ᒐᓂᓯᔅ 34
34
ᑕᐃᓇ ᑭᔭ ᓴᑭᒻ
1ᐸᐃᒂᐤ ᒐᓯᑲᔨᒡ ᑕᐃᓇ, ᒐᑭᑉ ᑭᔭ ᓕᐊ ᐅᑕᓂᓱᐛᐛ, ᒂ ᔅᑐᑕᑦ ᒐᒋ ᒧᐱᔅᑐᐛᑦ ᑲᐃᓇᓐ ᐃᔎᐛ᙮ 2ᐃᔅᐱ ᓴᑭᒻ, ᐦᐊᒧᕐ ᐃᐎ ᐃᔪᐤ ᐅᑯᓴ, ᐅᒋᒪᐤ ᐊᓐᑕ ᐅᑕᓇᒡ᙮ ᐎᔭᐱᒪᑦ ᑕᐃᓇᔨᒋ, ᒋ ᐅᑎᓇᐤ ᑭᔭ ᒂ ᒥᒋᑐᑐᐛᑦ᙮ 3ᒋᒋᐛ ᒋ ᒧᔅᑕᓄᐛᐤ ᑕᐃᓇᔨᒋ, ᒐᑭᐸ ᐅᑕᓂᓯᔪᐛ᙮ ᒋ ᓴᒋᐊᐤ ᐊᓂᔭ ᐃᔎᓴ ᑭᔭ ᒋ ᒥᔪ ᐃᔨᒪᐊᐤ᙮ 4ᐊᑯ ᓴᑭᒻ ᐊᑕᑦ ᐅᑕᐎᔭ ᐦᐊᒧᕋ, “ᒐ ᑯᒂᒋᒥᑎ ᐅᑕᐎᔭ ᒐᒋ ᐎᒋᒥᒃ ᐅ ᐃᔎᔅ᙮”
5ᒐᑭᑉ ᒋ ᐸᑎᒻ ᓴᑭᒪ ᑲ ᒥᒋᑐᑐᐛᔨᒋ ᐅᑕᓂᓴ ᑕᐃᓇᔨᒋ, ᒥᒄ ᐅᑯᓴ ᓂᑕᐅᒋᑕᑭᓂᒡ ᒋ ᑭᓄᐛᔨᒪᔪᐛ ᐊᐛᓯᓴ, ᐊᑯ ᓇᒪ ᒐᒂᔪᐤ ᐅᒋ ᐃᔅᒋᔄᐤ ᐸᑎᒪ ᑲᒋ ᑎᑯᓯᓂᔨᒋ ᐅᑯᓴ᙮
6ᐊᑯ ᓴᑭᒻ ᐅᑕᐎᔭ, ᐦᐊᒧᕐ, ᒋ ᓂᑐᐛᐱᒪᐤ ᒐᑭᐸ ᒐᒋ ᐃᔨᒪᐊᑦ, 7ᒧᔭᒻ ᒐᑭᑉ ᐅᑯᓴ ᑕᑯᓯᓂᔨᒋ ᓂᑕᐅᒋᑕᑭᓂᒡ ᐅᒡ᙮ ᐃᔅᐱ ᐱᔭᑕᒡ ᒐᒂᔪᐤ ᑲ ᐃᔅᐱᔨᒡ, ᒋ ᓴᑭᔅᒋᓇᔅᑲᑯᐅᒡ ᑯᐸᑕᔨᒧᐅᓂᔪᐤ ᑭᔭ ᒋ ᒋᔄᐳᐅᒡ᙮ ᐛᔅ ᓴᑭᒻ ᑲ ᐃᓯ ᐃᑐᑕᐧᒃ ᒐᒂᔪᐤ ᐊᑲ ᒥᔽᔨᒡ ᑭᔭ ᑲ ᒥᒋᑕᐛᑦ ᐃᔅᕋᐃᓪ ᐃᔪᐛ ᐅᑦ ᐃᓯᓂᐧᑲᓱᐅᓂᔪᐤ ᑲᒋ ᒥᒋᑐᑐᐛᑦ ᒐᑭᐸ ᐅᑕᓂᓯᔪᐛ᙮ ᐊᑐᒡ ᐊᐛᓐ ᒋ ᐎ ᑐᑕᒧᐱᓐ ᐅᔭ ᒐᒂᓂᔪᐤ᙮
8ᐃᔅᐱ ᑲᒋ ᒪᒧᐎᒡ ᓇᐸᐅᒡ, ᐦᐊᒧᕐ ᒋ ᐎᑎᒧᐛᐤ ᒐᒂᔪᐤ ᐛᒋ ᑎᑯᓯᐧᒃ, “ᓂᑯᔅ ᓴᑭᒻ ᒋᒋᐛ ᓂᑐᐛᔨᑎᒻ ᒐᒋ ᐎᒋᒪᑦ ᒋᑕᓂᓴ᙮ ᒋ ᑯᒂᒋᒥᑎᓐ ᒐᒋ ᒥᔨᑦ ᒐᒋ ᐎᔪᑦ᙮ 9ᑐᑕᑕᐤ ᓂᐳᐤ ᓂᔅᑯᒥᑐᐅᓐ᙮ ᒥᔨᓇᓐ ᒋᑕᓂᓯᐛᐅᒡ ᒐᒋ ᐎᒋᒥᒋᒡ ᑭᔭ ᒋᑭ ᒥᔨᑎᓇᓐ ᓂᑕᓂᓯᓇᓐᒡ᙮ 10ᒋᑭ ᒋ ᐎᒋᒥᓇᓐ᙮ ᐎᔭᐸᑎᒥᒄ ᓂᑐᐎᔾ ᐃᑕᐅᓐ ᐛ ᐊᐱᒋᑕᔭᒄ᙮ ᒋᑭ ᒋ ᐎᒋᓇᐤ ᐅᑕ ᐊᔅᒋᒡ, ᒐ ᐃᑐᑕᔭᒄ ᑕᓐᑕ ᒥᒄ ᓇᑐᐛᔨᑎᒪᒄ ᒐᒋ ᐃᑐᑕᔭᒄ ᑭᔭ ᐃᔭᐱᒡ ᒋᑭ ᒋ ᐃᔭᓇᐛᐤ ᐊᔅᒋᔾ᙮”
11ᐊᑯ ᓴᑭᒻ ᐊᑕᑦ ᑕᐃᓇᔨᒋ ᐅᑕᐎᔪᐛ ᑭᔭ ᐅᔅᑕᓯᔪᐛ, “ᐸᒋ ᒥᔨᒄ ᐊᓯ ᓂᑐᐛᔨᑎᒪᑎᑯᒡ ᑭᔭ ᒋᑭ ᒥᔨᑎᓇᐛᐤ ᒥᒄ ᒐᒂᓐ ᓇᑐᐛᔨᑎᒪᒄ᙮ 12ᐎᑎᒧᐅᒄ ᒐᒄ ᒥᔨᐛᐅᓇ ᓇᑐᐛᔨᑎᒪᒄ ᒐ ᒥᔨᑎᑯᒡ ᑭᔭ ᒋᑭ ᒋ ᐃᔅᐱᐱᑕᓇᐛᐤ ᐅᔅᒋᓂᐳ-ᒥᔨᐛᐅᓐ ᒥᒄ ᐊᔅᐱᔅ ᒥᔽᔨᑎᒪᒄ᙮ ᓇᐊᔨᑎᒪᒂ ᒐᒋ ᐎᒋᒥᑦ, ᒋᑭ ᒥᔨᑎᓇᐛᐤ ᐊᔅᐱᔅ ᓂᑐᐛᔨᑎᒪᒄ ᒥᔨᔭᒂ ᐊᓐ ᐃᔎᔅ ᒐᒋ ᐎᐅᔭᓐ᙮”
ᒐᑭᑉ ᐅᑯᓴ ᑲ ᐎᔭᓯᒪᒡ ᓴᑭᒪ
13ᒐᑭᑉ ᐅᑯᓴ ᒋ ᒋᔄᐳᐅᒡ ᐊᓂᔭ ᓴᑭᒪ ᑲ ᒥᒋᑐᑐᐛᔨᒋ ᐎᐧᑲᓂᓱᐛᐛ ᑕᐃᓇᔨᒋ᙮ ᐊᑯ ᒂ ᐎᔭᔨᑕᒡ ᒐᒋ ᐎᔭᓯᒪᒡ ᓴᑭᒪ ᑭᔭ ᐅᑕᐎᔪᐛ᙮ 14ᒂ ᐃᑕᒡ, “ᓇᒪ ᓂᒋ ᓇᐊᔨᒪᓇᓐ ᓂᐧᑲᓂᓯᓇᓐ ᒐᒋ ᐎᒋᒪᑦ ᓇᐸᐛ ᐊ ᐊᑲ ᒋᔅᒋᓄᐛᒋᔄᑭᓄᔨᒋ, ᓂᐸ ᓴᒂᔨᒧᓇᓐ ᐸᐃᒄ ᓂᐅᔅᒋᓂᒋᔎᓯᒥᓇᓐ ᒋ ᐎᒋᒪᑦ ᓇᐸᐛ ᐊ ᐊᑲ ᒋᔅᒋᓄᐛᒋᔄᑭᓄᔨᒋ, ᐛᔅ ᒥᓯᐛ ᓂᔭᐸᐅᒡ ᓂᑦ ᐃᔨᒥᓇᓐ ᒋᔅᒋᓄᐛᒋᔄᑭᓄᐎᒡ᙮ 15ᑎᑯᓐ ᐸᐃᒄ ᒐᒂᓐ ᐊᓐ ᒐ ᐅᒋ ᓇᐃᒥᑕᒡ ᒐᒋ ᐎᒋᒥᑦ ᓂᐅᔅᒋᓂᒋᔎᓯᒥᓇᓐ, ᒥᓯᐛ ᑕᑐᐤ ᓂᔭᐸᐅᑦ ᐊ ᑕᔭᒄ ᒋᑭ ᐎ ᒋᔅᒋᓄᐛᒋᔄᑭᓄᐤ ᐊᑯ ᒪᒃ ᒐ ᐃᓯᓇᑯᓯᒡ ᐊᓐᒡ ᓇᐸᐅᒡ ᐊᓯᓇᑯᓱᐅᒋᒡ᙮ 16ᐊᑯ ᒐ ᒥᔨᑕᒡ ᓂᑕᓂᓯᓇᓐᒡ ᑭᔭ ᓂᑭ ᐎᒋᒪᓇᓐᒡ ᒋᑕᓂᓱᐛᐅᒡ᙮ ᒋᑭ ᐎᒋᒥᑎᓇᓐ ᑭᔭ ᐸᐃᒄ ᐃᔪᒡ ᒐ ᐊᑎ ᐃᓯᓇᑯᓯᔭᐧᒄ᙮ 17ᐊᑲ ᐎ ᒋᔅᒋᓄᐛᒋᔄᑯᓯᑥᐛ ᒋᑦ ᐃᔨᒧᐛᐅᒡ, ᓂᑭ ᐅᑎᓇᓇᓐ ᓂᐧᑲᓂᓯᓇᓐ ᑭᔭ ᓂᑭ ᓂᑭᑕᓇᓐ ᒋᑦ ᐊᔅᒋᐛᐤ᙮”
18ᐊᑯ ᐦᐊᒧᕐ ᑭᔭ ᐅᑯᓴ ᓴᑭᒪ ᒋ ᓂᔅᑯᒪᐅᒡ ᒐᑭᐸ ᐅᑯᓯᔪᐛ ᐊᓂᔭ ᒐᒂᔪᐤ ᑲ ᐃᑎᑯᒡ ᒐᒋ ᐅᑎᓇᑦ ᓴᑭᒻ ᑕᐃᓇᔨᒋ ᒧᔭᒻ ᐎᐛ᙮ 19ᐛᔅ ᒋᒋᐛ ᒋ ᓴᒋᐊᐤ ᒐᑭᐸ ᐅᑕᓂᓯᔪᐛ, ᒋᔅᑎᑉ ᒐᒂᔪᐤ ᒋ ᐎ ᐃᑐᑎᒻ ᑲ ᐃᑎᓱᒥᑯᒡ ᒐᑭᐸ ᐅᑯᓯᔪᐛ᙮ ᒋᔅᒐᔨᒪᐤ ᐃᔭᐱᒡ ᒐ ᐎᒋᐃᑯᑦ ᐅᑕᐎᔭ ᒐᒋ ᓯᒋᒪᔨᒋ ᐊᓂᔭ ᓇᐸᐛ ᐊᓐᑕ ᐅᑕᓇᒡ᙮ ᐛᔅ ᐅᑕᐎᔭ ᐊᒧᕋ ᒋ ᓂᑲᓂᔅᑯᐛᔪᐛ ᐃᔪᐛ ᑭᔭ ᓇᓂᑎᒻ ᒋ ᐎ ᓇᐊᔨᑎᒪᐊᐤ ᐅᑯᓴ ᐃᔅᐱᔅ ᑯᑎᑲ ᐊᐛᔪᐛ ᐊᓐᑕ ᐊ ᐸᐃᑯᔅᑲᓇᓯᑦ᙮
20ᐦᐊᒧᕐ ᑭᔭ ᐅᑯᓴ ᓴᑭᒪ ᐊᑐᑕᒡ ᓇᒋᔅᑲᑐᑕᓄᐎᒡ ᐊᓐᑕ ᐅᑕᓇᐤ ᐃᔎᑕᒥᒡ ᑭᔭ ᐊᔨᒪᐊᒡ ᑯᑎᑲ ᓇᐸᐛ ᐊᓐᑕ ᐅᑕᓇᔪᐤ ᐅᒡ᙮ 21“ᒥᔽᔨᑕᑯᓱᐅᒡ ᐊᓐᒡ ᐃᔪᒡ; ᒥᔭᐧᑯᒡ ᒐᒋ ᐎᒋᒥᑕᐧᑯᒡ ᐅᑕ ᐊᔅᒋᒡ ᑭᔭ ᒧᓴ ᒐᒋ ᐱᐸᒧᑕᒡ᙮ ᐊᓯᒡ ᐃᔅᐱᔪᐤ ᐊᔅᒋᔾ ᑕᐱᔅᑯᓐ ᐊ ᓂᓱᐎᒋᔭᐧᒄ ᒐᒋ ᐎᒋᔭᐧᒄ ᐅᑕ᙮ ᓂᐳᐅᐛᑕᐤ ᐅᑕᓂᓱᐛᐛ ᑭᔭ ᒐ ᒥᔭᐧᑯᒡ ᒋᑕᓂᓯᓄᐛ ᒐᒋ ᐎᒋᒪᒡ᙮ 22ᒪᒃ, ᒋᑭ ᓂᔅᑯᒧᐅᒡ ᒐᒋ ᒪᒧᐤ ᐎᒋᒥᑕᐧᑯᒡ ᒧᔭᒻ ᐸᐃᒄ ᐃᔪᒡ ᐃᔅᐱ ᒋᔅᒋᓄᐛᒋᔄᑭᓄᑥᐛ ᓇᐸᐅᒡ ᒧᔭᒻ ᐎᔨᐛᐤ᙮ 23ᓂᔅᑯᒧᔭᒂ, ᒥᓯᐛ ᑲᓄᐛᔨᑕᒡ ᒐᒂᔪᐤ ᒋᔭᓄᐤ ᒋᑭ ᑎᐸᔨᑎᒺᓇᓐ, ᐊᓯᒡ ᒥᓯᐛ ᐅᑦ ᐊᐛᓯᓯᒧᐛᐛ ᑭᔭ ᒥᓯᐛ ᑯᑎᒋᔪᐤ ᒐᒂᔪᐤ ᑕᐱᔨᐛᐅᓯᒡ᙮ ᐃᑐᑎᒺᑕᐤ ᒐᒂᔪᐤ ᐊᔅᒋᔄᒡ ᐊᑯ ᒪᒃ ᒐ ᐎᒋᒥᑕᐧᑯᒡ ᐅᑕ ᐊᔅᒋᒡ᙮”
24ᒥᓯᐛ ᐃᔪᒡ ᐅᑕᓇᒡ ᐅᒡ ᒋ ᓂᔅᑯᒪᐅᒡ ᒐᒂᔪᐤ ᑲ ᑯᒂᒋᒥᑯᒡ ᐦᐊᒧᕋ ᑭᔭ ᓴᑭᒪ᙮ ᒥᓯᐛ ᓇᐸᐅᒡ ᒋ ᒋᔅᒋᓄᐛᒋᔄᑭᓄᐎᒡ᙮
25ᑲᒋ ᓂᔅᑐ ᒋᓯᑲᔨᒡ, ᐃᔅᐱ ᐊᔅᒄ ᑲ ᐊᐧᑯᓯᒡ ᓇᐸᐅᒡ ᑲ ᒋᔅᒋᓄᐛᒋᔄᑭᓄᐎᒡ, ᓂᓱ ᒐᑭᑉ ᐅᑯᓴ, ᓯᒥᐅᓐ ᑭᔭ ᓕᐸᐃ, ᑕᐃᓇ ᐅᔅᑕᓴ, ᐛᑎᓇᒡ ᐅᑦ ᐊᓯᒪᑭᓂᐛᐛ ᑭᔭ ᒋᒧᑦ ᐊ ᑐᑕᒡ ᐊᓐᑕ ᐃᑕᐅᓂᒡ ᐊ ᐊᑲ ᒋᔅᒐᔨᒪᑭᓄᐎᒡ ᑭᔭ ᓇᐸᐊᒡ ᒥᓯᐛ ᓇᐸᐛ, 26ᒋᒡ ᐦᐊᒧᕋ ᑭᔭ ᐅᑯᓯᔪᐛ ᓴᑭᒪ᙮ ᐊᑯ ᐛᔪᐎᑕᐊᒡ ᑕᐃᓇᔨᒋ ᓴᑭᒪ ᐎᒋᔨᒡ ᐅᒡ ᑭᔭ ᒂ ᔅᑐᑕᒡ᙮ 27ᐊᑯ ᑯᑎᑲ ᒐᑭᑉ ᐅᑯᓴ ᒂ ᐃᑐᑕᔨᒋ ᐃᑕᐅᓂᒡ᙮ ᒋ ᑕᑕᑯᔅᑲᑕᐅᒡ ᐊᓂᔭ ᑲ ᓂᐸᐊᑭᓄᔨᒋ, ᒥᒋᐛᐸ ᐸᒐᒡ ᑭᔭ ᐛᑎᓇᒡ ᒥᓯᐛ ᐊᔅᐱᑕᔨᑕᑯᓂᔨᒡ ᒐᒂᔪᐤ᙮ ᒥᓯᐛ ᒋ ᑭᒐᒧᑐᐅᒡ ᒐᒂᔪᐤ ᐅᑕᓇᒡ ᐅᒡ ᐛᔅ ᓴᑭᒪ ᒋ ᒥᒋᑐᑐᐛᔪᐛ ᐎᐧᑲᓂᓱᐛᐛ ᑕᐃᓇᔨᒋ᙮ 28ᒥᓯᐛ ᒪᔭᑕᓂᓴ, ᒥᔅᑐᓴ, ᒥᒋᑎᒂ, ᑲᓂᐧᑲᑎᓯᔨᒋ ᑲᐸᐃᑭᔎᐛ ᑭᔭ ᒥᓯᐛ ᑯᑎᒋᔪᐤ ᒐᒂᔪᐤ ᑲ ᑎᑯᓂᔨᒡ ᐊᓐᑕ ᐃᑕᐅᓂᒡ ᑭᔭ ᓂᑕᐅᒋᑕᑭᓂᒡ ᒋ ᐅᑎᓂᒧᒡ᙮ 29ᒥᓯᐛ ᐊᔅᐱᑕᔨᑕᑯᓂᔨᒡ ᒐᒂᔪᐤ ᐊᓐᑕ ᒥᒋᐛᐱᒡ ᐅᒡ ᒋ ᐅᑎᓂᒧᒡ, ᐊᓯᒡ ᐃᔎᐛ ᑭᔭ ᐊᐛᓴ᙮ ᓇᒪ ᒐᒂᔪᐤ ᐅᒋ ᐃᔅᑯᓂᒧᒡ ᐊᓐᑕ ᐎᒋᐛᔨᒡ᙮
30ᐊᑯ ᒐᑭᑉ ᐊᑕᑦ ᓯᒥᐅᓇ ᑭᔭ ᓕᐸᐃᔨᒋ, “ᒋ ᐅᔅᑕᐱᓇᐛᐤ, ᐊᓄᒡ ᑲᐃᓇᓐ ᐃᔪᒡ, ᐸᕆᔅ ᐃᔪᒡ ᑭᔭ ᒥᓯᐛ ᐊᐛᓐ ᐅᑕ ᐊᔅᒋᒡ ᓂᑭ ᐛᐧᑲᑎᑯᒡ᙮ ᓇᒪ ᒥᒐᑐᐅᒡ ᓂᑦ ᐃᔨᒥᒡ, ᒪᒧᐎᑥᐛ ᑭᔭ ᓂᑐᐱᔨᑕᑕᒂᐛ, ᒋᑭ ᓂᓱᐅᓇᒋᐃᑭᓄᐅᒡ ᒥᓯᐛ ᐊᑎᓯᐛᐧᒄ᙮”
31ᒥᒄ ᓯᒥᐅᓐ ᑭᔭ ᓕᐸᐃ ᒋ ᐎᑎᒧᐛᐅᒡ, “ᓇᒪ ᓂᒋ ᓇᐃᑕᓇᓐ ᒐᒋ ᐃᓯ ᐅᑎᓇᑭᓄᐅᑦ ᓂᐧᑲᓂᓯᓇᓐ ᒧᔭᒻ ᐱᓯᒂᑎᔎᐛ᙮”
Currently Selected:
ᒐᓂᓯᔅ 34: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
