ᐊᒃᓱᑕᔅ 37
37
ᐸᔭᒋ-ᒥᐅᑦ
1ᐸᓴᓕᓪ ᒋ ᐅᓯᑕᐤ ᐸᔭᒋ-ᒥᐅᑎᔪᐤ ᐊᑲᓯᔭ ᒥᔅᑎᒂ ᐅᒡ ᓇᐎᔪᐤ ᐊᓱ ᐱᑕᑕᒡ ᒥᒋᒋᓐ ᐊ ᐃᓯ ᒋᓏᔨᒡ, ᓂᓱᔪᐤ ᐊᓱ ᓂᔄᐅᑕᒡ ᒥᒋᒋᓐ ᐊ ᐃᔅᐱᔅ ᐃᔨᑭᔅᑲᔨᒡ, ᓂᓱᔪᐤ ᐊᓱ ᓂᔄᐅᑕᒡ ᒥᒋᒋᓐ ᐊ ᐃᓯ ᐃᔅᐸᔨᒡ᙮ 2ᐎᔄᐅᓱᓇᔭᔪᐤ ᒋ ᐎᔎᔭᒋᓂᒻ ᐱᑎᑭᒥᒡ ᑭᔭ ᐎᐎᑎᒥᒡ ᑭᔭ ᐊᓐᑕ ᒋᒡ ᐛᔅᑲ ᒋᐸᐃᑭᓂᒡ᙮ 3ᒋ ᐅᓯᐊᐤ ᓇᐤ ᓯᒋᐸᒋᑭᓇ ᐊ ᐎᔄᐅᓱᓇᔭᐎᔨᒋ ᑭᔭ ᒋ ᒋᑭᒧᐛᐤ ᐸᐸᐃᒄ ᐊᓐᑕ ᐊ ᒋᒐᔭᒡ ᒥᐅᑎᒡ᙮ 4ᒋ ᐅᓯᐊᐤ ᓂᓱ ᒥᔅᑎᑯᐧᑲᓇ, ᐎᔄᐅᓱᓇᔭᔪᐤ ᒋ ᐎᔎᔭᒋᓇᐤ᙮ 5ᒋ ᐱᑕᔅᑯᓄᐤ ᒥᔅᑎᑯᐧᑲᓇ ᐊᓐᑕ ᐛᐎᔭᐱᔅᑯᒡ, ᐊᐅᑯᓐ ᒐ ᐅᒋ ᐱᒧᑕᐧᑯᓂᑭᓄᐅᒡ ᐸᔭᒋ-ᒥᐅᑦ᙮
6ᒋ ᐅᓯᑕᐤ ᐎᔄᐅᓱᓇᔭᐤ ᒋᐸᐃᑭᓂᔪᐤ ᐊᓐᑕ ᒐ ᐛᐸᔨᑎᒧᐛᑭᓄᐎᒋ ᐃᔪᐛ ᐅᒥᒋᑐᑎᒧᐅᓂᔪᐛ᙮ ᓇᐎᔪᐤ ᐊᓱ ᐱᑕᑕᒡ ᒥᒋᒋᓐ ᐊ ᐃᔅᐱᔅ ᒋᓏᔨᒡ ᑭᔭ ᓂᓱᔪᐤ ᐊᓱ ᓂᔄᐅᑕᒡ ᒥᒋᒋᓐ ᐃᔅᐱᔅ ᐃᔨᑭᔅᑲᔨᒡ᙮ 7ᒋ ᐅᓯᐊᐤ ᐃᔭᐱᒡ ᓂᓱ ᐊ ᐅᑎᑎᑭᓄᐎᒋ ᐊᐛᓯᓴ ᐎᔄᐅᓱᓇᔭᒡ ᐅᒡ᙮ 8ᐸᐃᒄ ᐊᓂᔭ ᐊ ᓂᓯᔨᒋ ᐊ ᐅᑎᑎᑭᓄᐎᒋ ᐊᐛᓯᓴ ᐊᓐᑕ ᐊᔨᑐᐤ ᒋᐸᐃᑭᓂᒡ ᒋᒋᑭᒧᐊᐤ, 9ᐊᑯ ᐊᓐᒡ ᐊ ᐅᑎᑎᑭᓂᒡ ᐊᐛᓯᓯᒡ ᒋ ᑕᔅᑲᑐᐅᒡ ᐅᑎᑎᑭᓄᐛᒡ ᑭᔭ ᒋ ᐊᑯᓇᐊᒧᒡ ᒋᐸᐃᑭᓂᔪᐤ ᐊ ᒥᓯᑕᔅᑕᔨᒋ ᐅᑎᑎᑭᓄᐛᐛ᙮
ᒥᒋᓱᐛᑭᓇᑎᒄ
10ᐱᓴᓕᓪ ᒋ ᐅᓯᑕᐤ ᒥᒋᓱᐛᑭᓇᑎᑯᔪᐤ ᓂᔅᑐᐎᔪᐤ ᐊᓱ ᐊᓱᑕᒡ ᒥᒋᒋᓐ ᐊᔅᐱᔅ ᒋᓏᔨᒡ ᑭᔭ ᔭᓇᐤ ᑕᑐᓴᑉ ᒥᒋᒋᓐ ᐊᔅᐱᔅ ᐃᔨᑭᔅᑲᔨᒡ, ᑭᔭ ᓂᓱᐎᔪᐤ ᐊᓱ ᓂᔄᐅᑕᒡ ᒥᒋᒋᓐ ᐊᔅᐱᔅ ᐃᔅᐸᔨᒡ᙮ ᐊᑲᓯᔭ ᒥᔅᑎᒂ ᒋ ᐊᐱᒋᐊᐤ᙮ 11ᐎᔄᐅᓱᓇᔭᔪᐤ ᒋ ᐎᔎᔭᒋᓂᒻ ᑭᔭ ᑲ ᐎᔄᐅᓱᓇᔭᐅᔨᒋ ᐛᔅᑲᔅᑲᐃᑭᓇ ᒥᓯᐛ ᐊᓐᑕ ᐛᔅᑲ ᒋ ᒋᑭᒺᐊᐤ᙮ 12ᒋ ᒋᑭᒧᑕᐤ ᐃᔭᐱᒡ ᒥᔅᑎᒂ ᐊᓐᑕ ᐛᔅᑲ ᒋᒡ ᒥᒋᓱᐛᑭᓇᑎᑯᒡ, ᓂᔅᑐ ᒥᒋᒋᓐ ᐊᔅᐱᔅ ᐃᔨᑭᔅᑲᔨᒡ, ᑭᔭ ᑲ ᐎᔄᐅᓱᓇᔭᐅᔨᒋ ᐛᔅᑲᔅᑲᐃᑭᓇ ᒋ ᒋᑯᒺᐊᐤ ᐊᓐᑕ ᐛᔅᑲ ᒋᒡ ᒥᔅᑎᑯᒡ᙮ 13ᒋ ᐅᓯᐊᐤ ᓇᐤ ᐊ ᐎᔄᐅᓱᓇᔭᐅᔨᒋ ᐛᐎᔭᐱᔎ ᑭᔭ ᒋ ᒋᑭᒺᐊᐤ ᐊᓐᑕ ᐊ ᒋᒐᔭᔨᒡ ᒥᒋᓱᐛᑭᓇᑎᑯᒡ ᒥᒋᒪ ᐊ ᐅᔅᑲᑐᐎᔨᒡ᙮ 14ᒥᒋᒪ ᒋᒡ ᒋ ᒋᑭᒺᐊᐤ ᐛᐎᔭᐱᔎ ᒐᒋ ᑕᐧᑯᓇᑭᓄᐎᔨᒡ ᒥᒋᓱᐛᑭᓇᑎᑯᔪᐤ᙮ 15ᒋ ᐅᓯᐊᐤ ᓂᓱ ᒥᔅᑎᑯᐧᑲᓇ ᐊᑲᓯᔭ ᒥᔅᑎᒂ ᐅᒡ ᑭᔭ ᒋ ᐎᔎᔭᒋᓇᐤ ᐎᔄᐅᓱᓇᔭᔪᐤ, ᐊᐅᑯᓐᒡ ᐅᒡ ᒥᔅᑎᑯᐧᑲᓐᒡ ᒐᒋ ᐅᒋ ᑕᐧᑯᓂᑭᓄᐅᒡ ᐊ ᐱᐸᒧᑕᑭᓄᐅᒡ ᒥᒋᓱᐛᑭᓇᑎᒄ᙮ 16ᒥᓯᐛ ᒐᒂᔪᐤ ᐊᓐᑕ ᒐ ᐊᐱᒋᑕᑭᓄᐎᒡ ᒥᒋᓱᐛᑭᓇᑎᑯᒡ ᐎᔄᐅᓱᓇᔭᔪᐤ ᒋ ᐅᒋ ᐅᓯᑕᐤ: ᓱᒥᓇᐳᔾ ᒥᓂᒂᑭᓇ ᑭᔭ ᐊᑐᔅᐳᐛᑭᓇ ᑭᔭ ᐎᔭᑭᓇ ᒐ ᐱᔅᑎᓂᒐᓄᐅᒡ ᓱᒥᓇᐳᔾ᙮
ᐛᔅᑕᓂᐱᒪᑭᓇᑎᒄ
17ᒋ ᐅᓯᑕᐤ ᐛᔅᑕᓂᐱᒪᑭᓇᑎᑯᔪᐤ ᒋᒋᐛ ᐎᔄᐅᓱᓇᔭᔪᐤ ᐅᒡ᙮ ᒋ ᐅᓯᐊᐤ ᐃᔭᐱᒡ ᑕᑕᐃᑭᓇ ᑭᔭ ᐅᑎᐧᑯᓇ ᐊ ᐱᐱᑲᐃᑭᓄᐎᒡ ᐊ ᓄᑎᒪᔨᒡ ᐎᔄᐅᓱᓇᔭᔪᐤ ᐅᒡ ᑭᔭ ᒋ ᒥᒪᑕᐛᐱᔅᑲᐊᒻ ᐊᓐᑕ ᒥᓂᒂᑭᓇ ᐊᓱᔭᑭᓄᐅᑦ ᐱᒥᔾ ᑭᔭ ᐛᐱᑯᓂᔅᒐ ᑭᔭ ᐛᐱᑯᓐ ᓂᐱᔭ᙮ 18ᓂᔅᑐ ᐅᑎᐧᑯᓐᒡ ᒋ ᑕᐅᒡ ᐊᔨᑐᐤ ᐊᓐᑕ ᐛᔅᑕᓂᐱᒪᑭᓇᑎᑯᒡ᙮ ᒪᒧᐤ ᐊᓱᑕᒡ ᒋ ᐃᑕᑎᓱᐅᒡ ᐅᑎᐧᑯᓐᒡ᙮ 19ᓂᔅᑐ ᒥᓂᒂᑭᓂᔅᒐ ᐊᓐᑕ ᐊᓱᔭᑭᓄᐅᑦ ᐱᒥᔾ ᒧᔭᒻ ᐛᐱᑯᓂᓯᒡ ᐊ ᐃᓯᓇᑯᓂᔨᒋ ᒋ ᒋᑭᒧᐛ ᐊᓐᑕ ᐸᐃᒄ ᐅᑎᐧᑯᓂᒡ᙮ ᒪᒧᐤ ᐊᓱᑕᒡ ᒋ ᐃᑕᑎᓇ ᐊᓐᑕ ᐛᔅᑕᓂᐱᒪᑭᓇᑎᑯᒡ᙮ 20ᐊᓐᑕ ᑕᑕᐅᒡ ᐛᔅᑕᓂᐱᒪᑭᓇᑎᑯᒡ ᓇᐤ ᐊ ᒥᒪᑕᐛᐱᔅᑲᐃᑭᓄᐅᒋ ᐱᑲᓐ ᐛᐱᑯᓇ ᐊᓯᒡ ᐛᐱᑯᓂᔅᒐ᙮ 21ᐸᐃᒃ ᐛᐱᑯᓂᔅᒡ ᒋ ᒋᑭᒧᐤ ᐊᓇᒡ ᐊ ᓂᓯᒡ ᐅᑎᐧᑯᓂᒡ᙮ ᒪᒧᐤ ᒋ ᓂᔅᑎᓇ ᐊ ᓇᓂᓱᒧᒋ ᐅᑎᐧᑯᓇ᙮ 22ᒥᓯᐛ ᐊᓐ ᐛᔅᑕᓂᐱᒪᑭᓇᑎᒄ ᐊᓯᒡ ᐅᑎᐧᑯᓐᒡ ᑭᔭ ᐛᐱᑯᓇ ᐊ ᓄᑎᒪᒡ ᐎᔄᐅᓱᓇᔭᐤ ᒋ ᐅᒋ ᐅᓯᑕᑭᓄᐤ᙮
23ᐸᓴᓚᓪ ᐃᔭᐱᒡ ᒋ ᐅᓯᐊᐤ ᓂᔄᐅᑕᒡ ᐛᔅᑕᓂᐱᒪᑭᓇ ᑭᔭ ᐊ ᐃᑕᐱᒋᑕᑭᓄᐎᒋ ᒐᒂᔪᐛ ᐊᓯᒡ ᐛᔅᑕᓂᐱᒪᑭᓇᔭᐱᔪᐤ ᐊᒍᓴᑭᓄᐎᒡ ᑭᔭ ᐎᔭᑭᓂᔪᐤ ᒋᒋᐛ ᐎᔄᐅᓱᓇᔭᔪᐤ ᐅᒡ᙮ 24ᓂᔄᐅᑕᒡ ᑕᑐᔪᐤ ᐊᓱ ᐱᑕᑕᒡ ᑕᑐᐤ ᑎᐸᐸᑲᐃᑭᓇ ᒋ ᐃᔅᐱᔅ ᐊᐱᑎᓐ ᐎᔄᐅᓱᓇᔭᐤ ᐊ ᐅᓯᑕᑭᓄᐅᒡ ᐛᔅᑕᓂᐱᒪᑭᓇᑎᒄ ᑭᔭ ᒥᓯᐛ ᐊ ᐃᑕᐱᑎᒡ ᒐᒂᓐ᙮
ᐱᔅᑎᓂᒐᐅᓇᐱᔅᒄ ᐊᓐᑕ ᒐ ᓯᔅᑲᐃᑭᓄᐅᒋ ᐎᒋᒪᓯᑭᓇ
25ᐱᓴᓕᓪ ᒋ ᐅᓯᑕᐤ ᐱᔅᑎᓂᒐᐅᓇᐱᔅᑯᔪᐤ ᒐᒋ ᓯᔅᑲᐃᑭᓂᔨᒋ ᐎᒋᒪᓯᑭᓇ, ᐊᑲᓯᐊ ᒥᔅᑎᒂ ᒋ ᐊᐱᒋᐊᐤ᙮ ᒋ ᑭᒋᒐᔭᐤ ᐊᓐ ᐱᔅᑎᓂᒐᐅᓇᐱᔅᒄ ᑭᔭ ᔭᓇᐅᑕᑐᓴᑉ ᒥᒋᒋᓐ ᒋ ᐃᔅᐱᓯᑕᐤ ᑭᔭ ᓂᔅᑐᔪᐤ ᐊᓱ ᐊᓱᑕᒡ ᒥᒋᒋᓐ ᒋ ᐃᔅᐱᔅ ᐃᔅᐸᓂᑕᐤ ᑭᔭ ᒧᔭᒻ ᒥᒋᑎᒂ ᐅᑦ ᐊᔅᑭᓂᔨᐛ ᐊᐅᒡ ᓴᑲᔅᑯᒧᔨᒋ ᐊᓐᑕ ᑕᐧᑯᒡ ᓇᐤ ᐊ ᒋᒐᔭᔨᒋ ᒋ ᐃᓯᓇᑯᑕᐤ᙮ ᐸᐃᑯᑕᐤ ᒥᔅᑎᒂ ᒋ ᐊᐱᒋᐊᐤ ᐊᓂᔭ ᑲ ᐅᓯᑕᑦ ᐱᔅᑎᓂᒐᐅᓇᐱᔅᑯᔪᐤ᙮ 26ᐎᔄᐅᓱᓇᔭᐤ ᒋ ᐎᔅᑯᔭᒋᓂᒻ ᒥᓯᐛ ᐱᔅᑎᓂᒐᐅᓇᐱᔅᑯᔪᐤ ᑭᔭ ᐊᓂᔭ ᒥᒋᑎᒂ ᐅᑦ ᐊᔅᑭᓂᔨᐛ ᐊᐅᒡ ᓴᑲᔅᑯᒧᔨᒋ ᑭᔭ ᐛᔅᑲ ᐊᓐᑕ ᒋᒋᑭᒺᐊᐤ ᑲ ᐎᔄᐅᓱᓇᔭᐎᒋ ᐛᔅᑲᔅᑲᐃᑭᓇ᙮ 27ᔭᓯᒄ ᐊᓐᑕ ᐛᔅᑲᔅᑲᐃᑭᓇ ᒐᑯᒧᐎᔨᒋ, ᓇᓂᓱ ᐛᐎᔭᐱᔎ ᒋ ᒋᑭᒧᑕᐤ ᐊᓐᑕ ᐊᔨᑐᐤ ᒥᐅᑎᒡ ᒐᒋ ᓴᑯᓯᒪᑭᓄᐅᒡ ᐊᓐᑕ ᒥᔅᑎᑯᐧᑲᓐᒡ ᒐᒋ ᐱᐸᒧᑕᑭᓄᐅᒡ ᒥᐅᑦ᙮ 28ᐊᑲᓯᔭ ᒥᔅᑎᒂ ᒋ ᐊᐱᒋᐊᐤ ᑲ ᐅᓯᐊᑦ ᒥᔅᑎᑯᐧᑲᓇ ᒐ ᓴᑯᓯᒪᑦ ᐛᐎᔭᐱᔅᑯᒡ ᑭᔭ ᐎᔄᐅᓱᓇᔭᔪᐤ ᒋ ᐎᔎᔭᒋᓇᐤ᙮
29ᒋ ᐅᓯᐊᐤ ᐃᔭᐱᒡ ᐸᔭᒋ ᑐᒥᓂᒐᐅ-ᐱᒥᔭ ᑭᔭ ᐎᒋᒪᓯᑭᓂᔪᐤ ᐊ ᒪᒧᐱᔨᑕᑦ ᒧᔭᒻ ᑲᐎᒋᒪᑯᓯᔨᒡ᙮
Currently Selected:
ᐊᒃᓱᑕᔅ 37: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
