ᒐᓂᓯᔅ 39
39
ᒍᓯᑉ ᑭᔭ ᐸᑎᐸᕐ ᐎᐛ
1ᑲᒋ ᐃᔭᐛᒡ ᒍᓯᐸ ᐊᓐᒡ ᐃᔅᒪᐃᓪ ᐃᔪᒡ ᑭᔭ ᐃᒋᑉᑎᒡ ᑲ ᐃᑐᑕᐊᒡ, ᐸᑎᐸᕐ, ᒋᓴᐅᒋᒪᐤ ᐸᕈᐤ ᐅᓂᑐᐱᔪᐅ-ᐅᒋᒪᒪ, ᒂ ᐃᔭᐛᑦ ᐃᔅᒪᐃᓪ ᐃᔪᐛ ᐅᒡ᙮
2ᐅᑎᐸᔨᒋᒐᐤ ᒋ ᐎᒐᐛᐤ ᒍᓯᐸ ᑭᔭ ᒋ ᐃᑐᑐᐛᐤ ᒥᓯᐛ ᒐ ᐃᓯ ᒥᔪᐱᔨᒋ ᒪᒂᒡ ᑲ ᐊᑐᔅᒐᔨᒋ ᐊᓐᑕ ᐅᒋᒪᒥᔪᐛ ᐎᒋᔨᒡ᙮ 3ᒋ ᒋᔅᒐᔨᑎᒥᔪᐛ ᒍᓯᑉ ᐅᒋᒪᒪ ᐛᒋᐃᑯᑦ ᑎᐸᔨᒋᒐᓱᐛ᙮ ᐛᔅ ᒥᓯᐛ ᒐᒂᔪᐤ ᒍᓯᑉ ᑲ ᐃᑐᑕᐧᒃ ᒋ ᒥᔪᐱᔪᐤ᙮ 4ᒋ ᓇᐊᔨᑎᒥᐃᑯᐤ ᐸᑎᐸᕐ ᑭᔭ ᒂ ᐅᑎᓇᑦ ᒍᓯᐸ ᒧᔭᒻ ᐊᐱᒋᐊᑭᓇ, ᓇᓇᒐ ᐸᑎᐸᕐ ᒋ ᐱᔅᑎᓇᐤ ᒍᓯᐸ ᒐ ᑎᐸᔨᒪᔨᒋ ᒥᓯᐛ ᐊᐱᒋᐊᑭᓇ ᐊᓐᑕ ᐎᒋᒡ᙮ ᒍᓯᑉ ᒐᒃ ᒂ ᑭᓄᐛᔨᑎᒺᑦ ᒥᓯᐛ ᒐᒂᔪᐤ ᐅᒋᒪᒪ ᑲ ᑎᐸᔨᑎᒥᔨᒋ᙮ 5ᐅᑎᐸᔨᒋᒐᐤ ᒍᓯᐸ ᐅᒡ ᒋ ᐃᑐᑎᒻ ᒥᓯᐛ ᒐ ᐃᓯ ᒥᔪᐱᔨᒡ ᐊᓐᑕ ᐸᑎᐸᕋ ᐎᒋᔨᒡ ᑭᔭ ᐅᓂᑕᐅᒋᑕᑭᓂᔨᒡ᙮ 6ᒥᓯᐛ ᑲ ᑎᐸᔨᑕᐧᒃ ᐸᑎᐸᕐ ᒋ ᐱᔅᑎᓂᒧᐛᐤ ᒍᓯᐸ ᒐᒋ ᑭᓄᐛᔨᑎᒥᔨᒋ ᑭᔭ ᓇᒪ ᐅᒋ ᐊᔨᒪᑎᒥᐃᑯᐤ ᒐᒂᔪᐤ ᒥᒄ ᐊᓂᔭ ᒥᒋᒥᔪᐤ ᒐ ᒥᒋᑦ᙮
ᒋᓴᐱᐤ ᑭᔭ ᒋ ᒥᔪᓇᑯᓱᐤ ᒍᓯᑉ᙮ 7ᐸᑎᐸᕐ ᐎᐛ ᒋ ᐛᐱᒪᐤ ᒪᔪᓇᑯᓯᔨᒋ ᒍᓯᐸ ᑭᔭ ᒂ ᒧᔅᑕᓄᐛᑦ᙮ ᐸᐃᒂᐤ ᒐᓯᑲᔨᒡ ᒂ ᐃᑕᑦ, “ᐸᒋ ᐎᐸᒥ᙮”
8ᒥᒄ ᓇᒪ ᐅᒋ ᑕᑈᑐᐛᐤ ᒍᓯᑉ᙮ ᒂ ᐃᑕᑦ, “ᓂᒋ ᒥᔨᒄ ᓄᒋᒪᒻ ᒐᒋ ᑭᓄᐛᔨᑎᒧᒡ ᒥᓯᐛ ᒐᒂᔪᐤ ᐊ ᐃᔅᐱᔨᒡ ᐅᑕ ᓄᑎᒻ ᐎᒋᒡ᙮ ᓂᒋ ᑕᑈᐅᒐᔨᒥᒄ ᒐᒋ ᑭᓄᐛᔨᑎᒧᒡ ᒥᓯᐛ ᒐᒂᔪᐤ ᑕᐱᔨᐛᐅᓯᑦ᙮ 9ᓂᐸ ᒥᔨᒄ ᓄᒋᒪᒻ ᒥᒄ ᒐᒂᔪᐤ ᓇᑐᐛᔨᑎᒧᒡ, ᐛᔅ ᓂᔾ ᓂ ᑭᓄᐛᔨᑎᒺᓐ ᒥᓯᐛ ᒐᒂᔪᐤ ᐅᑕ ᐎᒋᒡ᙮ ᒥᒄ ᐊᑐᒡ ᒋ ᓇᐃᑎᒻ ᐅᔭ ᒐᒋ ᐃᑐᑎᒧᒡ᙮ ᒋᔾ ᐅ ᓄᒋᒪᒻ ᐎᐛ᙮ ᑕᓐᑕ ᓂᐸ ᐅᒋ ᑐᑕᓐ ᐅ ᒥᒋ ᒐᒂᓐ ᑭᔭ ᒐᒋ ᒥᒋᑐᑐᐅᒃ ᒋᓴᒪᓂᑐᐤ ?” 10ᐊᓯᑯᒻ ᒋᓯᑲᐛ ᒋ ᑯᒂᒐᐤ ᒍᓯᐸ, ᒥᒄ ᐃᔅᐱ ᑲ ᑯᒂᒋᒥᑯᒋ ᒍᓯᑉ ᒐᒋ ᐎᐸᒪᑦ ᑭᔭ ᒪᒃ ᒐᒋ ᑕᐛᑦ ᐊ ᑕᔨᒋ, ᓇᒪ ᐅᒋ ᑕᑈᑐᐛᐤ᙮
11ᐊᑯ ᐸᐃᒂᐤ ᒐᓯᑲᔨᒡ ᒍᓯᑉ ᒋ ᐃᑐᑕᐤ ᐊᓐᑕ ᐅᒋᒪᒪ ᐎᒋᔨᒡ ᒐᒋ ᐃᑐᑕᐧᒃ ᐅᑦ ᐊᑐᔅᒐᐅᓐ, ᐛᐛᒡ ᐸᐃᒄ ᓇᒪ ᐅᒋ ᑕᔪᐛ ᑯᑎᑲ ᐊᐱᒋᐊᑭᓇ ᐊᓐᑕ ᐱᑎᑭᒥᒡ᙮ 12ᒋ ᐛᐱᒥᑯᐤ ᐅᒋᒪᒪ ᐎᐎᐛ ᑭᔭ ᐅᑦ ᐊᑯᐱᒡ ᒂ ᐅᒋᒪᑭᓂᑯᑦ ᑭᔭ ᒂ ᐃᑎᑯᑦ, “ᐊᔅᑎᒻ ᐎᐸᒥ᙮” ᒥᒄ ᒋ ᐎᐎᐸᑕᐤ ᒍᓯᑉ ᒥᒋᐛᐱᒡ ᐊ ᓂᑭᑕᐧᒃ ᐅᑦ ᐊᑯᑉ ᐊᔅᒄ ᐊ ᑕᐧᑯᓂᒥᔨᒋ᙮
13ᐃᔅᐱ ᐸᑎᐸᕐ ᐎᐛ ᐎᔭᐸᑕᐧᒃ ᐊ ᓂᑭᑎᒥᔨᒋ ᐅᑦ ᐊᑯᐱᔪᐤ ᑭᔭ ᑲ ᐎᐎᐸᑕᔨᒋ ᒥᒋᐛᐱᒡ, 14ᒋ ᑕᑈᑕᐤ ᑯᑎᑲ ᐅᑦ ᐊᐱᒋᐊᑭᓇ ᑭᔭ ᒂ ᐃᑕᑦ, “ᒋ ᐸᓱᐛᐤ ᐅᑕ ᓂᐎᒋᒪᑭᓐ ᐅᔭ ᐃᑉᕈᐤ ᐃᔪᐛ ᒐᒋ ᐱᐛᔨᒥᑎᑕᐧᑯᐤ᙮ ᒋᐸ ᒋ ᐱᒐᐤ ᒥᒋᐛᐱᔪᐤ ᑭᔭ ᓂᒋ ᐎ ᒥᒋᑐᑕᒄ, ᒥᒄ ᓂᒋ ᐊᓯᒂᐛᓐ ᐊᔅᐱᔅ ᒋ ᐊᓯᒂᐅᒡ᙮ 15ᐃᔅᐱ ᐱᔭᑐᐅᑦ ᐃᔭᓯᒂᐅᒡ, ᒂ ᐎᐎᐸᑕᑦ ᐊ ᓂᑭᑕᐧᒃ ᐅᑦ ᐊᑯᑉ᙮”
16ᒋ ᑭᓄᐛᔨᑎᒺᐤ ᐅᑦ ᐊᑯᐱᔪᐤ ᐸᑎᒪ ᒍᓯᐸ ᐅᒋᒪᒥᔪᐛ ᑲ ᑎᑯᓯᓂᔨᒋ᙮ 17ᐊᑯ ᐸᐃᑯᑕᐤ ᒂ ᐃᑕᒋᒧᔅᑐᐛᑦ᙮ “ᐊᓐ ᐃᑉᕈᐤ ᐃᔪᐤ ᐅᑕ ᑲ ᐸᓱᐅᑦ ᓂᒋ ᐸᒋᓇᑎᒄ ᑭᔭ ᓂᒋ ᐎ ᒥᒋᑐᑕᒄ᙮ 18ᒥᒄ ᐃᔅᐱ ᐃᔭᓯᒂᐅᒡ, ᒂ ᐎᐎᐸᑕᑦ ᐊ ᓂᑭᑕᐧᒃ ᐅᑦ ᐊᑯᑉ᙮”
19ᐃᔅᐱ ᒍᓯᑉ ᐅᒋᒪᒪ ᑲ ᐸᑎᒺᑦ ᐎᐛ ᐅᑎᐸᒋᒧᐅᓂᔪᐤ, ᒋᒋᐛ ᒋ ᒋᔄᐳᐤ᙮ 20ᒂ ᐃᑎᓱᐛᑦ ᒐᒋ ᒪᑯᓇᑭᓄᔨᒋ ᑭᔭ ᒋᐸᐛᑭᓄᔨᒋ ᒍᓯᐸ ᐊᓐᑕ ᒋᓴᐅᒋᒪᐤ ᐅᒋᐸᐛᑭᓇ ᑲ ᑭᓄᐛᔨᒪᑭᓄᔨᒋ᙮
ᒪᒂᒡ ᑲ ᑕᑦ ᐊᓐᑕ ᑲᒪᑯᓄᐛᓯᐅᒋᐛᐱᒡ, 21ᒋ ᐎᒋᐃᑯᐤ ᑭᔭ ᒋ ᒥᔪ ᑐᑕᑯᐤ ᑎᐸᔨᒋᒐᓱᐛ᙮ ᐃᔭᐱᒡ ᐊᓐ ᓇᐸᐤ ᑲ ᑭᓄᐛᔨᒪᑦ ᑲ ᒪᑯᓇᑭᓄᓯᔨᒋ ᒋ ᒥᔽᔨᒪᐤ ᒍᓯᐸ᙮ 22ᒋ ᒥᔭᐤ ᒍᓯᐸ ᒐᒋ ᑭᓄᐛᔨᒪᔨᒋ ᒥᓯᐛ ᑯᑎᑲ ᑲ ᒪᑯᓇᑭᓄᓯᔨᒋ ᑭᔭ ᒂ ᐃᑐᑐᐛᑦ ᒐᒋ ᑎᐸᔨᑎᒥᔨᒋ ᒥᓯᐛ ᐊ ᐃᑎᓇᓄᐎᒡ ᐊᓐᑕ ᑲᒪᑯᓄᐛᓯᐅᒋᐛᐱᒡ᙮ 23ᐅᑎᐸᔨᒋᒐᐤ ᒋ ᐎᒐᐛᐤ ᒍᓯᐸ ᒐᒋ ᑭᔅᒋᑕᔨᒋ ᒥᓯᐛ ᒐᒂᔪᐤ ᐊ ᐃᑐᑎᒥᔨᒋ᙮ ᐅᔭ ᐅᒡ, ᑲᓂᑲᓂᔅᑲᐧᒃ ᑲᒪᑯᓄᐛᓯᐅᒋᐛᐱᔪᐤ ᒋᒋᐛ ᒋ ᓱᒐᔨᒪᐤ ᒍᓯᐸ ᒥᓯᐛ ᒐᒂᔪᐤ ᐊ ᐃᑐᑎᒥᔨᒋ᙮
Currently Selected:
ᒐᓂᓯᔅ 39: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
