ᒐᓂᓯᔅ 40
40
ᒍᓯᑉ ᑲᒪᑯᓄᐛᓯᐅᒋᐛᐱᒡ ᑲ ᑕᑦ
1ᐸᐃᒂᐤ ᒐᓯᑲᔨᒡ, ᓂᓱ ᐃᒋᑉᑎᒡ ᒋᓴᐅᒋᒪᐤ ᐅᑯᐸᓇᒪ ᓇᒪ ᐅᒋ ᓇᐊᔨᑎᒥᐃᑯᐤ, ᐸᐃᒄ ᐅᒥᓇᐃᐛᐤ ᐃᔪᐤ ᑭᔭ ᑯᑎᒃ ᐅᒋᒪᐤ ᑲᐱᒥᓄᐛᔅᑦ᙮ 2ᒋᓴᐅᒋᒪᐤ ᒋ ᒋᔄᓯᔅᑐᐛᐤ ᐅᔭ ᓂᓱ ᑯᐸᓇᐛ᙮ 3ᐊᑯ ᒂ ᐃᑎᓱᒪᑦ ᐅᓂᑐᐱᔪᐅ-ᐅᒋᒪᒪ ᒐᒋ ᑎᔭᔨᒋ ᑲᒪᑭᓄᐛᓯᐅᒋᐛᐱᒡ, ᐊᓐᑕ ᐸᐃᑯᑕᐤ ᑲ ᑭᓄᐛᔨᒪᑭᓄᐅᑦ ᒍᓯᑉ᙮ 4ᒍᓯᐸ ᒪᒃ ᒐ ᐃᑐᑐᐛᐤ ᓂᑐᐱᔪᐅ-ᐅᒋᒪᐤ ᑭᔭ ᒋ ᐃᑎᓱᒪᐤ ᒐᒋ ᐃᑐᑐᐛᔨᒋ ᐊ ᓂᓯᔨᒋ ᑯᐸᓇᐛ᙮
ᒍᓯᑉ ᑲ ᐃᑥᔅᑎᒧᐛᑦ ᒋᓴᐅᒋᒪᐤ ᑯᐸᓇᐛ ᐅᐳᐛᒧᐅᓂᔪᐛ
5ᒥᒐᑐᒋᓯᑲᐛ ᒋ ᑕᐅᒡ ᐊ ᓂᓯᒡ ᑯᐸᓇᐅᒡ ᐊᓐᑕ ᑲᒪᑯᓄᐛᓯᐅᒋᐛᐱᒡ, ᐊᑯ ᐸᐃᒂᐤ ᑕᐱᔅᑲᔨᒡ ᑕᐱᔅᑯᓐ ᒋ ᐳᐛᒧᐅᒡ᙮ ᑕᑎᐸᓐ ᐊ ᐃᑥᒥᑭᓂᔨᒋ ᐅᐳᐛᒧᐅᓄᐛᐛ᙮
6ᐃᔅᐱ ᒍᓯᑉ ᑲ ᐸᒋ ᐱᑎᑯᐛᑦ ᒋᔭᒋᓴᐸᔭᔨᒡ, ᒋ ᐛᐱᒪᐤ ᐊ ᒥᑯᔅᑲᑕᔨᑎᒥᔨᒋ᙮ 7ᐊᑯ ᑲ ᑯᒂᒋᒪᑦ᙮ “ᑕᓇᒡ ᐛᒡ ᒥᑯᔅᑲᑕᔨᑎᒪᒄ ᐊᓄᒡ ᑲᓯᑲᒡ ?”
8ᒂ ᐎᑎᒪᑯᑦ, “ᑕᐱᔅᑯᓐ ᓂᒋ ᐳᐛᒧᓇᓐ ᑭᔭ ᓇᒪ ᑕᐤ ᐅᑕ ᐊᐛᓐ ᒐᒋ ᐎᑎᒪᒐᑦ᙮”
ᒍᓯᑉ ᐃᑕᐤ “ᓇᒪ ᓇ ᒋᓴᒪᓂᑐᐤ ᑎᐸᔨᑎᒻ ᐎᑎᒪᒐᐅᓇ ? ᐎᑎᒧᐅᒃ ᒋᐳᐛᒧᐅᓄᐛᐛ᙮”
9ᐊᑯ ᐊᓐ ᒥᓇᐃᐛᐤ ᐃᔪᐤ ᒪᒃ ᒋ ᐎᑎᒧᐛᐤ ᒍᓯᐸ ᐅᐳᐛᒧᐅᓐ, ᐊ ᐃᑕᑦ, “ᓂᐳᐛᒧᐅᓂᒡ, ᓱᒥᓇᑎᒄ ᓂᒋ ᐅᔅᑎᔅᑲᐎᔅᑕᒄ᙮ 10ᒋ ᓂᔅᑎᓇ ᐅᑎᐧᑯᓇ, ᒥᓐ ᐊᓴᒋᐱᒋᔨᒋ ᒋ ᐃᓯᓇᑯᓱᐅᒡ ᑭᔭ ᒂ ᐊᑎ ᐛᐱᑯᓄᐅᒋ ᑭᔭ ᒋ ᐊᑎᑕᐛ ᓱᒥᓇ᙮ 11ᒋᓴᐅᒋᒪᐤ ᒪᒃ ᐅᒥᓂᒂᑭᓐ ᓂᒋ ᑕᐧᑯᓂᒺᓐ, ᐊᑯ ᐛᑎᓂᒪᓐ ᓱᒥᓇ ᑭᔭ ᓂᒋ ᒪᒪᑯᓇᐅᒡ ᒪᒃ ᐅᒥᓂᒂᑭᓂᒡ, ᐊᑯ ᑲ ᒥᔨᒃ ᐅᒥᓂᒂᑭᓐ᙮”
12ᐊᑯ ᒍᓯᑉ ᐃᑕᐤ, “ᐊᐅᑯᐤ ᐊᑥᒥᑲᒡ ᒋᐳᐛᒧᐅᓐ᙮ ᐊᓂᐃ ᓂᔅᑐ ᐅᑎᐧᑯᓇ, ᐊᐅᑯᓂ ᓂᔅᑐ ᒋᓯᑲᐛ᙮ 13ᒋ ᓂᔅᑐ ᒋᓯᑲᒐ ᒪᒃ ᒋᓴᐅᒋᒪᐤ ᒋᑭ ᐛᐸᔨᑎᒪᒄ ᑭᔭ ᒋᑭ ᒋᐛᓂᒪᒄ ᒋᑦ ᐊᐱᑎᓯᐅᓂᔪᐤ, ᒋᑭ ᒥᔭᐤ ᐅᒥᓂᒂᑭᓐ ᐅᑎᒋᒡ ᒧᔭᒻ ᑲ ᐃᓯ ᐃᑐᑎᒥᓐ ᑲ ᒥᓇᐃᐛᐤ ᐃᔪᔨᓐ᙮ 14ᒥᒄ ᒐ ᒋᔅᒋᑐᐎᓐ ᐃᔅᐱ ᒥᓯᐛ ᐃᓯ ᒥᔪᐱᔨᓇ ᑭᔭ ᒐ ᐎᒋᔨᓐ ᒐᒋ ᐎᐎᔭᓐ ᐅᑕ ᑲᒪᑯᓄᐛᓯᐅᒋᐛᐱᒡ, ᒐ ᐃᔨᒥᑦ ᒋᓴᐅᒋᒪᐤ ᐊᔭᔨᒧᒥᔨᓐ᙮ 15ᐛᔅ ᒋᒧᑦ ᓂᒋ ᐸᓱᑯᐅᓐ ᐃᑉᕈᐤ ᐃᔪᒡ ᐅᑦ ᐊᔅᒋᐛᒡ ᐅᒡ, ᑭᔭ ᐅᑕ ᓇᒪ ᒐᒂᓐ ᓂ ᐅᒋ ᑐᑕᓐ ᒐ ᐅᒋ ᒋᐸᐅᑯᐎᔭᓐ᙮”
16ᐃᔅᐱ ᐅᒋᒪᐤ ᑲᐱᒥᓄᐛᔅᑦ ᐱᔭᑕᐧᒃ ᐊ ᒥᔽᔨᒡ ᐎᑎᒪᒐᐅᓂᔪᐤ, ᒋ ᐃᑕᐤ ᒍᓯᐸ, “ᓂᔾ ᑭᔭ ᓂᒋ ᐳᐛᒧᓐ, ᓂᔅᑐ ᐅᑎᐱᐅᑕ ᓂᒋ ᐱᒧᐅᑕᓐ ᑕᐧᑯᒡ ᓂᔅᑎᒂᓂᒡ᙮ 17ᐊᓂᒪ ᑕᐧᑯᒡ ᐅᑎᐱᐅᑦ ᒋ ᑎᑯᓐ ᒥᒋᒻ ᒥᓯᐛ ᐊ ᐃᓯᓇᒂᒡ ᒐ ᒥᒋᑦ ᒋᓴᐅᒋᒪᐤ᙮ ᐱᔭᓱᐅᒡ ᒋ ᒥᒍᐅᒡ ᐅᑎᐱᐅᑎᒡ ᐅᒡ ᑕᐧᑯᒡ ᓂᔅᑎᒂᓂᒡ᙮”
18ᐊᑯ ᒍᓯᑉ ᐛᑎᒧᐛᑦ, “ᐊᐅᑯᐤ ᐊᑥᒥᑲᒡ ᒋᐳᐛᒧᐅᓐ᙮ ᐊᓂᐃ ᓂᔅᑐ ᐅᑎᐱᐅᑕ, ᐊᐅᑯᓂ ᓂᔅᑐ ᒋᓯᑲᐛ᙮ 19ᒋ ᓂᔅᑐ ᒋᓯᑲᒐ ᒋᑭ ᐱᔅᑎᓂᒄ ᒋᓴᐅᒋᒪᐤ ᑭᔭ ᒐ ᐃᑎᓱᐛᑦ ᒐ ᒥᓂᔅᑎᒂᓇᓱᑯᐅᑦ᙮ ᐊᑯ ᒐ ᐊᑯᑕᑭᓄᐅᒡ ᒋᔪᐤ ᐊᓐᑕ ᒥᔅᑎᑯᒡ, ᐱᔭᓱᐅᒡ ᒪᒃ ᒋᑭ ᒥᒍᐅᒡ ᒋᐎᔭᓯᔪᐤ᙮”
20ᑲᒋ ᓂᔅᑐ ᒋᓯᑲᔨᒡ, ᒋ ᐅᒋᓯᑯᒧᐤ ᑭᔭ ᒋ ᒥᒋᓱᓇᓂᒐᐤ ᒋᓴᐅᒋᒪᐤ, ᒋ ᓂᑐᒪᐤ ᒥᓯᐛ ᐅᑦ ᐊᑐᔅᒐᔭᑭᓇ᙮ ᒋ ᐱᔅᑎᓇᐤ ᒪᒃ ᒥᓇᐃᐛᐤ ᐃᔪᐛ ᑭᔭ ᐅᒋᒪᐤ ᑲ ᐱᒥᓄᐛᓯᔨᒋ ᑭᔭ ᒋ ᐸᑐᐛᑭᓄᐤ ᑲᒪᑯᓄᐛᓯᐅᒋᐛᐱᒡ ᐅᒡ᙮ 21ᒋ ᒋᐛᓂᒧᐛᐤ ᒥᓇᐃᐛᐤ ᐃᔪᐛ ᐅᑦ ᐊᑐᔅᒐᐅᓂᔪᐤ᙮ 22ᒥᒄ ᒋ ᐃᑎᓱᐛᐤ ᒥᔅᑎᑯᒡ ᒐ ᐊᑯᔭᑭᓄᔨᒋ ᐅᒋᒪᐤ ᑲ ᐱᒥᓄᐛᓯᔨᒋ, ᒧᔭᒻ ᒍᓯᑉ ᑲ ᐃᔅᒋᔄᑦ ᒐ ᐃᔅᐱᔨᒡ᙮
23ᒥᓇᐃᐛᐤ ᐃᔪᐤ ᒪᒃ ᓇᒪ ᓂᑕ ᒪᒥᑐᓇᔨᒪᐤ ᒍᓯᐸ, ᒋ ᐅᓂᒋᔅᒋᑐᐛᐤ᙮
Currently Selected:
ᒐᓂᓯᔅ 40: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
