ᒐᓂᓯᔅ 37
37
ᒍᓯᑉ ᐅᐳᐛᒧᐅᓇ
Genesis 37.1-4, 12-28 (Proper-14 Year A)
1ᑲᒋ ᐳᓂᐱᒪᑎᓯᑦ ᐊᐃᓯᒃ, ᑲᐃᓇᓐ ᐊᔅᒋᒡ ᒋ ᐎᒍᐤ ᒐᑭᑉ ᐊᓐᑕ ᐅᑕᐎᔭ ᑲ ᒪᓐᑕᐅᔨᒋ᙮ 2ᐊᐅᑯᐤ ᐊ ᐃᓯ ᑎᐸᒋᒪᑭᓄᐅᑦ ᒐᑭᑉ ᐅᑦ ᐊᓂᔅᑯᑕᐸᓇ᙮
ᒍᓯᐸ ᒋ ᐅᑯᓱᐤ᙮ ᐃᔅᐱ ᓂᔄᐅᑕᒡ ᑕᑐᓴᑉ ᑲ ᐃᑕᑐᐳᓇᓯᑦ ᒍᓯᑉ, ᒋ ᐎᒋ ᐊᑐᔅᒐᒪᐤ ᐱᔅᒐ ᐎᐧᑲᓂᓴ, ᐱᓚ ᑭᔭ ᓯᓪᐸ ᐅᑯᓯᔪᐛ᙮ ᒪᒧᐤ ᒋ ᑭᓄᐛᔨᒪᐅᒡ ᐅᑕᐎᐛᐛ ᐅᑦ ᐊᐛᓯᓯᒥᔪᐛ᙮ ᓇᓇᒐ, ᒋ ᐎᑎᒧᐛᐤ ᐅᑕᐎᔭ ᐊ ᐃᓯ ᒥᒋ ᐃᑎᔨᒋ ᐎᐧᑲᓂᓴ᙮
3ᒐᑭᑉ ᒪᒃ ᐅᔅᑕ ᒋ ᓴᒋᐊᐤ ᒍᓯᐸ ᐃᔅᐱᔅ ᑯᑎᑲ ᐅᑦ ᐊᐛᓯᒪ ᐛᔅ ᒋ ᒋᓴᐃᔪᐤ ᐃᔅᐱ ᑲ ᐃᔪᔨᒋ ᒍᓯᐸ, ᒋ ᐅᑦ ᐊᑯᐱᑯᐛᐤ ᐊ ᑭᑲᓂᓂᒂᔭᔨᒡ ᐊᑯᐱᔪᐤ ᒥᒐᑐᐎᒡ ᐊ ᐃᓯ ᒂᑕᔨᒡ᙮ 4ᐃᔅᐱ ᒪᒃ ᐎᐧᑲᓂᓴ ᐎᔭᐸᑎᒥᔨᒋ ᐅᑕᐎᐛᐛ ᐅᔅᑕ ᐊᓴᒐᔨᒋ ᒍᓯᐸ ᐃᔅᐱᔅ ᐎᔨᐛᐤ, ᒋ ᐛᐧᑲᑕᐅᒡ ᒍᓯᐸ, ᓇᒪ ᑭᔭ ᐅᒋ ᒥᔪ ᐃᔨᒪᐊᐅᒡ᙮
5ᒍᓯᑉ ᒋ ᐳᐛᒧᐤ ᑭᔭ ᒂ ᐎᑎᒧᐛᑦ ᐎᐧᑲᓂᓴ, ᐊᑎᑐᐤ ᒋ ᐛᐧᑲᑎᑯᐤ᙮ 6ᒋ ᐃᑕᐤ ᒪᒃ, “ᓂᑐᑎᒧᒄ ᐅᒪ ᑲ ᐃᓯ ᐳᐛᒧᔭᓐ᙮ 7ᓂᑕᐅᒋᑕᑭᓂᒡ ᒋᑦ ᐃᑕᓇᓄᐤ ᐊ ᒪᒧᐛᐱᐧᑲᑎᒪᐧᒄ ᐸᒂᓯᑭᓂᒥᓇ, ᐊᑯ ᑲ ᒪᒧᐛᐱᐧᑲᑎᒪᓐ ᐸᒂᓯᑭᓂᒥᓐ ᒋ ᐱᓯᑯᒥᑭᓐ ᑭᔭ ᒋᓯᒥᒋᑲᐳᐎᒥᑭᓐ, ᒋᐸᒂᓯᑭᓂᒥᓄᐛᐛ ᐛᔅᑲ ᒋᓯᒥᒋᑲᐳᐎᒥᑭᓇ ᑭᔭ ᒋ ᔭᓱᑎᓇ ᒋᓂᔅᑐᐎᒥᑭᓇ ᓂᐸᒂᓯᑭᓂᒥᒡ᙮”
8ᒋ ᐃᑎᑯᐤ ᒪᒃ ᐎᐧᑲᓂᓴ, “ᑕᑈ ᐊ ᒋᑦ ᐃᑕᔨᑕᓐ ᒐ ᒋᓴᐅᒋᒪᐎᔨᓐ ᑭᔭ ᒐ ᑎᐸᔨᒥᔭᒡ ?” ᐊᑯ ᐊᑎᑐᐤ ᒋ ᐛᐧᑲᑎᑯᐤ ᐅᐳᐛᒧᐅᓇ ᐅᒡ ᑭᔭ ᐊᓂᔭ ᑲ ᐃᑕᑦ᙮
9ᐊᑯ ᒍᓯᑉ ᒥᓐ ᒋ ᐳᐛᒧᐤ ᑭᔭ ᒋ ᐎᑎᒧᐛᐤ ᐎᐧᑲᓂᓴ, “ᒥᓐ ᓂᒋ ᐳᐛᒧᓐ, ᓂ ᐛᐱᒪᐅᒡ ᐱᓯᒻ, ᑎᐱᔅᑲᐤ ᐱᓯᒻ ᑭᔭ ᐸᐃᑯᓴᑉ ᐅᒐᑭᑕᐧᑯᒡ ᐊ ᓄᐅᒋᔅᑐᐅᒡ᙮”
10ᐃᔭᐱᒡ ᒋ ᐎᑎᒧᐛᐤ ᐅᑕᐎᔭ ᐅᐳᐛᒧᐅᓐ ᑭᔭ ᒋ ᔅᑐᑎᑯᐤ ᒪᒃ ᐅᑕᐎᔭ ᐊ ᐃᑎᑯᑦ, “ᒐᒂᓐ ᐅᒪ ᑲ ᐃᓯ ᐳᐛᒧᔨᓐ ? ᑕᑈ ᐊ ᒋᑦ ᐃᑕᔨᑕᓐ ᑕᐱᔅᑯᓐ ᓂᔾ ᑭᔭ ᒋᑲᐎᔾ ᑭᔭ ᒋᐧᑲᓂᓯᒡ ᒐ ᐸᒋ ᓄᐅᒋᔅᑕᑕᒡ ?” 11ᒋ ᐅᑕᔨᒥᑯᐤ ᒍᓯᑉ ᐎᐧᑲᓂᓴ, ᒥᒄ ᐅᑕᐎᔭ ᒋ ᒪᒥᑐᓇᔨᑎᒥᑯᔪᐛ ᑲ ᐃᔅᒋᔄᑦ᙮
ᑲ ᑕᐛᒐᓄᐅᑦ ᒍᓯᑉ ᑭᔭ ᐃᒋᑉᑎᒡ ᑲ ᐃᑐᑕᑭᓄᐅᑦ
Genesis 37.1-4, 12-28 (Proper-14 Year A)
12ᐸᐃᒂᐤ ᒐᓯᑲᔨᒡ, ᒍᓯᑉ ᐎᐧᑲᓂᓴ ᓴᑭᒥᒡ ᒋ ᐃᑐᑕᔪᐛ ᒐᒋ ᑭᓄᐛᔨᒪᔨᒋ ᐅᑕᐎᐛᐛ ᐅᒪᔭᑕᓂᓯᒥᔪᐛ᙮ 13ᒐᑭᑉ ᒋ ᐃᑕᐤ ᒍᓯᐸ, “ᒋ ᓂᑐᐛᔨᒥᑎᓐ ᒐᒋ ᐃᑐᑕᔨᓐ ᓴᑭᒥᒡ, ᐊᓐᑕ ᑲᓄᐛᔨᒪᒡ ᒋᐧᑲᓂᓯᒡ ᒪᔭᑕᓂᓴ᙮”
ᒍᓯᑉ ᐃᑕᐤ, “ᓴᔅ ᓂᑦ ᐊᔭᔅᑯᐎᔨᓐ᙮”
14ᐅᑕᐎᔭ ᒋ ᐃᑎᑯᐤ, “ᓇᒋ ᐛᐱᒥᒡ ᒪᔪᐱᔪᐛᒂ ᒋᐧᑲᓂᓯᒡ ᑭᔭ ᒪᔪᐱᔪᐛᒂ ᒪᔭᑕᓂᓯᒡ᙮ ᐊᑯ ᒐ ᐸᒋ ᒋᐛᔨᓐ ᑭᔭ ᒐ ᐎᑎᒧᐎᓐ᙮” ᐊᑯ ᒐ ᐃᑎᓴᐅᑯᑦ ᐅᑕᐎᔭ ᐃᑉᕈᓐ ᐊ ᐱᓴᔨᒡ ᐅᒡ᙮
ᒍᓯᑉ ᒂ ᑎᑯᓯᐧᒃ ᓴᑭᒥᒡ᙮ 15ᒂ ᓇᓂᑐᐛᐱᒪᑦ ᐎᐧᑲᓂᓴ ᑭᔭ ᒪᔭᑕᓂᓴ᙮ ᓂᑕᐅᒋᑕᑭᓂᒡ ᒋ ᐱᐸᒧᑕᐤ ᒐᒃ ᒪᔅᑲᑯᑦ ᓇᐸᐛ ᑭᔭ ᑲ ᑯᒂᒋᒥᑯᑦ, “ᒐᒂᓐ ᓂᔭᓂᑐᐛᐸᑎᒥᓐ ?”
16ᒍᓯᑉ ᒂ ᐃᑕᑦ, “ᓂᐧᑲᓂᓯᒡ ᓇᓂᑐᐛᐱᒪᐅᒡ ᐊᓐᒡ ᑲᓄᐛᔨᒪᒡ ᓄᑕᐎᔭ ᐅᑦ ᐊᐛᓯᓯᒥᔪᐛ᙮ ᒪᒋᔅᒐᔨᒪᐅᒡ ᑕᓐᑕ ᐊᑕᒡ ?”
17ᓇᐸᐤ ᒂ ᐃᑕᑦ, “ᓴᔅ ᐊᓂᔭ ᒋ ᔅᑐᑕᐅᒡ᙮ ᓂᒋ ᐸᑐᐛᐅᒡ ᐊ ᐊᔨᒧᑕᒡ ᑐᑎᓐ ᒐᒋ ᐃᑐᑕᒡ᙮”
ᐊᑯ ᒍᓯᑉ ᒂ ᓇᓴᐛᑦ ᐎᐧᑲᓂᓴ ᑭᔭ ᒪᔅᑯᐛᑦ ᐊᓐᑕ ᑐᑎᓐ᙮ 18ᒥᒄ ᐎᐧᑲᓂᓯᒪᐅᒡ ᒋ ᐛᐱᒪᐅᒡ ᒍᓯᐸ ᐱᔭᑕᔅᑎᒧᑕᐅᐎᒋ᙮ ᑎᐛᒡ ᒋ ᐅᔭᔨᑎᒧᒡ ᑕᓐ ᒐ ᐃᓯ ᓂᐸᐊᒡ᙮
19ᒂ ᐃᑎᑐᒡ, “ᐱᔭᑐᑕᑦ ᑲᐳᐛᒧᔅᑦ᙮ 20ᒐ ᓂᐸᐊᐧᒄ ᐊᑯ ᑭᔭ ᒐ ᐱᑕᐛᐱᓂᒺᐧᒄ ᐎᔪᐤ ᐊᓐᑕ ᐸᐃᒄ ᐊ ᐸᒂᔨᒡ ᒧᓇᐃᐸᓂᔪᐤ᙮ ᒐ ᐃᔅᒋᔄᔭᐧᒄ ᒥᒋ ᐊᐛᓯᓴ ᐊ ᓂᐸᐃᑯᑦ᙮ ᐊᑯ ᒐ ᐛᐸᑎᒺᐧᒄ ᒐ ᑕᑈᒥᑭᓂᒂᓂ ᐅᐳᐛᒧᐅᓇ᙮”
21ᕈᐱᓐ ᒋ ᐸᑐᐛᐤ ᐎᐧᑲᓂᓴ ᐊ ᐃᔅᒋᔄᔨᒋ ᑭᔭ ᒂ ᑯᒋᑕᑦ ᒐᒋ ᐱᒪᒐᐊᑦ ᒍᓯᐸ ᐊ ᐃᑕᑦ ᐎᐧᑲᓂᓴ, “ᐊᑲ ᓂᐸᐊᑕᐤ, 22ᒋᔭᒻ ᐱᑕᐛᐱᓇᑕᐤ ᐅᑕ ᐸᒂᑎᔅᒋᐅ-ᒧᓇᐃᐸᓂᒡ, ᒥᒄ ᐊᑲ ᐅᓯᑯᐊᐧᒄ᙮” ᒋ ᐃᔅᒋᔄᐤ ᐅᔭ ᕈᐱᓐ ᐊ ᐅᔭᔨᑕᐧᒄ ᒐᒋ ᐱᒪᒐᐊᑦ ᒍᓯᐸ ᐎᐧᑲᓂᓴ ᐅᒡ ᑭᔭ ᐅᑕᐎᐛᐛ ᐃᔅ ᒐᒋ ᐃᑎᓴᐛᑦ᙮
23ᐃᔅᐱ ᒍᓯᑉ ᐛᑎᑕᑦ ᐎᐧᑲᓂᓴ, ᒺᔅᑎᓂᑯᑦ ᑭᔭ ᒪᓂᐱᑎᒥᔨᒋ ᐅᑦ ᐊᑯᑉ ᒥᒐᑐᔨᒡ ᐊ ᐃᓯ ᒂᑕᔨᒡ ᐅᑕᐎᔭ ᑲ ᐅᓯᑎᒪᑯᑦ᙮ 24ᐊᑯ ᒂ ᐱᑕᐛᐱᓇᒡ ᒍᓯᐸ ᐊᓐᑕ ᐊᐸᒂᔨᒡ ᒧᓇᐃᐸᓂᔪᐤ᙮
25ᒪᒂᒡ ᐅᑎ ᒥᒋᓱᑕᐤ ᐊᓐᒡ ᐎᐧᑲᓂᓯᒪᐅᒡ, ᒐᒃ ᐎᔭᐱᒪᒡ ᐃᔅᒪᐃᓪ ᐃᔪᐛ ᑭᓕᐊᑦ ᐅᒋ ᐃᒋᑉᑎᒡ ᐃᔅ ᐊᑐᑕᔨᒋ᙮ ᐅᑲᐱᔎᐅᑭᒥᔪᐛ ᒋ ᐎᐅᓴᔪᐛ ᑲᐎᒋᒪᑯᓯᔨᒋ ᑭᔭ ᐊ ᐎᒋᒪᑯᓯᔨᒋ ᐱᒍᐛ᙮
26ᒍᑕ ᒂ ᐃᑕᑦ ᐎᐧᑲᓂᓴ, “ᒐᒂᓐ ᒐ ᑲᓂᔪᐅᔭᐧᒄ ᓂᐸᐊᒂ ᒋᐧᑲᓂᓯᓄᐤ ᑭᔭ ᑲ ᑕᔭᒂ ᐊ ᓂᐸᑕᒐᔭᐧᒄ ? 27ᐊᑕᒪᑕᐅᓐᒋ ᐃᔅᒪᐃᓪ ᐃᔪᒡ ᒋᐧᑲᓂᓯᓄᐛ ᒥᔅᑯᒡ ᒐ ᐊᑲ ᓂᐸᐊᐧᒄ᙮ ᓇᒪ ᐃᓯᓇᑯᓐ ᒐᒋ ᓂᐸᐊᐧᒄ ᐊᐛᓐ ᑎᐱᔨᐛ ᐊ ᐎᐧᑲᓂᓯᔭᐧᒄ᙮” ᐎᐧᑲᓂᓯᒪᐅᒡ ᒋ ᐎᔭᔨᑎᒧᒡ ᒐᒋ ᑐᑕᒡ ᐊᔅᒋᔄᔨᒋ ᒍᑕᔨᒋ᙮
28ᐃᔅᐱ ᐃᔅᒪᐃᓪ ᐃᔪᒡ ᐛᒪᔅᑯᐛᒡ, ᐎᐧᑲᓂᓯᒪᐅᒡ ᐛᔪᐎᑎᓯᓇᒡ ᒍᓯᐸ ᐊᓐᑕ ᒧᓇᐃᐸᓂᒡ ᐅᒋ, ᒂ ᑕᒪᒡ ᐃᔅᒪᐃᓪ ᐃᔪᐛ ᐎᐧᑲᓂᓱᐛᐛ ᓂᓱᔪᐤ ᐛᐱᓯᐅᓱᓇᔭᐱᔎ ᑭᔭ ᐃᔅᒪᐃᓪ ᐃᔪᒡ ᐃᒋᑉᑎᒡ ᒂ ᐃᑐᑕᐊᒡ᙮
29ᐃᔅᐱ ᕈᐱᓐ ᐊᑐᑕᑦ ᒧᓇᐃᐸᓂᒡ ᑭᔭ ᐎᔭᐸᑕᐧᒃ ᐊᑲ ᑕᔨᒋ ᒍᓯᐸ, ᒋ ᐱᑯᐱᑎᒻ ᐅᑦ ᐊᐱᒋᑕᐅᓇ ᐊᑯᐸᑕᔨᑕᐧᒃ᙮ 30ᑲᐤ ᒋ ᓂᑐᐛᐱᒪᐤ ᐎᐧᑲᓂᓴ ᑭᔭ ᒂ ᐃᑕᑦ, “ᓇᒪᑕᐤ ᐊᓂᔭ ᒍᓯᑉ, ᑕᓐ ᐊᑯ ᒐ ᐃᑎᔭᓐ ?”
31ᒂ ᓂᐸᐊᒡ ᓇᐸ ᒥᔅᑐᓴ ᑭᔭ ᒂ ᑯᑕᐛᒡ ᒍᓯᐸ ᐅᑦ ᐊᑯᐱᔪᐤ ᐊᓐᑕ ᐅᒥᐧᑯᐃᒡ᙮ 32ᑲᐤ ᒂ ᓂᑐᐛᐱᒪᒡ ᐅᑕᐎᐛᐛ ᑭᔭ ᐎᔭᐸᑎᔭᒡ ᐊᑯᐱᔪᐤ᙮ ᒂ ᐃᔅᒋᔄᒡ, “ᓂᒥᔅᑲᓇᓐ ᐅ ᐊᑯᑉ, ᓇᒪᔭᔪᐤ ᐊ ᐅᔭ ᑲ ᒥᔨᑦ ᒋᑯᔅ ?”
33ᐃᔅᐱ ᒐᑭᑉ ᐎᔭᐸᑕᐧᒃ ᐊᑯᐱᔪᐤ ᒂ ᐃᔅᒋᔄᑦ, “ᓂᑯᔅ ᐅᔭ ᐅᑦ ᐊᑯᑉ, ᒋ ᒋᒋᓂᑯᒐ ᒥᒋ ᐊᐛᓯᓴ ᑭᔭ ᒋᒧᐅᑯᒐ, ᐊᐸᐱᑯᐱᑎᑯᑦ᙮”
34ᒋ ᐱᑯᐱᑎᒻ ᐅᑦ ᐊᐱᒋᑕᐅᓇ ᐊᑯᐸᑕᔨᑕᐧᒃ᙮ ᒂ ᐳᔅᑯᐛᑦ ᐊ ᐎᐱᓯᔨᒋ ᒥᔅᑐᓱᔭᓇ ᐊᓂᔭ ᑈᔅᑯᐛᒡ ᐃᔪᒡ ᐳᓂᐱᒪᑎᓯᔨᒋ ᐊᐛᔪᐛ᙮ ᓇᒪ ᐅᒋ ᐳᓂᔪᐤ ᐊ ᓇᐧᑲᑕᔨᑕᐧᒃ ᐛᔅ ᑲ ᐃᓯᓇᑯᓯᔨᒋ ᒍᓯᐸ᙮ 35ᒥᓯᐛ ᐅᑯᓴ ᑭᔭ ᐅᑕᓂᓴ ᒋ ᐸᒋ ᓂᑐᐛᐱᒥᑯᐤ ᒐᒋ ᒥᔽᔨᒧᐃᑯᑦ, ᒥᒄ ᓇᒪ ᐅᒋ ᑕᑈᑎᒻ ᒐᒋ ᒥᔽᔨᒧᐛᑭᓄᐅᑦ᙮ ᒂ ᐃᔅᒋᔄᑦ, “ᓂᑭ ᐃᑐᑕᓐ ᒋᐱᔾ ᐊᔅᒋᒡ ᐊᔅᒄ ᐊ ᓇᐧᑲᑕᔨᒧᔭᓐ ᓂᑯᔅ ᒍᓯᑉ ᐅᒡ᙮”
36ᒪᒂᒡ ᐊᓐᑕ ᐃᒋᑉᑎᒡ, ᐃᔅᒪᐃᓪ ᐃᔪᒡ ᐸᑎᐸᕋ ᒋ ᑕᒪᐅᒡ ᒍᓯᐸ, ᐸᐃᒄ ᒋᓴᐅᒋᒪᐛ ᐅᓂᑐᐱᔪᐅ-ᐅᒋᒪᒥᔪᐛ, ᐊᓂᔭ ᑲ ᐅᒋᒪᐎᔨᒋ ᑲᒪᑯᓄᐛᓯᐅᒋᐛᐱᔪᐤ᙮
Currently Selected:
ᒐᓂᓯᔅ 37: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
