ᒐᓂᓯᔅ 43
43
ᒍᓯᑉ ᐎᐧᑲᓂᓴ ᓂᔄᐤ ᐊᑐᑕᔨᒋ ᐃᒋᑉᑎᒡ
1ᐊᔅᒄ ᒋ ᐱᒥᐱᔪᐤ ᐊ ᓯᐛᔨᓇᓄᐅᒡ ᐊᓐᑕ ᑲᐃᓇᓐ ᐊᔅᒋᒡ᙮ 2ᐃᔅᐱ ᑲᒋ ᒥᓯᐛ ᒥᒋᒡ ᐸᒂᓯᑭᓂᒥᓇ ᐃᒋᑉᑎᒡ ᑲ ᐅᒋ ᐃᔭᒡ, ᒋ ᐃᑎᑯᐅᒡ ᒪᒃ ᐅᑕᐎᐛᐛ, “ᒥᓐ ᐃᑐᑕᒄ ᐃᒋᑉᑎᒡ ᑭᔭ ᒐ ᐅᑎᓂᒧᐅᔭᒡ ᐊᐱᓯᔅ ᒥᒋᒻ᙮”
3ᒥᒄ ᒍᑕ ᒋ ᐃᑕᐤ ᐅᑕᐎᔭ, “ᐊᓐ ᐃᔪᐤ ᑲ ᑎᐸᔨᑕᐧᒃ ᐊᓂᔭᔪᐤ ᐊᔅᒋᔪᐤ ᓂᒋ ᐃᔭᒂᒥᑯᓇᓐ ᒐ ᐊᑲ ᒥᓐ ᒋ ᐛᐱᒥᔨᒥᑦ ᐸᑐᔅ ᐎᒐᐅᒥᒋᒐᓂ ᓂᓯᒥᓇᓇ᙮ 4ᓇᐃᒥᑕ ᒐᒋ ᐎᒐᐎᒥᑦ ᓂᐧᑲᓂᓯᓇᓐ, ᑲᐤ ᓂᑭ ᐃᑐᑕᓇᓐ ᐃᒋᑉᑎᒡ ᑭᔭ ᐊᑎᑐᐤ ᒋᑭ ᐃᔭᑎᔨᑎᓇᓐ ᒥᒋᒻ᙮ 5ᒥᒄ ᐊᑲ ᓇᐃᒥᑕ ᒐᒋ ᐎᒐᐎᒥᑦ, ᓇᒪ ᓂᑭ ᒋ ᐃᑐᑕᓇᓐ ᐃᒋᑉᑎᒡ, ᐛᔅ ᐊᓐ ᐃᔪᐤ ᑲ ᑎᐸᔨᑕᐧᒃ ᐊᓂᔭᔪᐤ ᐊᔅᒋᔪᐤ ᓂᒋ ᐃᑎᑯᓇᓐ ᒐ ᐊᑲ ᒥᓐ ᒋ ᐛᐱᒥᔨᒥᑦ ᐸᑐᔅ ᐸᒋ ᐎᒐᐅᒥᒋᒐᓂ ᓂᓯᒥᓇᓇ᙮”
6ᐊᑯ ᒐᑭᑉ, ᐃᔭᐱᒡ ᐃᔅᕋᐃᓪ ᐊᓯᓂᐧᑲᑕᑭᓄᐅᑦ ᐊᑕᑦ, “ᒐᒂᓐ ᒋᒋᐛ ᐛᒋ ᐅᔅᑕᐱᐃᔭᒄ ᐊ ᐎᑎᒧᐛᒄ ᐊᓐ ᐃᔪᐤ ᐊ ᑕᔨᒋ ᑯᑎᑲ ᒋᐧᑲᓂᓱᐛᐛ ?”
7ᒥᒄ ᒋ ᐃᑎᑯᐤ, “ᐊᓐ ᐃᔪᐤ ᓂ ᑯᒂᒋᒥᑯᓇᓐ ᐊ ᐃᑐᐅᒋᒡ ᑭᔭ ᐊ ᐸᐃᑯᔅᑲᓇᓱᐛᐧᒄ᙮ ᓂᒋ ᑯᒂᒋᒥᑯᓇᓐ ᐊᔅᒄ ᐸᒪᑎᓯᐛᐅᑕ᙮ ᐃᔭᐱᒡ ᒋ ᐎ ᓂᑐ ᒋᔅᒐᔨᑎᒻ ᐊ ᑕᔨᒂᓂ ᑯᑎᑲ ᓂᐧᑲᓂᓯᓇᓇ᙮ ᐊᑯ ᐛᑎᒧᐅᒋᒡ ᐊ ᐃᓯ ᑯᒂᒋᒐᒧᑦ᙮ ᒥᒄ ᓇᒪ ᓂ ᐅᒋ ᒋᔅᒐᔨᒪᓇᓐ ᒐᒋ ᐃᓯ ᐃᔨᒥᑦ ᒐᒋ ᐃᑐᑕᐃᒥᒋᔨᒋ ᐱᓐᒋᒥᓇ ᐃᒋᑉᑎᒡ᙮”
8ᐊᑯ ᒍᑕ ᐊᑕᑦ ᐅᑕᐎᔭ ᒐᑭᐸ, “ᓇᐃᒻ ᒐᒋ ᐎᒐᐅᑦ ᐱᓐᒋᒥᓐ ᑭᔭ ᑎᐛᒡ ᓂᑭ ᔅᑐᑕᓇᓐ ᒐᒋ ᐃᔭᔭᒡ ᒥᒋᒻ, ᐊᑯ ᒪᒃ ᒐ ᐊᑲ ᐛᐛᒡ ᐸᐃᒄ ᒋᒪᐧᑭᑕᔭᐧᒄ᙮ 9ᓂᑦ ᐊᓱᑎᒪᒐᓐ ᒐ ᒥᔪ ᑭᓄᐛᔨᒥᒃ᙮ ᐃᔅᐱ ᐊᑲ ᑲᐤ ᐸᑥᑕᓇ, ᓂᔾ ᒐ ᐊᑕᒪᔨᒥᔨᓐ ᒐ ᐃᔅᐱᔅ ᐱᒪᑎᓯᔭᓐ᙮ 10ᐊᑲ ᓇᐅᔅ ᑕᔭᒂᒂ ᐊ ᐛᑕᔨᑎᒪᒄ, ᒐᔅᑎᓇᔅ ᓂᔄᐤ ᒋᐸ ᒋ ᑎᑯᓯᓇᓇᐱᓐ᙮”
11ᐊᑯ ᐊᑎᑯᒡ ᐅᑕᐎᐛᐛ, “ᐛᓴ ᐊᑯ ᒐ ᐃᓯᓇᑯᓂᒂ, ᐊᑯ ᐃᑐᑎᒥᒄ ᐅᒪ᙮ ᒐ ᐅᑎᓂᒪᒄ ᑲ ᒥᔽᓯᔨᒋ ᒐᒂᔪᐛ ᑲ ᓂᑕᐅᒋᒋ ᒋᑦ ᐊᔅᒋᓇᒡ᙮ ᐃᑐᑐᐛᐧᒄ ᐊᓐ ᐃᔪᐤ ᒧᔭᒻ ᒥᔨᐛᐅᓇ, ᒥᔭᐧᒄ ᓱᑈᒋᐅᓂᔪᐤ, ᑲᓯᐛᓯᐛᐳᔪᐤ, ᑲᐎᒋᒪᑯᓯᔨᒡ, ᑭᔭ ᐱᐧᑲᓇ᙮ 12ᓂᔄᐤ ᐃᔅᐱᔅ ᒐ ᑕᐧᑯᓂᒪᒄ ᓱᓇᔭᐤ ᐛᔅ ᑲᐤ ᒋᑭ ᐎ ᒋᓯᐧᑲᓱᓇᐛᐤ ᐊᓐ ᓱᓇᔭᐤ ᑲ ᒥᔅᑭᒪᒄ ᐊᓐᑕ ᑕᐧᑯᒡ ᒋᐅᑐᐛᒡ᙮ ᒂᔄᓐ ᒋᐱᑕᐃᑭᓄᔨᒐ᙮ 13ᔅᑐᑕᐃᐧᒄ ᒋᓯᒧᐛᐤ ᑭᔭ ᓂᑐᐛᐱᒥᐧᒄ ᐊᓄᒡ ᐊᓐ ᐃᔪᐤ ᑲ ᑎᐸᔨᑕᐧᒃ ᐊᓂᔭᔪᐤ ᐊᔅᒋᔪᐤ᙮ 14ᑭᒪ ᒥᓯᐛ ᐊᓯ ᓱᐧᑲᑎᓯᑦ ᒋᓴᒪᓂᑐᐤ ᐃᑐᑐᐛᑦ ᐊᓂᔭ ᐃᔪᐛ ᒐᒋ ᒋᔅᑎᒪᒐᔨᒥᑎᑕᑯ ᐊᑯ ᒪᒃ ᒐᒋ ᐱᔅᑎᓂᒪᑕᒄ ᒋᓯᒧᐛᐛ ᐱᓐᒋᒥᓇ ᑭᔭ ᑯᑎᑲ ᒋᐧᑲᓂᓱᐛᐛ ᓯᒥᐅᓇ, ᒥᔅᑭᒥᑯᐅᔭᓇ ᓂᑦ ᐊᐛᓯᒥᒡ, ᓇᐧᑲᑕᔨᒧᐅᓐ ᓂ ᓴᑭᔅᒋᓇᔅᑲᑯᓐ᙮”
ᐎᐧᑲᓂᓯᒪᐅᒡ ᒥᓐ ᓇᔅᑯᐛᒡ ᒍᓯᐸ
15ᐊᑯ ᐎᐧᑲᓂᓯᒪᐅᒡ ᒐ ᑐᑕᒡ ᒥᔨᐛᐅᓇ ᑭᔭ ᓂᔄᐤ ᐃᔅᐱᔅ ᓱᓇᔭᔪᐤ ᑭᔭ ᐃᒋᑉᑎᒡ ᐊ ᑐᑕᒡ ᐱᓐᒋᒥᓇ ᐊ ᐎᒐᐛᒡ᙮ ᑲᒋ ᑕᑯᓯᒡ, ᒍᓯᐸ ᒋ ᓂᑐᐛᐱᒪᐅᒡ᙮ 16ᐃᔅᐱ ᒍᓯᑉ ᐎᔭᐱᒪᑦ ᐱᓐᒋᒥᓇ ᐊ ᐎᒐᐛᔨᒋ, ᒋ ᐃᑕᐤ ᐊᓂᔭ ᑭᓄᐛᔨᑎᔭᑭᓇ ᑲ ᑭᓄᐛᔨᑎᒥᔨᒋ ᐎᒡ, “ᓂᒋᒡ ᐃᑐᑕᐃᒡ ᐅᒡ ᐃᔪᒡ, ᒐ ᓂᐸᐃᑦ ᐊᐛᓯᔅ ᑭᔭ ᒐ ᐊᔭᔅᑯᔅᑕᔨᓐ ᒐ ᒥᒋᓱᓇᓄᐅᒡ, ᐛᔅ ᓂᑭ ᐎᒋᒥᒋᓱᒥᑯᒡ ᐅᒡ ᐃᔪᒡ ᐊᐱᑕᒋᓯᑲᔨᒐ᙮”
17ᑭᓄᐛᔨᑎᔭᑭᓐ ᒋ ᐃᑐᑎᒻ ᑲ ᐃᑎᓱᐛᔨᒋ ᒍᓯᐸ᙮ ᒋ ᐃᑐᑕᐤ ᒪᒃ ᐎᐧᑲᓂᓯᒪᐛ ᒍᓯᐸ ᐎᒋᔨᒡ᙮ 18ᒪᒂᒡ ᐊᑐᑕᑭᓄᐅᒡ ᒥᒋᐛᐱᒡ, ᒋ ᑯᔅᑕᒍᐅᒡ ᑭᔭ ᒋ ᐃᑎᑐᐅᒡ, “ᒋ ᐸᓱᐅᑯᓄᐤ ᐅᑕ ᐎᒋᒡ ᐊᓐ ᓱᓇᔭᐤ ᐅᒡ ᑲᐤ ᑲ ᐱᑕᐃᑭᓄᒂ ᒋᐅᑎᓇᒡ ᐅᔅᑭᒡ ᐅᑕ ᑲ ᑎᑯᓯᓂᔭᐧᒄ᙮ ᒋᑭ ᑕᒪᔨᒥᑯᓄᐅᒡ ᑭᔭ ᒐ ᒂᔅᑯᑕᑕᐧᑯᒡ ᑭᔭ ᒋᑭ ᐅᑎᓂᑯᓄᐤ ᒐᒋ ᐅᑦ ᐊᑐᔅᒐᔭᑭᓂᒥᑕᑕᐧᒄ ᐊᓯᒡ ᒐ ᐅᑎᓇᒡ ᑲᓂᐧᑲᑎᓯᔨᒋ ᒋᑲᐸᐃᑭᔎᒥᓄᐛ᙮”
19ᐊᑯ ᓂᔭᑕᒡ ᑲ ᑭᓄᐛᔨᑎᒥᔨᒋ ᒥᒋᐛᐱᔪᐤ ᑭᔭ ᒋ ᐃᔨᒪᐊᐅᒡ ᒪᒃ ᒋᐱᔎᒡ ᒥᒋᐛᐱᒡ, 20ᒋ ᐃᑕᐅᒡ ᒪᒃ, “ᓂᒋ ᑎᑯᓯᓇᓐ ᐅᑕ ᓴᔅ ᐸᐃᒂᐤ ᒐᒋ ᐃᔭᔭᒡ ᒥᒋᒻ᙮ 21ᒥᒄ ᐃᔅᐱ ᐊᑎ ᐎᒋᔭᒡ ᑕᐱᔅᑲᒡ, ᒂ ᐊᐱᐧᑯᓂᒪᒡ ᓂᐅᑎᓇᓇ ᑭᔭ ᒥᓯᐛ ᐊᐛᓐ ᒂ ᒥᔅᑲᐧᒃ ᐅᓱᓇᔭᓂᒻ ᐊ ᑎᑯᓂᔨᒡ ᑕᐧᑯᒡ ᐎᐅᑎᒡ᙮ ᒥᓐ ᒪᒃ ᑲᐤ ᓂ ᐸᑕᓇᓐ᙮ 22ᐃᔭᐱᒡ ᑯᑎᒃ ᓱᓇᔭᐤ ᓂ ᐸᑕᓇᓐ ᐊᑎᑐᐤ ᒐᒋ ᐃᔭᔭᒡ ᒥᒋᒻ᙮ ᓇᒪ ᓂ ᒋᔅᒐᔨᒪᓇᓐ ᐊᐛᓐ ᑲᐤ ᑲ ᐊᔅᑕᑦ ᓂᓱᓇᔭᓂᒥᓇᓂᔪᐤ ᐊᓐᑕ ᓂᐅᑎᓇᒡ᙮”
23ᒥᒄ ᒋ ᐃᑎᑯᐅᒡ ᑭᓄᐛᔨᑎᔭᑭᓇ, “ᒋᔭᒪᔨᑎᒥᒄ, ᐊᑲ ᑯᔅᑕᒋᒄ᙮ ᐊᓐ ᒋᓴᒪᓂᑐᐤ ᒋᔨᐛᐤ ᑭᔭ ᒍᑕᐎᐛᐤ ᐊᔨᒥᑐᐛᒄ ᒋᐱᑕᐊᒧᒐ ᓱᓇᔭᔪᐤ ᒋᐅᑐᐛᒡ, ᓂᒋ ᑲᔅᑎᓇᓐ ᓱᓇᔭᐤ ᑲ ᒋᓯᐧᑲᓱᔭᒄ ᐸᒂᓯᑭᓂᒥᓇ᙮” ᐊᑯ ᑭᓄᐛᔨᑎᔭᑭᓐ ᒐ ᑐᑕᑦ ᑭᔭ ᒂ ᐸᓱᐛᑦ ᓯᒥᐅᓇ᙮
24ᒋ ᒋᔅᒐᔨᑎᒧᒡ ᐎᐧᑲᓂᓯᒪᐅᒡ ᒐ ᒥᒋᓱᒡ ᒍᓯᐸ ᐎᒋᔨᒡ ᐃᔭᐱᑕᒋᓯᑲᔨᒐ᙮ ᑲᒋ ᐱᒐᒡ ᒥᒋᐛᐱᔪᐤ, ᑭᓄᐛᔨᑎᔭᑭᓐ ᒂ ᒥᔭᑦ ᐎᐧᑲᓂᓯᒪᐛ ᓂᐱᔪᐤ ᒐᒋ ᒋᔅᑕᐸᐛᓯᑕᔨᒋ ᑭᔭ ᒋᓯᒥᒪᐤ ᑲᓂᐧᑲᑎᓯᔨᒋ ᐅᑲᐸᐃᑭᔎᒥᔪᐛ᙮ 25ᒪᒂᒡ ᐎᐧᑲᓂᓯᒪᐅᒡ ᐊ ᐊᓱᐛᐱᒪᒡ ᒍᓯᐸ ᒐᒋ ᑎᑯᓯᓂᔨᒋ, ᒋ ᒧᓴᔅᑕᐅᒡ ᒥᔨᐛᐅᓇ ᑲ ᐸᑐᐛᒡ᙮
ᐎᐧᑲᓂᓯᒪᐅᒡ ᐎᒋᒥᒋᓱᒪᐅᒡ ᒍᓯᐸ
26ᐃᔅᐱ ᑕᑯᓯᓂᔨᒋ ᒍᓯᐸ, ᒋ ᒥᔭᐅᒡ ᒥᔨᐛᐅᓇ ᑲ ᐸᑕᒡ ᐊ ᓄᐛᒋᔅᑐᐛᒡ᙮ 27ᒋ ᐛᒋᔭᒪᐤ ᒍᓯᑉ ᑭᔭ ᒂ ᐃᑕᑦ, “ᒥᔪ ᐱᒪᑎᓯᐤ ᐊ ᒍᑕᐎᐛᐤ, ᐊᓐ ᒋᓴᐃᔪᐤ ᑲ ᐊᔨᒧᒪᒄ ? ᐊᔅᒄ ᐊ ᐱᒪᑎᓯᐤ ?”
28ᒋ ᐎᑎᒧᐛᐅᒡ ᒪᒃ, “ᒋᑦ ᐊᑐᔅᒐᔭᑭᓐ ᓄᑕᐎᓇᓐ ᐊᔅᒄ ᒥᔪ ᐱᒪᑎᓯᐤ᙮” ᒥᓐ ᒂ ᓄᐛᒋᔅᑐᐛᒡ ᐊ ᒋᔅᑕᔨᒪᒡ ᒍᓯᐸ᙮
29ᐃᔅᐱ ᒍᓯᑉ ᐎᔭᐱᒪᑦ ᐅᓯᒪ ᐱᓐᒋᒥᓇ, ᒂ ᐃᑕᑦ, “ᐊᐛᐤ ᒋᓯᒧᐛᐤ ᑲᒋ ᐃᔭᔨᒧᑎᒧᐅᔭᒄ᙮ ᒋᓴᒪᓂᑐᐤ ᒋᑭ ᐎ ᒥᔪᑐᑕᒄ, ᓂᑯᔅ᙮” 30ᐊᑯ ᒍᓯᑉ ᒋ ᐃᔭᓯᒋᐤ ᐛᔪᐎᑦ, ᐛᔅ ᒋᔅᑎᒪᒐᔨᒪᐤ ᐅᓯᒪ, ᒂᔅᑕᒐ ᑲᐱᔅᒋᒐᔭᔨᒡ ᒋ ᐃᑐᑕᐤ ᑭᔭ ᒂ ᒪᑦ᙮
31ᑲᒋ ᒪᑦ, ᒂ ᐛᐸᑲᐎᓱᑦ ᑭᔭ ᑲᐤ ᓇᑐᐛᐱᒪᑦ ᐎᐧᑲᓂᓴ᙮ ᐃᔅᐱ ᑲᒋ ᒋᔭᒪᐛᔨᑕᐧᒃ, ᒋ ᐃᑎᓱᒪᐤ ᐅᑦ ᐊᐱᒋᐊᑭᓇ ᒐᒋ ᒪᑎᓄᐛᔨᒋ ᒥᒋᒥᔪᐤ᙮
32ᒍᓯᑉ ᒋ ᐸᐃᑯᒥᒋᓱᐤ, ᐎᐧᑲᓂᓴ ᑎᐸᓐ ᒥᒋᓱᐛᑭᓇᑎᑯᒡ ᒋ ᐊᐱᔪᐛ ᑭᔭ ᐃᒋᑉᑦ ᐃᔪᒡ ᑯᑎᒋᔪᐤ ᒥᒋᓱᐛᑭᓇᑎᑯᔪᐤ ᒋ ᐊᐳᐅᒡ᙮ ᐛᔅ ᐃᒋᑉᑦ ᐃᔪᒡ ᐅᑦ ᐃᑐᐅᓄᐛᒡ ᓇᒪ ᐅᒋ ᓇᐊᔨᒪᑭᓄᐎᒡ ᒐᒋ ᐎᒋᒥᒋᓱᒪᒡ ᐃᑉᕈᐤ ᐃᔪᐛ᙮ 33ᒥᒋᓱᐛᑭᓇᑎᑯᒡ ᒋ ᐊᔭᑭᓄᐎᒡ ᐎᐧᑲᓂᓯᒪᐅᒡ ᐊ ᐸᑕᔅᑎᒥᐱᔅᑐᐛᒡ ᒍᓯᐸ, ᐊᑎ ᑕᑐᐤ ᐱᐳᓇᓯᒡ ᒋ ᐃᓯ ᓂᐸᑕᐳᐅᒡ, ᐊ ᒋᓴᐃᔨᐅᑦ ᐅᔅᑭᒡ ᐃᔅᐱᔅ ᐊ ᐊᐛᓯᐅᑦ᙮ ᒋ ᒥᔅᑲᑕᔭᔨᑎᒧᒡ ᑲ ᐃᑕᔭᑭᓄᐎᒡ᙮ 34ᒍᓯᑉ ᒋ ᐎᑎᒧᐛᐤ ᐅᑦ ᐊᐱᒋᐊᑭᓇ ᐅᒥᒋᓱᐛᑭᓇᑎᑯᒡ ᒐ ᐅᒋ ᒪᑎᓂᒧᐛᔨᒋ ᐎᐧᑲᓂᓴ ᒥᒋᒥᔪᐤ, ᒥᒄ ᐱᓐᒋᒥᓐ ᐱᑕᑕᒡ ᑕᑥᐤ ᒋ ᐃᔅᐱᓴᔪᐤ ᐅᒥᒋᒻ ᐃᔅᐱᔅ ᐊᓂᔭ ᑯᑎᑲ᙮ ᐊᑯ ᐎᐧᑲᓂᓯᒪᐅᒡ ᐛᒋ ᒥᓂᒪᒡ ᑭᔭ ᐛᒋ ᒥᔽᔨᑎᒧᒪᒡ ᒍᓯᐸ᙮
Currently Selected:
ᒐᓂᓯᔅ 43: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
