ᒐᓂᓯᔅ 45
45
ᒍᓯᑉ ᐛᑎᒧᐛᑦ ᐎᐧᑲᓂᓴ ᐊᐛᓐ ᐎᔾ ᐃᔭᐅᑦ
Genesis 45.1-15 (Proper-15 Year A)
1ᐃᔅᐱ ᒍᓯᑉ ᐱᔭᑕᐧᒃ ᐅᔭ, ᓇᒪ ᐅᒋ ᑭᔅᒋᑕᐤ ᒐᒋ ᒋᐱᒋᐃᑎᓱᑦ ᐊ ᐛᐱᒥᑯᑦ ᐊᓂᔭ ᑲ ᓂᐳᔅᑕᑯᑦ, ᒂ ᐃᔅᒋᔄᑦ᙮ “ᐊᑯᔅ ᒥᓯᐛ ᐊᐱᒋᐊᑭᓐ ᒋᑭ ᐎᐎᔪᐤ ᒐᒋ ᓂᑭᓯᑦ᙮” ᓇᒪ ᐛᔪᐛ ᒋ ᐎᒋᑲᐳᐅᔅᑕᑯᐤ, ᒪᒂᒡ ᑲ ᒋᔅᒐᔨᑕᑯᐃᑎᓱᔅᑐᐛᑦ ᐎᐧᑲᓂᓴ᙮ 2ᑲᒋ ᐎᐎᔨᒋ ᐊᐱᒋᐊᑭᓇ, ᒂ ᒪᑦ ᒍᓯᑉ ᐊ ᐸᑕᑯᓯᑦ, ᒋ ᐸᑕᑯᐤ ᒪᒃ ᐊᐱᒋᐊᑭᓇ᙮ ᓇᓇᒐ ᒪᒃ ᒋ ᐸᑎᒥᔪᐛ ᐸᕈᐛ ᑭᔭ ᐊᓂᔭ ᑲ ᐃᑕᔨᒋ ᐎᒋᔨᒡ᙮
3ᒍᓯᑉ ᒪᒃ ᒋ ᐃᑕᐤ ᐎᐧᑲᓂᓴ, “ᓂᔾ ᐅ ᒍᓯᑉ; ᐊᔅᒄ ᐊ ᐱᒪᑎᓯᐤ ᓄᑕᐎᔾ ?” ᓇᒪ ᐅᒋ ᐎᑎᒪᑯᐤ ᒪᒃ ᐎᐧᑲᓂᓴ, ᐛᔅ ᒋ ᓴᒋᓯᔨᐛ ᐊ ᑭᓄᐛᐱᒪᑦ᙮
4ᐊᑯ ᐊᑕᑦ ᒍᓯᑉ ᐎᐧᑲᓂᓴ, “ᒥᒋᒪ ᐸᒋ ᓇᓯᒄ,” ᒥᒋᒪ ᒪᒃ ᒋ ᐸᒋ ᓇᑎᑯᐤ, ᑭᔭ ᒋ ᐃᑕᐤ; “ᓂᔾ ᐅ ᒍᓯᑉ ᒋᐧᑲᓂᓱᐛᐤ, ᐃᒋᑉᑎᒡ ᑲᒋ ᐊᑕᐛᒐᔭᒄ᙮ 5ᐊᑲ ᒥᑯᔅᑲᑕᔨᑎᒥᒄ, ᐊᑲ ᑭᔭ ᒋᔄᐃᓱᒄ ᐅᑕ ᑲᒋ ᐊᑕᐛᓯᔭᒄ; ᐛᔅ ᒋᓴᒪᓂᑐᐤ ᓂᒋ ᓂᑲᓂᑎᓴᐅᒄ ᒐᒋ ᐱᒪᒋᑕᔭᓐ ᐱᒪᑎᓯᐅᓇ᙮ 6ᐛᔅ ᓴᔅ ᓂᓱᐳᓇ ᒋ ᑯᐅᐧᑭᑕᓄᐤ ᐅᑕ ᐊᔅᒋᒡ ᑭᔭ ᐊᔅᒄ ᐱᑕᑕᒡ ᑕᑐᐤ ᐱᐳᓇ ᐃᔅᐱᔅ ᒐ ᐊᑲ ᓂᑕᐅᒋᒐᓄᐅᒡ ᑭᔭ ᒪᐛᒋᒐᓄᐅᒡ᙮ 7ᓂᒋ ᓂᑲᓂᑎᓴᐅᒄ ᒋᓴᒪᓂᑐᐤ ᒐᒋ ᐱᒪᒋᐊᒂᐤ ᒋᑦ ᐊᐛᓯᒧᐛᐅᒡ ᐊᔅᒋᒡ, ᑭᔭ ᒐᒋ ᐱᒪᒋᑕᔭᓐ ᒋᐱᒪᑎᓯᐅᓄᐛᐛ ᐊᔅᒋᔾ ᐱᒪᑎᓯᐅᓂᒡ᙮
8ᐊᑯ ᓇᒪᔭᐤ ᒋᔨᐛᐤ ᑲᐸᒡ ᐃᑎᓴᐎᔭᒄ ᐅᑕ, ᒥᒄ ᒋᓴᒪᓂᑐᐤ᙮ ᓂᒋ ᐃᓯᐃᒄ ᒐᒋ ᐅᑕᐎᑐᐎᒋ ᐸᕈᐛ, ᑭᔭ ᒐᒋ ᑎᐸᔨᑎᒧᒡ ᒥᓯᐛ ᐎᒋᔨᒡ ᑭᔭ ᒥᓯᐛ ᐊᔅᐱᓴᔨᒡ ᐃᒋᑉᑦ ᐊᔅᒋᔪᐤ᙮ 9ᒋᐱᒄ ᑭᔭ ᓂᑐᐛᐱᒥᐧᒄ ᓄᑕᐎᔾ, ᒐ ᐃᑕᒄ ᒪᒃ, ᐊᒂᑎᔅᒃ ᒋᑯᔅ ᒍᓯᑉ, ᒋᓴᒪᓂᑐᐤ ᓂᒋ ᑎᐸᔨᑎᒥᔨᒄ ᒥᓯᐛ ᐃᒋᑉᑦ ᐊᔅᒋᔪᐤ; ᐸᒋ ᓇᓯ, ᑭᔭ ᐊᑲ ᓱᐛᐱᔾ᙮ 10ᑯᓯᓐ ᐊᔅᒋᒡ ᒋᑭ ᐎᒋᓐ, ᒥᒋᒪ ᐊ ᑕᔭᓐ ᒪᒃ ᒋᑭ ᑕᓐ, ᒋᔾ ᒋᑦ ᐊᐛᓯᒥᒡ ᑭᔭ ᒍᓯᒥᒡ, ᒋᑦ ᐊᐛᓯᓯᒥᒡ ᑭᔭ ᒥᓯᐛ ᒐᒂᓐ ᑲ ᐃᓯ ᐊᔭᔨᓐ᙮ 11ᐊᑯᑕ ᒪᒃ ᒐ ᑭᓄᐛᔨᒥᑕᓐ ᑭᔭ ᓇᒪ ᒋ ᓂᑐᐛᔨᒥᑎᓐ ᒋᔾ ᑭᔭ ᐊᑕᑎᓯᔨᓐ ᑭᔭ ᒋᑦ ᐊᐛᓯᓯᒥᒡ ᒐ ᒋᔅᑎᒪᑎᓯᔭᒄ, ᐛᔅ ᐊᔅᒄ ᐱᑕᑕᒡ ᑕᑐᐤ ᐱᐳᓇ ᒐ ᐃᔅᐱᔅ ᑯᐅᐧᑭᑕᓄᐅᒡ᙮
12ᑭᓄᐛᐱᒥᒄ, ᑕᐱᔅᑯᓐ ᒋᔨᐛᐤ ᑭᔭ ᓂᓯᒻ ᐱᓐᒋᒥᓐ ᒋ ᐛᐸᑕᓇᐛᐤ ᐊᐅᒄ ᐅ ᓂᔾ, ᒍᓯᑉ, ᐊ ᐃᒥᔨᑎᑯᒡ᙮ 13ᒋᑭ ᐎᑎᒧᐛᐛᐤ ᓄᑕᐎᔾ ᒥᓯᐛ ᓂᒋᔅᑕᔨᑕᑯᓱᐅᓂᔪᐤ ᐊᓐᑕ ᐃᒋᑉᑎᒡ ᑭᔭ ᒥᓯᐛ ᑲ ᐃᓯ ᐛᐸᑎᒪᒄ᙮ ᒋᑭ ᐎ ᒋᐱᓇᐛᐤ ᑭᔭ ᒐᒋ ᐸᓱᐛᒄ ᐅᑕ ᓄᑕᐎᔾ᙮”
14ᐊᑯ ᒍᓯᑉ ᐎᔭᐛᒋᓇᑦ ᐅᓯᒪ ᐱᓐᒋᒥᓇ ᑭᔭ ᒥᔭᑦ᙮ ᑭᔭ ᐎᔾ ᐱᓐᒋᒥᓐ ᒋ ᒪᐤ ᑭᔭ ᒋ ᐛᐅᒋᓇᐤ᙮ 15ᑭᔭ ᓴᐛᔨᒪᑦ ᒥᓯᐛ ᐎᐧᑲᓂᓴ ᑭᔭ ᒥᔭᑐᐛᑦ᙮ ᐊᑯ ᒪᒃ ᐊᔨᒥᐃᑯᑦ ᐎᐧᑲᓂᓴ᙮
16ᐃᔅᐱ ᑕᐸᒋᒧᓇᓄᐎᒡ ᐸᕈᐤ ᐎᒋᒡ ᑲ ᑎᑯᓯᓂᔨᒋ ᒍᓯᑉ ᐎᐧᑲᓂᓴ, ᐸᕈᐤ ᑭᔭ ᐅᑦ ᐊᑐᔅᒐᔭᑭᓇ ᒋ ᒥᔽᔨᑎᒧᒡ᙮ 17ᐊᑯ ᐸᕈᐤ ᐊᑕᑦ ᒍᓯᐸ, “ᐃᓯᒡ ᐅᔭ ᒋᐧᑲᓂᓯᒡ, ᐎᐅᓴᐧᑯᒡ ᑲᓂᐧᑲᑎᓯᒡ ᒋᑲᐸᐃᑭᔎᒧᐛᐅᒡ ᐸᒂᓯᑭᓂᒥᓇ ᑭᔭ ᑲᐤ ᐃᑐᑕᒄ ᑲᐃᓇᓐ ᐊᔅᒋᒡ᙮ 18ᐸᓱᐎᐧᒄ ᒪᒃ ᒍᑕᐎᐛᐤ ᑭᔭ ᑲ ᐃᑎᓯᒡ ᑭᔭ ᒐ ᐸᒋ ᓇᓯᔭᒄ᙮ ᒋᑭ ᒥᔨᑎᓇᐛᐤ ᒪᒃ ᐊ ᐃᓯ ᒥᔽᓯᒡ ᐃᒋᑉᑦ ᐊᔅᒋᒡ, ᐊᓐᑕ ᒐ ᒥᒋᔭᒄ ᐊ ᐃᓯ ᐎᔪᐃᒥᑲᒡ ᐊᔅᒋᔾ᙮
19ᐃᔭᐱᒡ ᒐ ᐃᑎᑥᐤ, ᐅᑎᓇᐧᑯᒡ ᑎᑎᐱᑕᐸᓇᔅᑯᒡ ᐃᒋᑉᑦ ᐊᔅᒋᒡ ᐅᒡ, ᒐ ᐊᐱᒋᐊᒡ ᒋᑦ ᐊᐛᓯᒧᐛᐅᒡ ᑭᔭ ᒋᐅᐛᐅᒡ᙮ ᐸᓱᐎᐧᒄ ᒪᒃ ᒍᑕᐎᐛᐤ ᑭᔭ ᒐ ᐸᒋ ᑎᑯᓯᓂᔭᒄ᙮ 20ᒐ ᐊᑲ ᒪᒃ ᐅᑎᒪᔨᑎᒪᒄ ᒐᒂᓐ ᑲ ᐃᓯ ᑎᐸᔨᑎᒪᒄ, ᐛᔅ ᒋᔨᐛᐤ ᒋᑭ ᑎᐸᔨᑕᓇᐛᐤ ᐊ ᐃᓯ ᒥᔽᓯᒡ ᐃᒋᑉᑦ ᐊᔅᒋᒡ᙮”
21ᒐᑭᑉ ᐅᑯᓴ ᒋ ᐃᑐᑎᒥᔪᐛ ᑲ ᐃᑕᑭᓄᔨᒋ᙮ ᒧᔭᒻ ᑲ ᐃᑎᑯᑦ ᐸᕈᐛ, ᒍᓯᑉ ᒋ ᒥᔭᐤ ᑎᑎᐱᑕᐸᓇᔎ, ᑭᔭ ᒋᓂᒪᐊᐤ᙮ 22ᒥᓯᐛ ᐊ ᐃᑎᓯᔨᒋ ᒋ ᒥᔭᐤ ᐅᔅᒋ ᐊᐱᒋᑕᐅᓇ, ᒥᒄ ᐱᑕᑕᒡ ᑕᑥᐤ ᐊ ᐃᑕᔅᐱᓱᓇᓄᐎᒡ ᐊᐱᒋᑕᐅᓇ ᒋ ᒥᔭᐤ ᐱᓐᒋᒥᓇ ᑭᔭ ᓂᔅᑐ ᒥᑕᓯᒥᑎᓄᐤ ᓱᓇᔭᐱᔎ᙮ 23ᐅᑕᐎᔭ ᒪᒃ ᒋ ᐃᑎᓴᐊᒧᐛᐤ ᐸᐃᑯᔪᐤ ᑲᓂᐧᑲᑎᓯᔨᒋ ᑲᐸᐃᑭᔎᐛ ᐊ ᐎᐅᓯᔨᒋ ᑲ ᒥᔽᓯᔨᒋ ᒐᒂᓇ ᐃᒋᑉᑎᒡ ᐅᒡ, ᑭᔭ ᐸᐃᑯᔪᐤ ᑲᓂᐧᑲᑎᓯᔨᒋ ᓄᓴ ᑲᐸᐃᑭᔎᐛ ᐊ ᐎᐅᓯᔨᒋ ᐸᒂᓯᑭᓂᒥᓇ ᑭᔭ ᐸᒂᓯᑭᓇ ᑭᔭ ᒥᒋᒥᔪᐤ ᒐ ᐸᒋ ᓂᒪᔨᒋ᙮ 24ᐊᑯ ᒐ ᑎᓴᐛᑦ ᐎᐧᑲᓂᓴ, ᑭᔭ ᒪᒂᒡ ᐊᑎ ᔅᑐᑕᔨᒋ, ᒋ ᐃᑕᐤ, “ᐊᑲᐎᔾ ᑎᓯᐧᑲᑐᒄ ᒐ ᐊᑎ ᔅᑐᑕᔭᒄ᙮”
25ᐊᑯ ᐎᐧᑲᓂᓯᒪᐅᒡ ᐃᒋᑉᑎᒡ ᒋ ᐅᒋ ᔅᑐᑕᐅᒡ ᑭᔭ ᐃᔅᐱ ᐛᑎᑕᒡ ᐅᑕᐎᐛᐛ ᒐᑭᐸ ᐊᓐᑕ ᑲᐃᓇᓐ ᐊᔅᒋᒡ᙮ 26ᐊᑯ ᐛᑎᒧᐛᒡ ᐊ ᐃᑕᒡ, “ᒍᓯᑉ ᐊᔅᒄ ᐱᒪᑎᓯᐤ ! ᒥᓯᐛ ᐃᒋᑉᑦ ᐊᔅᒋᔪᐤ ᑎᐸᔨᑎᒻ !” ᒋ ᓯᔅᒋᑯᒋᐃᑯᐤ ᒐᑭᑉ ᐛᔅ ᓇᒪ ᐅᒋ ᑕᑈᑐᐛᐤ᙮ 27ᒋ ᐎᑎᒧᐛᐅᒡ ᒥᓯᐛ ᑲ ᐃᑎᑯᒡ ᒍᓯᐸ ᑭᔭ ᐃᔅᐱ ᒐᑭᑉ ᐎᔭᐸᑕᐧᒃ ᐊᓂᔭ ᑎᑎᐱᑕᐸᓇᔎ ᒍᓯᐸ ᑲ ᐃᑎᓴᐊᒪᑯᑦ ᒐ ᐃᑐᑕᐃᑯᑦ ᐃᒋᑉᑎᒡ, ᒋ ᐊᒂᑕᔨᑎᒻ ᑭᔭ ᑎᔭᑈᑕᐧᒃ ᐊᔅᒋᔄᔨᒋ᙮ 28ᐊᑯ ᒐᑭᑉ ᐊᔅᒋᔄᑦ, “ᓂ ᓯᔅᒋᑯᒋᒥᑯᐅᓐ, ᒍᓯᑉ ᓂᑯᔅ ᐊᔅᒄ ᐸᒪᑎᓯᑦ ! ᓂᑭ ᓂᑐᐛᐱᒪᐤ ᐊᒺᔭ ᓂᐱᔭᓐ᙮”
Currently Selected:
ᒐᓂᓯᔅ 45: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
