ᒐᓂᓯᔅ 33
33
ᒐᑭᑉ ᑲ ᐛᐱᒪᑦ ᐃᓴᐅᐛ
1ᓇᒪ ᓱᐧᒄ ᓇᐅᔅ ᑲᒋ ᓂᑭᑕᐧᒃ ᒐᑭᑉ ᐱᓇᐃᐅ᙮ ᒋ ᐛᐱᒪᐤ ᐃᓴᐅᐛ ᐱᔭᑕᔅᑎᒧᑕᔨᒋ ᓇᐤ ᒥᑕᓯᒥᑎᓄᐤ ᐃᔪᐛ ᐊ ᐎᒐᐅᑯᔨᒋ᙮ ᒂ ᓂᔅᑐᐎᒡ ᐃᓯ ᑎᐸᓇᐊᑦ ᐊᐛᓴ ᐅᑲᐎᔪᐛ ᐊ ᐎᒐᐛᔨᒋ᙮ 2ᓂᔅᑎᒻ ᐅᑯᐸᓇᔎᒪ ᒋ ᑎᔭᐤ ᑭᔭ ᐅᑦ ᐊᐛᓯᒥᔪᐛ, ᒂ ᐅᒋ ᓇᓴᐅᑯᒡ ᓕᐊᔨᒋ ᑭᔭ ᐅᑦ ᐊᐛᓯᒥᔪᐛ ᑭᔭ ᒪᔅᑕᔾ ᐛᒋ ᐱᒧᑕᒡ ᕋᐃᒍᓪ ᑭᔭ ᒍᓯᑉ᙮ 3ᐎᔾ ᒋ ᓂᑲᓄᑕᐤ ᒐᑭᑉ ᒐᒋ ᓂᒋᔅᑯᐛᑦ ᐃᓴᐅᐛ᙮ ᓂᔄᐅᑕᒡ ᑕᑥᐤ ᒋ ᓄᐛᑲᐳᔅᑐᐛᐤ ᒪᒂᒡ ᐊᑎ ᐅᑎᑕᑦ ᐅᔅᑕᓴ ᐃᓴᐅᐛ, ᐊ ᐎ ᐛᐸᑎᔭᑦ ᐊ ᒋᔅᑕᔨᒪᑦ᙮
4ᒥᒄ ᐃᓴᐅ ᒋ ᒋᒋᓇᐤ ᒐᒋ ᓂᒋᔅᑯᐛᑦ ᒐᑭᐸ ᑭᔭ ᒂ ᐛᐅᒋᓇᑦ ᑭᔭ ᓴᐛᔨᒪᑦ᙮ ᑕᐱᔅᑯᓐ ᒋ ᒪᐅᒡ ᐊ ᒥᔽᔨᑕᒡ᙮ 5ᐃᔅᐱ ᐎᔭᐱᒪᑦ ᐃᓴᐅ ᐃᔎᐛ ᑭᔭ ᐊᐛᓴ, ᒂ ᑯᒂᒋᒪᑦ, “ᐊᐛᓐᒋ ᐅᒡ ᐃᔪᒡ ᑲᒋ ᐎᒐᐛᐅᒋ ?”
ᒐᑭᑉ ᒋ ᐃᑕᐤ, “ᓂᒋ ᒥᔪᑐᑕᒄ ᒋᓴᒪᓂᑐᐤ᙮ ᐊᐛᓴ ᓂᒋ ᒥᔨᒄ᙮” 6ᐊᑯ ᑯᐸᓇᔎᐅᒡ ᒂ ᐸᑐᑕᒡ ᐊ ᐎᒐᐅᑯᒡ ᐅᑦ ᐊᐛᓯᒧᐛᐛ ᑭᔭ ᒂ ᓄᐛᑲᐳᔅᑐᐛᒡ ᐊ ᒋᔅᑕᔨᒪᒡ ᐃᓴᐅᐛ᙮ 7ᒥᓐ ᓕᐊ ᑭᔭ ᐅᑦ ᐊᐛᓯᒪ ᐱᔭᑐᑕᒡ, ᑭᔭ ᐎᔨᐛᐤ ᓇᐛᑲᐳᔅᑐᐛᒡ ᐊ ᒋᔅᑕᔨᒪᒡ ᐃᓴᐅᐛ᙮ ᒪᔅᑕᔾ ᕋᐃᒍᓪ ᑭᔭ ᒍᓯᑉ ᐱᔭᑐᑕᒡ ᑭᔭ ᓇᐛᑲᐳᔅᑐᐛᒡ ᐃᓴᐅᐛ᙮
8ᐊᑯ ᐃᓴᐅ ᑲ ᑯᒂᒋᒪᑦ ᒐᑭᐸ, “ᒐᒂᓐ ᐛᒋ ᐃᑎᓴᐊᒪᐎᓐ ᐊᐛᓯᓯᒡ ?”
ᒐᑭᑉ ᒋ ᐎᑎᒧᐛᐤ ᐊ ᐃᑕᑦ, “ᔅᒋ ᐃᑎᓴᐊᒪᑎᓐ ᐊᓐᒡ ᒧᔭᒻ ᒥᔨᐛᐅᓇ᙮ ᔅᒋ ᐎ ᓇᐊᔨᑎᒥᐃᑎᓐ᙮”
9ᒥᒄ ᐃᓴᐅ ᐃᑕᐤ, “ᓂᑦ ᐃᔅᐱᔨᓐ ᐊᐛᓯᓯᒡ, ᓂᐧᑲᓂᔅ᙮ ᒋᔾ ᒋᐸ ᑭᓄᐛᔨᒪᐅᒡ᙮”
10ᒐᑭᑉ ᒂ ᐃᑕᑦ, “ᓇᒪ, ᐅᑎᓇ ᓂᒥᔨᐛᐅᓐ ᐊᑯ ᒐᔅᒐᔨᑎᒪᓐ ᐊᑲ ᓴᔅ ᒋᔄᐱᔅᑐᐎᓐ᙮ ᐊᐅᑯᐤ ᒐ ᐛᐸᑎᐛᔨᓐ ᐊᒋ ᐛᐸᔨᑎᒧᔨᓐ, ᒧᔭᒻ ᒋᓴᒪᓂᑐᐤ ᑲ ᐃᓯ ᐛᐸᔨᑎᒧᐅᑦ᙮ 11ᐅᑎᓇ ᓂᒥᔨᐛᐅᓐ᙮ ᐛᔅ ᓂᒋ ᑐᑕᒄ ᒋᓴᒪᓂᑐᐤ ᒐ ᒥᔪᐱᔪᐅᒡ ᑭᔭ ᓴᔅ ᓂᑦ ᐃᔅᐱᔨᓐ ᐊᐛᓯᓯᒡ᙮” ᐊᑯ ᒐᑭᑉ ᒋ ᓴᐧᑯᒋᒪᐤ ᐅᔅᑕᓴ ᑭᔭ ᐃᓴᐅ ᒐᒃ ᐛᑎᓂᒺᑦ ᐅᒥᔨᐛᐅᓂᔪᐤ᙮
12ᐊᑯ ᐃᓴᐅ ᐊᑕᑦ ᒐᑭᐸ, “ᒪᒧᐤ ᐊᑎ ᐱᒧᑕᑕᐤ᙮ ᓂᔾ ᓂᑭ ᓂᑲᓄᑕᓐ᙮”
13ᒐᑭᑉ ᒋ ᐎᑎᒧᐛᐤ, “ᒋᔅᒐᔨᒪᐅᒡ ᐊᑲ ᓴᐱᓯᒡ ᐊᐛᓯᒡ ᒐᒋ ᐱᒧᑕᒡ ᐊᔅᐱᓯᐱᔨᓐ᙮ ᐃᔭᐱᒡ ᓂᑦ ᐊᔨᒪᔨᑎᒥᑯᒡ ᐊᐛᓯᓯᒡ ᐊ ᐊᓯᒪᒡ ᐅᑦ ᐊᐛᓯᒧᐛᐛ᙮ ᑐᑐᐅᒂᐛ ᒐᒋ ᒋᓯᐱᔨᒡ, ᐊᑎᓱᐧᒄ ᐸᐃᑯᒋᓯᑲᐛ᙮ ᒥᓯᐛ ᐊᐛᓯᓯᒡ ᒋᑭ ᐳᓂᐱᒪᑎᓯᐅᒡ᙮ 14ᓂᑲᓄᑕᒪ ᑭᔭ ᐸᑎᑲᒡ ᒋᑭ ᓇᓴᐅᑎᓐ, ᐊᔅᐱᓯᐱᔨᒡ ᐊᐛᓯᒡ ᑭᔭ ᐊᐛᓯᓯᒡ᙮ ᓇᓇᒐ ᒋᑭ ᓂᒋᔅᑲᑎᓐ ᐊᓐᑕ ᓯᐅᕐ᙮”
15ᐊᑯ ᐃᓴᐅ ᐊᑕᑦ, “ᐊᑯ ᓇᐃᒥ ᐱᔅᒐ ᒐᒋ ᓂᑭᑎᒪᑕᓐ ᓂᑦ ᐃᔨᒥᒡ᙮”
ᒐᑭᑉ ᐃᑕᐤ, “ᒋ ᓂᔅᑯᒥᑎᓐ, ᒥᒄ ᐃᔅᐱᔪᐤ ᑲᒋ ᐛᐸᑎᔨᓐ ᒋᓴᐛᑎᓯᐅᓐ ᑭᔭ ᑲ ᒥᔪ ᐅᑎᓂᔨᓐ᙮”
16ᐊᑯ ᐃᓴᐅ ᒂ ᓂᓇᔅᑯᒧᑦ ᑭᔭ ᐊᓂᔭ ᐸᐃᑯᑕᐤ ᒋᓯᑯᔪᐤ ᒂ ᔅᑐᑕᑦ ᑲᐤ ᓯᐅᕐ ᐊᔅᒋᒡ ᐊᑐᑕᑦ᙮ 17ᒥᒄ ᒐᑭᑉ ᓱᑯᑦ ᒋ ᐃᑐᑕᐤ ᑭᔭ ᐊᑯᑕ ᑲ ᐃᑐᑕᐧᒃ ᐎᒡ ᑭᔭ ᑲ ᐎᒋᐧᑯᐛᑦ ᐅᑦ ᐊᐛᓯᓯᒪ᙮ ᐊᐅᑯᓐ ᓱᑯᑦ ᑲ ᐅᒋ ᐃᓯᓂᐧᑲᑕᒡ ᐃᔪᒡ ᐊᓂᔭ ᐃᑕᐅᓂᔪᐤ᙮
18ᒂ ᓂᑭᑕᐧᒃ ᓱᑯᑦ, ᒐᒃ ᒂ ᑎᑯᓯᐧᒃ ᒐᑭᑉ ᐊᓐᑕ ᑲᐃᓇᓐ ᐊᔅᒋᒡ, ᒋᓴᒪᓂᑐᐛ ᒋ ᒥᔪ ᑎᑯᓯᑕᐃᑯᐤ ᐅᑦ ᐊᔅᒋᒡ ᐸᑕᓐ ᐊᕋᒻ ᐅᒡ᙮ ᒋ ᒪᓂᑲᓱᐅᒡ ᓂᑕᐅᒋᑕᑭᓂᒡ ᐊᓐᑕ ᒥᒋᒪ ᓴᑭᒻ ᐅᑕᓇᔪᐤ᙮ 19ᒋ ᐃᔭᐤ ᐱᔅᒐ ᓂᑕᐅᒋᑕᑭᓂᔪᐤ ᐦᐊᒧᕋ ᐅᑦ ᐊᐛᓯᒥᔪᐛ ᐅᒡ, ᓴᑭᒪ ᐅᑕᐎᔪᐛ᙮ ᐸᐃᑯ ᒥᑕᓯᒥᑎᓄᐤ ᐛᐱᓯᐅᓱᓇᔭᐱᔎ ᐊᑐᑕᐃᒡ᙮ 20ᐊᑯᑕ ᐊᓐᑕ ᒐᑭᑉ ᑲ ᐅᓯᑕᑦ ᐱᔅᑎᓂᒐᐅᓇᐱᔅᑯᔪᐤ ᑭᔭ ᐃᓪ ᐃᓗᐃ ᐃᔅᕋᐃᓪ ᒂ ᐃᓯᓂᐧᑲᑕᐧᒄ, “ᒋᓴᒪᓂᑐᐤ ᐊᐅᑯᓐ ᐃᔅᕋᐃᓪ ᒋᓴᒪᓂᑐᐤ᙮”
Currently Selected:
ᒐᓂᓯᔅ 33: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
