ᒐᓂᓯᔅ 41
41
ᐃᒋᑉᑎᒡ ᒋᓴᐅᒋᒪᐤ ᒋ ᐳᐛᒧᐤ
1ᓂᓱ ᐱᐳᓇ ᑲᒋ ᐎᒪᐱᔨᒡ, ᐃᒋᑉᑎᒡ ᒋᓴᐅᒋᒪᐤ ᒋ ᐳᐛᒧᐤ ᐊ ᓂᐳᐅᑦ ᓇᓯᐸᑎᒥᒡ ᓇᐃᔭᓪ ᓯᐱᒡ᙮ 2ᓯᔅᒋᑯᒡ ᓂᔄᐅᑕᒡ ᐊ ᒥᔪᓇᑯᓯᔨᒋ ᑭᔭ ᐊ ᑕᒋᐳᔨᒋ ᒥᒋᑎᒂ ᐱᔭᒋ ᒧᔅᒋᐸᐱᔪᔨᒋ ᓇᐃᔭᓪ ᓯᐱᔪᐤ ᑭᔭ ᒂᒋ ᒋᒥᒋᔨᒋ ᒥᔅᑯᓱᐛ᙮ 3ᒥᓐ ᓂᔄᐅᑕᒡ ᑯᑎᑲ ᒥᒋᑎᒂ ᒧᔅᒋᐸᐱᔪᔨᒋ ᓇᐃᔭᓪ ᓯᐱᒡ, ᒥᒄ ᒋ ᐱᔅᒐᐛᔪᐛ ᑭᔭ ᒋ ᒋᒪᐧᑭᑕᔪᐛ ᐅᔭ ᒥᒋᑎᒂ᙮ ᒥᒋᒪ ᐅᒡ ᒥᒋᑎᐧᑯᒡ ᒋ ᓇᑕᐅᒡ ᑭᔭ ᐛᒋᑲᐳᔅᑐᐛᒡ ᐅᔭ ᑯᑎᑲ ᒥᒋᑎᒂ ᐊᓐᑕ ᓇᓯᐸᑎᒥᒡ ᓯᐱᒡ᙮ 4ᐊᑯ ᐊᓐᒡ ᑲ ᒋᒪᐧᑭᑕᒡ ᒥᒋᑎᐧᑯᒡ ᒂ ᒧᐛᒡ ᐊᓂᔭ ᑲ ᑕᒋᐳᔨᒋ ᒥᒋᑎᒂ᙮ ᒂ ᐸᑯᐱᔨᑦ ᒋᓴᐅᒋᒪᐤ᙮
5ᒥᓐ ᑲᐤ ᒂ ᓂᐸᑦ ᒋᓴᐅᒋᒪᐤ ᑭᔭ ᒥᓐ ᐸᐛᒧᑦ᙮ ᓂᔄᐅᑕᒡ ᐊᑎᑕᔨᒋ ᑭᔭ ᐊ ᒪᒥᓴᔨᒋ ᐊ ᐅᔅᑎᒂᓄᔨᒋ ᐸᒂᓯᑭᓂᒥᓇ ᒋ ᐛᐸᑎᒻ ᐊ ᐸᐸᐃᑯ ᓂᑕᐅᒋᓂᔨᒋ᙮ 6ᐊᑯ ᒥᓐ ᑯᑎᑲ ᐊ ᓴᒋᓂᑕᐅᒋᓂᔨᒋ ᓂᔄᐅᑕᒡ ᐊ ᐅᔅᑎᒂᓄᔨᒋ ᐸᒂᓯᑭᓂᒥᓇ, ᐊ ᐱᓴᔅᑯᓯᔨᒋ ᑭᔭ ᐊ ᐸᔅᑕᔨᒋ ᐛᐱᓄᑕᒡ ᐅᒡ ᐊ ᐅᑎᓂᔨᒡ᙮ 7ᐊᑯ ᐊᓐᒡ ᐊᐱᓴᔅᑯᓯᒡ ᐊ ᐅᔅᑎᒂᓄᐎᒡ ᐸᒂᓯᑭᓂᒥᓐᒡ ᓯᔅᒋᑯᒡ ᓇᒪ ᑎᔭᐅᒡ ᐊᓂᔭ ᓂᔄᐅᑕᒡ ᐊᑎᑕᔨᒋ ᑭᔭ ᐊ ᒪᒥᓴᔨᒋ ᐊ ᐅᔅᑎᒂᓄᔨᒋ ᐸᒂᓯᑭᓂᒥᓇ, ᐃᔅᐱ ᒋᓴᐅᒋᒪᐤ ᐱᔭᑯᐱᔨᑦ, ᒂ ᒋᔅᒐᔨᑕᐧᒃ ᒥᒄ ᐊᒋ ᐳᐛᒧᑦ᙮
8ᒋᔭᒋᓴᐸᔭᔨᒡ ᒋ ᒥᑯᔅᑲᑕᔨᑎᒻ ᑲ ᐃᓯᓇᐧᒃ ᐅᐳᐛᒧᐅᓂᒡ, ᐊᑯ ᐛᓴᒪᑦ ᒥᓯᐛ ᑲ ᒥᓂᑐᐅᓯᔨᒋ ᑭᔭ ᐃᒋᑉᑎᒡ ᑲ ᑭᒐᑕᐛᔨᑕᑯᓯᔨᒋ ᐃᔪᐛ᙮ ᒋ ᐊᑕᐳᐛᒧᔅᑐᐛᐤ, ᒥᒄ ᓇᒪ ᐊᐛᔪᐛ ᒋ ᐎᑎᒪᑯᐤ ᑕᓐ ᐊᑥᒥᑭᓂᔨᒋ ᐅᐳᐛᒧᐅᓇ᙮
9ᐊᑯ ᒥᓇᐃᐛᐤ ᐃᔪᐤ ᐊᑕᑦ ᒋᓴᐅᒋᒪᐛ, “ᓂ ᒋᔅᒋᑕᓐ ᒐᒂᓐ ᐊᓐ ᑲ ᐅᓂᒋᔅᒋᔭᓐ ᒐᒋ ᐎᑎᒪᑕᓐ᙮ 10ᐸᐃᒂᐤ ᐃᔅᐱ ᑲ ᒋᔄᓯᔅᑐᐎᔭᒡ ᐅᒋᒪᐤ ᑲᐱᒥᓄᐛᔅᑦ ᑭᔭ ᓂᔾ ᑭᔭ ᑲᒪᑯᓄᐛᓯᐅᒋᐛᐱᒡ ᑲ ᐱᔅᑎᓂᔭᒡ ᐊᓐᑕ ᓂᑐᐱᔪᐅ-ᐅᒋᒪᐤ ᐎᒋᒡ᙮ 11ᐸᐃᒂᐤ ᑕᐱᔅᑲᒡ ᑕᐱᔅᑯᓐ ᓂᒋ ᐳᐛᒧᓇᓐ ᒥᒄ ᑕᑎᐸᓐ ᒋ ᐃᓯᓇᑯᓇ ᓂᐳᐛᒧᐅᓇᓇ᙮ 12ᒋ ᑕᐤ ᐊᓐᑕ ᐊ ᐅᔅᑎᓂᒋᐅᑦ ᐃᑉᕈᐤ ᐃᔪᐤ ᐊᑕᐅᒋᒡ, ᓂᑐᐱᔪᐅ-ᐅᒋᒪᐤ ᐅᑯᐸᓇᒪ, ᑕᐱᔅᑯᓐ ᓂᒋ ᐊᑕᐳᐛᒧᔅᑐᐛᓇᓐ ᑭᔭ ᓂᒋ ᐎᑎᒪᑯᓇᓐ ᓂᐳᐛᒧᐅᓇᓇ᙮ 13ᒥᓯᐛ ᒐᒂᔪᐤ ᒋ ᐃᔅᐱᔪᐤ ᒧᔭᒻ ᑲ ᐃᔅᒋᔄᑦ ᒐ ᐃᔅᐱᔨᒡ, ᔅᒋ ᒋᐛᓂᒧᐅᓐ ᓂᑦ ᐊᐱᑎᓯᐅᓐ, ᒥᒄ ᔅᒋ ᐃᑎᓱᐛᓐ ᒥᔅᑎᑯᒡ ᒐ ᐊᑯᔭᑭᓄᐅᑦ ᐅᒋᒪᐤ ᑲᐱᒥᓄᐛᔅᑦ᙮”
ᒍᓯᑉ ᐎᑎᒧᐛᐤ ᒋᓴᐅᒋᒪᐛ ᐅᐳᐛᒧᐅᓂᔪᐛ
14ᑲᒋ ᐸᑕᐧᒃ ᐅᔭ ᒋᓴᐅᒋᒪᐤ, ᒂ ᐎᓴᒪᑦ ᒍᓯᐸ ᑭᔭ ᑎᐛᒡ ᒋ ᐸᓱᐛᑭᓄᐎᔪᐛ ᑲᒪᑯᓄᐛᓯᐅᒋᐛᐱᒡ ᐅᒡ᙮ ᑲᒋ ᑲᔅᑲᐃᔅᑐᐛᑦ ᑭᔭ ᐊᑕᔅᐱᓱᑦ ᒍᓯᑉ, ᐊᑯ ᓇᑐᐛᐱᒪᑦ ᒋᓴᐅᒋᒪᐛ᙮
15ᒂ ᐃᑎᑯᑦ ᒋᓴᐅᒋᒪᐛ, “ᓂᒋ ᐳᐛᒧᓐ ᑭᔭ ᓇᒪ ᑕᐤ ᐊᐛᓐ ᒐᒋ ᐎᑎᒧᐅᑦ᙮ ᓂᒋ ᐎᑎᒪᑯᐅᓐ ᐊᓂᑕᐤ ᐎᑎᒪᒐᔨᓐ ᐳᐛᒧᐅᓇ᙮”
16ᐊᑯ ᒍᓯᑉ ᐊᑕᑦ, “ᓇᒪᔭᐤ ᓂᔾ ᐊ ᐃᑐᑎᒪᓐ, ᒥᒄ ᒋᓴᒪᓂᑐᐤ ᒋᑭ ᒥᔭᐤ ᒋᓴᐅᒋᒪᐛ ᐊ ᒥᔽᔨᒡ ᐎᑎᒪᒐᐅᓂᔪᐤ᙮”
17ᐊᑯ ᒋᓴᐅᒋᒪᐤ ᐛᑎᒧᐛᑦ ᒍᓯᐸ ᐅᐳᐛᒧᐅᓇ, “ᓇᓯᐸᑎᒥᒡ ᓇᐃᔭᓪ ᓯᐱᒡ ᓂ ᓂᐳᐅᓐ, 18ᓯᔅᒋᑯᒡ ᓂᔄᐅᑕᒡ ᐊ ᒥᔪᓇᑯᓯᒡ ᑭᔭ ᐊ ᑕᒋᐳᒡ ᒥᒋᑎᐧᑯᒡ ᐸᒋ ᒧᔅᒋᐸᐱᔪᐅᒡ ᓇᐃᔭᓪ ᓯᐱᔪᐤ ᑭᔭ ᒂᒋ ᒋᒥᒋᒡ ᒥᔅᑯᓱᐛ᙮ 19ᒥᓐ ᓂᔄᐅᑕᒡ ᑯᑎᑭᒡ ᐊ ᐱᔅᒐᐛᒡ ᑭᔭ ᐊ ᒋᒪᐧᑭᑕᒡ ᒥᒋᑎᐧᑯᒡ ᒺᔅᒋᐸᐱᔪᐅᒡ ᓇᐃᔭᓪ ᓯᐱᔪᐤ, ᓇᒪ ᓂᑕ ᐛᐱᒪᐅᒡ ᐊ ᒥᒋᓇᑯᓯᒡ ᒥᒋᑎᐧᑯᒡ ᐊᓐᑕ ᒥᓯᐛ ᐃᒋᑉᑦ ᐊᔅᒋᒡ᙮ 20ᐊᑯ ᐊᓐᒡ ᑲ ᒋᒪᐧᑭᑕᒡ ᒥᒋᑎᐧᑯᒡ ᒂ ᒧᐛᒡ ᐊᓂᔭ ᑲ ᑕᒋᐳᔨᒋ ᒥᒋᑎᒂ᙮ 21ᒥᒄ ᑲᒋ ᒧᐛᒡ ᐊᓐᒡ ᑲ ᐱᔅᒐᐛᒡ ᒥᒋᑎᐧᑯᒡ ᐊᓂᔭ ᑲ ᑕᒋᐳᔨᒋ ᒥᒋᑎᒂ, ᐸᐃᑯᑕᐤ ᐊᔅᒄ ᒋ ᐃᓯᓇᑯᓱᐅᒡ᙮ ᒂ ᐊᑎ ᐸᑯᐱᔨᔭᓐ᙮
22ᒥᓐ ᑲᐤ ᓇᐸᔭᓐ, ᒥᓄᐛᒡ ᐸᐛᒧᔭᓐ, ᓂᔄᐅᑕᒡ ᐊᑎᑕᔨᒋ ᑭᔭ ᐊ ᒪᒥᓴᔨᒋ ᐊ ᐅᔅᑎᒂᓄᔨᒋ ᐸᒂᓯᑭᓂᒥᓇ ᓂ ᐛᐸᑕᓐ ᐊ ᐸᐃᑯ ᓂᑕᐅᒋᒋ᙮ 23ᐊᑯ ᒥᓐ ᓯᔭᒋᓂᑕᐅᒋᒋ ᓂᔄᐅᑕᒡ ᐊ ᐅᔅᑎᒂᓄᔨᒋ ᐸᒂᓯᑭᓂᒥᓇ, ᐊᔭᐱᓴᔅᑯᓯᒋ ᑭᔭ ᐊ ᐸᔅᑕᒋ ᐛᐱᓄᑕᒡ ᐅᒡ ᐊ ᐅᑎᒡ᙮ 24ᐊᑯ ᐊᓐᒡ ᐊᔭᐱᓴᔅᑯᓯᒡ ᐊ ᐅᔅᑎᒂᓄᐎᒡ ᐸᒂᓯᑭᓂᒥᓐᒡ ᓯᔅᒋᑯᒡ ᒥᑎᔭᐅᒡ ᐊᓂᔭ ᓂᔄᐅᑕᒡ ᐊᑎᑕᔨᒋ ᑭᔭ ᐊ ᒪᒥᓴᔨᒋ ᐊ ᐅᔅᑎᒂᓄᔨᒋ ᐸᒂᓯᑭᓂᒥᓇ᙮ ᓂᒋ ᐊᑕᐳᐛᒧᔅᑐᐛᐅᒡ ᑲᒥᓂᑐᐅᓯᒡ, ᒥᒄ ᓇᒪ ᑕᐤ ᐊᐛᓐ ᒐᒋ ᐎᑎᒧᐅᑦ ᑕᓐ ᐊᑥᒥᑭᓂᔨᒋ ᓂᐳᐛᒧᐅᓇ᙮”
25ᐊᑯ ᒍᓯᑉ ᐊᑕᑦ ᒋᓴᐅᒋᒪᐛ, “ᐸᐃᑯᑕᐤ ᐃᑥᒥᑭᓇ ᐊ ᓂᓯᒋ ᒋᐳᐛᒧᐅᓇ; ᔅᒋ ᐎᑎᒪᒄ ᒐᒂᓂᔪᐤ ᒐ ᐃᑐᑕᐧᒃ ᒋᓴᒪᓂᑐᐤ᙮ 26ᐊᓐᒡ ᓂᔄᐅᑕᒡ ᐊ ᑕᒋᐳᒡ ᒥᒋᑎᐧᑯᒡ ᑭᔭ ᐊᓂᔭ ᓂᔄᐅᑕᒡ ᐊ ᐅᔅᑎᒂᓄᒋ ᐸᒂᓯᑭᓂᒥᓇ ᐊᐅᑯᓐ ᓂᔄᐅᑕᒡ ᑕᑐᐤ ᐱᐳᓇ ᒐ ᐛᔪᑎᒡ ᒥᒋᒻ, ᐸᐃᑯᑕᐤ ᐃᑥᒥᑭᓇ᙮ 27ᒥᒄ ᐊᓐᒡ ᓂᔄᐅᑕᒡ ᐊᐱᔅᒐᐛᒡ ᒥᒋᑎᐧᑯᒡ ᓇᓇᒐ ᑲ ᐸᒋ ᒧᔅᒋᐸᐱᔪᐅᒡ ᑭᔭ ᐊᐱᓴᔅᑯᓯᒡ ᐊ ᐅᔅᑎᒂᓄᐎᒡ ᐸᒂᓯᑭᓂᒥᓐᒡ ᐊ ᐸᔅᑕᔨᒋ ᐛᐱᓄᑕᒡ ᐅᒡ ᐊ ᐅᑎᒡ ᐊᐅᑯᓐ ᓂᔄᐅᑕᒡ ᑕᑐᐤ ᐱᐳᓇ ᒐ ᓯᐛᔨᓇᓄᐅᒡ᙮
28ᒋᓴᒪᓂᑐᐤ ᔅᒋ ᐛᐸᑎᔨᒄ ᒐᒂᔪᐤ ᒐ ᐃᑐᑕᐧᒃ, ᐊᐅᑯᓐ ᒧᔭᒻ ᒐ ᐃᔅᐱᔨᒡ ᐊ ᐃᓯ ᐎᑎᒪᑕᓐ᙮ 29ᒋᑭ ᐅᑎᒋᐱᔪᐤ ᓂᔄᐅᑕᒡ ᑕᑐᐤ ᐱᐳᓇ ᐃᔅᐱ ᒐ ᐛᔪᑎᒡ ᒥᒋᒻ ᐊᓐᑕ ᒥᓯᐛ ᐃᒋᑉᑦ ᐊᔅᒋᒡ᙮ 30ᒋ ᐳᓂᐱᔨᒐ ᐅᔭ ᐱᐳᓇ ᒐ ᐛᔪᑎᒡ ᒥᒋᒻ, ᐊᑯ ᒐ ᐅᑎᒋᐱᔨᒡ ᓂᔄᐅᑕᒡ ᑕᑐᐤ ᐱᐳᓇ ᒐ ᓯᐛᔨᓇᓄᐅᒡ᙮ ᒋᑭ ᐅᓂᒋᔅᒋᐅᒡ ᐃᔪᒡ ᑕᓐ ᑲ ᐃᑕᔨᑕᑯᓂᔨᒡ ᐃᔅᐱ ᑲ ᐛᔪᑎᓂᔨᒡ ᒥᒋᒥᔪᐤ ᐊᓐᑕ ᐃᒋᑉᑎᒡ᙮ ᒋᑭ ᐊᔨᒥᐅᐎᒡ ᐃᔪᒡ ᐊ ᓯᐛᔨᓇᓄᐅᒡ᙮ 31ᒋᒋᐛ ᒋᑭ ᐊᔨᒥᓐ ᒐ ᐊᑲ ᑎᒂᒡ ᒥᒋᒻ, ᓇᒪ ᐊᐛᓐ ᐊᓐᑕ ᐊᔅᒋᒡ ᒋᑭ ᒋᔅᒋᑎᒻ ᐃᔅᐱ ᑲ ᐛᔪᑎᓂᔨᒡ ᒥᒋᒥᔪᐤ᙮ 32ᐊᒂᑥᒥᑲᒡ ᐊᓐ ᓂᔄᐤ ᑲ ᐃᓯ ᐳᐛᒧᔨᓐ, ᒋᓴᒪᓂᑐᐤ ᓴᔅ ᒋ ᐛᑕᔨᑎᒻ ᒐᒂᔪᐤ ᒐ ᐃᔅᐱᔨᒡ ᑭᔭ ᐎᐱᒡ ᒐ ᐅᑎᒋᐱᔨᑕᑦ᙮
33ᐊᑯ ᒪᒃ ᐊᓄᒡ ᒋᓴᐅᒋᒪᐤ ᒋᐸ ᐅᑎᓇᐤ ᓇᐸᐛ ᐊ ᑭᒐᑕᐛᔨᑕᑯᓯᔨᒋ ᑭᔭ ᐊ ᑭᔅᒋᑕᔨᒋ ᒐᒋ ᑎᐸᔨᑎᒪᑭᓄᔨᒋ ᐃᒋᑉᑦ ᐊᔅᒋᔪᐤ᙮ 34ᐃᔭᐱᒡ ᑯᑎᑭᒡ ᐅᒋᒪᓯᒡ ᒋᐸ ᐅᑎᓇᐅᒡ ᑭᔭ ᒋᐸ ᐃᑎᓱᒪᐅᒡ ᐅᒡ ᐅᒋᒪᓯᒡ ᒐᒋ ᐱᑕᑕᒡ ᑕᑐᐎᒡ ᐃᓯᑕᑎᐸᓇᒡ ᒥᒋᒥᔪᐤ ᓇᑕᐅᒋᑕᑭᓄᐎᒡ, ᓇᐎᒡ ᐅᔭ ᒐ ᒥᒋᓇᓄᔨᒋ ᑭᔭ ᐸᐃᒄ ᒐᒋ ᓇᐅᔅᑕᑭᓄᐎᒡ᙮ 35ᒐ ᐃᑎᓱᒥᑥᐤ ᒐᒋ ᒪᒧᓴᒋᓇᒡ ᒥᓯᐛ ᒥᒋᒥᔪᐤ ᒪᒂᒡ ᐅᑎᒋᐱᔨᒐ ᓂᔄᐅᑕᒡ ᑕᑐᐤ ᐱᐳᓇ ᒐ ᐃᔅᐱᔅ ᒥᔪᐱᔨᒡ ᑭᔭ ᒐ ᒥᔨᑥᐤ ᑎᐸᔨᒋᒐᐅᓂᔪᐤ ᒐ ᓇᐅᔅᑕᒡ ᐸᒂᓯᑭᓂᒥᓇ ᐊᓐᑕ ᐅᑕᓇᐛ ᑭᔭ ᒐ ᒥᔪ ᑭᓄᐛᔨᑕᒡ᙮ 36ᐊᐅᑯᐤ ᒥᒋᒻ ᒐ ᐃᔅᑯᓇᑭᓄᐅᒡ ᐃᔪᒡ ᒐ ᒥᒋᒡ ᒪᒂᒡ ᒐ ᐅᑎᒋᐱᔨᒡ ᓂᔄᐅᑕᒡ ᑕᑐᐤ ᐱᐳᓇ ᒐ ᐊᑲ ᑎᒂᒡ ᒥᒋᒻ ᐅᑕ ᐃᒋᑉᑦ ᐊᔅᒋᒡ᙮ ᐊᐅᑯᐤ ᐅᒡ ᒐ ᐊᑲ ᑯᐧᑭᑕᒡ ᐃᔪᒡ ᒪᒂᒡ ᐊᑲ ᑎᒂᒐ ᒥᒋᒻ᙮”
ᒍᓯᑉ ᐅᒋᒪᐧᑲᑕᑭᓄᐤ ᒥᓯᐛ ᐃᒋᑉᑎᒡ
37ᒋ ᒥᔽᔨᑎᒥᐃᑯᐅᒡ ᒋᓴᐅᒋᒪᐤ ᑭᔭ ᐅᑦ ᐊᑐᔅᒐᔭᑭᓇ ᒍᓯᐸ ᐅᑦ ᐃᑕᔨᑎᒧᐅᓂᔪᐛ᙮ 38ᐊᑯ ᒋᓴᐅᒋᒪᐤ ᐊᑕᑦ ᐅᑦ ᐊᑐᔅᒐᔭᑭᓇ, “ᓇᒪ ᓂᑕ ᒋᑭ ᒥᔅᑯᐛᓄᐤ ᐊ ᒥᔪ ᑭᔅᒋᑕᑦ ᐊᐛᓐ ᐃᔅᐱᔅ ᒍᓯᑉ, ᐊᓐ ᓇᐸᐤ ᑲ ᐱᒋᔅᑲᑯᑦ ᒋᓴᒪᓂᑐᐛ ᐅᑦ ᐊᒐᐧᑯᔪᐛ᙮” ᓇᒪ ᑕᐤ ᐊᐛᓐ ᑲᓄᐛᔨᑕᐧᒃ ᐃᑈᐧᑲᐅᓂᔪᐤ ᑭᔭ ᑭᒐᑕᐛᔨᑕᑯᓱᐅᓂᔪᐤ ᒧᔭᒻ ᒋᔾ ᐊᓯ ᑭᓄᐛᔨᑎᒥᓐ᙮
39ᐊᑯ ᒋᓴᐅᒋᒪᐤ ᐊᑕᑦ ᒍᓯᐸ, “ᐛᔅ ᒋᓴᒪᓂᑐᐤ ᑲ ᒋᔅᒐᔨᑎᒥᐃᔅᒃ ᐊᑥᒥᑭᓂᔨᒋ ᓂᐳᐛᒧᐅᓇ᙮ 40ᒋᔾ ᒋᑭ ᑭᓄᐛᔨᑎᔨᑎᓐ ᓂᒋᓴᐅᒋᒪᐅᒋᐛᑉ ᑭᔭ ᓂᑎᐸᔨᑎᒧᐅᓇ᙮ ᒥᓯᐛ ᐊᐛᓐᒋ ᒋᑭ ᓂᓇᐃᑕᑯᒡ ᒐᒂᔪᐤ ᐊ ᐃᑎᑥᐤ᙮ ᓂᔾ ᒥᒄ ᐅᔅᑕ ᓂᑭ ᐃᑕᔨᑕᑯᓯᓐ ᐃᔅᐱᔅ ᒋᔾ᙮”
41ᐊᑯ ᒋᓴᐅᒋᒪᐤ ᐊᑕᑦ ᒍᓯᐸ, “ᐊᓄᒡ ᒥᓯᐛ ᐃᒋᑉᑎᒡ ᒋᑭ ᒋᓴᐅᒋᒪᐤ ᒋᔅᒋᓄᐛᒋᐃᑎᓐ᙮” 42ᒋᓴᐅᒋᒪᐤ ᒂ ᒥᓇᑦ ᐅᒋᓴᐅᒋᒪᐅ ᑕᐱᒋᒐᐱᓱᓇ ᐅᑎᒋᒡ ᐅᒡ ᑭᔭ ᒐᑭᒧᐃᒪᑦ ᐊᓐᑕ ᒍᓯᐸ ᐅᑎᒋᔨᒡ, ᐃᔭᐱᒡ ᒋᒋᑭᒧᑕᑎᔭᐤ ᐊ ᒥᔽᔨᒋ ᐊᐱᒋᑕᐅᓇ ᑭᔭ ᑎᔭᐱᔅᑯᒧᑎᔭᑦ ᑲ ᐎᔄᐅᓱᓇᔭᐎ ᑲᐃᑕᐸᔅᑲᑭᓄᐎᒡ᙮ 43ᒋᓴᐅᒋᒪᐤ ᒋ ᒥᔭᐤ ᒍᓯᐸ ᑯᑎᑲ ᑲ ᑎᑎᐱᔨᒋ ᐅᑕᐸᓇᔎ ᒐᒋ ᐳᓯᔨᒋ ᑭᔭ ᐅᓂᑐᐱᔪᐅ-ᐃᔨᒪ ᓇᑲᓄᐸᑕᔨᒋ ᑭᔭ ᑎᔭᑈᔨᒋ, “ᑐᐎᔅᑐᐛᐧᒄ᙮” ᐊᑯ ᒍᓯᑉ ᒂ ᒋᓴᐅᒋᒪᐧᑲᑕᑭᓄᐅᑦ ᒥᓯᐛ ᐃᒋᑉᑎᒡ᙮
44ᒋᓴᐅᒋᒪᐤ ᒂ ᐃᑕᑦ ᒍᓯᐸ, “ᐊᑎᓱᐧᒄ ᓂᔾ ᒋᓴᐅᒋᒪᐎᔭᓐ ᐃᒋᑉᑎᒡ, ᒋᑭ ᓇᐃᒥᑎᓐ ᒐᒋ ᓄᑎᒻ ᑎᐸᔨᒥᑥᐤ ᓂᑦ ᐃᔨᒥᒡ᙮ ᓇᒪ ᒐᒂᔪᐤ ᒋᑭ ᐃᑐᑎᒧᒡ ᐸᑐᔅ ᓂᔅᑯᒧᔨᓇ᙮” 45ᒋᓴᐅᒋᒪᐤ ᒂ ᐅᔅᒋᓯᓂᐧᑲᑕᑦ ᒍᓯᐸ, “ᓴᐱᓇᑦ-ᐸᓂᐊ” ᐊ ᐃᓯᓂᐧᑲᑕᑦ, ᐃᔭᐱᒡ ᐃᒋᑉᑦ ᐃᔎᐛ ᒋ ᒥᔭᐤ ᒐ ᐎᐎᔨᒋ, ᐊᓯᓇᑦ ᒋ ᐃᓯᓂᐧᑲᓱᔪᐛ᙮ ᐸᑎᐸᕋ ᐅᑕᓂᓴ ᐊᓐ ᑲ ᐊᔭᒥᐊᐅᒋᒪᐅᑦ ᐊᓐᑕ ᐅᓐ᙮ ᐊᑯ ᒍᓯᑉ ᐛᒋᒪᐅᑦ ᒥᓯᐛ ᐃᔪᐛ ᑭᔭ ᐃᒋᑉᑎᒡ ᐊᔅᒋᔪᐤ᙮
46ᒋ ᓂᔅᑐᔪᐛᐱᐳᓇᓱᐤ ᒍᓯᑉ ᐃᔅᐱ ᑲ ᐊᑐᔅᑯᐛᑦ ᐃᒋᑉᑎᒡ ᒋᓴᐅᒋᒪᐛ᙮ ᐊᑯ ᒍᓯᑉ ᓇᑭᑕᑦ ᒋᓴᐅᒋᒪᐛ ᑭᔭ ᒥᓯᐛ ᐃᒋᑉᑦ ᐊᔅᒋᒡ ᐊᑎ ᐃᑐᑕᑦ᙮ 47ᒪᒂᒡ ᐊᓂᔭ ᐅᔅᑭᒡ ᓂᔄᐅᑕᒡ ᑕᑐᐤ ᐱᐳᓇ, ᒋ ᒥᔅᑎ ᓂᑕᐅᒋᓐ ᒥᒋᒻ ᐊᓐᑕ ᐊᔅᒋᒡ᙮ 48ᒍᓯᑉ ᒋ ᐃᑎᓱᒪᐤ ᐅᑦ ᐊᑐᔅᒐᔭᑭᓇ ᒪᒂᒡ ᑲ ᐛᔪᑎᓂᔨᒡ ᒥᒋᒥᔪᐤ ᐃᒋᑉᑎᒡ ᒐᒋ ᒪᐅᒋᑕᔨᒋ ᑭᔭ ᓇᐅᔅᑕᔨᒋ ᒥᒋᒥᔪᐤ ᐊᓐᑕ ᐅᑕᓇᐛ᙮ ᐊᓐ ᒥᒋᒻ ᑲ ᓂᑕᐅᒋᒡ ᓂᑕᐅᒋᑕᑭᓂᒡ ᒥᒋᒪ ᐊᓐᑕ ᐊ ᐅᑕᓇᐅᒡ ᒋ ᑭᓄᐛᔨᑕᑭᓄᐤ᙮ 49ᒋᒋᐛ ᒋ ᒥᓴᔪᐤ ᐊᓂᔭ ᒥᒋᒥᔪᐤ ᒍᓯᑉ ᑲ ᐃᑎᓱᒪᑦ ᐃᔪᐛ ᒐᒋ ᓇᐅᔅᑕᔨᒋ ᒐᒃ ᑲ ᓂᑲᐎᒡ ᒐᒋ ᑎᐱᒋᑕᒡ ᑕᓐ ᐊᔅᐱᓴᔨᒡ, ᐊ ᐎ ᑎᐱᒋᑕᑭᓄᐅᒡ ᒥᒋᒻ ᒧᔭᒻ ᐊ ᑎᐱᒋᑕᑭᓄᐅᒡ ᐃᔭᑲᐤ ᓇᓯᐸᑎᒥᒡ ᐎᓂᐸᑯᒡ ᐃᓯᓇᑯᓐ᙮
50ᐊᒺᔭ ᐅᑎᒋᐱᔨᒋ ᐱᐳᓇ ᐊ ᓯᐛᔨᓇᓄᐅᒡ, ᒋ ᓂᓯᔨᐛ ᒍᓯᑉ ᐅᑯᓴ ᐎᐛ ᐊᓯᓇᑦ ᐅᒡ᙮ 51“ᒪᓇᓴ” ᒋ ᐃᓯᓂᐧᑲᑕᐤ ᒍᓯᑉ ᓂᔅᑎᒻ ᐅᑯᓴ, “ᐊᓐ ᐊᐛᓐ ᐊ ᐃᑐᑕᐧᒃ ᒐ ᐅᓂᒋᔅᒋᓇᓄᐎᒡ,” ᐊ ᐃᑥᒥᑲᒡ᙮ ᐛᔅ ᒋ ᐃᔅᒋᔄᐤ, “ᓂᒋ ᑐᑕᒄ ᒋᓴᒪᓂᑐᐤ ᒐᒋ ᐅᓂᒋᔅᒋᑎᒧᒡ ᓂᐎᓯᒐᔨᑎᒧᐅᓇ ᑭᔭ ᒥᓯᐛ ᓄᑕᐎᔭ ᐎᒋᔨᒡ ᐊ ᑕᔨᒋ᙮” 52“ᐃᑉᕋᐃᒻ” ᒋ ᐃᓯᓂᐧᑲᑕᐤ ᑯᑎᑲ ᐅᑯᓴ, “ᑲ ᒥᓂᓱᐅᒡ,” ᐊ ᐃᑥᒥᑲᒡ᙮ ᐛᔅ ᒋ ᐃᔅᒋᔄᐤ, “ᒋᓴᒪᓂᑐᐤ ᓂᒋ ᒥᔨᒄ ᐊᐛᓴ ᐊᓐᑕ ᐊᔅᒋᒡ ᑲ ᒥᔅᑎ ᐅᔅᑕᐱᔪᐅᒡ᙮”
53ᐃᔅᐱ ᑲ ᐳᓂᐱᔨᒡ ᓂᔄᐅᑕᒡ ᑕᑐᐤ ᐱᐳᓇ ᑲ ᐛᔪᑎᒡ ᒥᒋᒻ ᐊᓐᑕ ᐃᒋᑉᑎᒡ, 54ᐊᑯ ᒐ ᒋᐱᔨᒡ ᓂᔄᐅᑕᒡ ᑕᑐᐤ ᐱᐳᓇ ᐊ ᓯᐛᔨᓇᓄᐅᒡ, ᒧᔭᒻ ᒍᓯᑉ ᑲ ᐃᔅᒋᔄᑦ ᒐ ᐃᔅᐱᔨᒡ᙮ ᓇᒪ ᐅᒋ ᑎᑯᓐ ᒥᒋᒻ ᐊᓐᑕ ᑯᑎᑲ ᐊᔅᒋᔭ, ᒥᒄ ᒋ ᑎᑯᓐ ᒥᒋᒻ ᐊᓐᑕ ᒥᓯᐛ ᐃᒋᑉᑎᒡ᙮ 55ᐊᑯ ᐃᔅᐱ ᐃᒋᑉᑎᒡ ᐃᔪᒡ ᓄᑕᐱᔨᒡ ᒥᒋᒥᔪᐤ, ᒋ ᓂᑐᐛᔨᑎᒧᐛᐅᒡ ᒋᓴᐅᒋᒪᐛ ᒐᒋ ᒥᔨᑯᒡ ᒐᒂᔪᐤ ᒐ ᒥᒋᒡ᙮ ᒋᓴᐅᒋᒪᐤ ᒂ ᐃᑕᑦ ᐃᔪᐛ, “ᒍᓯᑉ ᓂᑐᐛᐱᒥᐧᒄ ᑭᔭ ᒐ ᐃᑐᑎᒺᒄ ᒥᒄ ᒐᒂᔪᐤ ᐊ ᐃᑎᓱᒥᑕᒄ᙮”
56ᐃᔅᐱ ᒪᓯᑕᐱᔨᒡ ᓄᑕᐧᑭᑕᐅᓐ ᒥᓯᐛ ᐊᔅᐱᑎᔅᑭᒥᑲᒡ ᐊᔅᒋᒡ, ᒂ ᓴᓇᐧᒃ ᒍᓯᑉ ᒥᓯᐛ ᐊᔅᑕᓱᐅᒋᐛᐸ ᐊᓐᑕ ᑲᓄᐛᔨᑕᑭᓄᐎᒡ ᒥᒋᒥᔪᐤ ᑲᒪᐅᑕᑭᓄᐎᒡ ᑭᔭ ᒂ ᐊᑕᒪᑦ ᒥᒋᒥᔪᐤ ᐃᒋᑉᑎᒡ ᐃᔪᐛ᙮ 57ᐃᒋᑉᑎᒡ ᒋ ᐃᑐᑕᐅᒡ ᐃᔪᒡ ᒥᓯᐛ ᐊᔅᐱᑎᔅᑭᒥᑲᔨᒡ ᐊᔅᒋᒡ ᐅᒡ ᒐᒋ ᐃᔭᒡ ᒥᒋᒥᔪᐤ ᒍᓯᐸ ᐅᒡ, ᐛᔅ ᒋᒋᐛ ᒋ ᐊᔨᒥᓐ ᑲ ᐅᑎᒋᐱᔨᒡ ᐊᑲ ᐅᒋ ᑎᒂᒡ ᒥᒋᒻ ᐊᓐᑕ ᒥᓯᐛ ᐊᔅᒋᒡ᙮
Currently Selected:
ᒐᓂᓯᔅ 41: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
