ᒐᓂᓯᔅ 20
20
ᐊᑉᕋᐊᒻ ᑭᔭ ᐊᐱᒪᓕᒃ
1ᐱᓯᒧᑕᒡ ᒋ ᐃᓯ ᐊᑐᒐᐤ ᐊᑉᕋᐊᒻ ᑭᔭ ᑎᔅᑐᐎᒡ ᑲᑎᔅ ᑭᔭ ᓱᕐ ᒂ ᐎᒋᑦ, ᑭᕋᕐ ᐛᐃᐱᔅᒋᔅ ᒋ ᑕᐤ, 2ᒪᒂᒡ ᐊᓐᑕ ᑲ ᑕᑦ, ᐊᑉᕋᐊᒻ ᒋ ᐃᑕᐤ ᐃᔪᐛ ᐊᐅᓯᒥᑦ ᐊᓂᔭ ᐎᐛ ᓴᕋᔨᒋ᙮ ᐊᑯ ᐊᐱᒪᓚᒃ, ᑭᕋᕐ ᒋᓴᐅᒋᒪᐤ, ᒋ ᓂᑐᒪᐤ ᓴᕋᔨᒋ ᑭᔭ ᒂ ᐅᑎᓇᑦ ᒐ ᐎᐅᑦ᙮
3ᐸᐃᒂᐤ ᑕᐱᔅᑲᔨᒡ, ᒋᓴᒪᓂᑐᐤ ᒋ ᓄᑯᓯᔅᑐᐛᐤ ᐊᐱᒪᓕᑲ ᐅᐳᐛᒧᐅᓂᔨᒡ ᑭᔭ ᒂ ᐃᑕᑦ, “ᓂᑐᑕ ! ᒋᑭ ᐳᓂᐱᒪᑎᓯᓐ, ᐛᔅ ᐊᓐ ᐃᔎᐤ ᑲ ᐅᑎᓂᑦ ᓴᔅ ᐊ ᓂᐳᐅᑦ᙮”
4ᒥᒄ ᐊᐱᒪᓕᒃ ᓇᒪ ᐅᒋ ᐎᐸᒪᐤ, ᐊᑯ ᒂ ᐃᔅᒋᔄᑦ, “ᑎᐸᔨᒋᒐᓱᐤ, ᓇᒪ ᓂ ᐅᒋ ᒥᒋᑐᑕᓐ᙮ ᑕᐱᔅᑯᓐ ᐊ ᒋᑭ ᓂᐸᐃᓇᓐ ᓂᔾ ᑭᔭ ᐊᓐᒡ ᐃᔪᒡ ᑕᐸᔨᒋᒐᔭᓐ ? 5ᓇᒪ ᓇ ᓂ ᐅᒋ ᐃᑎᒄ ᐊᑉᕋᐊᒻ, ‘ᓂᓯᒻ ᐊᓐ,’ ᑭᔭ ᓇᒪ ᓇ ᐃᔭᐱᒡ ᐅᒋ ᐃᔅᒋᔄᐤ ᓴᕋ, ‘ᓂᔅᑕᔅ ᐊᓐ᙮’ ᓇᒪ ᓂ ᐅᒋ ᐎ ᒥᒋᑐᑕᓐ, ᑯᐃᔅᒄ ᒐᒂᓐ ᓂᑦ ᐃᑐᑕᓐ ᓂᒋ ᐃᑕᔨᑕᓐ᙮”
6ᒋᓴᒪᓂᑐᐤ ᒂ ᓂᔎᐅᓯᐊᑦ, “ᓂ ᒋᔅᒐᔨᑕᓐ ᑯᐃᔅᒄ ᒐᒂᓐ ᓂᑦ ᐃᑐᑕᓐ ᐊᒋ ᐃᑕᔨᑎᒥᓐ, ᓇᒪ ᒋ ᐅᒋ ᒥᔨᑎᓐ ᒐᒋ ᐎᐸᒥᑦ ᓴᕋ, ᐊᑯ ᑭᔭ ᓂᔾ ᔅᒋ ᓂᑲᓂᑎᓐ ᒐᒋ ᐅᓂᑐᑐᐎᓐ᙮ 7ᑲᐤ ᒐ ᒥᔨᑦ ᐅ ᓇᐸᐤ ᐎᐛ, ᐛᔅ ᐎᔾ ᐅᒋᔅᒋᐛᐃᒐᓱᐤ ᑭᔭ ᒋᑭ ᐃᔨᒥᑥᒄ ᐊᑯ ᒪᒃ ᒐ ᐊᑲ ᐳᓂᐱᒪᑎᓯᓐ᙮ ᒥᒄ ᐊᑲ ᒋᐛᑎᓴᐅᑕ ᓴᕋ, ᑕᐱᔅᑯᓐ ᒋᔾ ᑭᔭ ᒋᑦ ᐃᔨᒥᒡ ᒋᑭ ᐳᓂᐱᒪᑎᓯᓇᐛᐤ᙮”
8ᐎᐱᒡ ᒥᓐ ᒋᔭᒋᓴᐸᔭᔨᒡ ᐊᐱᒪᓕᒃ ᒋ ᐎᓴᒪᐤ ᒥᓯᐛ ᐅᑦ ᐊᑐᔅᒐᔭᑭᓇ, ᒋ ᐎᑎᒧᐛᐤ ᒥᓯᐛ ᒐᒂᔪᐤ ᑲ ᐛᐸᑕᐧᒃ ᐅᐳᐛᒧᐅᓂᒡ᙮ ᒋᒋᐛ ᒋ ᑯᔅᑕᒋᔪᐛ᙮ 9ᐊᑯ ᐊᐱᒪᓕᒃ ᒂ ᐎᓴᒪᑦ ᐊᑉᕋᐊᒪ ᑭᔭ ᒂ ᐃᑕᑦ, “ᒐᒂᓐ ᐅ ᑲ ᑐᑐᐎᔭᒡ ? ᑭᔭ ᑕᓐ ᑲ ᐃᓯ ᐅᓂᑐᑕᑕᓐ ? ᓇᒪ ᒋ ᐅᓂᑐᑕᑎᓐ, ᐊᑯ ᒐᒂᓐ ᒪᒃ ᐛᒋ ᐸᑐᐎᓐ ᑭᔭ ᓂᑦ ᐃᔨᒥᒡ ᐊ ᒥᓴᒡ ᒥᒋᑐᑎᒧᐅᓐ ? ᔅᒋ ᑐᑐᐅᓐ ᐅ ᒐᒂᓐ ᒐ ᐊᑲ ᒋ ᐃᑐᑐᐛᑦ ᑯᑎᒃ ᐊᐛᓐ ᐊᐛᔪᐛ᙮ 10ᒐᒂᓐ ᒪᒃ ᐛᒋ ᐎᔭᔨᑎᒥᓐ ᐅ ᒐᒋ ᐃᑐᑎᒥᓐ ?”
11ᐊᑉᕋᐊᒻ ᒋ ᐃᑕᐤ, “ᓂᒋ ᐃᑕᔨᑕᓐ ᐊ ᐊᑲ ᐊᐛᓐ ᐅᑕ ᒋᔅᑕᔨᒪᑦ ᒋᓴᒪᓂᑐᐛ᙮ ᓂᑭ ᐎ ᓂᐸᐃᑯᒡ ᐃᔪᒡ ᐊᑯ ᒪᒃ ᒐ ᐅᑎᓇᒡ ᓂᐎᒋᒪᑭᓇ ᓂᒋ ᐃᑕᔨᒪᐅᒡ᙮” 12ᑭᔭ ᑕᑈᓄᐤ, ᓂᐧᑲᓂᔅ ᐊᓐ᙮ ᓂ ᐸᐃᒂᐊᓇᓐ ᓄᑕᐎᓇᓐ ᒥᒄ ᓇᒪ ᓂ ᐸᐃᒂᐊᓇᓐ ᓂᑲᐎᓇᓐ, ᓇᓇᒐ ᒂ ᐎᒋᒥᒃ᙮ 13ᐃᔅᐱ ᑲ ᐃᓯᑦ ᒋᓴᒪᓂᑐᐤ ᒐᒋ ᓂᑭᑎᒧᒡ ᓄᑕᐎᔭ ᐎᒋᔪᐤ, ᓂᒋ ᐃᑕᐤ ᓴᕋ, “ᒪᐅ ᒐ ᐃᓯ ᓄᑯᑕᔨᓐ ᐊ ᓴᒋᐃᔨᓐ, ᒥᓯᐛ ᐊᓐᑕ ᒐ ᐃᑐᑕᔭᐧᒄ, ‘ᓂᔅᑕᔅ ᐊᓐ’ ᒐ ᐃᑕᒋᒥᔨᓐ᙮”
14ᐊᐱᒪᓕᒃ ᑲᐤ ᒋ ᒥᔭᐤ ᐊᑉᕋᐊᒪ ᐎᐎᔪᐛ᙮ ᐃᔭᐱᒡ ᑭᔭ ᒥᔨᐛᐅᓇ, ᒋᒡ ᒪᔭᑕᓂᓴ, ᒥᒋᑎᒂ, ᓇᐸᐤ ᐊᐱᒋᐊᑭᓇ ᑭᔭ ᐃᔎᐤ ᐊᐱᒋᐊᑭᓇ᙮ 15ᒂ ᐃᑕᑦ ᐊᑉᕋᐊᒪ, “ᒪᐅ ᓄᑎᒻ ᓂᑦ ᐊᔅᒋᔾ, ᒐ ᐎᒋᔨᓐ ᐊᓐᑕ ᒥᒄ ᐛᐎᒋᐃᔨᓐ᙮”
16ᐊᑯ ᒂ ᐃᑕᑦ ᓴᕋᔨᒋ, “ᐸᐃᒂᐤ ᒐᓯᐱᔪᐤ ᓇᒪᔭᐤ ᐛᐱᓯᐅᓱᓇᔭᐱᔎ ᒋᐧᑲᓂᔅ, ᐊᐅᑯᐤ ᒐᒋ ᐛᐸᑎᔭᑭᓄᐅᒡ ᒥᓯᐛ ᒋᑦ ᐃᔨᒧᐛᐅᒡ ᐊ ᒥᔽᑎᓯᔨᓐ, ᒥᓯᐛ ᐊᐛᓐ ᒋᑭ ᒋᔅᒐᔨᑎᒻ ᐊ ᐊᑲ ᐅᒋ ᒥᒋᑐᑕᒥᓐ᙮”
17ᐊᑯ ᐊᑉᕋᐊᒻ ᓇᑐᑕᒧᐛᑦ ᒋᓴᒪᓂᑐᐛ ᑭᔭ ᒋᓴᒪᓂᑐᐤ ᒋ ᒥᓏᒋᐊᐤ ᐊᐱᒪᓕᑲ, ᒋᒡ ᐎᒋᒪᑭᓂᔪᐛ ᑭᔭ ᐅᑦ ᐃᔎᐤ ᐊᐱᒋᐊᑭᓂᔪᐛ, ᐊᑯ ᒪᒃ ᒐᒋ ᒥᓐ ᐅᑦ ᐊᐛᓯᒥᔨᒋ᙮ 18ᐛᔅ ᑎᐸᔨᒋᒐᓱᐤ ᒋ ᓂᑲᐊᒺᐤ ᒐᒋ ᐅᑦ ᐊᐛᓯᒥᔨᒋ ᒥᓯᐛ ᐊ ᑕᔨᒋ ᐃᔎᐛ ᐊᓐᑕ ᐊᐱᒪᓕᑲ ᐅᒋᓴᐅᒋᒪᐅᒋᐛᐱᒡ, ᐛᔅ ᐊᐱᒪᓕᒃ ᑲᒋ ᐅᑎᓇᑦ ᓴᕋᔨᒋ, ᐊᑉᕋᐊᒪ ᐎᐎᔪᐛ᙮
Currently Selected:
ᒐᓂᓯᔅ 20: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
