ᒐᓂᓯᔅ 12
12
ᐊᑉᕋᒻ ᑲ ᑕᑈᑎᑯᑦ ᒋᓴᒪᓂᑐᐛ
Genesis 12.1-9 (Proper-5 Year A)
Genesis 12.1-4a (Lent-2 Year A)
1ᑎᐸᔨᒋᒐᓱᐤ ᐃᑕᐤ ᐊᑉᕋᒪ, “ᓂᑭᑕ ᒋᑦ ᐊᔅᒋᔾ ᑭᔭ ᒋᐧᑲᓂᓯᒡ ᑭᔭ ᒍᑕᐎᔾ ᐎᒡ, ᐃᑐᑕ ᒪᒃ ᐊᓐᑕ ᐊᔅᒋᔾ ᒐ ᐛᐸᑎᔨᑕᓐ᙮
2ᒋᑭ ᐅᑕᐎᒪᐅᓐ ᐊ ᓱᐧᑲᑎᓯᒡ ᐊ ᐃᑎᔅᑲᓇᓯᒡ, ᒋᑭ ᒥᔪᑐᑕᑎᓐ ᒥᓯᐛ ᒐᒂᓐ ᐅᒡ,
ᓂᑭ ᒋᔅᑕᔨᑕᑯᑕᓐ ᒋᑦ ᐃᓯᓂᐧᑲᓱᐅᓐ, ᒋᑭ ᓱᐛᔨᑕᑯᐎᐛᓐ ᒪᒃ᙮
3ᓂᑭ ᒥᔽᒋᒪᐅᒡ ᐊᓐᒡ ᑲ ᒥᔽᒋᒥᔅᒡ ᑭᔭ ᓂᑭ ᒥᒐᒋᒪᐤ ᐊᓐ ᒪᒐᒋᒥᔅᒃ;
ᒋᔾ ᐅᒡ ᒥᓯᐛ ᐊ ᑕᑎᓯᒡ ᐃᔪᒡ ᐅᑕ ᐊᔅᒋᒡ ᒋᑭ ᓱᐛᔨᑕᑯᓱᐅᒡ᙮”
4ᓂᔄᐅᑕᒡ ᑕᑐᔪᐤ ᐊᓱ ᐱᑕᑕᒡ ᒋ ᐃᑕᑐᐳᓇᓱᐤ ᐊᑉᕋᒻ ᑲ ᐃᑎᑯᑦ ᑎᐸᔨᒋᒐᓱᐛ ᒐᒋ ᓂᑭᑕᐧᒃ ᐦᐊᕋᓐ ᐅᑕᓇᔪᐤ᙮ ᒋ ᑕᑈᑐᐛᐤ ᑭᔭ ᒋ ᔅᑐᑕᐤ ᓗᑕ ᐊ ᐎᒐᐅᑯᑦ᙮ 5ᐊᑉᕋᒻ ᒋ ᐅᑎᓇᐤ ᐎᐛ ᓴᕋᐃᔨᒋ ᑭᔭ ᐅᑐᓯᒪ ᓗᑕ ᑭᔭ ᒥᓯᐛ ᒐᒂᓂᔪᐤ ᑲ ᒪᐅᒋᑕᑦ ᑭᔭ ᒥᓯᐛ ᐅᑦ ᐊᐱᒋᐊᑭᓇ ᐦᐊᕋᓐ ᑲ ᐅᒋ ᐊᔭᐛᒡ, ᒋ ᔅᑐᑕᐅᒡ ᒐᒋ ᐃᑐᑕᒡ ᑲᐃᓇᓐ ᐊᔅᒋᒡ᙮ ᐊᑯ ᑲ ᑎᑯᓯᒡ ᐊᓐᑕ ᑲᐃᓇᓐ ᐊᔅᒋᒡ᙮
6ᒧᕋᐃ ᒋ ᐃᔅᐱᔅ ᐃᑐᑕᐤ ᐊᑉᕋᒻ ᐊᓐᑕ ᓴᑭᒻ ᐃᑕᐅᓂᒡ᙮ ᑲᐃᓇᓐ ᐃᔪᐛ ᐊᔅᒄ ᒋ ᑕᔪᐛ ᐊᓐᑕ ᐊᔅᒋᒡ᙮ 7ᑎᐸᔨᒋᒐᓱᐤ ᒋ ᓄᑯᓯᔅᑐᐛᐤ ᐊᑉᕋᒪ ᑭᔭ ᒂ ᐃᑕᑦ, “ᓂᑭ ᒥᔭᐅᒡ ᒋᑦ ᐊᑐᔅᒐᔭᑭᓐᒡ ᐅᔭ ᑲᐃᓇᓐ ᐊᔅᒋᔪᐤ᙮” ᐊᑯ ᐊᑉᕋᒻ ᒂ ᐃᑐᑎᒧᐛᑦ ᑎᐸᔨᒋᒐᓱᐛ ᐱᔅᑎᓂᒐᐅᓇᐱᔅᑯᔪᐤ ᑲᒋ ᓄᑯᓯᔅᑕᑯᑦ᙮
8ᐊᑉᕋᒻ ᒪᒃ ᒋ ᐃᑐᑕᐤ ᐱᔅᑯᑎᓇᒡ ᐛᐱᓄᑕᒡ ᐸᑕᓪ ᐃᑕᒐ ᑭᔭ ᐊᑯᑕ ᑲ ᒋᒥᑕᑦ ᐅᐱᒍᐎᔭᓂᒋᐛᑉ, ᐸᑕᓪ ᐊᑎᒪᐱᓯᒧᒡ ᐊ ᑎᑯᓂᔨᒡ ᐃᑕᒐ ᑭᔭ ᐊᐃ ᐛᐱᓄᑕᒡ ᐃᑕᒐ᙮ ᐊᑯᑕ ᐱᔅᑎᓂᒐᐅᓇᐱᔅᑯᔪᐤ ᑲ ᐅᓯᑎᒧᐛᑦ ᑎᐸᔨᒋᒐᓱᐛ ᑭᔭ ᒋ ᓂᑐᑎᒧᐛᐤ ᑎᐸᔨᒋᒐᓱᐛ᙮ 9ᐊᑯ ᐊᑉᕋᒻ ᐱᓯᒧᑕᒡ ᒋ ᐃᓯ ᔅᑐᑕᐤ ᐃᔅᐱᔅ ᓇᒐᑉ ᐊᔅᒋᒡ᙮
ᐃᒋᑉᑎᒡ ᐊ ᑕᑦ ᐊᑉᕋᒻ
10ᒋ ᑎᒂᓐ ᓄᑕᐧᑭᑕᐅᓐ ᐊᓐᑕ ᑲᐃᓇᓐ ᐊᔅᒋᒡ᙮ ᐊᑯ ᐊᑉᕋᒻ ᒂ ᐃᑐᑕᑦ ᐱᓯᒧᑕᒡ ᐃᒋᑉᑎᒡ ᒐᒋ ᑕᑦ ᐊᓐᑕ, ᐅᓴᒻ ᒋ ᐊᔨᒥᓐ ᒐᒋ ᐎᒋᓇᓄᐅᒡ ᐊᓐᑕ ᐊᔅᒋᒡ ᐊᑲ ᑎᒂᒡ ᒥᒋᒻ᙮ 11ᒥᒄ ᐊᔅᒄ ᐊᑲ ᑎᑯᓯᒡ ᐊᓐᑕ ᐃᒋᑉᑎᒡ, ᐊᑯ ᐊᑕᑦ ᐎᐛ ᓴᕋᐃᔨᒋ, “ᓂ ᒋᔅᒐᔨᑕᓐ ᐊᔅᐱᔅ ᒥᔪᔎᐎᓐ, 12ᐛᐱᒥᔎᐛ ᐃᒋᑉᑦ ᐃᔪᒡ ᐊᔅᐱᔅ ᒥᔪᔎᐎᓐ, ᓂᑭ ᐎ ᓂᐸᐃᑯᒡ ᐅᓴᒻ ᓂᔾ ᐅ ᒋᓇᐸᒻ᙮ ᒥᒄ ᒋᔾ ᓇᒪ ᒋᑭ ᓂᐸᐃᒂᒡ᙮ 13ᒐ ᐃᑎᑥᐤ ᐊ ᐅᓯᒥᑕᑕᓐ᙮ ᐃᑎᑥᐛ ᐅᔭ, ᓂᑭ ᒥᔪᑐᑕᑯᒡ ᑭᔭ ᓇᒪ ᓂᑭ ᓂᐸᐃᑯᒡ᙮”
14ᐃᔅᐱ ᑲ ᑎᑯᓯᒡ ᐊᓐᑕ ᐃᒋᑉᑎᒡ, ᒋ ᐛᐱᒪᐅᒡ ᐃᒋᑉᑦ ᐃᔪᒡ ᐊᔅᐱᔅ ᒥᔪᔎᐎᔨᒋ ᐊᓂᔭ ᐃᔎᐛ᙮ 15ᐃᔅᐱ ᐱᔅᒐ ᒋᓴᐅᒋᒪᐤ ᐅᑯᐸᓇᒪ ᐎᔭᐱᒪᒡ ᐃᔎᐛ, ᒋ ᐎᑎᒧᐛᐅᒡ ᒋᓴᐅᒋᒪᐛ ᐊᔅᐱᔅ ᒥᔪᔎᐎᔨᒋ᙮ ᐊᑯ ᒋᓴᐅᒋᒪᐤ ᑲ ᓂᑐᐛᔨᒪᑦ ᒐᒋ ᐸᓱᐛᑭᓄᔨᒋ ᒐᒋ ᑕᔨᒋ ᐎᒋᒡ᙮ 16ᒋ ᒥᔪᑐᑐᐛᐤ ᒪᒃ ᐊᑉᕋᒪ, ᐊᒋ ᐃᑕᔨᒪᑦ ᓴᕋᐃᔨᒋ ᐊ ᐅᔅᑕᓯᔨᒋ᙮ ᐊᑉᕋᒻ ᒋ ᒥᔭᑭᓄᐤ ᒪᒃ ᒪᔭᑕᓂᓴ ᑭᔭ ᒥᔅᑐᓴ, ᓇᐸᐤ ᐊᐱᒋᐊᑭᓇ ᑭᔭ ᐃᔎᐤ ᐊᐱᒋᐊᑭᓇ, ᓇᐸ ᐅᐧᑲᓇ ᑭᔭ ᓄᓴ ᐅᐧᑲᓇ, ᑭᔭ ᑲ ᒥᔅᑎ ᐱᔎᐅᑯᓇᔨᒋ ᐊᐛᓯᓴ᙮
17ᐅᓴᒻ ᒋᓴᐅᒋᒪᐤ ᑲ ᐅᑎᓇᑦ ᐊᑉᕋᒪ ᐎᐎᐛ, ᑎᐸᔨᒋᒐᓱᐤ ᒋ ᐃᑐᑐᐛᐤ ᒋᓴᐅᒋᒪᐛ ᑭᔭ ᒥᓯᐛ ᑲ ᑕᔨᒋ ᐎᒋᐛᔨᒡ ᒐᒋ ᒥᔅᑎᐊᐧᑯᓯᔨᒋ᙮ 18ᐊᑯ ᒋᓴᐅᒋᒪᐤ ᒂ ᓂᑐᒪᑦ ᐊᑉᕋᒪ ᑭᔭ ᐊᑕᑦ, “ᒐᒂᓐ ᐅ ᑲ ᐃᑐᑕᐎᓐ ? ᒋᐸ ᐎᑎᒧᐅᓇᐱᓐ ᐅ ᒋᔾ ᐛᐎᓐ᙮ 19ᒐᒂᓐ ᒪᒃ ᐛᒋ ᐃᔅᒋᔄᔨᓐ ᐊ ᐅᓯᒥᔨᓐ ? ᒪᐅ ᒋᐅ, ᐅᑎᓐ ᑭᔭ ᒐ ᔅᑐᑕᔨᓐ᙮” 20ᐊᑯ ᒋᓴᐅᒋᒪᐤ ᒂ ᐃᑕᑦ ᐅᓂᑐᐱᔪᐅ-ᐃᔨᒪ ᒐᒋ ᐅᑎᓇᔨᒋ ᐊᑉᕋᒪ ᑭᔭ ᐎᐎᐛ ᑭᔭ ᒥᓯᐛ ᒐᒂᓂᔪᐤ ᑲ ᑎᐱᔨᐛᐅᓯᔨᒋ ᒐᒋ ᐎᐎᑎᓴᐛᔨᒋ ᐊᓐᑕ ᐃᒋᑉᑎᒡ᙮
Currently Selected:
ᒐᓂᓯᔅ 12: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
