ᒐᓂᓯᔅ 13
13
ᐊᑉᕋᒻ ᑭᔭ ᓗᑦ ᑎᐸᓐ ᐃᑐᑕᐅᒡ
1ᐊᑉᕋᒻ ᑭᔭ ᐎᐛ ᒋ ᓂᑭᑐᒧᒡ ᐃᒋᑉᑦ ᐊᔅᒋᔪᐤ᙮ ᒋ ᔅᑐᑕᐅᒡ ᒥᓯᐛ ᒐᒂᔪᐤ ᑲ ᑎᐸᔨᑕᒡ ᑭᔭ ᑲᐤ ᒋ ᐃᑐᑕᐅᒡ ᐊᓐᑕ ᑲᐃᓇᓐ ᐱᓯᒧᑕᒡ ᐃᑕᒐ᙮ ᓗᑦ, ᐊᑉᕋᒻ ᐅᑐᓯᒪ ᒋ ᐎᒐᒐᐤ᙮ 2ᐊᑉᕋᒻ ᒋ ᐛᔪᑎᓯᐤ᙮ ᒋ ᑎᐸᔨᒪᐤ ᒥᒐᑦ ᒥᒋᑎᒂ, ᒪᔭᑕᓂᓴ ᑭᔭ ᒥᔅᑐᓴ ᑭᔭ ᒋ ᒥᔅᑎ ᑭᓄᐛᔨᑎᒻ ᐛᐱᓯᐅᓱᓇᔭᐱᔎ ᑭᔭ ᐎᔄᐅᓱᓇᔭᔪᐤ᙮
3ᒋ ᐱᐸᒧᑕᐤ ᓇᒐᑉ ᐊ ᐅᒋ ᔅᑐᑕᑦ ᐃᔅᐱᔅ ᐸᑕᓪ, ᐊᓐᑕ ᐅᔅᑭᒡ ᑲ ᒋᒥᑕᑦ ᐅᐱᒍᐎᔭᓂᒋᐛᑉ, ᑎᔅᑐᐎᒡ ᐸᑕᓪ ᐃᑕᐅᓂᔪᐤ ᑭᔭ ᐊᐃ, 4ᐊᓐᑕ ᐅᔅᑭᒡ ᑲ ᐅᓯᑕᑦ ᐱᔅᑎᓂᒐᐅᓇᐱᔅᑯᔪᐤ᙮ ᐊᑯᑕ ᑲ ᓂᑐᑎᒧᐛᑦ ᑎᐸᔨᒋᒐᓱᐛ᙮
5ᓗᑦ ᑭᔭ ᐅᑐᑕᒪ ᑭᔭ ᐅᑦ ᐊᐱᒋᐊᑭᓇ ᒋ ᐱᐸᒧᐎᒐᐛᐅᒡ ᐊᑉᕋᒪ᙮ ᒋ ᑭᓄᐛᔨᒪᐤ ᒪᔭᑕᓂᓴ ᑭᔭ ᒥᒋᑎᒂ᙮ 6ᒐᒃ ᑲ ᐅᑎᒋᐱᔨᒡ ᐊᑉᕋᒻ ᑭᔭ ᓗᑦ ᑲ ᒥᔅᑎᑭᓄᐛᔨᒪᒡ ᐊᐛᓯᓴ ᓇᒪ ᐅᒋ ᐃᔅᐱᔪᒡ ᐊᔅᒋᔪᐤ ᒐᒋ ᒪᒧᐤ ᐎᒋᒡ᙮ 7ᒂ ᒋᒋᐱᔨᒡ ᐊ ᒋᐧᑲᒥᑐᔨᒋ ᐊᑉᕋᒻ ᑭᔭ ᓗᑦ ᐅᑦ ᐊᐱᒋᐊᑭᓄᐛᐛ, ᑲᐃᓇᓐ ᑭᔭ ᐸᕆᔅ ᐃᔪᒡ ᐃᔭᐱᒡ ᐊᓐᑕ ᒋ ᐎᒍᐅᒡ ᐊᔅᒋᒡ᙮
8ᐊᑯ ᐊᑉᕋᒻ ᐊᑕᑦ ᓗᑕ, “ᐛᐸᑕ ! ᒋ ᐎᐧᑲᓂᓯᑕᑐᓇᓄᐤ, ᐊᑲ ᒥᔭᑕᐅᒋ ᒋᑦ ᐊᐱᒋᐊᑭᓄᐅᒡ ᒐᒋ ᒪᓯᐧᑲᑐᒡ᙮ 9ᑎᑯᓐ ᐊᔅᒋᔾ ᒐᔅᑎᓇᔅ ᒐ ᐃᔅᐱᔭᐧᒄ ᐊ ᓂᓯᔭᐧᒄ᙮ ᒋᐸ ᒥᔽᐤ ᒐᒋ ᑎᐸᓂᔭᐧᒄ᙮ ᐛᔭᐸᑕ ᑕᓐᑕ ᒐᐸ ᒥᔽᔨᑕᓐ ᒐᒋ ᐎᒋᔨᓐ ᑭᔭ ᓂᔾ ᐃᔭᒡ ᓂᑭ ᐃᑐᑕᓐ᙮”
10ᓗᑦ ᒋ ᓇᓂᑐᐛᐳᐤ ᑭᔭ ᒂ ᐛᐸᑕᐧᒃ ᐊ ᐱᓴᔨᒡ ᒠᕐᑕᓐ ᐊ ᒥᔪ ᓂᐱᐎᒡ, ᒧᔭᒻ ᐃᑎᓐ ᓂᑕᐅᒋᑕᑭᓂᔪᐤ ᑭᔭ ᒧᔭᒻ ᐃᒋᑉᑦ ᐊᔅᒋᔪᐤ, ᓱᐊᕐ ᐃᑕᒐ᙮ ᐊᐅᑯᐤ ᑲ ᐃᔅᐱᔨᒡ ᐊᒺᔭ ᑎᐸᔨᒋᒐᓱᐤ ᓂᓱᐅᓇᒋᑕᑦ ᓱᑕᒻ ᑭᔭ ᑯᒧᕋ ᐅᑕᓇᐛ᙮ 11ᐊᑯ ᓗᑦ ᒂ ᐎᔭᔨᑕᐧᒃ ᒐᒋ ᐎᒋᑦ ᐊᓐᑕ ᐊ ᐱᓴᔨᒡ ᒠᕐᑕᓐ, ᐎᔾ ᑭᔭ ᐅᑦ ᐃᔨᒪ ᐛᐱᓄᑕᒡ ᒋ ᐃᓯ ᐊᑐᒐᐅᒡ᙮ ᐊᐅᑯᐤ ᑲ ᐃᓯ ᑎᐸᓄᑕᒡ ᐊ ᓂᓯᒡ ᓇᐸᐅᒡ᙮ 12ᑲᐃᓇᓐ ᐊᔅᒋᒡ ᒋ ᐎᒍᐤ ᐊᑉᕋᒻ, ᒥᒄ ᓗᑦ ᒥᒋᒪ ᐅᑕᓇᐛ ᐊᓐᑕ ᐊ ᐱᓴᔨᒡ ᒠᕐᑕᓐ ᒋ ᐃᓯ ᐊᑐᒐᐤ, ᒥᒋᒪ ᓱᑕᒻ ᐅᑕᓇᔪᐤ ᒋ ᐎᒍᐤ᙮ 13ᐃᔪᒡ ᑲ ᐎᒋᒡ ᐊᓐᑕ ᓱᑕᒻ ᒋᒋᐛ ᒋ ᒥᒋ ᐃᔪᐎᒡ ᑭᔭ ᐊ ᒥᒋᑐᑕᒡ ᐊᑲ ᑕᑈᑐᐛᒡ ᑎᐸᔨᒋᒐᓱᐛ᙮
14ᑎᐸᔨᒋᒐᓱᐤ ᒋ ᐃᑕᐤ ᐊᑉᕋᒪ ᑲᒋ ᓂᑭᑎᑯᑦ ᓗᑕ, “ᑎᔅᑎᓴᐱᔾ ᑭᔭ ᒐ ᐃᑕᐱᔨᓐ ᒋᐛᑎᓄᒡ ᑭᔭ ᐱᓯᒧᑕᒡ, ᐛᐱᓄᑕᒡ ᑭᔭ ᐊᑎᒪᐱᓯᒧᒡ᙮ 15ᒥᓯᐛ ᐊᓐ ᐎᔭᐸᑎᒥᓐ ᐊᔅᒋᔾ ᒋᑭ ᒥᔨᑎᓐ ᑭᔭ ᒋᓂᑕᐅᒋᐊᑭᓐᒡ, ᒋᔨᐛᐤ ᓇᓂᑎᒻ ᒋᑭ ᑎᐸᔨᑕᓇᐛᐤ᙮ 16ᓂᑭ ᐃᑐᑐᐛᐅᒡ ᒋᓂᑕᐅᒋᐊᑭᓐᒡ ᒐᒋ ᒥᒐᑎᒡ ᒐ ᐊᑲ ᒋ ᐊᒋᒪᑦ ᐊᐛᓐ᙮ ᐅᔅᑕ ᒋᑭ ᒥᒐᑐᐅᒡ ᐃᔅᐱᔅ ᐊ ᑕᑎᓂᔨᒋ ᐃᔭᑲᐛ ᐅᑕ ᐊᔅᒋᒡ᙮ 17ᔅᑐᑕ, ᐱᐸᒧᑕ ᒥᓯᐛ ᒐ ᐃᑐᑕᔨᓐ ᐅ ᐊᔅᒋᔾ, ᐛᔅ ᒋᑭ ᒥᔨᑎᓐ ᐅ᙮”
18ᐊᑯ ᐊᑉᕋᒻ ᒋ ᐊᑐᒐᐤ ᑭᔭ ᒋ ᐎᒍᐤ ᒥᒋᒪ ᒪᒻᕋ ᒥᔅᑎᒂ ᐊ ᑕᔨᒋ ᐊᓐᑕ ᐃᑉᕈᓐ, ᐊᑯᑕ ᑲ ᐃᑐᑕᐧᒃ ᐱᔅᑎᓂᒐᐅᓇᐱᔅᑯᔪᐤ ᒐᒋ ᓂᑐᑎᒧᐛᑦ ᑎᐸᔨᒋᒐᓱᐛ᙮
Currently Selected:
ᒐᓂᓯᔅ 13: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
