦ ᒋᓴᔅ ᐊᓐ ᙭ ᑲ ᐃᓯᓂᐧᑲᑕᑭᓄᐅᑦ᙮
17ᓇᐅᓴᑉ ᒪᒃ ᒋ ᐃᑕᑎᓱᐅᒡ ᐅᒡ ᐅᑕᐎᒪᐅᒡ ᑭᔭ ᐅᑯᓯᓯᒪᐅᒡ ᐊᓐᑕ ᐊᑉᕋᐊᒪ ᐊ ᑕᔨᒋ ᐊᒋ ᐅᒋ ᐊᓂᔅᒐ ᐱᒪᑎᓯᒡ ᐊᓐᑕ ᑎᐱᑦ ᐊ ᑕᑦ ᐃᔅ᙮ ᓇᐅᓴᑉ ᑭᔭ ᒋ ᐃᑕᑎᓱᐅᒡ ᑎᐱᑕ ᐊ ᑕᔨᒋ ᐊᒋ ᐅᒋ ᐊᓂᔅᒐ ᐱᒪᑎᓯᒡ ᐅᑕᐎᒪᐅᒡ ᐊᓐᑕ ᐃᓯ ᐃᔅᐱᔅ ᑲ ᒪᑯᓇᑭᓄᐎᒡ ᐃᔪᒡ ᐊᓐᑕ ᐸᐱᓗᓂᒡ ᑲ ᐃᑐᑕᐊᑭᓄᐎᒡ᙮ ᐊᑯᑕ ᒥᓐ ᓇᐅᓴᑉ ᑲ ᐅᒋ ᐊᓂᔅᒐ ᐱᒪᑎᓯᒡ ᐅᑕᐎᒪᐅᒡ ᐊᓐᑕ ᐅᒋ ᐊᓐᑕ ᒪᒃ ᐃᔅ ᙭ ᑲ ᐱᒪᑎᓯᑦ᙮
ᒋᓴᔅ ᑲ ᐱᒪᑎᓯᑦ
ᓗᒃ 2.1-7
Matthew 1.18-25 (Advent-4 Year A)
18ᒪᐅ ᒪᒃ ᑲ ᐃᔅᐱᔨᒡ ᐃᔅᐱ ᒐ ᐱᒪᑎᓯᑦ ᒋᓴᔅ ᙭᙮ ᒪᕆ, ᐊᓂᔭᔪᐛ ᒋᓴᔅ ᒐ ᐅᑲᐎᑦ ᒋᐸ ᓂᐳᐅᒡ ᐊᓂᔭᔪᐛ ᒍᓯᐸ, ᒥᒄ ᒪᒃ ᐊᔅᒄ ᐊᑲ ᐅᒋ ᓂᐳᐅᒡ ᒋᔅᒐᔨᑎᒻ ᒪᕆ ᐊ ᑭᓄᐛᔨᒪᐅᓱᑦ᙮ ᐊᓂᔭ ᒪᒃ ᐊᐛᓴ ᑲ ᐊᔭᐛᑦ ᑲ ᐸᔭᒋᓯᔨᒋ ᐊᒐᒂ ᒋ ᐃᑐᑕᑯᐤ ᒐᒋ ᐊᔭᐛᑦ᙮ 19ᐊᓐ ᒪᒃ ᓇᐸᐤ ᒍᓯᑉ ᒧᔅ ᑯᐃᔅᒄ ᑲ ᐎ ᐃᑎᑦ ᒋ ᐃᑕᔨᑕᑯᓱᐤ᙮ ᐃᔅᐱ ᒪᒃ ᒐᔅᒐᔨᒪᑦ ᒪᕆᔨᒋ ᐊ ᑭᓄᐛᔨᒪᐅᓱᔨᒋ ᓇᒪ ᐅᒋ ᓂᑐᐛᔨᒪᐤ ᓂᑐᐎᔾ ᒐᒋ ᐃᑕᒋᒪᑭᓄᔨᒋ ᐊᓐᑕ ᐊ ᒥᒐᑎᓇᓄᐎᒡ, ᐊᑯ ᑲ ᑯᒂᑕᔨᑕᐧᒃ ᒋᔭᒻ ᒐᒋ ᓂᑭᑕᑦ᙮
20ᒪᒂᒡ ᐅᔭ ᐊ ᒪᒥᑐᓇᔨᑕᐧᒃ, ᐃᔅᐱ ᒪᒃ ᓇᐸᑦ, ᐅᑎᐸᔨᒋᒐᐛ ᐅᑦ ᐊᓐᒋᓂᒥᔪᐛ ᒋ ᓄᑯᓯᔅᑕᑯᐤ ᐅᐳᐛᒧᐅᓂᒡ ᐊ ᐃᑎᑯᑦ, “ᒍᓯᑉ, ᒋᔾ ᐊᓂᔭ ᑎᐱᑦ ᐊᓂᔅᒐ ᐅᑯᓯᓴ, ᐊᑲᐎᔾ ᑯᔅᑕᒋ ᒐᒋ ᐎᒋᒥᑦ ᒪᕆ ᐛᔅ ᑲ ᐸᔭᒋᓯᔨᒋ ᐊᒐᒂ ᒋ ᐃᑐᑕᑯᐤ ᒐᒋ ᐊᔭᐛᑦ ᐊᓂᔭᔪᐛ ᐊᐛᓴ᙮ 21ᒋᑭ ᓇᐸᓯᐎᔪᐛ ᐊᓂᔭ ᐅᑦ ᐊᐛᓯᒪ, ᒋᓴᔅ ᒋᑭ ᐃᓯᓂᐧᑲᑕᐛᐤ, ᐛᔅ ᐊᐅᒄ ᐅ ᒐ ᐱᒪᒋᐊᑦ ᐅᑦ ᐃᔨᒪ ᐅᒥᒐᑎᓯᐅᓂᔨᒡ ᐅᒡ᙮” ᐊᐅᑯᐤ ᐅᔭ ᑲ ᐃᑎᑯᑦ ᒍᓯᑉ ᐊᓂᔭ ᐊᓐᒋᓇ᙮
22ᐊᐅᑯᓐ ᐊᓐ ᑲ ᐃᔅᐱᔨᒡ ᑕᓐ ᑲ ᐸᒋ ᐃᔅᒋᔄᔨᒋ ᐅᑎᐸᔨᒋᒐᐤ ᐅᒋᔅᒋᐛᐃᒐᓯᒪ ᑲ ᐃᔅᒋᔄᔨᒋ, 23“ᐃᔎᔅ ᐊᑲ ᐊᔅᒄ ᐅᒋ ᒋᔅᒐᔨᒥᑯᑦ ᓇᐸᐛ ᒋᑭ ᐊᔭᐛᐤ ᐊᐛᓴ, ᒋᑭ ᓇᐸᓯᐎᔪᐛ ᒪᒃ, ᐃᒪᓄᐃᓪ ᒋᑭ ᐃᓯᓂᐧᑲᑕᑭᓄᐤ᙮” ᒋᓴᒪᓂᑐᐤ ᐊ ᐸᒋ ᑕᑦ ᐅᑕ ᐊ ᑕᔭᐧᒄ ᐃᔅᒋᔄᒥᑭᓐ ᐅ ᐃᓯᓂᐧᑲᓱᐅᓐ᙮
24ᐃᔅᐱ ᒪᒃ ᐱᔭᑯᐱᔨᑦ ᒍᓯᑉ ᐊᒋ ᓂᐸᑦ, ᒋ ᐃᑐᑎᒻ ᑕᓐ ᑲ ᐃᑎᓱᒥᑯᑦ ᐊᓂᔭ ᐅᑎᐸᔨᒋᒐᐛ ᐅᑦ ᐊᓐᒋᓂᒥᔪᐛ, ᒋ ᐎᒋᒪᐤ ᐊᓂᔭ ᒪᕆᔨᒋ᙮ 25ᒥᒄ ᒪᒃ ᓇᒪ ᐊᔅᒄ ᐅᒋ ᐎᐸᒪᐤ ᐸᑐᔅ ᑲ ᐱᒪᑎᓯᔨᒋ ᐊᓂᔭᔪᐛ ᐅᑦ ᐊᐛᓯᒥᔪᐛ᙮ ᒍᓯᑉ ᒪᒃ, ᒋᓴᔅ ᒋ ᐃᓯᓂᐧᑲᑕᐤ ᐊᓂᔭᔪᐛ ᐊᐛᓴ᙮
Currently Selected:
ᒪᑎᔪᐤ 1: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
