ᒐᓂᓯᔅ 21
21
ᓴᕋ ᑲ ᐅᑯᓯᑦ
1ᒋᓴᒪᓂᑐᐤ ᒋ ᓱᐛᔨᑕᑯᐛᐤ ᓴᕋᔨᒋ ᒧᔭᒻ ᑲ ᐃᔅᒋᔄᑦ ᒐ ᐃᑐᑕᐧᒃ, ᓇᒪ ᐅᒋ ᐅᓂᒋᔅᒍᐤ ᒐᒋ ᑐᑕᐧᒄ ᒐᒂᔪᐤ ᑲ ᐊᓱᑎᒪᒐᑦ᙮ 2ᓴᕋ ᒋ ᐊᓱᐛᐱᒪᐅᓱᐤ ᑭᔭ ᒋ ᐅᑯᓱᐤ ᐃᔅᐱ ᑲ ᒋᓴᐃᔪᔨᒋ ᐊᑉᕋᐊᒪ, ᒋ ᐃᔪᐤ ᐅᑯᓯᓯᒪᐤ ᐊᓂᔭ ᒧᔭᒻ ᒋᓴᒪᓂᑐᐤ ᑲ ᐃᔅᒋᔄᑦ ᒐ ᐃᔅᐱᔅ ᐃᔪᔨᒋ᙮ 3ᐊᐃᓯᒃ ᒋ ᐃᓯᓂᐧᑲᑕᐤ ᐊᑉᕋᐊᒻ, “ᐸᐳᐤ,” ᐊ ᐃᑥᒥᑲᒡ᙮ 4ᐃᔅᐱ ᔭᓇᐤ ᑲ ᑕᑐᒋᓯᒂᓯᔨᒋ ᐅᑯᓴ ᐊᐃᓯᑲ, ᐊᑉᕋᐊᒻ ᒋ ᒋᔅᒋᓄᐛᒋᐊᐤ ᒧᔭᒻ ᑲ ᐃᑎᓱᒥᑯᑦ ᒋᓴᒪᓂᑐᐛ᙮ 5ᒋ ᐸᐃᑯ ᒥᑕᓯᒥᑎᓄᐛᐳᓇᓱᐤ ᐊᑉᕋᐊᒻ ᑲ ᐃᔪᔨᒋ ᐅᑯᓴ ᐊᐃᓯᑲ᙮
6ᓴᕋ ᒂ ᐃᔅᒋᔄᑦ, “ᐸᐳᐅᓂᔪᐤ ᑭᔭ ᒥᔽᔨᑎᒧᐅᓂᔪᐤ ᓂᒋ ᒥᔨᒄ ᒋᓴᒪᓂᑐᐤ ᑭᔭ ᒥᓯᐛ ᐊᐛᓐ ᐸᑕᒐ ᑲᒋ ᐛᐱᒪᐅᓱᐅᒡ ᓂᑭ ᐎᒋ ᐸᐱᒥᒄ᙮” 7ᐊᑯ ᐊᔅᒋᔄᑦ, “ᐊᐛᓐ ᒋᐸ ᒋ ᐃᑕᐱᓐ ᐊᑉᕋᐊᒪ ᐊᓂᔭ ᒐᒋ ᑭᓄᐛᔨᒪᐅᓱᔨᒋ ᓴᕋᔨᒋ ? ᐃᔭᐱᒡ ᐊᓄᒡ ᐊ ᒋᓴᐃᔨᐅᑦ ᓂᒋ ᒥᔭᐤ ᐊᐛᓴ᙮”
ᑲ ᒋᑎᓴᐛᑭᓄᐎᒡ ᐦᐊᐃᑲᕐ ᑭᔭ ᐃᔅᒪᐃᓪ
Genesis 21.8-21 (Proper-7 Year A)
8ᐃᔅᐱ ᑲᒋ ᐃᓯ ᓂᑕᐅᒋᑦ ᐊᐃᓯᒃ ᑭᔭ ᐊᓂᔭ ᒋᓯᑯᔪᐤ ᑲ ᐳᓂ ᓄᓴᓂᑦ, ᒋ ᒥᒋᓱᓇᓂᒐᐤ ᐊᑉᕋᐊᒻ᙮ 9ᐸᐃᒂᐤ ᒐᓯᑲᔨᒡ ᓴᕋ ᒋ ᐛᐱᒪᐤ ᐅᑯᓴ ᐊᐃᓯᑲ ᑭᔭ ᐃᔅᒪᐃᓚ, ᐦᐊᐃᑲᕋ ᐃᒋᑉᑦ ᐃᔎᐛ ᐅᑯᓯᔪᐛ ᐊ ᐎᒋᒪᑐᐛᒥᑐᐎᔨᒋ, 10ᐊᑯ ᓴᕋ ᐊᑕᑦ ᐊᑉᕋᐊᒪ, “ᐃᒐᑎᓴᐤ ᐊᓐ ᐃᔎᐤ ᐊᑐᔅᒐᔭᑭᓐ ᑭᔭ ᐅᑯᓴ᙮ ᓇᒪ ᓂᑐᐛᔨᒪᔪᐛ ᐅᑯᓴ ᒐᒋ ᑎᐸᔨᑎᒥᔨᒋ ᒐᒂᓂᔪᐤ, ᒋᑯᓯᓄᐤ ᐊᐃᓯᒃ ᒥᓯᐛ ᒐᒂᔪᐤ ᒋᑭ ᑎᐸᔨᑎᒻ᙮”
11ᒋᒋᐛ ᒋ ᒥᑯᔅᑲᑕᔨᑎᒥᐃᑯᐤ ᐅᔭ ᐊᑉᕋᐊᒻ ᐛᔅ ᐃᔭᐱᒡ ᐎᔾ ᒋ ᐅᑯᓱᐤ ᐃᔅᒪᐃᓚ᙮ 12ᒥᒄ ᒋᓴᒪᓂᑐᐤ ᒋ ᐃᑕᐤ ᐊᑉᕋᐊᒪ, “ᐊᑲᐎᔭ ᐅ ᒋᑭ ᒥᑯᔅᑲᑕᔨᑎᒥᐃᑯᓐ, ᓂᑐᑐ ᓴᕋ ᒐᒂᔪᐤ ᐊᑎᔅᒃ, ᐛᔅ ᐊᐃᓯᒃ ᐅᒡ ᒋᑭ ᐅᒋ ᑕᐅᒡ ᒋᑦ ᐊᓂᔅᑯᑕᐸᓐᒡ ᑲ ᐊᓱᑎᒪᑕᓐ᙮ 13ᒋᒡ ᓂᑭ ᑐᑐᒪᐛ ᐊᓐ ᐃᔎᐤ ᐊᑐᔅᒐᔭᑭᓐ ᐅᑯᓴ ᒐᒋ ᐃᑎᔅᑲᓇᓯᔨᒋ, ᐛᔅ ᐎᔾ ᐊᓐ ᑭᔭ ᒋᑯᔅ᙮”
ᐊᓐᒋᓐ ᑲ ᑕᑈᑕᑦ ᐦᐊᐃᑲᕋ
14ᐎᐱᒡ ᒥᓐ ᒋᔭᒋᓴᐸᔭᔨᒡ ᒋ ᐅᓂᔪᐤ ᐊᑉᕋᐊᒻ, ᒂ ᐅᑎᓇᐧᒃ ᐱᔅᒐ ᒥᒋᒥᔪᐤ ᑭᔭ ᓂᐱᔪᐤ ᐱᓴᑭᓄᐅᑕᒡ ᐊ ᓴᑭᔅᒋᓇᐸᔨᒡ ᑭᔭ ᒂ ᒥᔭᑦ ᐦᐊᐃᑲᕋ᙮ ᐅᑎᑎᒥᓂᔨᒡ ᒋ ᐊᔅᑕᐛᐤ ᐊᑯ ᑭᔭ ᒂ ᒋᑎᓴᐛᑦ ᐊᓯᒡ ᓇᐸᓴ᙮ ᐦᐊᐃᑲᕐ ᒂ ᔅᑐᑕᑦ ᑭᔭ ᒂ ᐱᐸᒧᑕᑦ ᐊᓐᑕ ᐱᕐ-ᓯᐸ ᐸᐧᑯᑎᔅᑭᒥᑲᒡ᙮
15ᐃᔅᐱ ᑲ ᒪᒋᐱᔨᒡ ᓂᐱᔪᐤ, ᐦᐊᐃᑲᕐ ᒋ ᐱᔅᑎᓇᐤ ᓇᐸᓴ ᐊᓐᑕ ᑕᒥᓯᑲᒡ᙮ 16ᒪᒃ ᐛᔪᐎᔅ ᒋ ᐃᑐᑕᐤ ᑭᔭ ᒂ ᓇᐃᐱᑦ, ᐛᔅ ᒋ ᐃᑕᔨᑎᒻ, “ᓇᒪ ᓂᑭ ᒋ ᑭᓄᐛᐱᒪᐤ ᓇᐸᔅ ᐊ ᐳᓂᐱᒪᑎᓯᑦ᙮” ᐊᑯ ᒂ ᒪᑦ᙮
17ᒋᓴᒪᓂᑐᐤ ᒋ ᐸᑐᐛᐤ ᐊᒪᔨᒋ ᓇᐸᓴ ᑭᔭ ᐅᑦ ᐊᓐᒋᓂᒪ ᒋᒋᒋᓯᑯᒡ ᒋ ᐅᒋ ᑕᑈᑕᔪᐛ ᐦᐊᐃᑲᕋ ᑭᔭ ᒂ ᐃᑕᔨᒋ, “ᐦᐊᐃᑲᕐ, ᒐᒂᓐ ᒪᑯᔅᑲᑕᔨᑎᒥᐃᑯᔨᓐ ? ᐊᑲ ᑯᔅᑕᒋ, ᒋᓴᒪᓂᑐᐤ ᒋ ᐸᑐᐛᐤ ᐊᒪᔨᒋ ᓇᐸᓴ ᐅᑎ ᐱᒥᓯᓂᔾ ᐊᓐᑕ ᑕᒥᓯᑲᒡ᙮ 18ᐱᓯᑯ, ᒐ ᐅᐱᓂᑦ ᐊᓐ ᓇᐸᔅ ᑭᔭ ᐅᑎᒋᒡ ᒐ ᐅᒋ ᑕᐧᑯᓐᑦ, ᐛᔅ ᓂᑭ ᐃᑐᑐᐛᐤ ᒐᒋ ᒥᒐᑐᔅᑲᓇᓯᑦ᙮”
19ᒪᒃ ᒋᓴᒪᓂᑐᐤ ᒂ ᐃᑐᑐᐛᑦ ᐦᐊᐃᑲᕋ ᒐᒋ ᐛᐸᑎᒥᔨᒋ ᒧᓇᐃᐸᓂᔪᐤ ᐊ ᓴᑭᔅᒋᓇᐸᔨᒡ ᓂᐱᔪᐤ᙮ ᒋ ᓇᑎᒻ ᒧᓇᐃᐸᓂᔪᐤ ᑭᔭ ᒋ ᓴᑭᔅᒋᓇᐱᑕᐤ ᓂᐱᔪᐤ ᐱᓴᑭᓄᐅᑎᒡ ᑭᔭ ᒂ ᒥᓇᐊᑦ ᐅᑯᓴ᙮
20ᒋᓴᒪᓂᑐᐤ ᒋ ᑭᓄᐛᔨᒪᐤ ᓇᐸᓴ ᐊᑎ ᓂᑕᐅᒋᔨᒋ, ᒋ ᓂᑕᐤ ᓂᑐᐅᐤ ᑭᔭ ᐸᕋᓐ ᐸᐧᑯᑎᔅᑭᒥᑲᒡ ᒋ ᐎᒋᐤ᙮ 21ᒪᒂᒡ ᑲ ᐎᒋᑦ ᐊᓐᑕ ᐸᕋᓐ ᐸᐧᑯᑎᔅᑭᒥᑲᒡ, ᐃᒋᑉᑎᒡ ᒋ ᐅᑎᓂᒪᑯᐤ ᐅᑲᐎᔭ ᐃᔎᐛ ᒐ ᐎᒋᒪᑦ᙮
ᑲ ᑐᑕᒡ ᐊᑉᕋᐊᒻ ᑭᔭ ᐊᐱᒪᓕᒃ ᓂᔅᑯᒧᐅᓂᔪᐤ
22ᐸᐃᒂᐤ ᒐᓯᑲᔨᒡ, ᐊᐱᒪᓕᒃ ᓇᑐᐛᐱᒪᑦ ᐊᑉᕋᐊᒪ ᓂᑐᐱᔪᐅ-ᐅᒋᒪᐛ ᐱᑯᓪ ᐊ ᐎᒐᐛᑦ, ᑭᔭ ᒂ ᐃᑕᑦ ᐊᑉᕋᐊᒪ, “ᓂ ᒋᔅᒐᔨᒪᐤ ᒋᓴᒪᓂᑐᐤ ᒋ ᐎᒋᐃᒄ ᒐᒋ ᑭᔅᒋᑕᐅᑦ ᐊᓐᑕ ᒥᒄ ᒐᒂᓂᔪᐤ ᐊ ᐃᑐᑎᒧᑦ, 23ᒋ ᓂᑐᐛᔨᒥᑎᓐ ᒐᒋ ᐊᓱᑎᒪᒐᔨᓐ ᐅᑕ ᒋᓴᒪᓂᑐᐤ ᐊ ᐛᐱᒥᑕᐧᒄ ᒐ ᐊᑲ ᒥᒋᑐᑐᐎᓐ ᑭᔭ ᒪᒃ ᓂᑦ ᐊᐛᓯᒥᒡ ᑭᔭ ᐅᑦ ᐊᐛᓯᒧᐛᐛ᙮ ᑕᐱᔅᑯᓐ ᒋᓴᐛᑎᓯᐅᓐ ᑲ ᐛᐸᑎᔨᑕᓐ ᐸᒋ ᐛᐸᑎᔾ ᑭᔭ ᐊᓐᒡ ᐃᔪᒡ ᐅᑕ ᓂᑦ ᐊᔅᒋᒡ ᐊᓐᑕ ᐛᒋᔨᓐ ᒧᔭᒻ ᒪᓐᑕᐤ᙮”
24ᐊᑉᕋᐊᒻ ᒂ ᐃᑕᑦ, “ᓂᑦ ᐊᓱᑎᒪᒐᓐ᙮”
25ᒪᒃ ᐊᑉᕋᐊᒻ ᒋ ᐎᑎᒧᐛᐤ ᐊᐱᒪᓕᑲ ᒧᓇᐃᐸᓂᔪᐤ ᑲ ᒪᑯᓂᒥᔨᒋ ᐅᑦ ᐊᐱᒋᐊᑭᓂᔪᐛ᙮ 26ᒥᒄ ᐊᐱᒪᓕᒃ ᒋ ᐃᑕᐤ, “ᓇᒪ ᓂ ᒋᔅᒐᔨᒪᐤ ᐊᐛᓐ ᐅᔭ ᑲ ᐃᑐᑕᐧᒃ ᓇᒪ ᒋ ᐅᒋ ᐎᑎᒧᐅᓐ ᓂᑦ ᐊᐱᒋᐊᑭᓐᒡ ᑲᒋ ᐅᑎᓇᒡ ᐅᔭ ᒧᓇᐃᐸᓂᔪᐤ ᑭᔭ ᐃᔭᒄ ᐅ ᐊᓄᒡ ᐱᔭᑎᒪᓐ᙮”
27ᐊᑯ ᐊᑉᕋᐊᒻ ᐱᔭᓱᐛᑦ ᒪᔭᑕᓂᓴ ᑭᔭ ᒥᒋᑎᒂ, ᒂ ᒥᔭᑦ ᐊᐱᒪᓕᑲ᙮ ᒂ ᑐᑕᒡ ᓂᔅᑯᒧᐅᓂᔪᐤ ᐊᓐᒡ ᐊ ᓂᓯᒡ ᓇᐸᐅᒡ᙮ 28ᐊᑉᕋᐊᒻ ᒋ ᑎᐸᓇᐤ ᓂᔄᐅᑕᒡ ᓄᓴ ᒪᔭᑕᓂᓴ ᑭᔭ ᐅᐱᒪ ᒂ ᑎᔭᑦ᙮ 29ᐊᐱᒪᓕᒃ ᒋ ᑯᒂᒋᒪᐤ ᐊᑉᕋᐊᒪ, “ᒐᒂᓐ ᐛᒋ ᐅᐱᒪ ᑎᔨᑥᐤ ᐊᓐᒡ ᓂᔄᐅᑕᒡ ᓄᓴ ᒪᔭᑕᓂᓯᒡ ?”
30ᐊᑉᕋᐊᒻ ᐛᑎᒧᐛᑦ ᐊ ᐃᑕᑦ, “ᒋ ᓂᑐᐛᔨᒥᑎᓐ ᒐᒋ ᐅᑎᓂᑥᐤ ᐅᒡ ᒪᔭᑕᓂᓯᒡ ᒐ ᑎᐸᔨᒥᑥᐤ ᒐᒋ ᐅᒋ ᒋᔅᒋᓯᔨᓐ ᓂᔾ ᑲᒋ ᒧᓇᐊᒪᓐ ᐊᓐ ᒧᓇᐃᐸᓐ᙮”
31ᐊᐅᑯᓐ ᐊᓂᔭ ᐛᒋ ᐃᓯᓂᐧᑲᑕᐧᒃ ᐊᐛᓐ ᐊᓂᔭ ᐃᑕᐅᓂᔪᐤ ᐱᕐ-ᓯᐸ, ᐛᔅ ᐊᑯᑕ ᐊᓐᑕ ᑲ ᑐᑕᒡ ᓂᔅᑯᒧᐅᓂᔪᐤ ᐊᓐᒡ ᐊ ᓂᓯᒡ ᓇᐸᐅᒡ᙮
32ᑲᒋ ᑐᑕᑭᓄᐅᒡ ᓂᔅᑯᒥᑐᐅᓐ ᐊᓐᑕ ᐱᕐ-ᓯᐸ, ᐊᐱᒪᓕᒃ ᑭᔭ ᓂᑐᐱᔪᐅ-ᐅᒋᒪᐤ ᐱᑯᓪ ᑲᐤ ᒋ ᒋᐛᐅᒡ ᐊᓐᑕ ᐱᓕᔅᑕᐃᓐ ᐊᔅᒋᒡ᙮ 33ᐊᑉᕋᐊᒻ ᐛᒋᓇᑭᓇᑎᒂ ᒋ ᓂᑕᐅᒋᐊᐤ ᐊᓐᑕ ᐱᕐ-ᓯᐸ, ᐊᑯᑕ ᑭᔭ ᑲ ᓂᑐᑕᒺᑦ ᐅᑦ ᐃᓯᓂᐧᑲᓱᐅᓂᔪᐤ ᑎᐸᔨᒋᒐᓱᐛ ᒋᓴᒪᓂᑐᐛ ᒧᔅ ᑲᒋᒡ ᐸᒪᑎᓯᔨᒋ᙮ 34ᓇᐅᔅ ᒋ ᑕᐤ ᐊᑉᕋᐊᒻ ᐊᓐᑕ ᐱᓕᔅᑕᐃᓐ ᐊᔅᒋᒡ᙮
Currently Selected:
ᒐᓂᓯᔅ 21: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
