ᒐᓂᓯᔅ 44
44
ᑲ ᐅᓂᑎᒡ ᒥᓂᒂᑭᓐ
1ᑲᒋ ᐃᓯ ᒥᒋᓱᓇᓄᐅᒡ, ᒍᓯᑉ ᒋ ᐃᑎᓱᒪᐤ ᐅᑭᓄᐛᔨᑎᔭᑭᓇ ᑲ ᑭᓄᐛᔨᑎᒥᔨᒋ ᐎᒡ, “ᓴᑭᔅᒋᓂᑕᐤ ᐎᐅᑐᐛᐛ ᐸᒂᓯᓂᒥᓇ ᒥᒄ ᐊᔅᐱᔅ ᒋ ᐎᐅᓴᐊᒡ ᑲᓂᐧᑲᑎᓯᔨᒋ ᐅᑲᐸᐃᑭᔎᒧᐛᐛ ᑭᔭ ᒥᓯᐛ ᐊᑎᓯᒡ ᐅᓱᓇᔭᓂᒧᐛᐤ ᒐ ᐱᑕᐊᒧᑦ ᑕᐧᑯᒡ ᐎᐅᑐᐛᒡ᙮ 2ᒐ ᐱᑕᐊᒧᑦ ᓂᓱᓇᔭᐱᔅᑯᐅ-ᒥᓂᒂᑭᓂᔪᐤ ᐊᐛᓯᐅᑦ ᐎᐅᑎᒡ ᐊᓯᒡ ᐅᓱᓇᔭᓂᒻ ᑲ ᒋᓯᐧᑲᓱᐛᒐᑦ ᐸᒂᓯᑭᓂᒥᓇ᙮” ᐊᑯ ᑭᓄᐛᔨᑎᔭᑭᓐ ᒋ ᐃᑐᑎᒺᐤ ᑲ ᐃᑎᓱᒥᑯᑦ ᒍᓯᐸ᙮
3ᐎᐱᒡ ᒋᔭᒋᓴᐸᔭᔨᒡ ᒋ ᔅᑐᑕᐅᒡ ᐎᐧᑲᓂᓯᒪᐅᒡ ᒐ ᒋᐛᒡ ᐊᓯᒡ ᑲᓂᐧᑲᑎᓯᔨᒋ ᐅᑲᐸᐃᑭᔎᒧᐛᐛ᙮ 4ᐃᔅᐱ ᑲᒋ ᓂᑭᑕᒡ ᐅᑕᓇᔪᐤ ᑭᔭ ᐊᑲ ᐛᔪᐤ ᐅᒋ ᑕᒡ, ᒍᓯᑉ ᒋ ᐃᑕᐤ ᐅᑭᓄᐛᔨᑎᔭᑭᓇ ᒐᒋ ᓇᓴᐛᔨᒋ ᐊᓂᔭ ᐎᐧᑲᓂᓯᒪᐛ ᑭᔭ ᒐ ᓂᑲᓇᔨᒋ ᒐ ᐊᑲ ᐊᑎᑐᐤ ᒋ ᔅᑐᑕᔨᒋ᙮ ᒋ ᐃᑕᐤ ᐅᑭᓄᐛᔨᑎᔭᑭᓇ ᒐᒋ ᒥᔭᔨᒋ ᐅᔭ ᐃᔨᒧᐅᓂᔪᐤ, “ᒐᒂᓐ ᐛᒋ ᒋᐛᑎᐸᒪᒐᔭᒄ ᑲ ᒪᔭᑎᒡ ᒥᔅᑯᒡ ᑲ ᒥᔽᓯᒡ ? 5ᒐᒂᓐ ᐛᒋ ᒋᒧᑎᒧᐛᒄ ᓄᒋᒪᒻ ᐅᓱᓇᔭᐱᔅᑯ ᒥᓂᒂᑭᓐ ? ᐊᐅᑯᔪᐤ ᐊᓂᔭ ᒪᓂᒂᒐᑦ ᒥᓂᒂᑭᓂᔪᐤ ᑭᔭ ᐃᔭᐱᒋᑕᑦ ᒐᒋ ᓂᑲᓂᐎᑎᒪᒐᑦ, ᑕᑈ ᒥᒋᓐ ᒐᒂᓐ ᐊ ᐃᑐᑎᒪᒄ᙮”
6ᐊᑯ ᑭᓄᐛᔨᑎᔭᑭᓐ ᒐ ᑐᑕᑦ ᓂᔭᓴᐛᑦ ᐎᐧᑲᓂᓯᒪᐛ᙮ ᐃᔅᐱ ᒪᒃ ᐛᑎᑕᑦ ᒋ ᐎᑎᒧᐛᐤ ᒐᒂᔪᐤ ᑲ ᐃᑎᑯᑦ ᒍᓯᐸ ᒐ ᐃᑕᑦ᙮ 7ᒥᒄ ᐊᓐᒡ ᐎᐧᑲᓂᓯᒪᐅᒡ ᐃᑕᐅᒡ, “ᓇᒪ ᓂ ᒋᔅᒐᔨᑕᓇᓐ ᒐᒂᓐ ᐃᔭᔨᒧᑎᒥᓐ, ᐊᑐᒡ ᒋ ᓂᑕ ᒋ ᐃᑐᑎᒧᒡ ᐅᔭ ᒋᑦ ᐊᐱᒋᐊᑭᓐᒡ᙮ 8ᒋ ᒋᔅᒐᔨᑕᓐ ᑲᐤ ᑲ ᐸᑥᑕᒡ ᑲᐃᓇᓐ ᐊᔅᒋᒡ ᐅᒡ ᐊᓐ ᓱᓇᔭᔪᐤ ᑲ ᒥᔅᑭᒪᒡ ᐊᓐᑕ ᑕᐧᑯᒡ ᓂᐅᑎᓇᒡ᙮ ᒐᒂᓐ ᒪᒃ ᓂᐸ ᐅᒋ ᒋᒧᑎᓇᓐ ᓱᓇᔭᐱᔅᒄ ᑭᔭ ᒪᒃ ᐎᔄᐅᓱᓇᔭᐱᔅᒄ ᒋᐅᒋᒪᒻ ᐎᒋᒡ ᐅᒡ ?” 9ᒥᔅᑯᐅᑕ ᐊᓐ ᐊᐛᓐ ᐊᑎᓯᔭᒡ ᑲᒋ ᒋᒧᑎᒂ ᒥᓂᒂᑭᓂᔪᐤ, ᓂᐳᐅᓂᒡ ᒋᑭ ᒋ ᐃᓯ ᐱᔅᑎᓄᐤ, ᐊᑯ ᒥᓯᐛ ᐊᑎᓯᔭᒡ ᒐ ᐅᑎᓂᔭᒡ ᒧᔭᒻ ᒋᑦ ᐊᑐᔅᒐᔭᑭᓂᒡ᙮
10ᐊᑯ ᑭᓄᐛᔨᑎᔭᑭᓐ ᐊᑕᑦ, “ᐊᐅᑯᓐ ᒐ ᐃᓯᓇᒂᒡ ᒧᔭᒻ ᐊᔅᒋᔄᔨᓐ᙮ ᐊᓐ ᐊᐛᓐ ᒪᔅᑯᐛᑭᓄᐅᑦ ᒐ ᑭᓄᐛᔨᑎᒧᒂ ᒥᓂᒂᑭᓂᔪᐤ ᓂᑭ ᐅᑦ ᐊᑐᔅᒐᔭᑭᓂᒥᑐᐛᐤ, ᐊᑯ ᒋᔨᐛᐤ ᒥᓯᐛ ᐊᑎᓯᔭᒄ ᒋᑭ ᒋ ᔅᑐᑕᓇᐛᐤ᙮”
11ᐊᑯ ᒥᓯᐛ ᐸᐸᐃᒄ ᐎᐧᑲᓂᓯᒪᐤ ᒋᔅᑎᐸᐤ ᐊᔅᑕᑦ ᐎᐅᑦ ᒧᔅᑎᔅᑭᒥᒡ ᑭᔭ ᓯᔭᓇᐧᒃ᙮ 12ᐊᒋ ᓴᓇᐸᐎᔨᒋ ᐎᐅᑎᔪᐛ ᐅᔅᑭᒡ ᓇᔭᓂᑐᓂᒐᑦ ᐸᑎᒪ ᐊᐛᓯᐎᔨᒋ ᐛᑎᒋᐱᔨᑦ ᑭᔭ ᐱᓐᒋᒥᓐ ᐎᐅᑎᒡ ᒋ ᒥᔅᑲᑭᓄᐎᔪᐤ ᒥᓂᒂᑭᓂᔪᐤ᙮ 13ᒋ ᑯᔅᑯᓯᐃᑯᐅᒡ ᐎᐧᑲᓂᓯᒪᐅᒡ, ᒂ ᐱᑯᐱᑕᒡ ᐅᑦ ᐊᐱᒋᑕᐅᓄᐛᐛ ᐊᑯᐸᑕᔨᑕᒡ᙮ ᒋᔅᑎᐸᐤ ᒋ ᐳᓯᑐᐛᐅᒡ ᐎᐅᑐᐛᐛ ᑲᓂᐧᑲᑎᓯᔨᒋ ᐅᑲᐸᐃᑭᔎᒧᐛᐛ ᑭᔭ ᑲᐤ ᒐᐛᒡ ᐅᑕᓇᒡ ᐊᓯᒡ ᒍᓯᐸ ᐅᑦ ᐊᐱᒋᐊᑭᓂᔪᐛ᙮
14ᐃᔅᐱ ᒍᑕ ᑭᔭ ᐎᐧᑲᓂᓴ ᐛᑎᑕᒺᒡ ᒍᓯᐸ ᐎᒋᔪᐤ, ᐊᔅᒄ ᒋ ᑕᔪᐛ᙮ ᒋ ᓄᒋᔅᑐᐛᐅᒡ ᐊ ᒋᔅᑕᔨᒪᒡ᙮ 15ᐊᑯ ᒍᓯᑉ ᐊᑕᑦ, “ᒐᒂᓐ ᐅ ᑲ ᐃᑐᑎᒪᒄ ? ᓇᒪ ᓇ ᒋ ᐅᒋ ᒋᔅᒐᔨᑕᓇᐛᐤ ᐊᓐ ᓇᐸᐤ ᑕᐸᔨᒋᒐᑦ ᒧᔭᒻ ᓂᔾ ᐊᔭᑦ ᓱᐧᑲᑎᓯᐅᓂᔪᐤ ᒐ ᒋᔅᒐᔨᑕᐧᒃ ᒐᒂᔪᐤ ᐊ ᐊᑲ ᑯᑎᑲ ᒋᔅᒐᔨᑎᒥᔨᒋ ?”
16ᐊᑯ ᒍᑕ ᐊᑕᑦ, “ᓇᒪ ᓂ ᒋᔅᒐᔨᑕᓇᓐ ᒐᒂᓐ ᒐ ᐃᑎᑕᒡ, ᐅᒋᒪᐤ᙮ ᓇᒪ ᓂ ᒋᔅᒐᔨᑕᓇᓐ ᑕᓐᑕ ᒐ ᐅᒋ ᒋᔅᒐᔨᑕᒥᐃᑕᒡ ᐊ ᒥᔽᑎᓯᔭᒡ᙮ ᐛᔅ ᒋᓴᒪᓂᑐᐤ ᒋ ᐛᐸᑎᔨᐛᐤ ᒋᑦ ᐊᑐᔅᒐᔭᑭᓇ ᐅᒥᒐᑎᓯᐅᓂᔪᐛ᙮ ᐊᑯ ᒪᒃ ᐊᓄᒡ, ᓂᔭᓐ ᐅ ᒥᓯᐛ ᒋᑦ ᐊᑐᔅᒐᔭᑭᓐᒡ, ᑕᐱᔅᑯᓐ ᐊᓐ ᐊᐛᓐ ᑲ ᐃᔭᑦ ᒥᓂᒂᑭᓂᔪᐤ ᐎᐅᑎᒡ ᑭᔭ ᒥᓯᐛ ᓂᔭᓐ ᐊᑎᓯᔭᒡ᙮”
17ᒥᒄ ᒍᓯᑉ ᒂ ᐃᑕᑦ, “ᓇᒪ, ᓇᒪ ᓂᒋ ᑐᑕᓐ᙮ ᒥᒄ ᐊᓐ ᐊᐛᓐ ᑲ ᐊᔭᑦ ᒥᓂᒂᑭᓂᔪᐤ ᓂᑭ ᐅᑦ ᐊᑐᔅᒐᔭᑭᓂᒥᓐ᙮ ᒥᒄ ᒋᔨᐛᐤ ᒥᓯᐛ ᐊᑎᓯᔭᒄ ᒋᔭᒪᔨᐃᑎᒧᐅᓂᒡ ᒐ ᒋᐛᔭᒄ ᒐ ᓂᑐᐛᐱᒪᒄ ᒍᑕᐎᐛᐤ᙮”
18ᐊᑯ ᒍᑕ ᒥᒋᒪ ᓂᔭᑕᑦ ᒍᓯᐸ ᑭᔭ ᐃᑕᐤ, “ᐅᒋᒪᐤ, ᓇᐃᒥ ᐛᐃᐱᔅᒋᔅ ᒐᒋ ᐃᔨᒥᐃᑕᓐ, ᓄᒋᒪᒻ᙮ ᒧᔭᒻ ᐃᒋᑉᑎᒡ ᒋᓴᐅᒋᒪᐤ ᒋᑦ ᐃᑕᔨᑕᑯᓯᓐ᙮ ᒐᒂᓐ ᐎᔭᔨᑎᒥᓐ, ᒋᑭ ᐃᑐᑎᒧᒡ ᐃᔪᒡ᙮ ᓂᔾ ᒥᒄ ᒋᑦ ᐊᐱᒋᐊᑭᓐ ᓂᑦ ᐃᑕᔨᑕᑯᓯᓐ᙮ ᐊᑯ ᐊᑲ ᒋᔄᐱᔅᑐᐎ ᐊ ᑯᒂᒋᒥᑕᓐ ᒐᒋ ᐃᔨᒥᑕᓐ᙮ 19ᐅᔅᑭᒡ ᐅᑕ ᐃᒋᑉᑎᒡ ᑲ ᑎᑯᓯᓂᔭᒡ ᒐᒋ ᐃᔭᔭᒡ ᐸᒂᓯᑭᓂᒥᓇ, ᔅᒋ ᑯᒂᒋᒥᓇᓐ ᐊᑕᒂ ᓄᑕᐎᓇᓐ ᑭᔭ ᒪᒃ ᓂᓯᒥᓇᓐ ? 20ᔅᒋ ᐎᑎᒪᑎᓇᓐ, ‘ᐊ ᑕᑦ ᓄᑕᐎᓇᓐ ᑭᔭ ᓂᓯᒥᓇᓐ, ᐊᓐ ᑲ ᐃᔪᑦ ᐊ ᒋᓴᐃᔪᔨᒋ ᓄᑕᐎᓇᓇ᙮ ᒋ ᐳᓂᐱᒪᑎᓯᔨᐛ ᐎᐧᑲᓂᓴ᙮ ᐎᔾ ᒥᒄ ᐸᐃᑯᓱᐤ ᐸᒪᑎᓯᑦ ᐅᑲᐎᔭ ᐅᒡ ᑭᔭ ᒋᒋᐛ ᓴᒋᐃᑯᐤ ᐅᑕᐎᔭ᙮’
21ᐊᑯ ᒂ ᐃᓯᔭᒡ ᒐᒋ ᐸᓱᐅᒋᒡ ᒋᔾ ᐛᒋᒡ ᒐᒋ ᐛᐱᒥᑦ᙮ 22ᒥᒄ ᔅᒋ ᐃᑎᑎᓇᓐ ᐊᑲ ᒋ ᓂᑭᑕᑦ ᐅᑕᐎᔭ, ᐛᔅ ᒪᒃ ᓂᑭᑕᑦ, ᒋᐸ ᐳᓂᐱᒪᑎᓯᔨᐛ ᐅᑕᐎᔭ᙮ 23ᐊᑯ ᒂ ᐃᓯᔭᒡ, ‘ᒥᓱᐤ ᐊᑲ ᐅᑕ ᐎᒐᐅᑕᒂ ᒋᓯᒧᐛᐤ, ᓇᒪ ᒥᓐ ᒋᑭ ᐛᐸᑕᓇᐛᐤ ᓂᑕᔅᑎᒥᐧᒄ᙮’ 24ᐊᑯ ᑲᐤ ᑲ ᓂᑐᐛᐱᒥᒋᒡ ᓄᑕᐎᓇᓐ ᑭᔭ ᓂᒋ ᐎᑎᒧᐛᓇᓐ ᒂ ᐃᔅᒋᔄᔨᓐ᙮
25ᐃᔅᐱ ᐎᔭᔨᑕᐧᒃ ᓄᑕᐎᓇᓐ ᒐᒋ ᑲᐤ ᐃᑎᓴᐎᒥᑦ ᐃᒋᑉᑎᒡ ᐊᑎᑐᐤ ᒐᒋ ᐃᔭᐅᒋᒡ ᒥᒋᒥᔪᐤ᙮ 26ᓂᒋ ᒋᔅᒋᓱᒪᓇᓐ ᒐ ᐊᑲ ᒥᓐ ᐛᐱᒥᑕᒡ ᐸᑐᔅ ᐎᒐᐅᒥᒋᒐᓂ ᓂᓯᒥᓇᓇ᙮
27ᓄᑕᐎᓇᓐ ᒂ ᐃᓯᐃᒥᑦ, ‘ᒋᔅᒐᔨᑕᓇᐛᐤ ᓂᐅ ᕋᐃᒍᓪ ᒥᒄ ᓂᓱ ᑲ ᓂᑕᐅᒋᔭᑦ ᓂᑯᓴ᙮ 28ᐸᐃᒄ ᓴᔅ ᓂᒋ ᓂᑭᑐᒄ᙮ ᒋ ᐸᐱᑯᐱᑎᑯᒐ ᒥᒋ ᐊᐛᓯᓴ᙮ ᓴᔅ ᐊ ᐊᑲ ᒪᒃ ᓂᑕ ᐛᐱᒥᒃ᙮ 29ᒥᔅᑭᒥᔭᒂ ᐃᔭᐱᒡ ᐅ ᓂᑯᔅ ᑭᔭ ᐎᔭᔅᑎᒐ, ᒋᑭ ᓇᔍᔨᑎᒥᐃᓇᐛᐤ᙮’
30ᓄᑕᐎᔾ ᐅᐱᒪᑎᓯᐅᓐ ᑭᔭ ᐱᓐᒋᒥᓐ ᐅᐱᒪᑎᓯᐅᓐ ᐛᔅ ᐸᐃᑯᓂᔨᐛ᙮ ᐊᑯ ᑲᐤ ᓂᑐᐛᐱᒥᒋᒐ ᓄᑕᐎᓇᓐ ᐊᑲ ᐎᒐᐅᒋᒡ ᐱᓐᒋᒥᓐ, 31ᒋᑭ ᐳᓂᐱᒪᑎᓯᐤ ᓄᑕᐎᓇᓐ ᐊᑲ ᐛᐱᒪᒐ ᐱᓐᒋᒥᓇ, ᒋᒋᐛ ᒋᓴᐃᔪᐤ ᑭᔭ ᒋᐸ ᐳᓂᐱᒪᑎᓯᐤ ᐊ ᓇᐧᑲᑕᔨᑎᒥᐃᒋᒡ᙮ 32ᓂᒋ ᐊᓱᑎᒧᐛᐤ ᓄᑕᐎᔾ ᒐᒋ ᒥᔪ ᑭᓄᐛᔨᒥᒋ ᐱᓐᒋᒥᓇ, ᓂᒋ ᐃᑕᐤ᙮ ‘ᐃᔅᐱ ᐊᑲ ᑲᐤ ᐸᑥᑕᓇ, ᓂᔾ ᒐ ᐊᑕᒪᔨᒥᔨᓐ ᒐ ᐃᔅᐱᔅ ᐱᒪᑎᓯᔭᓐ᙮’
33ᐊᑯ ᑎᐱᑕᔨᒧᐅᓂᒡ ᒋ ᑯᒂᒋᒥᑎᓐ, ᓄᒋᒪᒻ, ᓂᔾ ᒐ ᐅᑦ ᐊᑐᔅᒐᔭᑭᓂᒥᑐᐎᓐ ᒥᔅᑯᒡ ᐱᓐᒋᒥᓐ, ᓇᐊᔨᒻ ᒐᒋ ᒋᐛᑦ ᐊᓯᒡ ᐎᐧᑲᓂᓴ᙮ 34ᐛᔅ ᑕᓐᑕ ᓂᐸ ᐅᒋ ᑲᐤ ᓂᑐᐛᐱᒪᐤ ᓄᑕᐎᔾ ᐊ ᐊᑲ ᐎᒐᐅᑦ ᐱᓐᒋᒥᓐ ? ᓇᒪ ᓂᑕᐸᔨᒧᓐ ᒐᒋ ᐛᐱᒥᒃ ᓄᑕᐎᔾ ᓇᐧᑲᑕᔨᒧᐅᓂᔪᐤ ᐊ ᐎᓯᒐᔨᑎᒥᐃᑯᑦ᙮”
Currently Selected:
ᒐᓂᓯᔅ 44: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
