ᐊᒃᓱᑕᔅ 5
5
ᒧᓱᔅ ᑭᔭ ᐊᕋᓐ ᑲ ᓂᑐᐛᐱᒪᒡ ᒋᓴᐅᒋᒪᐛ
1ᐸᑐᔅ ᑲᒋ ᐛᐸᑎᔭᒡ ᐊᓂᔭ ᒋᓴᐃᔪᐛ ᒐᒂᔪᐤ, ᐊᐅᑯᔪᐤ ᒧᓱᔅ ᑭᔭ ᐊᕋᓐ ᒂ ᓂᑐᐛᐱᒪᒡ ᒋᓴᐅᒋᒪᐛ᙮ ᒂ ᐃᑕᒡ, “ᐊᐅᑯᔪᐤ ᑎᐸᔨᒋᒐᓱᐤ, ᐃᔅᕋᐃᓪ ᐅᒋᓴᒪᓂᑐᒧᐛᐛ ᑲ ᐃᔅᒋᔄᔨᒋ, ‘ᐱᔅᑎᓂᒡ ᓂᑦ ᐃᔨᒥᒡ ᒐᒋ ᔅᑐᑕᒡ, ᒋᑭ ᐃᑐᑕᐅᒡ ᐊᓐᑕ ᐸᐧᑯᑎᔅᑭᒥᑲᒡ ᒐᒋ ᒥᑯᓴᒡ ᑭᔭ ᒐᒋ ᐊᔭᒥᐊᔅᑐᐅᒡ᙮’ ”
2ᐊᑯ ᒋᓴᐅᒋᒪᐤ ᒂ ᐃᑕᑦ, “ᐊᐛᓐ ᐊᓐ ᑎᐸᔨᒋᒐᓱᐤ ᒐᒋ ᓂᑐᑐᐅᒄ ᑭᔭ ᒐᒋ ᐱᔅᑎᓂᒥᒋ ᐃᔅᕋᐃᓪ ᐃᔪᐛ ᒐᒋ ᔅᑐᑕᔨᒋ ?”
3ᐊᑯ ᒂ ᐃᑕᒡ, “ᐃᑉᕈᐤ ᐃᔪᒡ ᐅᒋᓴᒪᓂᑐᒧᐛᐛ ᓂᒋ ᓄᑯᓯᔅᑕᑯᐱᓇᓂ, ᓇᐃᒥᓇᓐ ᒐᒋ ᐱᒧᑕᔭᒡ ᓂᔅᑐ ᒋᓯᑲᐛ ᐃᔅᐱᔅ ᐊᓐᑕ ᐸᐧᑯᑎᔅᑭᒥᑲᒡ, ᑭᔭ ᒐᒋ ᒥᔨᒋᒡ ᒥᑐᔅᑕᐊᒪᒐᐅᓂᔪᐤ ᑎᐸᔨᒋᒐᓱᐤ ᓂᒋᓴᒪᓂᑐᒥᓇᓐ, ᐊᑲ ᑕᑈᑐᔭᒐ ᐊᐧᑯᓱᐅᓐ ᓂᑭ ᓂᐸᐃᑯᓇᓐ ᑭᔭ ᒪᒃ ᓂᑐᐱᔪᐅ-ᒧᐧᑯᒪᓐ᙮”
4ᒋᓴᐅᒋᒪᐤ ᒂ ᐃᑕᑦ, “ᒧᓱᔅ ᑭᔭ ᐊᕋᓐ, ᐊᑯ ᒐᒂᓐ ᐛᒋ ᑯᔅᑎᔭᑯᒡ ᐃᔪᒡ ᒐᒋ ᐊᑐᔅᒐᒡ ? ᒪᒋᒄ ᑲᐤ ᐊᓐᑕ ᐊᑐᔅᒐᒄ ! 5ᐛᐸᑎᒧᒄ ! ᒋᒋᐛ ᒋ ᒥᒐᑎᓇᐛᐤ ᐃᔅᐱᔅ ᐃᒋᑉᑦ ᐃᔪᒡ᙮ ᐊᓄᒡ ᒋ ᐎ ᑯᔅᑎᔭᐛᐅᒡ ᒐᒋ ᐊᑐᔅᒐᒡ᙮”
6ᐊᓂᔭ ᐸᐃᑯᑕᐤ ᒋᓯᑯᔪᐤ ᒋᓴᐅᒋᒪᐤ ᒋ ᐃᑎᓱᒪᐤ ᐅᑯᐸᓇᒪ ᓂᔭᑭᑐᐛᔨᒪᔨᒋ ᐃᔅᕋᐃᓪ ᑲ ᐊᑐᔅᒐᓯᔨᒋ ᐊ ᐃᑕᑦ᙮ 7“ᐊᑲ ᒥᔭᐧᑯᒡ ᐃᔪᒡ ᒥᔅᑯᓱᐛ ᒐᒋ ᐅᓯᐊᒡ ᐊᓯᔅᒍᐤ ᐊᓯᓂᔭ᙮ ᐎᔪᐛᐤ ᒋᑭ ᐅᑎᓂᒪᓱᐅᒡ᙮ 8ᒥᒄ ᒧᔭᒻ ᐸᐃᑯᑕᐤ ᒋᑭ ᐎ ᐃᔅᐱᔅ ᐅᓯᐊᒡ ᐊᓯᔅᒍᐤ ᐊᓯᓂᔭ ᒐ ᐊᑲ ᒋ ᓄᑕᐱᔨᒡ᙮ ᒋᑎᒧᐅᒡ ᐊᓐᒡ, ᑭᔭ ᒪᒃ ᓇᒪ ᓂᐸ ᐅᒋ ᓂᑐᐛᔨᑎᒪᐧᑯᐱᓐᒡ ᒐᒋ ᔅᑐᑕᒡ ᒐᒋ ᒥᔭᒡ ᒥᑐᔅᑕᐊᒪᒐᐅᓇ ᐅᒋᓴᒪᓂᑐᒧᐛᐛ᙮ 9ᒐ ᐎ ᒥᔅᑎ ᐊᑐᔅᑲᑯᒡ ᒐ ᐊᑲ ᓂᑐᑕᒡ ᐅᔭ ᐊ ᐃᓯ ᐎ ᑭᑭᒋᔭᒥᑯᒡ ᐅᒋᒪᒧᐛᐛ᙮”
10ᐅᒋᒪᐅᒡ ᑲ ᓇᑭᑐᐛᔨᒪᒡ ᑲ ᐊᑐᔅᒐᓯᔨᒋ ᒋ ᓂᑐᐛᐱᒪᐅᒡ ᐃᔪᐛ ᑭᔭ ᒋ ᐃᑕᐅᒡ᙮ “ᐊᐅᒃ ᐅᔭ ᒋᓴᐅᒋᒪᐤ ᑲ ᐃᔅᒋᔄᑦ, ‘ᓇᒪ ᒋᑭ ᒋ ᒥᔨᑎᓇᐛᐤ ᒥᔅᑯᓱᐛ᙮ 11ᒋᔨᐛᐤ ᒋᑭ ᐎ ᓂᑐᐛᐸᑎᒪᓱᓇᐛᐤ᙮ ᒋᔨᐛᐤ ᒋᑭ ᐎ ᒥᔅᑲᓇᐤ ᑕᓐᑕ ᒐ ᐅᑎᓂᒪᒄ᙮ ᒥᒄ ᐸᐃᑯᑕᐤ ᒋᑭ ᐎ ᐃᔅᐱᔅ ᐅᓯᐊᐅᒡ ᐊᓯᔅᒍᐤ ᐊᓯᓂᔨᒡ ᑲ ᐃᔅᐱᔅ ᐅᓯᐊᑯᒡ᙮’ ” 12ᐊᑯ ᐃᔅᕋᐃᓪ ᐃᔪᒡ ᒥᓯᐛ ᐃᒋᑉᑦ ᐊᔅᒋᒡ ᒋ ᐃᑐᑕᐅᒡ ᐊ ᓇᓂᑐᐛᐸᑕᒡ ᒥᔅᑯᓱᐛ᙮ 13ᐅᒋᒪᐅᒡ ᑲ ᓇᑭᑐᐛᔨᒪᒡ ᑲ ᐊᑐᔅᒐᓯᔨᒋ ᒋ ᐃᔨᒧᐅᒡ ᐃᔪᐛ ᐊ ᐃᑕᒡ, “ᐊᓯᑯᒻ ᒋᓯᑲᐛ ᒋᑭ ᐎ ᐃᔅᐱᔅ ᐅᓴᐛᐅᒡ ᐊᓯᔅᒍᐤ ᐊᓯᓂᔨᒡ ᒧᔭᒻ ᑲ ᐃᔅᐱᔅ ᐅᓯᐊᑯᒡ ᑲ ᒥᔨᑯᐅᔭᒄ ᒥᔅᑯᓱᐛ᙮” 14ᐃᒋᑉᑦ ᐅᒋᒪᐅᒡ ᒂ ᐱᓯᔅᑕᐛᒡ ᐃᔅᕋᐃᓪ ᐅᒋᒪᐛ ᐊᓂᔭ ᑲ ᓇᑭᑐᐛᔨᒪᒋ ᑲ ᐊᑐᔅᒐᓯᔨᒋ᙮ ᒂ ᐃᑕᒡ, “ᐊᑯ ᒐᒂᓐ ᐛᒋ ᐊᑲ ᐅᒋ ᓯᒋᒪᑯᒡ ᐃᔪᒡ ᒐᒋ ᐃᔅᐱᔅ ᐅᓯᐊᒡ ᐊᓯᔅᒍᐤ ᐊᓯᓂᔭ ᒧᔭᒻ ᑲᒋ ᐃᑎᒡ ?”
15ᐊᑯ ᐃᔅᕋᐃᓪ ᐅᒋᒪᐅᒡ ᒂ ᓂᑐᐛᐱᒪᒡ ᒋᓴᐅᒋᒪᐛ ᑭᔭ ᒂ ᐃᑕᒡ, “ᒐᒂᓐ ᐅ ᐛᒋ ᐃᑐᑐᐅᔭᒡ ? 16ᓇᒪ ᓂ ᒥᔨᑯᐅᓇᓐ ᒥᔅᑯᓱᐛ, ᑭᔭ ᐃᔭᐱᒡ ᓂᑦ ᐃᑐᑕᑯᐅᓇᓐ ᒐᒋ ᐅᓯᔨᒋᒡ ᐊᓯᔅᒍᐤ ᐊᓯᓂᔨᒡ ᒧᔭᒻ ᑲᒋ ᐃᔅᐱᔅ ᐅᓯᔨᒋᒡ᙮ ᓴᒐᔾ ᓂ ᐱᓯᔅᑕᐅᑯᓇᓐ, ᓇᒪᔭᐤ ᐅ ᓂᔭᓐ ᑲ ᐃᑐᑎᒪᒡ᙮ ᒋᐅᒋᒪᒧᐛᐅᒡ ᐊᓂᔭ ᐃᑐᑎᒧᒡ ᐊ ᒥᔅᑎᓂᑐᐛᔨᑕᒡ ᒐᒂᔪᐤ᙮”
17ᒋᓴᐅᒋᒪᐛ ᒂ ᐃᑎᑯᒡ, “ᓇᒪ ᒋᑦ ᐃᔅᐱᔅ ᐊᑐᔅᒐᓇᐛᐤ ᒋᔨᐛᐤ ᑭᔭ ᒪᒃ ᓇᒪ ᒋᐸ ᐃᓯᓇᐤ, ‘ᐱᔅᑎᓇᓐ, ᓂ ᐎ ᔅᑐᑕᓇᓐ ᒐᒋ ᒥᔨᒋᒡ ᒥᑐᔅᑕᐊᒪᒐᐅᓂᔪᐤ ᑎᐸᔨᒋᒐᓱᐤ᙮’ 18ᒪᒋᒄ ᑲᐤ ᐊᑐᔅᒐᒪᒃ᙮ ᓇᒪ ᒋᑭ ᒋ ᒥᔨᑯᐅᓇᐛᐤ ᒥᔅᑯᓱᐛ, ᑭᔭ ᓇᔅᒡ ᒋᑭ ᐎ ᐅᓴᐛᐅᒡ ᐊᓯᔅᒍᐤ ᐊᓯᓂᔨᒡ ᒧᔭᒻ ᑲᒋ ᐃᔅᐱᔅ ᐅᓯᐊᑯᒡ ᐸᐃᑯᒋᓯᑲᐛ !”
19ᓇᐸᐅᒡ ᒋᔅᒐᔨᑎᒧᒡ ᐊ ᒥᔅᑎ ᒋᔄᐃᐛᒡ ᑭᔭ ᑲ ᐃᑎᓱᒪᑭᓄᐅᒡ ᒐᒋ ᐅᓯᐊᒡ ᐊᓯᔅᒍᐤ ᐊᓯᓂᔭ ᒧᔭᒻ ᑲᒋ ᐃᔅᐱᔅ ᐅᓯᐊᒡ ᐸᐃᑯᒋᓯᑲᐛ᙮ 20ᑲᒋ ᓂᑐᐛᐱᒪᒡ ᒋᓴᐅᒋᒪᐛ᙮ ᒂ ᓂᑐᐛᐱᒪᒡ ᒧᓱᓴ ᑭᔭ ᐊᕋᓇ, ᑲ ᐊᓱᐛᐱᒥᑯᒡ ᐊᓐᑕ ᐎᐎᑎᒥᒡ ᒋᓴᐅᒋᒪᐛ ᐎᒋᔨᒡ᙮ 21ᒂ ᐃᑕᒡ ᒧᓱᓴ ᑭᔭ ᐊᕋᓇ, “ᑭᒪ ᑎᐸᔨᒋᒐᓱᐤ ᑎᐸᔅᑯᓂᑕᒄ ᐊᑐᑐᐅᔭᒡ ᒐᒋ ᐛᐧᑲᓯᔨᒥᑦ ᒋᓴᐅᒋᒪᐤ, ᑭᔭ ᐅᔅᑦ ᒐᒋ ᓂᐸᐃᑯᐅᔭᒡ᙮”
ᑎᐸᔨᒋᒐᓱᐤ ᐊᓱᑎᒧᐛᐤ ᐃᔅᕋᐃᓪ ᐃᔪᐛ᙮
22ᐊᑯ ᒧᓱᔅ ᑲᐤ ᒂ ᓂᑐᐛᐱᒪᑦ ᑎᐸᔨᒋᒐᓱᐛ ᑭᔭ ᒂ ᐃᑕᑦ, “ᐅᑎᐸᔨᒋᒐᐤ, ᐊᑯ ᒐᒂᓐ ᐛᒋ ᓂᓇᐧᑲᒋᐃᑥᐤ ᐅᒡ ᐃᔪᒡ ? ᐊᑯ ᒐᒂᓐ ᐛᒋ ᐃᑎᓴᐎᓐ ? 23ᐃᔅᐱ ᑲᒋ ᓂᑐᐛᐱᒥᒃ ᒋᓴᐅᒋᒪᐤ, ᑲ ᐃᔨᒥᐃᒃ ᒋᑦ ᐃᓯᓂᐧᑲᓱᐅᓂᒡ ᐅᒡ, ᒋ ᐊᐧᑯᐊᐤ ᐃᔪᐛ᙮ ᑭᔭ ᓇᒪ ᒐᒂᓐ ᒋ ᐅᒋ ᑐᑕᓐ ᒐᒋ ᐎᒋᐃᑥᐤ᙮”
Currently Selected:
ᐊᒃᓱᑕᔅ 5: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
