ᐊᒃᓱᑕᔅ 4
4
ᒧᓱᔅ ᑲ ᒥᔭᑭᓄᐅᑦ ᐅᓱᐧᑲᑎᓯᐅᓐ
1ᒧᓱᔅ ᒂ ᐃᑕᑦ, “ᐊᑲ ᒪᒃ ᐎ ᑕᑈᑐᐅᑥᐛ ᑭᔭ ᐊᑲ ᐎ ᓂᑐᑐᐅᑥᐛ᙮ ᑕᓐ ᒐ ᐃᑎᔭᓐ ᐃᓯᑥᐛ, ‘ᑎᐸᔨᒋᒐᓱᐤ ᓇᒪ ᒋ ᐅᒋ ᓄᑯᓯᔅᑕᒄ᙮’ ”
2ᑎᐸᔨᒋᒐᓱᐤ ᒂ ᐃᑕᑦ, “ᒐᒂᓐ ᑎᔭᐧᑯᓂᒥᓐ ?”
ᒧᓱᔅ ᒂ ᐃᑕᑦ, “ᓯᔅᑲᐅᓐ᙮”
3ᑎᐸᔨᒋᒐᓱᐤ ᒂ ᐃᑕᑦ, “ᐛᐱᓇ ᐊᓐᑕ ᒧᔅᑎᔅᑭᒥᒡ᙮”
ᐊᑯ ᒧᓱᔅ ᑲ ᐛᐱᓇᐧᒃ ᐊᓐᑕ ᒧᔅᑎᔅᑭᒥᒡ, ᑭᔭ ᒋᓇᐱᑯᒡ ᒂ ᐃᓯ ᒥᔅᑯᒋᐱᔨᒡ᙮ ᒧᓱᔅ ᒂ ᒋᑎᓯᒧᑕᐧᒃ᙮
4ᑎᐸᔨᒋᒐᓱᐤ ᒂ ᐃᑕᑦ, “ᐅᒋᐱᔅ ᐊᓐᑕ ᐅᓱᒡ᙮” ᐊᑯ ᒧᓱᔅ ᒂ ᐅᒋᐱᑕᑦ ᐅᓱᔨᒡ ᐅᒡ, ᑭᔭ ᓯᔅᑲᐅᓐ ᑲᐤ ᒂ ᐃᓯᓇᑯᓯᔨᒋ᙮ 5ᑎᐸᔨᒋᒐᓱᐤ ᒂ ᐃᑕᑦ, “ᐊᐅᑯᐤ ᒐ ᐃᑐᑎᒥᓐ, ᐛᐸᑕᐧᑲᐛ ᐅᔭ ᐊᑯ ᒐ ᑕᑈᑥᒡ ᓂᔾ, ᑎᐸᔨᒋᒐᓱᐤ, ᒍᑕᐎᐛᐅᒡ ᐅᒋᓴᒪᓂᑐᒧᐛᐛ, ᐊᑉᕋᐊᒻ, ᐊᐃᓯᒃ, ᑭᔭ ᒐᑭᑉ ᐅᒋᓴᒪᓂᑐᒧᐛᐛ, ᐊᒋ ᓄᑯᓯᔅᑕᑕᓐ᙮”
6ᑎᐸᔨᒋᒐᓱᐤ ᒂ ᐃᑕᑦ, “ᐳᑎᓇ ᒋᑎᒋᔾ ᐊᓐᑕ ᒋᑦ ᐊᑯᐱᒡ,” ᐊᑯ ᒧᓱᔅ ᒂ ᐱᑕᐊᐧᒃ ᐅᑎᒋᔾ ᐊᓐᑕ ᐅᑦ ᐊᑯᐱᒡ᙮ ᐃᔅᐱ ᐛᒋᐱᔨᑕᑦ ᐅᑎᒋᔾ ᐊᓐᑕ ᐅᑦ ᐊᑯᐱᒡ ᐅᒡ, ᒋ ᐛᐸᔪᐤ ᐅᑎᒋᔾ ᒧᔭᒻ ᑯᓇ ᐊᓯᓇᑯᓯᔨᒋ ᐊᐅᒥᒋᔪᐅᓇᑯᓂᔨᒡ᙮
7ᑎᐸᔨᒋᒐᓱᐤ ᒂ ᐃᑕᑦ, “ᐳᑎᓇ ᑲᐤ ᒋᑎᒋᔾ ᐊᓐᑕ ᒋᑦ ᐊᑯᐱᒡ᙮” ᐊᑯ ᒧᓱᔅ ᒥᓐ ᒂ ᐱᑕᐊᐧᒃ ᐅᑎᒋᔾ ᐊᓐᑕ ᐅᑦ ᐊᑯᐱᒡ᙮ ᐃᔅᐱ ᐛᒋᐱᔨᑕᑦ ᐅᑎᒋᔾ ᐊᓐᑕ ᐅᑕᑯᐱᒡ ᐅᒡ, ᑲᐤ ᒋ ᒥᔪᓇᑯᓂᔪᐤ ᒧᔭᒻ ᑯᑎᒋᔪᐤ ᐅᑎᒋᔾ ᐊᓯᓇᑯᓂᔨᒡ᙮
8ᐊᑯ ᑎᐸᔨᒋᒐᓱᐤ ᒂ ᐃᑕᑦ, “ᐊᑯ ᑲ ᑕᑈᑕᐧᑲᐛ ᐅᔭ ᒋᔅᒋᓄᐛᒡ ᐛᐸᑎᔨᐛᐅᓇ, ᒋᑭ ᑕᑈᑕᑯᐛᐅᒡ ᐅᔭ ᑯᑎᒋᔪᐤ᙮” 9ᐊᑯ ᐊᑲ ᑕᑈᑕᒂᐛ ᐊᓂᔭ ᓂᓱ ᒋᔅᒋᓄᐛᒡ ᐛᐸᑎᔨᐛᐅᓇ ᑭᔭ ᐊᑲ ᐎ ᓂᑐᑕᔎᐛ ᒐᒂᔪᐤ ᐊᔅᒋᔄᐅᑦ, ᐊᑯ ᒐ ᐅᑎᓂᒥᓐ ᐱᔅᒐ ᓂᐱᔾ ᐊᓐᑕ ᓇᐃᔭᓪ ᓯᐱᒡ ᐅᒡ ᑭᔭ ᒐ ᑯᑎᐱᓂᒥᓐ ᐊᓐᑕ ᐊᔅᒋᒡ᙮ ᒥᐧᑯᒡ ᒋᑭ ᐃᓯᓇᑯᓐ ᐊᓐ ᓂᐱᔾ᙮
10ᒧᓱᔅ ᒂ ᐃᑕᑦ ᑎᐸᔨᒋᒐᓱᐛ, “ᑎᐸᔨᒋᒐᓱᐤ, ᓇᒪ ᓇᔅᒡ ᓂ ᑭᔅᒋᑕᓐ ᐊᔨᒥᔭᓐ᙮ ᓇᒪ ᓂ ᐅᒋ ᑭᔅᒋᑕᓐ ᐊᔨᒥᔭᓐ ᐊᒺᔭ ᐅᒋ ᐃᔨᒥᔨᓐ, ᑭᔭ ᐊᓄᒡ ᓇᒪ ᓂᑭᔅᒋᑕᓐ᙮ ᒋᒋᐛ ᐸᑎᐧᑲᒡ ᓂᑦ ᐃᔨᒥᓐ ᐊ ᐃᔨᒥᔭᓂ ᑭᔭ ᓂᑦ ᐊᔨᒥᐃᑯᓐ ᐛ ᐃᔨᒥᔭᓂ᙮”
11ᒥᒄ ᑎᐸᔨᒋᒐᓱᐛ ᐃᑎᑯᐤ “ᐊᐛᓐ ᑲ ᐅᓯᑕᐛᑦ ᓇᐸᐛ ᐅᑐᓂᔪᐤ ? ᐊᐛᓐ ᑲ ᒥᔭᑦ ᒐᒋ ᐃᔨᒥᔨᒋ ᑭᔭ ᒐ ᐊᑲ ᒋ ᐃᔨᒥᔨᒋ ? ᑭᔭ ᐊᐛᓐ ᑲ ᒥᔭᑦ ᒐᒋ ᐛᐸᑎᒥᔨᒋ ᑭᔭ ᒐ ᐊᑲ ᐛᐸᑎᒥᔨᒋ ? ᓇᒪᔭᐤ ᐊ ᓂᔾ, ᑎᐸᔨᒋᒐᓱᐤ ?
12ᐊᑯ ᐃᑐᑕᒪ, ᒋᑭ ᐎᒋᐃᑎᓐ ᒐᒋ ᐃᔨᒥᔨᓐ ᑭᔭ ᒋᑭ ᐎᑎᒪᑎᓐ ᑕᓐ ᒐ ᐃᔅᒋᔄᔨᓐ᙮”
13ᐊᑯ ᒧᓱᔅ ᐊᑕᑦ, “ᑎᐸᔨᒋᒐᓱᐤ, ᒋ ᐱᑯᓴᔨᒥᑎᓐ ᑯᑎᒃ ᐊᐛᓐ ᒐᒋ ᐃᑎᓴᐅᑦ᙮”
14ᑎᐸᔨᒋᒐᓱᐤ ᒋ ᒋᔄᐃᑯᐤ ᒧᓱᓴ ᑭᔭ ᒂ ᐃᑕᑦ, “ᐊᑯ ᒋᔅᑕᔅ ᐊᕋᓐ, ᓕᐸᐃ ᐊ ᐃᑎᔅᑲᓇᓯᑦ ? ᓂ ᒋᔅᒐᔨᒪᐤ ᐎᔾ ᓇᑕᐤ ᐃᔨᒥᑦ᙮ ᒪᒂᒡ ᐸᑐᑕᐤ ᒐ ᓇᒋ ᒧᐱᔅᑕᔅᒃ᙮ ᒋᒋᐛ ᒋᑭ ᒥᔽᔨᑎᒻ ᐛᐱᒥᔅᑲ᙮ 15ᒋᔾ ᒐ ᐃᔨᒥᔨᑦ, ᑭᔭ ᒐ ᐎᑎᒧᐅᑦ ᒐᒂᔪᐤ ᒐ ᐃᔅᒋᔄᑦ᙮ ᑕᐱᔅᑯᓐ ᒋᑭ ᐎᒋᐃᑎᓇᐛᐤ ᒐᒋ ᐃᔨᒥᔭᒄ ᑭᔭ ᒋᑭ ᐎᑎᒪᑎᓇᐛᐤ ᑕᓐ ᒐ ᐃᑎᔭᒄ᙮ 16ᐊᕋᓐ ᐎᔾ ᒋᑭ ᐃᔨᒪᐤ ᐃᔪᐛ ᑭᔭ ᒧᔭᒻ ᓂᔾ ᐊᑕᔨᑕᑯᓯᔭᓐ ᒋᑭ ᐃᑕᔨᑕᑯᓯᓐ ᐊᐛᐎᑎᒧᐅᑦ ᐊᕋᓐ ᑕᓐ ᒐ ᐃᔅᒋᔄᑦ᙮ ᓂᑭ ᑕᓐ ᐊᑕᔭᒄ ᒪᒂᒡ ᐃᔨᒥᔭᒂ ᑭᔭ ᑕᐱᔅᑯᓐ ᒋᑭ ᐎᑎᒪᑎᓇᐛᐤ ᑕᓐ ᒐ ᐃᑎᔭᒄ, ᒐ ᐎᑎᒧᐅᑦ ᒐᒂᔪᐤ ᒐ ᐃᔅᒋᔄᑦ᙮ 17ᐊᑯ ᐅᑎᓇ ᐅ ᓯᔅᑲᐅᓐ ᑭᔭ ᒐ ᐊᐱᒋᑕᔨᓐ ᐃᑐᑎᒥᓇ ᒋᔅᒋᓄᐛᒡ ᐛᐸᑎᑕᐛᐅᓇ᙮”
ᒧᓱᔅ ᑲᐤ ᒋᐛᐤ ᐊᓐᑕ ᐃᒋᑉᑎᒡ
18ᒧᓱᔅ ᑲᐤ ᒂ ᒋᐛᑦ ᑭᔭ ᒂ ᐃᔨᒪᐊᑦ ᐅᒋᓴᐃᔨᒪ ᒐᑦᕈᐛ᙮ ᒧᓱᔅ ᑲ ᐃᑕᑦ, “ᑕᑈᑎᒥᓇ ᓂ ᐎ ᐃᑐᑕᓐ ᑲᐤ ᐊᓐᑕ ᐃᒋᑉᑎᒡ ᒐᒋ ᒧᐱᔅᑐᐅᒂᐤ ᓂᐧᑲᓂᓯᒡ᙮ ᐛᔅ ᑭᔭ ᓇᒪ ᓂ ᒋᔅᒐᔨᒪᐅᒡ ᒐᒋ ᐃᔪᐛᐛᒂ᙮”
ᒐᑦᕈᐤ ᒂ ᐃᑕᑦ ᒧᓱᓴ, “ᐊᑯ ᑭᑈ ᒐ ᐃᑐᑕᔨᓐ᙮”
19ᑎᐸᔨᒋᒐᓱᐛ ᒂ ᐃᑎᑯᑦ ᒧᓱᔅ ᐊᔅᒄ ᐊᑕᑦ ᐊᓐᑕ ᒥᑎᐊᓐ, “ᑲᐤ ᐃᑐᑕᒪ ᐊᓐᑕ ᐃᒋᑉᑎᒡ, ᐊᓐᒡ ᓇᐸᐅᒡ ᑲ ᐎ ᓂᐸᐃᔅᒡ ᓄᑎᒻ ᐊᓂᔭᐧᑲ ᓂᐳᐅᒡ᙮” 20ᐊᑯ ᒧᓱᔅ ᒂ ᐳᓴᐊᑦ ᐎᐛ ᑭᔭ ᐅᑯᓴ ᐊᓐᑕ ᑲᓂᐧᑲᑎᓯᔨᒋ ᑲᐸᐃᑭᔎᐛ, ᑭᔭ ᑲᐤ ᒂ ᐃᑐᑕᒡ ᐊᓐᑕ ᐃᒋᑉᑦ ᐊᔅᒋᒡ᙮ ᐊᑕᐧᑯᓂᒺᑦ ᒋᓴᒪᓂᑐᐛ ᐅᓯᔅᑲᐅᓂᔪᐤ᙮
21ᑎᐸᔨᒋᒐᓱᐤ ᒂ ᐃᑕᑦ ᒧᓱᓴ, “ᒋ ᑎᑯᓯᓂᔭᒂ ᐊᓐᑕ ᐃᒋᑉᑎᒡ, ᒐ ᓂᑐᐛᐱᒥᑦ ᒋᓴᐅᒋᒪᐤ, ᒐ ᐃᑐᑎᒥᓐ ᐅᔭ ᐊᒥᔅᑲᑕᔨᑕᒂᒋ ᒐᒂᔪᐛ ᑲ ᒥᔨᑕᓐ ᓱᐧᑲᑎᓯᐅᓐ ᒐᒋ ᐃᑐᑎᒥᓐ᙮ ᓂᑭ ᐃᑐᑐᐛᐤ ᒐᒋ ᒥᔅᑯᔅᑎᒂᓇᑦ ᑭᔭ ᓇᒪ ᒋᑭ ᐎ ᐱᔅᑎᓇᐤ ᐃᔪᐛ᙮ 22ᐊᑯ ᒐ ᐎᑎᒧᐅᑦ, ‘ᐊᐅᑯᐤ ᐅᔭ ᑲ ᐃᔅᒋᔄᑦ ᑎᐸᔨᒋᒐᓱᐤ, “ᐃᔅᕋᐃᓪ ᐊᐅᒃ ᐅ ᓂᔅᑎᒻ ᑲ ᐃᔪᐅᑦ ᓂᑯᔅ᙮ 23ᐊᐅᑯᐤ ᑲ ᐃᑎᑕᓐ, “ᐱᔅᑎᓐ ᓂᑯᔅ ᐊᑯ ᒪᒃ ᒐᒋ ᐃᔭᒥᐊᔅᑐᐅᑦ᙮” ᐊᑯ ᒪᒃ ᐊᑲ ᑕᑈᑎᐎᓇ, ᐊᑯ ᒐ ᓂᐸᐃᒃ ᓂᔅᑎᒻ ᒋᑯᔅ᙮” ’ ”
24ᑎᐸᔨᒋᒐᓱᐤ ᒂ ᓄᑯᓯᔅᑐᐛᑦ ᒧᓱᓴ ᐊᓐᑕ ᑲ ᒪᓂᑲᓱᐎᒋ ᑭᔭ ᒐᑲᑦ ᒋ ᓂᐸᐊᐤ᙮ 25ᐊᑯ ᐎᐛ ᓯᐳᕋᔨᒋ, ᒂ ᐅᑎᓂᒥᔨᒋ ᐊ ᒋᓇᐱᔅᑲᔨᒡ ᐊᓯᓂᔪᐤ ᒂ ᒪᑎᓯᐛᔨᒋ ᐊᐱᓯᔅ ᐅᑯᓴ ᐅᓯᑲᔪᐤ (ᒐᒋ ᒋᔅᒋᓄᐛᒋᔄᑭᓄᐅᑦ) ᑭᔭ ᒂ ᑕᒋᑕᐛᑦ ᒧᓱᓴ ᐅᓯᑎᔨᒡ᙮ ᒂ ᐃᑕᑦ, “ᒋᔾ ᐅ ᓂᓇᐸᒻ ᒥᐧᑯᒡ ᐅᒡ᙮” 26ᐊᐅᑯᔪᐤ ᐅᔭ ᑲ ᐃᔅᒋᔄᑦ ᒪᒂᒡ ᑲ ᒥᓂᓱᒺᑦ ᐅᑯᓴ ᐅᓯᑲᔪᐤ (ᒐᒋ ᒋᔅᒋᓄᐛᒋᔄᑭᓄᐅᑦ), ᐊᑯ ᒋᓴᒪᓂᑐᐤ ᓇᒪ ᐅᒋ ᓂᐸᐊᐤ ᒧᓱᓴ᙮
27ᐊᑯ ᑎᐸᔨᒋᒐᓱᐤ ᒂ ᐃᑕᑦ ᐊᕋᓇ, “ᒐ ᐃᑐᑕᔨᓐ ᐊᓐᑕ ᐸᐧᑯᑎᔅᑭᒥᑲᒡ ᒐ ᓂᑐᐛᐱᒥᑦ ᒧᓱᔅ᙮” ᐊᑯ ᐊᕋᓐ ᒂ ᐃᑐᑕᑦ ᐊᓐᑕ ᒋᓴᒪᓂᑐᐛ ᐅᐱᔅᑯᑎᓇᒥᔪᐤ, ᑭᔭ ᒂ ᒥᔅᑯᐛᑦ ᒧᓱᓴ ᑭᔭ ᒋ ᒥᔽᔨᑎᒥᔪᐛ ᐎᔭᐱᒥᑯᑦ᙮ 28ᒧᓱᔅ ᒂ ᐎᑎᒧᐛᑦ ᐊᕋᓇ ᓄᑎᒻ ᒐᒂᔪᐤ ᑎᐸᔨᒋᒐᓱᐛ ᑲ ᐃᑎᑯᔨᒋ ᑲᐤ ᒐᒋ ᐃᑐᑕᑦ ᐊᓐᑕ ᐃᒋᑉᑎᒡ ᑭᔭ ᒋ ᐎᑎᒪᑯᐤ ᒪᒥᔅᑲᒡ ᒐᒂᔪᐛ ᒐ ᐃᑐᑕᐧᒃ ᑲ ᐃᑎᓱᒥᑯᑦ ᒐᒋ ᐃᑐᑕᐧᒄ᙮
29ᒧᓱᔅ ᑭᔭ ᐊᕋᓐ ᑲᐤ ᒂ ᐃᑐᑕᒡ ᐊᓐᑕ ᐃᒋᑉᑎᒡ ᑭᔭ ᒂ ᐎᓴᒪᒡ ᓄᑎᒻ ᐅᒋᒪᐛ ᐊᓐᑕ ᐃᔅᕋᐃᓪ ᒐᒋ ᓇᔅᑯᐛᒡ᙮ 30ᐊᕋᓐ ᒂ ᐎᑕᒃ ᓄᑎᒻ ᒐᒂᔪᐤ ᑎᐸᔨᒋᒐᓱᐛ ᑲ ᐃᑕᔨᒋ ᒧᓱᓴ, ᒧᓱᔅ ᒂ ᐛᐸᑎᔨᐛᑦ ᐊᓂᔭ ᒋᔅᒋᓄᐛᒡ ᐛᐸᑎᔨᐛᐅᓂᔪᐤ ᒥᓯᐛ ᐊᐛᔪᐛ ᐊ ᑭᓄᐛᐱᒥᑯᑦ, 31ᐊᑯ ᓄᑎᒻ ᒂ ᑕᑈᑕᒡ᙮ ᐊᑯ ᒐᔅᒐᔨᑕᒡ ᐊᓂᔭ ᑎᐸᔨᒋᒐᓱᐛ ᑲ ᐛᐸᑎᒥᔨᒋ ᑕᓐ ᑲ ᐃᓯ ᓇᐧᑲᒋᐅᒡ, ᒂ ᓄᐛᑲᐳᔅᑐᐛᒡ ᑭᔭ ᒂ ᐊᔭᒥᐊᔅᑐᐛᒡ ᒋᓴᒪᓂᑐᐛ᙮
Currently Selected:
ᐊᒃᓱᑕᔅ 4: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
