ᒐᓂᓯᔅ 36
36
ᐃᓴᐅ ᐎᐛ ᑭᔭ ᐅᑦ ᐊᐛᓯᒪ ᑲᐃᓇᓐ ᑲ ᑕᒡ
1ᐊᐅᑯᐤ ᐊ ᐃᓯ ᑎᐸᒋᒪᑭᓄᐅᑦ ᐃᓴᐅ ᐅᑦ ᐊᓂᔅᑯᑕᐸᓇ, ᐃᑕᒻ ᐃᔭᐱᒡ ᑲ ᐃᓯᓂᐧᑲᑕᑭᓄᐅᑦ᙮ 2ᓇᒪ ᐅᒋ ᐎᒋᒪᐤ ᐃᔎᐛ ᐊᓐᑕ ᐎᒡ ᐃᔪᐛ ᐅᒡ, ᒥᔅᑯᒡ ᐃᔭᒡ ᐊ ᐃᑎᔅᑲᓇᓯᔨᒋ ᐃᔪᐛ ᒋ ᐅᑎᓇᐤ ᐃᔎᐛ ᐊᓐᑕ ᑲᐃᓇᓐ ᐊᔅᒋᒡ ᑲ ᐎᒋᔨᒋ᙮ ᒋ ᓂᔅᑎᔨᐛ ᐎᐛ; ᐊᑕ, ᐅᐅᓕᐸᒪ ᑭᔭ ᐸᓯᒪᑦ᙮ ᐊᑦ ᐃᔪᐛ ᒋ ᐅᑕᐎᔪᐤ ᐊᑕ, ᐃᓚᓐ ᐃᓯᓂᐧᑲᓱᔪᐛ᙮ ᐅᐅᓕᐸᒪ ᐊᓇ ᒋ ᐅᑕᐎᔪᐤ ᑭᔭ ᓯᐱᔭᓇ ᒋ ᐅᒧᓱᒧᐤ, (ᐃᐎ) ᐃᔪᐛ᙮ 3ᐸᓯᒪᑦ ᐃᔅᒪᐃᓪ ᒋ ᐅᑕᐎᔪᐤ ᑭᔭ ᓇᐸᐃᐅᑦ ᒋ ᐃᓯᓂᐧᑲᓱᔪᐛ ᐅᔅᑕᓴ᙮
4ᐃᓴᐅ ᑭᔭ ᐊᑕ ᒋ ᑕᔪᐛ ᐅᑯᓱᐛᐛ ᐃᓕᐸᔅ ᐊ ᐃᓯᓂᐧᑲᓱᔨᒋ; ᐃᓴᐅ ᑭᔭ ᐸᓯᒪᑦ ᒋ ᑕᔪᐛ ᐅᑯᓱᐛᐛ ᕋᐅᓪ ᐊ ᐃᓯᓂᐧᑲᓱᔨᒋ᙮ 5ᐃᓴᐅ ᑭᔭ ᐅᐅᓕᐸᒪ ᒋ ᑕᔪᐛ ᐅᑯᓱᐛᐛ ᒐᐅᔅ, ᒐᓚᒻ ᑭᔭ ᑯᕋ ᐊ ᐃᓯᓂᐧᑲᓱᔨᒋ᙮ ᐊᐅᑯᐤ ᐅᔭ ᐃᓴᐅ ᐅᑯᓴ ᐎᐛ ᑲ ᓂᑕᐅᒐᔨᒋ ᒪᒂᒡ ᐊᓐᑕ ᑲ ᑕᒡ ᑲᐃᓇᓐ ᐊᔅᒋᒡ᙮
6ᐃᓴᐅ ᒂ ᓂᑭᑕᑦ ᐎᐧᑲᓂᓴ ᒐᑭᐸ ᑭᔭ ᒂ ᐃᑐᑕᑦ ᒐᒋ ᐎᒋᒡ ᐊᓐᑕ ᐃᔭᑎᔅᒋᒡ᙮ ᒋ ᐅᑎᓇᐤ ᐎᐛ, ᐅᑯᓴ, ᐅᑕᓂᓴ ᑭᔭ ᒥᓯᐛ ᐊᐛᔪᐛ ᑲ ᑕᔨᒋ ᐎᒋᒡ, ᐊᓯᒡ ᒥᓯᐛ ᐅᑦ ᐊᐛᓯᓯᒪ ᑭᔭ ᒥᓯᐛ ᐅᑎᐱᔨᐛᐅᓯᐅᓐ ᑲᐃᓇᓐ ᐊᔅᒋᒡ ᑲ ᐅᑎᓇᐧᒃ ᑭᔭ ᒂ ᔅᑐᑕᑦ᙮ 7ᒋ ᔅᑐᑕᐤ ᐅᓴᒻ ᒋᒋᐛ ᒋ ᐱᓴᓯᔪᐤ ᐊᔅᒋᔪᐤ ᐎᔾ ᑭᔭ ᒐᑭᐸ ᐊᓐᑕ ᑲ ᐎᒋᒡ; ᒋ ᒥᒐᑎᔨᐛ ᐅᑦ ᐊᐛᓯᓯᒧᐛᐛ ᑭᔭ ᓇᒪ ᐅᒋ ᒪᒧᐤ ᑕᐅᒡ᙮ 8ᐊᑯ ᐃᓴᐅ ᓯᐅᕐ ᐱᔅᑯᑎᓇᒡ ᒂ ᐎᒋᑦ᙮
ᐃᓴᐅ ᑭᔭ ᐅᑦ ᐊᓂᔅᑯᑕᐸᓇ ᓯᐅᕐ ᑲ ᑕᒡ
9ᒂ ᐅᑕᐎᒪᐅᑦ ᐃᓴᐅ ᐃᑕᒻ ᐃᔪᐛ ᐊᓐᑕ ᑲ ᐎᒋᒡ ᓯᐅᕐ ᐱᔅᑯᑎᓇᒡ᙮ ᐊᐅᑯᐤ ᐅᔭ ᐊ ᐃᓯ ᐎᔭᑭᓄᔨᒋ ᐅᑦ ᐊᓂᔅᑯᑕᐸᓇ:
10ᐃᓕᐸᔅ, ᐊᑕ ᐅᑯᓴ, ᐃᓴᐅ ᐎᐛ ᑭᔭ ᕋᐅᓪ, ᐸᓯᒪᑦ ᐅᑯᓴ, ᐃᓴᐅ ᐎᐛ᙮
11ᐃᓕᐸᔅ ᐱᑕᑕᒡ ᒋ ᐃᑕᑎᓯᔨᐛ ᐅᑯᓴ: ᑕᒪᓐ, ᐅᒪᕐ, ᓯᐳ, ᑲᑕᒻ ᑭᔭ ᑭᓇᔅ ᐃᓯᓂᐧᑲᑕᑭᓄᐎᔪᐛ᙮ 12ᒋ ᑕᔪᐛ ᐃᓕᐸᔅ ᑯᑎᑲ ᐎᐛ ᑎᒻᓇ ᐊ ᐃᓯᓂᐧᑲᓱᔨᒋ᙮ ᒋ ᓂᑕᐅᒋᐃᒪᐤ ᐃᓕᐸᓴ ᐅᑯᓯᔪᐛ, ᐊᒪᓕᒃ ᐊ ᐃᓯᓂᐧᑲᓱᔨᒋ᙮ ᒥᓯᐛ ᐅᔭ ᒋ ᐅᔅᒋᒧᐤ ᐊᑕ, ᐃᓴᐅ ᐎᐛ᙮
13ᐃᓴᐅ ᐅᑯᓴ, ᕋᐅᓪ, ᒋ ᓇᐎᔪᐛ ᐅᑯᓴ: ᓇᐊᑦ, ᓯᕋ, ᓴᒪ ᑭᔭ ᒥᓴ᙮ ᒥᓯᐛ ᐅᔭ ᒋ ᐅᔅᒋᒧᐤ ᐸᓯᒪᑦ, ᐃᓴᐅ ᐎᐛ᙮
14ᐃᓴᐅ ᐎᐛ ᐅᐅᓕᐸᒪ, ᐊᓇ ᐅᑕᓂᓴ ᑭᔭ ᓯᐱᐅᓐ ᐅᔅᒋᒪ, ᓂᔅᑐ ᒋ ᓂᑕᐅᒋᐊᐤ ᐅᑯᓯᒪᐛ; ᒐᐅᔅ, ᒐᓚᒻ ᑭᔭ ᑯᕋ᙮
ᐊᓂᔅᒐ ᐅᑕᐎᒪᐅᒡ ᐃᑕᒻ ᐅᒡ ᑲ ᐃᑎᔅᑲᓇᓯᒡ
15ᐊᐅᑯᓐᒡ ᐅᒡ ᑲ ᐃᑎᔅᑲᓇᓯᒡ ᐃᓴᐅᐛ ᑲ ᐅᒋ ᐊᓂᔅᑯᑕᐸᓄᐎᒡ᙮ ᐃᓴᐅ ᐅᓂᔅᑎᒧᓴᓇ ᐃᓕᐸᔅ ᒋ ᐊᓂᔅᒐ ᐅᑕᐎᒪᐤ ᐅᔭ ᑲ ᐃᑎᔅᑲᓇᓯᔨᒋ: ᑕᒪᓐ, ᐅᒪᕐ, ᓯᐳ, ᑭᓇᔅ, 16ᑯᕋ, ᑲᑕᒻ ᑭᔭ ᐊᒪᓕᒃ᙮ ᐊᐅᑯᐤ ᐅᔭ ᐃᓴᐅ ᐎᐛ ᐊᑕ ᒥᓯᐛ ᑲ ᐅᑦ ᐊᓂᔅᑯᑕᐸᓐᑦ᙮
17ᐃᓴᐅ ᐅᑯᓴ ᕋᐅᓪ ᒋ ᐊᓂᔅᒐ ᐅᑕᐎᒪᐤ ᐅᔭ ᑲ ᐃᑎᔅᑲᓇᓯᔨᒋ: ᓇᐊᑦ, ᓯᕋ, ᓴᒪ ᑭᔭ ᒥᓴ᙮ ᒥᓯᐛ ᐅᒡ ᐸᓯᒪᑦ, ᐃᓴᐅ ᐎᐛ ᒋ ᐅᒋ ᐊᓂᔅᑯᑕᐸᓄᐎᒡ᙮
18ᐅᒡ ᑲ ᐃᑎᔅᑲᓇᓯᒡ ᐃᓴᐅ ᐎᐛ, ᐅᐅᓕᐸᒪ, ᐊᓇ ᐅᑕᓂᓴ, ᒋ ᐅᒋ ᐊᓂᔅᑯᑕᐸᓄᐎᒡ: ᒐᐅᔅ, ᒐᓚᒻ ᑭᔭ ᑯᕋ᙮
19ᒥᓯᐛ ᐅᒡ ᑲ ᐃᑎᔅᑲᓇᓯᒡ ᐃᓴᐅᐛ ᒋ ᐅᒋ ᐊᓂᔅᑯᑕᐸᓄᐎᒡ᙮
ᓯᐅᕐ ᐅᕆ ᐃᔪᐤ ᐅᑦ ᐊᓂᔅᑯᑕᐸᓇ
20ᐊᒺᔭ ᐃᓴᐅ ᑭᔭ ᐅᑦ ᐃᔨᒪ ᐃᑕᒻ ᐃᔅ ᐊᑐᒐᒡ᙮ ᐊᓐᒡ ᐊᓐᑕ ᐃᔪᒡ ᑲ ᐎᒋᒡ ᓯᐅᕐ, ᐦᐅᕆ ᐃᔪᐛ, ᒋ ᐅᒋ ᐊᓂᔅᑯᑕᐸᓄᐎᒡ᙮ ᓯᐅᕐ ᐅᑯᓴ, ᐅᑦ ᐃᔨᒧᐛᐛ ᒋ ᓂᑲᓂᔅᑯᐛᐅᒡ: 21ᓗᑕᓐ, ᓱᐸᓪ, ᓯᐱᐊᓐ, ᐊᓇ, ᑎᓱᓐ, ᐃᓱᕐ ᑭᔭ ᑎᓴᓐ ᒋ ᐃᓯᓂᐧᑲᓱᔨᐛ᙮
22ᒋ ᐅᑯᓱᐤ ᓚᑕᓐ, ᐦᐅᕆ ᑭᔭ ᐅᒪᒻ ᒋ ᐃᓯᓂᐧᑲᓱᔨᐛ᙮ ᒋ ᑕᔪᐛ ᐃᔭᐱᒡ ᐅᒥᓴ, ᑎᒻᓇ ᐊ ᐃᓯᓂᐧᑲᓱᔨᒋ᙮
23ᓱᐸᓪ ᒋ ᐅᑯᓱᐤ: ᐊᓪᐸᓐ, ᒪᓇᐊᑦ, ᐃᐸᓪ, ᓯᐳ ᑭᔭ ᐅᓇᒻ᙮
24ᓯᐱᐅᓐ ᒋ ᐅᑯᓱᐤ: ᐊᐃᐊ ᑭᔭ ᐊᓇ᙮ ᐊᓇ ᒋ ᐃᓯᓂᐧᑲᓱᐤ ᐊᓐ ᓇᐸᐤ ᑲ ᒥᔅᑲᐧᒃ ᓂᐱᔪᐤ ᐊᓐᑕ ᐸᐧᑯᑎᔅᑭᒥᑲᒡ ᐃᔅᐱ ᑲ ᑭᓄᐛᔨᒪᑦ ᐅᑕᐎᔭ ᑲᓂᐧᑲᑎᓯᔨᒋ ᐅᑲᐸᐃᑭᔎᒥᔪᐛ᙮
25ᐊᓇ ᒋ ᐅᑯᓱᐤ ᑎᓱᓐ ᐊ ᐃᓯᓂᐧᑲᓱᔨᒋ ᑭᔭ ᒋ ᐅᑕᓂᓱᐤ ᐅᐅᓕᐸᒪ ᐊ ᐃᓯᓂᐧᑲᓱᔨᒋ᙮
26ᒋ ᓇᐎᔨᐛ ᑎᓱᓐ ᐅᑯᓴ: ᐊᒻᑕᓐ, ᐃᔅᐸᓐ, ᐃᑦᕋᓐ ᑭᔭ ᑲᕋᓐ᙮
27ᒋ ᓂᔅᑎᔨᐛ ᐃᓱᕐ ᐅᑯᓴ: ᐱᓚᓐ, ᓴᐊᐸᓐ ᑭᔭ ᐊᑲᓐ᙮
28ᒋ ᓂᓯᔨᐛ ᑎᓴᓐ ᐅᑯᓴ: ᐅᔅ ᑭᔭ ᐊᕋᓐ᙮
29ᐊᐅᑯᓐᒡ ᐅᒡ ᑲ ᓂᑲᓂᔅᑯᐛᒡ ᐦᐅᕆ ᐃᔪᐛ: ᓚᑕᓐ, ᓱᐸᓪ, ᓯᐱᐅᓐ, ᐊᓇ, 30ᑎᓱᓐ, ᐃᓱᕐ ᑭᔭ ᑎᓴᓐ᙮ ᐊᐅᑯᓐᒡ ᐅᒡ ᑲ ᓂᑲᓂᔅᑲᒡ ᐊᓐᑕ ᓯᐅᕐ ᐊᔅᒋᒡ᙮
ᒋᓴᐅᒋᒪᐅᒡ ᐃᑕᒻ ᑲ ᑎᐸᔨᒋᒐᒡ
31ᐊᒺᔭ ᐃᔅᕋᐃᓪ ᐃᔪᒡ ᑭᓄᐛᔨᒪᒡ ᑎᐱᔨᐛ ᐅᒋᓴᐅᒋᒪᒧᐛᐛ᙮ ᒋ ᑕᐅᒡ ᒋᓴᐅᒋᒪᐅᒡ ᑲ ᑎᐸᔨᒋᒐᒡ ᐊᓐᑕ ᐃᑕᒻ ᐊᔅᒋᒡ᙮ ᐊᐅᑯᐤ ᐊ ᐃᓯ ᐎᔭᑭᓄᐅᒡ ᐊᓐᒡ ᒋᓴᐅᒋᒪᐅᒡ:
32ᓂᔅᑎᒻ ᒋ ᑕᐤ ᒋᓴᐅᒋᒪᐤ ᐸᓚ ᐊᓐ ᐃᑕᒻ ᑲ ᑎᐸᔨᒋᒐᑦ ᑎᓇᐸ ᐅᑕᓇᔪᐤ ᐅᒡ᙮ ᐱᐅᕐ ᒋ ᐃᓯᓂᐧᑲᓱᔨᐛ ᐅᑕᐎᔭ᙮
33ᑲᒋ ᐳᓂᐱᒪᑎᓯᑦ ᐸᓚ, ᒍᐸᑉ, ᓯᕋ ᐅᑯᓴ, ᐸᔅᕋ ᐃᑕᐅᓂᒡ ᐅᒡ, ᒋ ᐊᓂᔅᑲᔅᑯᐛᐤ ᐊ ᒋᓴᐅᒋᒪᐅᑦ᙮
34ᑲᒋ ᐳᓂᐱᒪᑎᓯᑦ ᒍᐸᑉ, ᐅᔅᐊᒻ ᒋ ᐊᓂᔅᑲᔅᑯᐛᐤ ᐊ ᒋᓴᐅᒋᒪᐅᑦ᙮ ᑎᒪᓐ ᐃᔪᐛ ᐅᑦ ᐊᔅᒋᔨᒡ ᒋ ᐅᒋᐱᔪᐤ ᐅᔅᐊᒻ᙮
35ᑲᒋ ᐳᓂᐱᒪᑎᓯᑦ ᐅᔅᐊᒻ, ᐊᑕᑦ, ᐱᑕᑦ ᐅᑯᓴ, ᒋ ᐊᓂᔅᑲᔅᑯᐛᐤ ᐊ ᒋᓴᐅᒋᒪᐅᑦ᙮ ᒋ ᓴᐧᑯᒋᐊᐤ ᒥᑎᐊᓐ ᓂᑐᐱᔪᐅ-ᐃᔪᐛ ᐊᓐᑕ ᒧᐊᑉ ᐊᔅᒋᒡ᙮ ᐊᐱᑦ ᐃᑕᐅᓂᒡ ᒋ ᐅᒋ ᑎᐸᔨᒋᒐᐤ᙮
36ᐃᔅᐱ ᑲ ᐳᓂᐱᒪᑎᓯᑦ ᐊᑕᑦ, ᓴᒻᓚ ᒂ ᐊᓂᔅᑲᔅᑯᐛᑦ ᐊ ᒋᓴᐅᒋᒪᐅᑦ᙮ ᒪᔅᕆᑲ ᐅᑕᓇᔪᐤ ᒋ ᐅᒋᐱᔪᐤ᙮
37ᐃᔅᐱ ᑲ ᐳᓂᐱᒪᑎᓯᑦ ᓴᒻᓚ, ᓴᐅᓪ ᒂ ᐊᓂᔅᑲᔅᑯᐛᑦ ᐊ ᒋᓴᐅᒋᒪᐅᑦ᙮ ᕋᐅᐳᑦ ᐊᓇᐊᕐ ᐅᑕᓇᔪᐤ ᒋ ᐅᒋᐱᔪᐤ᙮
38ᐃᔅᐱ ᑲ ᐳᓂᐱᒪᑎᓯᑦ ᓴᐅᓪ, ᐸᐊᓪ-ᐊᓇᓐ, ᐊᒃᐳᕐ ᐅᑯᓴ, ᒂ ᐊᓂᔅᑲᔅᑯᐛᑦ ᐊ ᒋᓴᐅᒋᒪᐅᑦ᙮
39ᐃᔅᐱ ᑲ ᐳᓂᐱᒪᑎᓯᑦ ᐸᐊᓪ-ᐊᓇᓐ, ᐊᑕᕐ ᒂ ᐊᓂᔅᑲᔅᑯᐛᑦ ᐊ ᒋᓴᐅᒋᒪᐅᑦ᙮ ᐸᐅ ᐅᑕᓇᔪᐤ ᒋ ᐅᒋ ᑎᐸᔨᒋᒐᐤ᙮ ᒪᐊᑕᐱᓪ ᒋ ᐃᓯᓂᐧᑲᓱᔨᐛ ᐎᐛ᙮ ᒪᑦᕋᑦ ᐅᑕᓂᓯᔪᐛ ᑭᔭ ᒪ-ᓴᐊᑉ ᐅᔅᒋᒥᔪᐛ᙮
ᐃᑕᒻ ᐅᒋᒪᐅᒡ
40ᐊᐅᑯᐤ ᐅᔭ ᑲ ᐃᓯᓂᐧᑲᑕᑭᓄᔨᒋ ᐃᓴᐅ ᐅᒋᒪᐧᑲᓂᒪ, ᐊ ᐃᓯ ᑕᑐᐃᒋᓯᒡ, ᐅᑦ ᐃᑕᐅᓄᐛᐤ ᑭᔭ ᐅᑦ ᐃᓯᓂᐧᑲᓱᐅᓄᐛᐤ: ᑎᒻᓇ, ᐊᓪᐸ, ᒐᑕᐊᑦ, 41ᐅᐅᓕᐸᒪ, ᐃᓚ, ᐱᓄᓐ, 42ᑭᓇᔅ, ᑎᒪᓐ, ᒥᑉᓴᕐ, 43ᒪᒃᑎᐅᓪ ᑭᔭ ᐃᕋᒻ᙮
ᐊᐅᑯᓐᒡ ᐅᒡ ᐃᑕᒻ ᐅᒋᒪᐅᒡ, ᐊᓐ ᐃᓴᐅ, ᐃᑕᒻ ᐃᔪᐛ ᑲ ᐅᑕᐎᒪᐅᑦ, ᐊᓐᑕ ᑲ ᐎᒋᒡ ᑲ ᑎᐱᔨᐛᐅᓯᒡ ᐊᔅᒋᔪᐤ᙮
Currently Selected:
ᒐᓂᓯᔅ 36: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
