ᒐᓂᓯᔅ 38
38
ᒍᑕ ᑭᔭ ᑕᐃᒪᕐ
1ᓇᓇᒐ ᒍᑕ ᒋ ᓂᑭᑕᐤ ᐎᐧᑲᓂᓴ ᑭᔭ ᒂ ᐃᑐᑕᑦ ᐊᑐᓚᒻ ᐅᑕᓇᒡ ᒐᒋ ᐎᒋᒪᑦ ᓇᐸᐛ ᐃᕋ ᐊ ᐃᓯᓂᐧᑲᓱᔨᒋ᙮ 2ᒪᒂᒡ ᐊᓐᑕ ᑲ ᑕᑦ ᒍᑕ, ᒋ ᓂᒋᔅᑯᐛᐤ ᑲᐃᓇᓐ ᐃᔎᐛ, ᓱᐊ ᑲ ᐃᓯᓂᐧᑲᓱᔨᒋ ᐅᑕᐎᔪᐛ, ᒂ ᐎᒋᒪᑦ᙮ 3ᒋ ᐊᓱᐛᐱᒪᐅᓱᔨᐛ ᑭᔭ ᒋ ᓂᑕᐅᒋᔭᔨᐛ ᓇᐸᓴ, ᒍᑕ ᐅᕐ ᒋ ᐃᓯᓂᐧᑲᑕᐤ᙮ 4ᒥᓐ ᒋ ᐊᓱᐛᐱᒪᐅᓱᔨᐛ ᑭᔭ ᒂ ᑕᔨᒋ ᑯᑎᑲ ᐅᑯᓴ, ᐅᓇᓐ ᒋ ᐃᓯᓂᐧᑲᑕᐤ᙮ 5ᒥᓐ ᒋ ᐅᑯᓱᐤ ᑭᔭ ᓯᓚ ᒋ ᐃᓯᓂᐧᑲᑕᐤ᙮ ᑲᓯᑉ ᒋ ᑕᐤ ᒍᑕ ᐃᔅᐱ ᑲ ᐃᔪᔨᒋ ᓇᐸᓴ᙮
6ᐃᔅᐱ ᐅᕐ, ᒍᑕ ᐅᓂᔅᑎᒧᓴᓇ ᑲ ᒋᓴᐸᐎᒋ, ᒍᑕ ᒋ ᐎᔭᐸᑎᒧᐛᐤ ᐃᔎᐛ ᒐ ᐎᒋᒪᔨᒋ᙮ ᑕᐃᒪᕐ ᒋ ᐃᓯᓂᐧᑲᓱᔨᐛ᙮ 7ᒥᒄ ᐅᕐ, ᒍᑕ ᐅᓂᔅᑎᒧᓴᓇ, ᒋ ᒥᒋᑐᑎᒻ᙮ ᓇᒪ ᐅᒋ ᓇᐃᑎᒪᐊᐤ ᑎᐸᔨᒋᒐᓱᐛ, ᐊᑯ ᑎᐸᔨᒋᒐᓱᐤ ᒂ ᐅᑎᓂᒺᑦ ᐅᐱᒪᑎᓯᐅᓂᔪᐤ᙮
8ᑲᒋ ᐳᓂᐱᒪᑎᓯᑦ ᐅᕐ, ᒍᑕ ᒂ ᐃᑕᑦ ᐅᓇᓇ, “ᒋᑭ ᐎ ᐎᒋᒪᐤ ᑕᐃᒪᕐ, ᒧᔭᒻ ᐊᓯ ᓂᑐᐛᔨᑕᒂᒡ ᒋᐎᓱᐛᐅᓄᐤ ᒐᒋ ᐃᑐᑕᐧᒃ ᐎᐧᑲᓂᓯᒪᐤ, ᐊᑯ ᒪᒃ ᒐᒋ ᑕᔨᒋ ᐅᑦ ᐊᓂᔅᑯᑕᐸᓇ ᒋᐧᑲᓂᔅ᙮” 9ᒥᒄ ᐅᓇᓐ ᒋᔅᒐᔨᑎᒻ ᒐ ᐊᑲ ᑎᐸᔨᒪᑦ ᐊᐛᓴ᙮ ᐊᑯ ᑕᑥᐤ ᐛᐸᒪᒋ ᐅᔅᑕᓴ ᐎᐎᐛ, ᒋ ᑯᒋᑕᐤ ᒐ ᐊᑲ ᒋ ᐊᓱᐛᐱᒪᐅᓱᔨᒋ᙮ 10ᓇᒪ ᐅᒋ ᓇᐃᑎᒪᐊᐤ ᑎᐸᔨᒋᒐᓱᐛ, ᐊᑯ ᐃᔭᐱᒡ ᒂ ᐅᑎᓂᒺᑦ ᑎᐸᔨᒋᒐᓱᐤ ᐅᓇᓇ ᐅᐱᒪᑎᓯᐅᓂᔪᐤ᙮
11ᒂ ᐃᑕᑦ ᒍᑕ ᐅᓇᐊᑭᓂᔎᒪ ᑕᐃᒪᕐᔨᒋ, “ᑲᐤ ᒐ ᒋᐛᔨᓐ ᒍᑕᐎᔾ ᐎᒋᒡ, ᒥᒄ ᒐ ᐊᑲ ᒥᓐ ᓂᐳᔨᓐ ᐸᑎᒪ ᒋ ᐃᓯ ᓂᑕᐅᒋᒐ ᓂᑯᔅ ᓯᓚ᙮” ᒋ ᐃᑕᐤ ᐅᔭ ᐛᔅ ᒋ ᑯᔅᑕᒍᐤ ᒐᒋ ᐃᔭᐱᒡ ᐳᓂᐱᒪᑎᓯᔨᒋ ᓯᓚᔨᒋ ᒧᔭᒻ ᐎᐧᑲᓂᓯᔪᐛ, ᐊᑯ ᑕᐃᒪᕐ ᑲᐤ ᒂ ᒋᐛᑦ᙮
ᑕᐃᒪᕐ ᑲ ᐎᔭᓯᒪᑦ ᒍᑕᔨᒋ
12ᑲᒋ ᒥᒐᑎᐳᓂᔨᒡ, ᒍᑕ ᐎᐛ ᒋ ᐳᓂᐱᒪᑎᓯᔪᐛ᙮ ᐃᔅᐱ ᐃᔭᐧᑭᓂᔨᒡ ᐅᒥᑐᓇᔨᒋᑭᓐ, ᐎᔾ ᑭᔭ ᐎᒐᐛᑭᓇ, ᐃᕋᔨᒋ ᐊᑐᓚᒻ ᐅᒡ, ᑎᒻᓇ ᒋ ᐃᑐᑕᐅᒡ, ᐊᓐᑕ ᑲ ᒧᓱᐛᑭᓄᔨᒋ ᐅᒪᔭᑕᓂᓯᒪ᙮
13ᑕᐃᒪᕐ ᒋ ᐎᑎᒪᑯᐤ ᐊᐛᔪᐛ ᐊᓂᔭ ᐅᒋᓴᐃᔨᒪ ᐊᑐᑕᔨᒋ ᐊᓐᑕ ᑎᒻᓇ ᓂᔭᒋᒧᓱᐛᔨᒋ ᐅᒪᔭᑕᓂᓯᒥᔪᐛ᙮ 14ᒋ ᒥᔅᑯᑎᔅᑯᒻ ᐊᓂᔭ ᑲ ᐳᔅᑲᐧᒃ ᒋᔅᑎᒪᒋᔎᐤ ᐊᐱᒋᑕᐅᓇ ᑭᔭ ᑯᑎᑲ ᐊᐱᒋᑕᐅᓇ ᒋ ᐳᔅᑭᒻ ᑭᔭ ᐊᑯᐛᐱᒂᐅᓂᔪᐤ ᒋ ᐊᑯᓇᐊᒻ ᐅᑕᔅᑎᒥᐧᒄ ᒐ ᐊᑲ ᒪᒃ ᒋᔅᒐᔨᒥᑯᑦ ᐊᐛᔪᐛ᙮ ᐊᑯ ᒂ ᐃᑐᑕᑦ ᐊᓐᑕ ᐃᓇᐃᒻ ᐅᑕᓇᒡ ᐅᐱᒪᔅᑭᓇᒡ, ᑎᒻᓇ ᐃᔅ ᐊᑎᒧᐃᒡ᙮ ᐊᑯᑕ ᒂ ᓇᐃᐱᑦ ᐊᓐᑕ ᐛᒋ ᐱᒐᓄᐎᒡ ᐊᓂᔭ ᐅᑕᓇᔪᐤ᙮ ᐛᔅ ᒋ ᒋᔅᒐᔨᒪᐤ ᑲᒋ ᐃᓯ ᓂᑕᐅᒋᔨᒋ ᓯᓚᔨᒋ ᑭᔭ ᓇᒪ ᐅᒋ ᒥᔭᑭᓄᐤ ᒐᒋ ᐎᒋᒪᑦ᙮
15ᓇᓇᒐ ᒍᑕ ᐛᒋ ᐱᒧᑕᑦ ᐊᓐᑕ ᑲ ᐊᐱᔨᒋ ᑕᐃᒪᕐᔨᒋ᙮ ᒍᑕ ᒋ ᐛᐱᒪᐤ ᒥᒄ ᓇᒪ ᐅᒋ ᒋᔅᒐᔨᒪᐤ ᐊᐛᔪᐛ ᐃᔭᐅᔨᒋ᙮ ᐱᓯᒂᑎᓯᔎᐤ ᒋ ᐃᑕᔨᒪᐤ ᐊᒋ ᐊᑯᐛᒥᔨᒋ ᐅᑕᔅᑎᒥᐧᑯᔪᐤ᙮ 16ᓇᒪ ᐅᒋ ᒋᔅᒐᔨᒪᐤ ᐊᓂᔭ ᐃᔭᐅᔨᒋ ᐅᓇᐊᑭᓂᔎᒪ, ᐊᑯ ᒋ ᓇᑕᐤ ᐊᓐᑕ ᑲ ᐊᐱᔨᒋ ᐅᐱᒪᔅᑭᓇᒡ ᑭᔭ ᒂ ᐃᑕᑦ, “ᓇᐃᒥ ᒐᒋ ᐎᐸᒥᑕᓐ᙮”
ᑕᐃᒪᕐ ᒂ ᐃᑕᑦ, “ᒐᒂᓐ ᒐ ᒥᔨᓐ ᐎᐸᒥᑕᓇ ?”
17ᒍᑕ ᒂ ᐎᑎᒧᐊᑦ, “ᒋᑭ ᐃᑎᓴᐊᒪᑎᓐ ᒥᔅᑐᓯᔅ ᓂᑦ ᐊᐛᓯᓯᒥᒡ ᐅᒡ᙮”
ᑕᐃᒪᕐ ᒂ ᐃᑕᑦ, “ᒐᒂᓐ ᒐ ᒥᔨᓐ ᒐᒋ ᑭᓄᐛᔨᑎᒪᓐ ᐸᑎᒪ ᒋ ᐃᑎᓴᐊᒧᐎᓇ ᒥᔅᑐᓯᔅ ?”
18ᒍᑕ ᑲ ᑯᒂᒋᒪᑦ, “ᒐᒂᓐ ᓇᑐᐛᔨᑎᒥᓐ ᒐ ᒥᔨᑕᓐ ᒐᒋ ᑭᓄᐛᔨᑎᒥᓐ ᐸᑎᒪ ᒋ ᐃᑎᓴᐊᒪᑕᓇ ᒥᔅᑐᓯᔅ ?”
ᑕᐃᒪᕐ ᐃᑕᐤ, “ᒋᑦ ᐊᐱᒋᒐᐱᓱᓐ ᑭᔭ ᐊᓯᒡ ᒋᓯᔅᑲᐅᓐ᙮” ᒍᑕ ᒂ ᒥᔭᑦ ᑭᔭ ᒂ ᐎᐸᒪᑦ ᒥᒄ ᓇᒪ ᐅᒋ ᒋᔅᒐᔨᒪᐤ ᐃᔭᐅᔨᒋ ᐅᓇᐊᑭᓂᔎᒪ᙮ ᐊᑯ ᓇᓇᒐ ᒂᔅᒐᔨᑕᐧᒃ ᑕᐃᒪᕐ ᐊᓱᐛᐱᒪᐅᓱᑦ᙮ 19ᐃᔅᐱ ᑲᒋ ᔅᑐᑕᑦ ᒍᑕ, ᑎᐛᒡ ᒋ ᒋᐛᐤ ᑕᐃᒪᕐ, ᒂ ᒥᓇᐧᒃ ᐅᑦ ᐊᑯᐛᐱᒂᐅᓐ ᑭᔭ ᑲᐤ ᑈᔅᑲᐧᒃ ᒋᔅᑎᒪᒋᔎᐤ ᐊᐱᒋᑕᐅᓇ᙮
20ᓇᓇᒐ ᒍᑕ ᒋ ᐃᑎᓴᐛᐤ ᐎᒐᐛᑭᓇ ᐃᕋᔨᒋ ᒐᒋ ᓂᑐᐛᐱᒪᔨᒋ ᐊᓂᔭ ᐃᔎᐛ ᑭᔭ ᒥᔭᔨᒋ ᐸᐃᒄ ᐅᒥᔅᑐᓯᓯᒥᓴ᙮ ᒋ ᐃᑕᐤ ᒐᒋ ᔭᐃᑕᔾ ᐅᑎᓂᒺᑦ ᐅᑦ ᐊᐱᒋᒐᐱᓱᓇ ᑭᔭ ᐅᓯᔅᑲᐅᓐ᙮ ᐊᑯ ᐃᕋ ᑲ ᐃᑐᑕᑦ ᐊᓐᑕ ᐅᑕᓇᒡ, ᒥᒄ ᐃᔅᐱ ᑲ ᑎᑯᓯᐧᒃ ᓇᒪ ᐅᒋ ᒥᔅᑯᐛᐤ ᐃᔎᐛ᙮ 21ᐃᕋ ᒋ ᑯᒂᒋᒪᐤ ᐱᔅᒐ ᐃᔪᐛ ᐊᓐᑕ ᑲ ᐎᒋᔨᒋ, “ᑕᓐᑕ ᐊᓂᔭ ᐱᓯᒂᑎᓯᔎᐤ ᑲ ᐊᐱᑦ ᐊᓐᑕ ᐅᐱᒪᔅᑭᓇᒡ ?”
ᒥᒄ ᒋ ᐃᑎᑯᐤ, “ᑕᐸ ᓂᑕ ᐊᑕᐤ ᐅᑕ ᐱᓯᒂᑎᓯᔎᐤ᙮”
22ᐊᑯ ᒍᑕ ᑲᐤ ᒋ ᓂᑐᐛᐱᒥᑯᐤ ᐎᒐᐛᑭᓇ ᑭᔭ ᒂ ᐃᑎᑯᑦ, “ᓇᒪ ᓂ ᒥᔅᑯᐛᐤ ᐊᓐ ᐃᔎᐤ᙮ ᐃᔪᒡ ᐊᓐᑕ ᐛᒋᒡ ᐃᔅᒋᔄᐅᒡ ᐊ ᐊᑲ ᓂᑕ ᑕᔨᒋ ᐱᓯᒂᑎᓯᔎᐛ᙮”
23ᒍᑕ ᒂ ᐃᔅᒋᔄᑦ, “ᒋᑭ ᑎᐸᔨᑎᒻ ᐊᓂᔭ ᒐᒂᓂᔪᐛ᙮ ᓇᒪ ᒋ ᓂᑐᐛᔨᒪᓄᐅᒡ ᒐᒋ ᐛᐅᓯᓇᑕᐧᑯᒡ ᐃᔪᒡ, ᓂᒋ ᑯᒋᑕᐛᓐ ᒐᒋ ᒋᓯᐧᑯᐅᒃ ᒥᒄ ᓇᒪ ᒋ ᐅᒋ ᒥᔅᑯᐛᐤ᙮”
24ᑲᒋ ᓂᔅᑐ ᐱᓯᒺᔭᔨᒡ ᒍᑕ ᒋ ᐃᑎᑯᐤ ᐊᐛᔪᐛ, “ᒋᓇᐊᑭᓂᔎᒻ ᑕᐃᒪᕐ ᒋ ᒥᒋ ᐃᑐᐤ᙮ ᒋ ᐎᐸᒪᓯᐱᓐ ᐊᐛᔪᐛ ᑭᔭ ᐊᓄᒡ ᐊᓱᐛᐱᒪᐅᓱᐤ᙮”
ᒋ ᒋᔄᒋᓇᑭᓂᐳᐤ ᒍᑕ ᑭᔭ ᒂ ᐃᔅᒋᔄᑦ, “ᐸᒋ ᐎᐎᑕᐃᐧᒄ ᑭᔭ ᒐ ᓂᐸᐃᑭᓱᐛᒄ᙮”
25ᒋ ᓂᑐᐛᐱᒪᐅᒡ ᐃᔪᒡ ᑭᔭ ᒪᒂᒡ ᐱᔭᑐᑕᐊᑭᓄᐅᑦ ᑕᐃᒪᕐ ᐊᓐᑕ ᐛᒋᐱᒐᓂᐎᒡ ᐅᑕᓇᔪᐤ, ᒋ ᐃᑎᓴᐊᒧᐛᐤ ᐊᐛᔪᐛ ᐅᒋᓴᐃᔨᒪ ᐊ ᑕᐧᑯᓂᒥᔨᒋ ᑲ ᒥᔨᑯᑦ ᑕᐱᒋᒐᐱᓱᓇ ᑭᔭ ᓯᔅᑲᐅᓂᔪᐤ ᑭᔭ ᐊᑕᑦ, “ᐊᓐ ᓇᐸᐤ ᑲ ᒥᔨᑦ ᐅᔭ ᓂᓱ ᒐᒂᓂᔪᐛ ᐊᐅᑯᓐ ᑲ ᑭᔅᒋᑲᑕᐅᑦ᙮ ᒥᔪ ᒋ ᑕᐸᑕ ᐅᔭ, ᒋᔅᒐᔨᒪᐤ ᐅᔭ ᐊᐛᓐ ᑕᐸᔨᑕᐧᒄ᙮”
26ᐃᔅᐱ ᒍᑕ ᐎᔭᐸᑕᐧᒃ ᐊᓂᔭ ᓂᓱ ᒐᒂᓂᔪᐛ, ᒋ ᒋᔅᒐᔨᑎᒻ ᐎᔾ ᐊᓂᔭ ᑲ ᑎᐱᔨᐛᐅᓯᑦ᙮ ᒂ ᐃᔅᒋᔄᑦ, “ᑯᐃᔅᒄ ᒋ ᐃᑐᑎᒻ ᒐᒂᔪᐤ ᑕᐃᒪᕐ ᑭᔭ ᓂᔾ ᓂᒋ ᐅᓂᑐᑕᓐ, ᐛᔅ ᓇᒪ ᓂ ᐅᒋ ᒥᔭᐤ ᓂᑯᓴ ᓯᓚᔨᒋ ᑕᐃᒪᕐ ᒐ ᐅᓇᐸᒥᑦ᙮” ᓇᒪ ᒥᓐ ᐅᒋ ᐎᐸᒪᐤ ᒍᑕ ᑕᐃᒪᕐᔨᒋ᙮
ᑲ ᐅᓂᓯᓯᒥᑦ ᑕᐃᒪᕐ
27ᐃᔅᐱ ᑲ ᐅᑎᒋᐱᔨᒡ ᑕᐃᒪᕐ ᒐᒋ ᐛᐱᒪᐅᓱᑦ, ᒂ ᒋᔅᒐᔨᒪᑭᓄᐅᑦ ᑲ ᓂᓯᓯᔨᒋ ᒐ ᑭᓄᐛᔨᒪᑦ᙮ 28ᒪᒂᒡ ᐃᔭᐧᑯᓯᑦ, ᐸᐃᒄ ᐅᑦ ᐊᐛᓯᒪ ᒋ ᓴᒋᐱᔨᑕᔪᐛ ᐅᔅᐱᑐᓂᔪᐤ᙮ ᒋ ᒐᔅᑎᓂᒺᐤ ᐊᓐ ᑲ ᐅᑎᓇᐅᓱᑦ ᑭᔭ ᒥᔭᑭᐱᑎᒺᑦ ᑲ ᒥᐧᑯᓯᔨᒋ ᓴᔅᑎᒂᔭᐱᔭ ᐅᐧᑯᓂᑎᒋᒡ, ᒂ ᐃᔅᒋᔄᑦ, “ᐊᐅᑯᐤ ᓂᔅᑎᒻ ᐊ ᐃᔪᐅᑦ᙮” 29ᒥᒄ ᑲᐤ ᒋ ᐅᒋᐱᑕᐤ ᐅᔅᐱᑐᓐ ᑭᔭ ᐎᐧᑲᓂᓴ ᓂᔅᑎᒻ ᒋ ᐃᔪᐃᔪᐛ᙮ ᐊᑯ ᑲ ᐅᑎᓇᐅᓱᑦ ᒂ ᐃᔅᒋᔄᑦ, “ᒋᔾ ᐅᔅᑭᒡ ᔅᒋ ᐸᒋ ᐎᐎᐱᔪᐅᓐ᙮” ᐊᑯ ᐸᕋᔅ ᒋ ᐃᓯᓂᐧᑲᑕᐤ ᒍᑕ᙮ 30ᐊᑯ ᐎᐧᑲᓂᓴ ᐅᐧᑯᓂᑎᒋᒡ ᑲ ᒋᑭᒧᑕᑎᔭᑭᓄᔨᒋ ᑲ ᒥᐧᑯᓯᔨᒋ ᓴᔅᑎᒂᔭᐱᔭ ᐊ ᐃᔪᔨᒋ᙮ ᓴᕋ ᒋ ᐃᓯᓂᐧᑲᑕᐤ ᒍᑕ᙮
Currently Selected:
ᒐᓂᓯᔅ 38: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
