ᒐᓂᓯᔅ 35
35
ᒋᓴᒪᓂᑐᐤ ᐸᑕᓪ ᑲ ᐃᑎᓴᐛᑦ ᒐᑭᐸ ᑭᔭ ᐎᐎᐛ
1ᓇᓇᒐ ᐊᑯ ᒋᓴᒪᓂᑐᐤ ᐊᑕᑦ ᒐᑭᐸ, “ᐸᑕᓪ ᐅᑕᓇᐤ ᐃᑐᑕ ᑭᔭ ᐊᑯᑕ ᒐ ᐎᒋᔨᓐ᙮ ᓂᔾ ᐅ ᒋᓴᒪᓂᑐᐤ ᑲ ᓄᑯᓯᔅᑕᑕᓐ ᐃᔅᐱ ᑲ ᒋᑎᓯᒥᑦ ᒋᔅᑕᔅ ᐃᓴᐅ᙮ ᐊᑯ ᒐ ᐅᓯᑕᔨᓐ ᐱᔅᑎᓂᒐᐅᓇᐱᔅᒄ ᐊᓐᑕ ᐸᑕᓪ ᑭᔭ ᐊᑯᑕ ᒐ ᐊᔭᒥᐊᔅᑐᐅᔭᒄ᙮” ᐊᑯ ᒐᑭᑉ ᒋ ᑕᑈᑐᐛᐤ ᒋᓴᒪᓂᑐᐛ ᑲ ᐃᑎᓱᒥᑯᑦ᙮
2ᐊᑯ ᒐᑭᑉ ᐊᑕᑦ ᐅᑦ ᐃᔨᒪ, “ᐱᔅᒐ ᒋᔨᐛᐤ ᒋᑦ ᐊᔭᒥᐊᔅᑐᐛᐛᐅᒡ ᒥᓂᑐᐧᑲᓐᒡ ᐃᔭᒡ ᐊᔅᒋᒡ ᐅᒡ ᑲ ᐅᑎᓇᑯᒡ᙮ ᓂᔅᑐᐅᓇᐧᑯᒡ, ᒋᑭ ᐎᐛᐱᓇᓄᐅᒡ ᐊᓐᒡ᙮ ᐸᔭᒋᐃᓱᒄ ᑭᔭ ᒐ ᐳᔅᑎᔅᑭᒪᒄ ᐊ ᐛᔅᑭᒪᒋ ᐊᐱᒋᑕᐅᓇ᙮ 3ᒋᑭ ᓂᑭᑕᓇᓄᐤ ᐅᑕ ᑭᔭ ᐸᑕᓪ ᒋᑭ ᐃᑐᑕᓇᓄᐤ, ᐊᓐᑕ ᒐ ᐃᑐᑎᒧᐛᐧᒄ ᐱᔅᑎᓂᒐᐅᓇᐱᔅᑯᔪᐤ ᒋᓴᒪᓂᑐᐤ ᐊᓐ ᑲ ᐎᒋᐃᑦ ᑲ ᐅᔅᑕᐱᔪᐅᒡ ᑭᔭ ᐊᓐ ᑲ ᐎᒐᐅᑦ ᒥᒂᑕ ᑲ ᐊᑎ ᐃᑕᐅᒡ᙮”
4ᒋ ᐃᑐᑎᒧᒡ ᐃᔪᒡ ᑲ ᐃᑎᑯᒡ ᒐᑭᐸ᙮ ᒋ ᓂᔅᑐᓇᐅᒡ ᒥᓯᐛ ᒥᓂᑐᐧᑲᓇ ᑭᔭ ᒂ ᒥᔭᒡ ᒐᑭᐸ᙮ ᐃᔭᐱᒡ ᒋ ᒥᔭᐅᒡ ᐎᑐᑲᐛᒡ ᑲ ᒋᑭᒧᑕᒡ᙮ ᐊᑯ ᒐᑭᑉ ᓯᐸᔭᔅᑎᑯᒡ ᒥᔅᑯᐛᑎᑯᒡ ᒋ ᐃᔨᔅᑭᒥᒋᓇᐤ ᒥᒋᒪ ᓴᑭᒥᒡ᙮ 5ᐊᑯ ᒐᑭᑉ ᑭᔭ ᐅᑦ ᐃᔨᒪ ᓇᑭᑕᒡ ᓴᑭᒻ ᐸᑕᓪ ᐃᔅ ᒐᒋ ᐃᑐᑕᒡ᙮ ᒋ ᑭᓄᐛᔨᒥᑯᐅᒡ ᒋᓴᒪᓂᑐᐛ ᒪᒂᒡ ᐊᑎ ᐱᒧᑕᑕᐤ, ᓇᒪ ᐛᐛᒡ ᐸᐃᒄ ᐃᔪᐛ ᑲᐃᓇᓐ ᐅᑕᓇᐛ ᐅᒡ ᒋ ᓇᓴᐅᑯᒡ ᐛᔅ ᒋᓴᒪᓂᑐᐤ ᒋ ᐃᑐᑐᐛᐤ ᐃᔪᐛ ᐊᓐᑕ ᐅᑕᓇᐛ ᒐᒋ ᒋᒋᐛ ᑯᔅᑕᔨᒋ ᒐᑭᐸ ᑭᔭ ᐅᑦ ᐃᔨᒥᔪᐛ᙮
6ᓗᔅ ᑲᐃᓇᓐ ᐊᔅᒋᔪᐤ ᒐᑭᑉ ᒋ ᐅᑎᑎᒧᒡ ᐊᓯᒡ ᐅᑦ ᐃᔨᒪ, ᐸᑕᓪ ᐊᓄᒡ ᐊᓯᓂᐧᑲᑕᒡ ᐊᓐ ᐃᑕᐅᓐ᙮ 7ᐊᑯᑕ ᑭᔭ ᒋᓴᒪᓂᑐᐤ ᐸᑕᓪ ᐅᒡ ᒋ ᐃᓯᓂᐧᑲᑎᒻ ᐊᓂᔭ ᐅᑕᓇᔪᐤ ᐛᔅ ᐊᑯᑕ ᐊᓐᑕ ᑲ ᓄᑯᓯᔅᑐᐛᑦ ᒋᓴᒪᓂᑐᐤ ᒐᑭᐸ ᐃᔅᐱ ᑲᒋ ᒋᑎᓴᒪᔨᒋ ᐅᔅᑕᓯᔪᐛ᙮
8ᒪᒂᒡ ᑲ ᐎᒋᒡ ᒥᒋᒪ ᐸᑕᓪ, ᑕᐳᐛ ᕋᐸᑲ ᑲ ᐅᑯᐸᓇᔎᒥᑦ ᒋ ᐳᓂᐱᒪᑎᓯᐤ᙮ ᓯᐸᔭᔅᑎᑯᒡ ᒥᔅᑯᐛᑎᑯᒡ ᐸᑕᓪ ᐱᓯᒧᑕᒡ ᒋ ᓇᐃᐧᑯᐛᑭᓄᐤ᙮ ᐊᑯ “ᒥᔅᑯᐛᑎᒄ ᑲ ᒪᓄᐅᒡ” ᒂ ᐃᓯᓂᐧᑲᑕᑭᓄᐅᒡ᙮
9ᒪᒂᒡ ᑲ ᑕᒡ ᐊᓐᑕ ᐸᑕᓪ, ᒋᓴᒪᓂᑐᐤ ᒥᓐ ᒋᓄᑯᓯᔅᑐᐛᐤ ᒐᑭᐸ ᑭᔭ ᒂ ᒥᔪᑐᑐᐛᑦ᙮ ᒥᓐ ᐛᑎᒧᐛᑦ ᐊᓱᑎᒪᒐᐅᓇ ᐎᐱᒡ ᑲ ᐊᓱᑎᒧᐛᑦ᙮ 10ᒋᓴᒪᓂᑐᐤ ᒂ ᐃᑕᑦ, “ᒐᑭᑉ ᒋᑦ ᐃᓯᓂᐧᑲᑎᑯᐅᓐ, ᒥᒄ ᐊᓄᒡ ᐃᔅᕋᐃᓪ ᒋᑭ ᐃᓯᓂᐧᑲᑎᑯᐅᓐ᙮” ᐊᑯ ᒋᓴᒪᓂᑐᐤ ᐃᔅᕋᐃᓪ ᒂ ᐃᓯᓂᐧᑲᑕᑦ ᒐᑭᐸ᙮
11ᐊᑯ ᒋᓴᒪᓂᑐᐤ ᐊᑕᑦ, “ᓂᔾ ᐅ ᒋᓴᒪᓂᑐᐤ ᒥᓯᐛ ᐊᓯ ᓱᐧᑲᑎᓯᑦ, ᒐ ᐃᔭᐛᑯᒡ ᒥᒐᑦ ᐊᐛᓯᒡ᙮ ᒋᑭ ᒥᒐᑐᔅᑲᓇᓱᐅᒡ ᒋᑦ ᐊᐛᓯᒥᒡ ᑭᔭ ᐱᔅᒐ ᒋᑭ ᒋᓴᐅᒋᒪᐅᒡ ᒋᑦ ᐊᐛᓯᒥᒡ᙮ 12ᐊᓂᔭ ᐊᔅᒋᔪᐤ ᑲ ᒥᔨᒂᐤ ᐊᑉᕋᐊᒻ ᑭᔭ ᐊᐃᓯᒃ, ᐊᓄᒡ ᒋ ᒥᔨᑎᓐ ᐊᓐ ᐊᔅᒋᔾ ᑭᔭ ᓂᑭ ᒥᔭᐅᒡ ᒋᑦ ᐊᐛᓯᒥᒡ ᒐ ᐊᔭᓂᔅᒐ ᐱᒪᑎᓯᒡ ᐊᓂᔭᔪᐤ ᐊᔅᒋᔪᐤ᙮” 13ᐊᑯ ᒋᓴᒪᓂᑐᐤ ᒂ ᐃᑐᑎᒧᐛᑦ ᒐᑭᐸ ᐅᔭ ᐊᓱᑎᒪᒐᐅᓇ ᑭᔭ ᑲᒋ ᐃᓯ ᐃᔨᒥᑦ, ᒋ ᓂᑭᑎᒻ ᐊᓂᔭ ᐃᑕᐅᓂᔪᐤ ᐊᓐᑕ ᑲ ᑕᔨᒋ ᒐᑭᐸ᙮ 14ᐊᓐᑕ ᒪᒃ ᑲ ᐃᔨᒥᑯᑦ ᒋᓴᒪᓂᑐᐛ, ᒋ ᒋᒥᔭᐤ ᒐᑭᑉ ᐊᓯᓂᔭ ᑭᔭ ᒋ ᐃᔨᒥᑥᑎᒻ ᐊᓯᒋᓇᒃ ᒥᓂᒂᐎ ᐱᔅᑎᓂᒐᐅᓂᔪᐤ ᑭᔭ ᐱᒥᐛᑎᒃ ᐱᒥᔪᐤ ᑕᐧᑯᒡ ᐊᓯᓂᒡ᙮ 15ᐊᑯ ᐸᑕᓪ ᒂ ᐃᓯᓂᐧᑲᑕᐧᒃ ᒐᑭᑉ ᐊᓐᑕ ᑲ ᐃᔨᒥᑯᑦ ᒋᓴᒪᓂᑐᐛ᙮
ᑲ ᐳᓂᐱᒪᑎᓯᒡ ᕋᐃᒍᓪ ᑭᔭ ᐊᐃᓯᒃ
16ᓇᓇᒐ ᒐᑭᑉ ᑭᔭ ᐅᑦ ᐃᔨᒪ ᒋ ᑎᒪᒋᐅᒡ ᑭᔭ ᐱᓯᒧᑕᒡ ᐸᑕᓪ ᐅᒡ ᒋ ᐃᓯ ᔅᑐᑕᐅᒡ᙮ ᐛᔪᐤ ᐃᑉᕋᑦ ᐅᒡ ᐊᔅᒄ ᒋ ᑕᐅᒡ ᐃᔅᐱ ᑲ ᐅᑎᒋᐱᔨᒡ ᒐᒋ ᐛᐱᒪᐅᓱᑦ ᕋᐃᒍᓪ᙮ 17ᐃᔅᐱ ᑲ ᒥᔅᑎ ᐊᐧᑯᓯᑦ ᕋᐃᒍᓪ᙮ ᒂ ᐃᑕᑦ ᐃᔎᐤ ᑲ ᐅᑎᓇᐅᓱᑦ, “ᐊᑲ ᑯᔅᑕᒋ, ᐛᔅ ᒥᓐ ᒋ ᐅᑯᓯᓐ᙮” 18ᒥᒄ ᐎ ᐳᓂᐱᒪᑎᓯᐤ ᑭᔭ ᒪᔅᑕᔾ ᐊᑎ ᐊᔭᔭᑦ, ᐱᓐᐅᓂ ᒋ ᐃᓯᓂᐧᑲᑕᐤ ᐅᑯᓴ᙮ ᒥᒄ ᓇᓇᒐ ᒐᑭᑉ ᒋ ᒥᔅᑯᑐᓂᒺᐤ ᐊᓯᓂᐧᑲᓱᔨᒋ ᐅᑯᓴ, ᐱᓐᒋᒥᓐ ᒋ ᐃᓯᓂᐧᑲᑕᐤ᙮
19ᐃᔅᐱ ᑲ ᐳᓂᐱᒪᑎᓯᑦ ᕋᐃᒍᓪ, ᐅᐱᒪᔅᑭᓇᒡ ᐊᓐᑕ ᐃᑉᕋᑦ ᐊᑎ ᐃᑎᒧᒡ ᒋ ᓇᐃᐧᑯᐛᑭᓄᐤ, ᐸᑦᓕᔭᒥᒡ ᐊᓄᒡ ᐊᑎ ᐃᑎᒧᒡ ᐊᓐ ᒪᔅᑭᓄᐤ᙮ 20ᒋ ᒋᒥᔭᐤ ᐊᓯᓂᔭ ᒐᑭᑉ ᐊᓐᑕ ᐅᒋᐱᐃᒋᐛᐱᒡ, ᐊᔅᒄ ᐊᓄᒡ ᑲᓯᑲᒡ ᒋ ᒥᓱᐤ ᐊᓐ ᐊᓯᓂᔾ᙮
21ᐊᑯ ᒐᑭᑉ ᐊᓄᒡ ᐃᔅᕋᐃᓪ ᐊᓯᓂᐧᑲᑕᑭᓄᐅᑦ, ᐅᔅᑕᒐ ᒥᒃᑕᓪ ᐃᑐᕐ ᒋ ᐃᑐᑕᐅᒡ᙮ ᐊᑯᑕ ᐎᔾ ᑭᔭ ᐅᑦ ᐃᔨᒪ ᑲ ᒋᒥᑕᒡ ᐎᒋᐛᐛ 22ᒪᒂᒡ ᑲ ᐎᒋᒡ ᐊᓐᑕ ᐃᑕᐅᓂᒡ, ᕈᐱᓐ ᒋ ᐎᐸᒪᐤ ᐱᓚᔨᒋ, ᐸᐃᒄ ᐅᑕᐎᔭ ᐎᑎᒧᓯᔪᐛ᙮ ᓇᓇᒐ ᒋ ᐸᑎᒻ ᒐᑭᑉ ᑲ ᐃᑎᔨᒋ ᕈᐱᓇ᙮
ᐊᐅᑯᔪᐤ ᐅᔭ ᑲ ᐃᓯᓂᐧᑲᓱᔨᒋ ᑲ ᓂᓱᓴᐳᔨᒋ ᒐᑭᑉ ᐅᑯᓴ᙮
23ᐊᓱᑕᒡ ᒋ ᐃᑕᑎᓯᔪᐛ ᐅᑯᓴ ᓕᐊᔨᒋ ᐅᒡ᙮
ᓂᔅᑎᒧᓴᓐ ᕈᐱᓐ,
ᒥᓐ ᓯᒥᐅᓐ, ᓕᐸᐃ, ᒍᑕ, ᐃᓴᑲᕐ ᑭᔭ ᓴᐳᓕᓐ᙮
24ᕋᐃᒍᓪ ᒋ ᓂᓯᔨᐛ ᐅᑯᓴ,
ᒍᓯᑉ ᑭᔭ ᐱᓐᒋᒥᓐ᙮
25ᕋᐃᒍᓪ ᐅᑯᐸᓇᔎᒪ ᐱᓚ ᒋ ᓂᓯᔨᐛ ᐅᑯᓴ,
ᑕᐊᓐ ᑭᔭ ᓇᑉᑕᓕ᙮
26ᓯᓪᐸ, ᓕᐊ ᐅᑯᐸᓇᔎᒪ, ᒋ ᓂᓯᔨᐛ ᐅᑯᓴ,
ᑲᑦ ᑭᔭ ᐊᓱᕐ᙮
ᒥᓯᐛ ᒐᑭᑉ ᐅᑯᓴ ᐸᑕᓐ ᐊᕋᒻ ᒋ ᐃᔪᔨᐛ᙮
27ᒋ ᓂᑐᐛᐱᒪᐤ ᒐᑭᑉ ᐅᑕᐎᔭ ᐊᐃᓯᑲ ᐊᓐᑕ ᒪᒻᕋ, ᒥᒋᒪ ᐃᑉᕈᓐ, ᐊᓐᑕ ᑲ ᐎᒋᒡ ᐊᑉᕋᐊᒻᐱᓐ ᑭᔭ ᐊᐃᓯᒃ᙮ 28ᐸᐃᑯ ᒥᑕᓯᒥᑎᓄᐤ ᐊᓱ ᔭᓇᐤ ᑕᑐᔪᐛᐳᓇ ᒋ ᐃᔅᐱᔅ ᐱᒪᑎᓯᐤ ᐊᐃᓯᒃ 29ᑭᔭ ᒂ ᐳᓂᐱᒪᑎᓯᑦ ᐊ ᒋᓴᐃᔪᐅᑦ ᑭᔭ ᓂᔭᐃᐧᑲᑯᑦ ᐅᑯᓴ ᐃᓴᐅᐛ ᑭᔭ ᒐᑭᐸ᙮
Currently Selected:
ᒐᓂᓯᔅ 35: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
