ᐊᒃᓱᑕᔅ 38
38
ᐱᔅᑎᓂᒐᐅᓇᐱᔅᒄ ᐊᓐᑕ ᒐ ᓯᔅᑲᐃᑭᓄᐅᒋ ᐎᒋᒪᓯᑭᓇ
1ᐱᓴᓕᓪ ᒋ ᐅᓯᑕᐤ ᐱᔅᑎᓂᒐᐅᓇᐱᔅᑯᔪᐤ ᐊᑲᓯᔭ ᒥᔅᑎᒂ ᐅᒡ ᒐᒋ ᒥᑐᔅᑕᐊᒧᐛᑯᓂᔨᒋ ᑎᐸᔨᒋᒐᓱᐛ᙮ ᓂᔄᐅᑕᒡ ᒪᒃ ᐳᔅᒄ ᒥᓯᑦ ᒋ ᐃᔅᐱᔅ ᒋᓏᔪᐤ ᑭᔭ ᓂᔄᐅᑕᒡ ᒪᒃ ᐳᔅᒄ ᒥᓯᑦ ᒋ ᐃᔅᐱᔅ ᐃᔨᑭᔅᑲᔭᐤ, ᓇᐤ ᒪᒃ ᐳᔅᒄ ᒥᓯᑦ ᒋ ᐃᔅᐱᔅ ᐃᔅᐸᓂᑯᑕᔪᐤ᙮ 2ᒧᔭᒻ ᐊ ᒋᒥᓱᐎᑥᐎ ᐊᔅᑭᓇ ᐊᓐᑕ ᓇᐤ ᐊ ᒋᒐᔭᒋ ᒋ ᐃᓯᓇᑯᑕᐤ᙮ ᐊ ᐸᐃᒂᒡ ᒋ ᐃᓯᓇᑯᓐ ᐊᓯᒡ ᐱᔅᑎᓂᒐᐅᓇᐱᔅᒄ᙮ ᑭᔭ ᒥᓯᐛ ᑲ ᐎᔄᐛᐱᔅᑯᔨᒡ ᒋ ᐎᔎᔭᒋᓂᒻ᙮ 3ᐃᔭᐱᒡ ᒋ ᐅᓯᑕᐤ ᒐ ᐃᑕᐱᑎᓂᔨᒋ ᒐᒂᔪᐛ ᐱᔅᑎᓂᒐᐅᓇᐱᔅᑯᒡ: ᑭᔅᑭᒋᔭᑭᓇ ᒐᒋ ᐱᑕᐃᑭᓄᐅᒋ ᐊᓐᑕ ᐊ ᐱᒥᐅᐎᒋ ᑭᔅᑕᐛ ᑭᔭ ᒋ ᐅᓯᑕᐤ ᐃᔭᐱᒡ ᒥᑲᐃᐸᑭᓇ ᒐᒋ ᐛᐸᔨᑭᓄᐎᒋ ᑭᔅᑕᐛ᙮ ᐎᔭᑭᓇ ᑭᔭ ᒋᔅᑕᒥᒋᓱᐛᑭᓇ ᒋ ᐅᓯᐊᐤ ᒐᒋ ᒂᔎᔨᑭᓄᐎᔨᒡ ᐎᔭᓯᔪᐤ ᒪᒂᒡ ᐸᒥᓄᐛᓄᐎᔨᒋ ᑭᔭ ᐊᔅᒋᒂ ᒐᒋ ᓱᑕᑭᓄᐎᒋ ᐊ ᒋᓯᑕᔨᒋ ᑭᔅᑕᐛ᙮ ᒥᓯᐛ ᒐᒂᓐ ᐎᔄᐛᐱᔅᑯᒡ ᒋ ᐅᒋ ᐅᓯᑕᑭᓄᐤ᙮ 4ᒋ ᐅᓯᑕᐤ ᐊ ᐎᔄᐛᐱᔅᑯᔨᒡ ᐃᐸᐱᔅᑯᔪᐤ ᒐ ᑕᐧᑯᓯᔅᑕᑭᓄᔨᒋ ᐊ ᐃᔎᑕᒋ ᒥᑕ ᑭᔭ ᑭᔅᑕᐛ᙮ ᒋ ᒋᑭᒧᑕᐤ ᐊᓐᑕ ᐊᒋᒐᔨᒡ ᐊ ᐎᔄᐛᐱᔅᑯᔨᒡ ᐛᐎᔭᐱᔎ ᒐᒋ ᐅᒋ ᑕᐧᑯᓂᑭᓄᐅᐎᒡ ᐱᔅᑎᓂᒐᐅᓇᐱᔅᑯᔪᐤ᙮ 5ᒋ ᒋᑭᒧᑕᐤ ᐊᓐᑕ ᐊ ᒋᒐᔭᔨᒡ ᐊ ᐎᔄᐛᐱᔅᑯᔨᒡ ᐛᐎᔭᐱᔎ ᒐᒋ ᐅᒋ ᑕᐧᑯᓇᑭᓄᐅᒡ ᐱᔅᑎᓂᒐᐅᓇᐱᔅᒄ᙮ 6ᒋ ᐅᓯᐊᐤ ᒥᔅᑎᑯᐧᑲᓇ ᐊᑲᓯᔭ ᒥᔅᑎᑯᒡ ᐅᒡ ᒐ ᐅᒋ ᑕᐧᑯᓇᑭᓄᐎᒡ ᐱᔅᑎᓂᒐᐅᓇᐱᔅᑯᔪᐤ ᑭᔭ ᐎᔄᐛᐱᔅᑯᔪᐤ ᒋ ᐎᔎᔭᒋᓇᐤ᙮ 7ᒋ ᓴᒂᐛᐤ ᒥᔅᑎᑯᐧᑲᓇ ᐊᓐᑕ ᐛᐎᔭᐱᔅᑯᒡ ᐊᔨᑐᐤ ᐱᔅᑎᓂᒐᐅᓇᐱᔅᑯᒡ ᒐᒋ ᐱᐸᒧᑕᑭᓄᐎᒡ᙮ ᒋ ᐅᓯᑕᐤ ᐱᔅᑎᓂᒐᐅᓇᐱᔅᑯᔪᐤ ᐊ ᐊᑲ ᒋᐸᐃᑭᓄᐎᒡ ᑲ ᒥᓴᔪᒋᓯᔨᒋ ᐊ ᐊᐱᒋᐊᑦ᙮
8ᑭᔭ ᐃᔭᐱᒡ ᒋ ᐅᓯᑕᐤ ᐊ ᐎᔄᐛᐱᔅᑯᔨᒡ ᐛᐸᑲᐎᓱᔭᑭᓂᔪᐤ ᑭᔭ ᐊᑕᐧᑯᑎᔅᑕᔨᒡ ᐃᔎᐛ ᐅᐛᐱᒥᓱᓂᔨᐛ ᐅᒡ ᐊᓂᔭ ᑲ ᑯᐸᓇᐎᒋ ᐊᓐᑕ ᐛᒋ ᐱᒐᓄᐎᒡ ᐸᔭᒋ-ᐱᒍᐎᔭᓂᒋᐛᐱᔪᐤ᙮
ᐊᑐᐛᒡ ᐊ ᐱᐸᒧᑕᓄᒡ
9ᒋ ᐅᓯᑕᐤ ᐊᑯᐛᑲᐃᑭᓇ ᐊ ᒥᔽᔨᒋ ᐱᒍᐎᔭᓂᔪᐤ ᐅᒡ ᒐᒋ ᒋᐸᐃᑭᓄᐎᒡ ᐊᔅᑲ ᐸᔭᒋ-ᐱᒍᐎᔭᓂᒋᐛᐱᔪᐤ᙮ ᐸᐃᑯ ᒥᑕᓯᒥᑎᓄᐤ ᐊᓱ ᐱᑕᑕᒡ ᑕᑐᔪᐛ ᒥᓯᑦ ᒋ ᐃᔅᐱᔅ ᒋᓏᐤ ᐊᑯᐛᑲᐃᑭᓐ ᐊᓐᑕ ᓴᐅᓄᒡ᙮ 10ᒐᒋ ᑯᑕᒡ ᐊᑯᐛᑲᐃᑭᓐ ᒋ ᐅᓯᐊᐤ ᓂᓱᔪᐤ ᓯᑥᔎᐃᑭᓇ ᑭᔭ ᑲ ᐎᔄᐛᐱᔅᒋᔨᒋ ᑕᑕᐃᑭᓇ ᐊᓯᒡ ᐊ ᓱᓇᔭᐱᔅᑯᔨᒋ ᓯᒋᐸᒋᑭᓇ ᑭᔭ ᐃᓴᒂ ᓱᓇᔭᐱᔅᑯᒡ ᐊᐎᔎᔭᒋᓂᑭᓄᐎᒋ᙮ 11ᐸᐃᑯᑕᐤ ᒋ ᐃᑐᑎᒻ ᐊᓐᑕ ᒋᐛᑎᓄᒡ ᐃᑕᒐ ᐸᔭᒋ-ᐱᒍᐎᔭᓂᒋᐛᐱᒡ᙮
12ᒋ ᐅᓯᑕᐤ ᐊᓐᑕ ᐊᑎᒪᐱᓯᒧᑕᒡ ᐃᑕᒐ ᐊᑯᐛᑲᐃᑭᓇ ᓂᓱᔪᐤ ᐊᓱ ᐸᑕᑕᒡ ᑎᐸᔎᐃᑭᓇ ᐊᔅᐱᔅ ᒋᓏᔨᒋ ᐊᓐᑕ ᐸᐃᑯᔪᐤ ᓯᑥᔎᐃᑭᓂᒡ ᐊᓐᑕ ᒐᒥᓱᐎᒋ ᐸᐃᑯᔪᐤ ᑕᑕᐃᑭᓇ ᐊᓯᒡ ᐊ ᓱᓇᔭᐱᔅᑯᔨᒋ ᓯᒋᐸᒋᑭᓇ ᑭᔭ ᐃᓴᒂ ᓱᓇᔭᐱᔅᑯᒡ ᐊᐎᔎᔭᒋᓂᑭᓄᐎᒋ᙮ 13ᐊᑯ ᐊᓐᑕ ᐛᐱᓄᑕᒡ ᐃᑕᒐ ᐊᓐᑕ ᐛᒋ ᐱᒐᓄᐅᒡ: ᓂᔄᐅᑕᒡ ᑕᑐᔪᐤ ᐊᓱ ᐱᑕᑕᒡ ᒥᓯᑦ ᒋ ᐃᔅᐱᔅ ᐃᔨᑭᔅᑲᐤ᙮ 14ᐊᓐᑕ ᐸᐃᒄ ᐊᔨᑐᐤ ᐛᒋ ᐱᒐᓄᐎᒡ ᒋ ᐅᓯᑕᐤ ᐊᑯᐛᑲᐃᑭᓇ ᓂᓱᔪᐤ ᐊᓱ ᓂᓱ ᒪᒃ ᐳᔅᒃ ᑕᑐᐤ ᒥᓯᑦ ᐊᔅᐱᔅ ᒋᓏᔨᒋ᙮ ᒋ ᐊᑯᑕᐤ ᐊᓐᑕ ᓂᔅᑐ ᓯᑥᔎᐃᑭᓂᒡ ᐊᓐᑕ ᑲ ᒋᒥᓱᐎᒋ ᓂᔅᑐ ᑕᑕᐃᑭᓇ᙮ 15ᑭᔭ ᒂᔅᑕᒐ ᐃᑕᒐ ᓂᔄᐅᑕᒡ ᒪᒃ ᐳᔅᒄ ᑎᐸᔎᐃᑭᓇ ᐊᔅᐱᔅ ᒋᓏᒋ ᐊᓐᑕ ᓂᔅᑐ ᓯᑥᔎᐃᑭᓂᒡ ᐊᓐᑕ ᒐ ᒥᓱᒡ ᓂᔅᑐ ᑕᑕᐃᑭᓐᒡ᙮ 16ᒥᓯᐛ ᐊᑯᐛᑲᐃᑭᓇ ᐊᓐᑕ ᐛᔅᑲ ᐊ ᒥᔽᓯᒡ ᐱᒍᐎᔭᓐ ᒋ ᐅᒋ ᐅᓯᑕᑯᓄᐎᐛ᙮ 17ᒥᓯᐛ ᒋ ᐎᔄᐛᐱᔅᒍᐅᒡ ᑕᑕᐃᑭᓐᒡ, ᒥᒄ ᐊᓐᑕ ᑕᐧᑯᒡ ᒋ ᓱᓇᔭᐛᐱᔅᒍᐅᒡ, ᒋ ᐊᓂᔅᑯᓯᒪᐅᒡ ᓯᑥᔅᑲᐃᑭᓐᒡ ᐊᓐᑕ ᐃᓴᑯᒡ ᓱᓇᔭᐱᔅᑯᒡ ᑲ ᐎᔎᔭᒋᓇᑭᓄᐅᒡ᙮ ᐛᐎᔭᐱᔅᔎ ᑭᔭ ᓯᒋᐸᒋᑭᓇ ᓱᓇᔭᐱᔅᑯᒡ ᒋ ᐅᒋ ᐅᓯᑕᑭᓄᐛ᙮
18ᐊᑯ ᐊᓐᑕ ᐊᑐᐛᒡ ᑎᔅᑐᐎᒡ ᐛᒋ ᐱᒐᓄᐅᒡ ᑭᔭ ᐸᔭᒋ-ᐱᒍᐎᔭᓂᒋᐛᐱᒡ, ᐱᓴᓕᓪ ᒋ ᐅᓯᑕᐤ ᐊᑯᐛᑲᐃᑭᓂᔪᐤ ᒐ ᐊᑯᑕᔨᒡ ᐊᓐᑕ ᐛᒋ ᐱᒐᓄᐎᒡ, ᐊ ᒥᔽᔨᒋ ᐱᒍᐎᔭᓂᔪᐤ ᐅᒡ ᑭᔭ ᑲ ᓂᑕᐅᒂᓱᑦ ᒋ ᒥᒪᑕᐅᒂᑎᒻ ᐊ ᐱᔅᑭᓂᓯᔨᒋ ᑭᔭ ᐊ ᐱᒋᒥᓇᑯᓯᔨᒋ ᑭᔭ ᐊ ᒥᐧᑯᓯᔨᒋ ᐊᓯᑭᓇᔭᐱᔭ ᐅᒡ᙮ ᓂᔅᑐᔪᐛ ᒥᓯᑦ ᐊᔅᐱᔅ ᐃᔅᐸᓂᑯᑕᔨᒡ ᒧᔭᒻ ᐊᓂᔭ ᑯᑎᒂ ᐊᑯᐛᑲᐃᑭᓇ᙮ 19ᒥᓯᐛ ᐊᓂᔭ ᐊᑯᐛᑲᐃᑭᓇ ᓇᔅᒡ ᐛᒋ ᒥᔽᔅᒡ ᐱᒍᐎᔭᓐ ᒋ ᐅᒋ ᐛᓯᑕᑭᓂᔪᐛ᙮ ᒥᓯᐛ ᒋ ᐊᑯᑕᔪᐛ ᐊᓐᑕ ᓇᐤ ᓯᑥᔎᐃᑭᓂᒡ ᐊᑯ ᐊᓇᒡ ᒋ ᒋᑭᒧᐛ ᓇᐤ ᑲ ᐎᔄᐛᐱᔅᑯᔨᒋ ᑕᑕᐃᑭᓇ, ᑲ ᐎᔄᐛᐱᔅᑯᒡ ᐃᓴᒄ ᒥᓯᐛ ᒋ ᐅᒋ ᐛᓯᑕᑭᓂᔪᐛ ᐅᒡ᙮ ᑕᐧᑯᒡ ᐊᓐᒡ ᐛᔅᑲᔭᔅᑯᓂᑭᓇ ᒋ ᓱᓇᔭᐱᔅᑯᔪᐛ ᓄᑎᒻ ᐊ ᓇᐅᓂᔨᒋ ᐊᓂᔭ ᒥᓯᐛ ᓯᒋᐸᒋᑭᓇ᙮ 20ᒥᓯᐛ ᒐᒂᓐ ᒐ ᐊᐱᑎᒡ ᐸᔭᒋ-ᐱᒍᐎᔭᓂᒋᐛᐱᒡ ᑭᔭ ᒋᔅᑕᐸᒋᑭᓐᒡ ᐃᔭᐱᒋᐊᑭᓄᐅᒡ ᐊᓐᑕ ᐸᔭᒋ-ᐱᒍᐎᔭᓂᒋᐛᐱᒡ ᑭᔭ ᐊᓐᑕ ᐛᔅᑲ ᐊᑐᐛᒡ ᐊ ᐱᐸᒧᑕᓄᒡ ᐎᔄᐛᐱᔅᑯᒡ ᒋ ᐅᒋ ᐅᓯᑕᑭᓄᐅᐛ᙮
ᐸᔭᒋ-ᐱᒍᐎᔭᓂᒋᐛᐱᒡ ᒐ ᐃᑕᐱᑎᔨᒋ ᒐᒂᔪᐛ
21ᐊᐅᑯᐤ ᑲ ᐃᓯ ᒪᔅᑎᓂᑭᓄᐅᒡ ᒥᓯᐛ ᐃᓴᒄ ᑲ ᐊᐱᑎᒡ ᐊ ᒋᒥᑕᑭᓄᐅᒡ ᐸᔭᒋ-ᐱᒍᐎᔭᓂᒋᐛᑉ᙮ ᒧᓱᔅ ᒋ ᐃᑎᓱᒪᓯᐱᓐ ᓕᐸᐃ ᐃᔪᐛ ᐊ ᐃᑎᔅᑲᓇᓯᔨᒋ ᒐᒋ ᒋᒥᔨᒋ ᒥᓯᐛ ᒐᒂᔪᐤ ᑲ ᐊᐱᒋᑕᑭᓄᐎᒡ ᑭᔭ ᒐᒋ ᒥᓯᓇᒥᔨᒋ ᒥᓯᐛ ᒐᒂᔪᐤ ᑲ ᐊᐱᑎᓂᔨᒡ᙮ ᐃᑕᒪᕐ ᐊᕋᓐ ᐅᑯᓴ, ᓇᑭᑐᐛᔨᒪᐤ ᑲ ᒋᑕᓱᐎᒋ᙮ 22ᐸᓴᓕᓪ ᔪᕆ ᐅᑯᓴ, ᐅᕐ ᐅᔅᒋᒪ ᒥᓯᐛ ᒋ ᐅᓯᑕᐤ ᑎᐸᔨᒋᒐᓱᐛ ᑲ ᐃᑎᓱᒪᔨᒋ ᒧᓱᓴ ᒐᒂᔪᐤ ᒐᒋ ᐛᓯᑕᑭᓄᔨᒡ᙮ 23ᐱᓴᓕᓪ ᐅᐦᐅᓕᐊᐸ, ᐊᐦᐃᓴᒪᑲ ᐅᑯᓯᔨᐛ, ᑕᐊᓐ ᐃᔪᐛ ᑲ ᐃᑎᔅᑲᓇᓯᔨᒋ, ᒋ ᐎᒋᐃᑯᐤ᙮ ᐅᐦᐅᓕᐊᑉ ᒋ ᑭᔅᒋᐅᐤ ᐊᐅᓯᑕᑦ ᒐᒂᔪᐤ ᑭᔭ ᐊ ᒥᒪᑕᐅᓯᓇᔨᒐᑦ ᑭᔭ ᐊ ᒥᒪᑕᐅᒂᓱᑦ ᐊ ᐱᔅᑭᓂᓯᔨᒋ ᑭᔭ ᐊ ᐱᒋᒥᓇᑯᓯᔨᒋ ᑭᔭ ᐊ ᒥᐧᑯᓯᔨᒋ ᐊᓯᑭᓇᔭᐱᔭ ᑭᔭ ᐊ ᒥᔽᓯᔨᒋ ᐱᒍᐎᔭᓇ ᐊ ᐊᐱᒋᐊᑦ᙮ 24ᓂᔄᐤ ᒐᓯᐱᔪᐤ ᐊᓱ ᐸᐃᑯᒥᑕᓯᒥᑎᓄᐤ ᐊᓱ ᐸᐃᑯᔅᑕᐤ ᑕᑐᔪᐤ ᐊᓱ ᐱᑕᑕᒡ ᑎᐸᐸᑲᐃᑭᓇ, ᒋᔅᐱᔅ ᐊᐱᑎᓐ ᐎᔄᐅᓱᓇᔭᐤ ᐊ ᐅᓯᑕᑭᓄᐅᒡ ᐸᔭᒋ-ᐱᒍᐎᔭᓂᒋᐛᑉ᙮
25ᒥᓯᐛ ᓱᓇᔭᐱᔅᒄ ᑲ ᐱᔅᑎᓂᒐᓄᐅᒡ ᒋ ᒋᑕᑭᓄᐤ ᐸᔭᒋ-ᐱᒍᐎᔭᓂᒋᐛᐱᒡ ᐊ ᑎᐸᐸᑲᐃᑭᓄᐅᒡ ᓱᓇᔭᓇᐱᔅᒃ ᒋ ᐊᐱᒋᑕᑭᓄᐤ᙮ ᓂᔄᐅᑕᒡ ᒐᓯᐱᔪᐤ ᐊᓱ ᐱᑕᑕᒡ ᑕᑐ ᒥᑕᓯᒥᑎᓄᐤ ᒋ ᑕᑎᐸᐸᑲᐃᑭᓇᔭᐤ᙮ 26ᒥᓯᐛ ᓇᐸᐅᒡ ᑲ ᓂᓱᔪᐛᐳᓇᓯᒡ ᑭᔭ ᐅᔅᑕ ᒋ ᒋᒪᑭᓄᐎᒡ ᑭᔭ ᒥᓯᐛ ᐊᐛᓐ ᒋ ᒋᓯᐧᑲᓱᐤ ᐊᓂᔭ ᑕᓐ ᑲ ᐃᓯ ᓂᑐᐛᔨᑎᒧᐛᑭᓄᐅᑦ᙮ ᒥᓯᐛ ᐊ ᒋᒪᑭᓄᐅᒡ ᐊᓐᒡ ᓇᐸᐅᒡ ᐊᓱᑕᒡ ᑕᑐ ᒥᑕᓯᒥᑎᓄᐤ ᐊᓱ ᓂᔍᐤ ᒐᓯᐱᔪᐤ ᐊᓱ ᐱᑕᑕᒡ ᑕᑐ ᒥᑕᓯᒥᑎᓄᐤ ᐊᓱ ᐱᑕᑕᒡ ᑕᑐᔪᐤ ᒋ ᐃᑕᑎᓱᐅᒡ᙮ 27ᓂᔄᐅᑕᒡ ᑕᑐᔪᐤ ᐊᓱ ᐱᑕᑕᒡ ᑎᐸᐸᑲᐃᑭᓇ ᓱᓇᔭᐱᔅᒄ ᒋ ᐊᐱᒋᑕᑭᓄᐤ ᒐᒋ ᐅᓯᐊᑭᓄᑦ ᐸᐃᒄ ᐊᓐ ᐊ ᐸᐃᑯᒥᑕᓯᒥᑎᓄᐛᓯᒡ ᑕᑕᐃᑭᓐᒡ ᐊᓐᑕ ᒐ ᒋᒥᓱᒡ ᓯᑥᔅᑲᐃᑭᓐᒡ ᐊᓐᑕ ᒐ ᐊᑯᑕᒋ ᐊᑯᐛᑲᐃᑭᓇ ᐸᔭᒋ-ᐱᒍᐎᔭᓂᒋᐛᐱᒡ᙮ 28ᐱᓴᓕᓪ ᑭᔭ ᐎᒋᑐᔅᒐᐛ ᐱᑕᑕᒡ ᑕᑐᔪᐛ ᑎᐸᐸᑲᐃᑭᓇ ᓱᓇᔭᐱᔅᑯᔪᐤ ᑲ ᐃᔅᑯᐱᔨᒡ ᒋ ᐅᒋ ᐅᓯᑕᐅᒡ ᓯᒋᐸᒋᑭᓇ ᐊᓐᑕ ᓯᑥᔎᔨᑭᓂᒡ ᒐ ᒋᑭᒧᐎᒋ ᒐᒋ ᐊᑯᓇᐃᑭᓄᐎᒋ ᑕᐧᑯᒡ ᓯᑥᔎᔨᑭᓇ᙮
29ᐱᑕᑕᒡ ᒐᓯᐱᔪᐤ ᐊᓱ ᓂᔅᑐ ᒥᑕᓯᒥᑎᓄᐤ ᐊᓱ ᐸᐃᑯᔪᐤ ᑕᑐᐤ ᑎᐸᐸᑲᐃᑭᓇ ᒋ ᐃᔅᐱᔅ ᐱᔅᑎᓂᒐᐅᒡ ᐃᔪᒡ ᑲ ᐎᔄ ᐛᐱᔅᑲᔨᒡ᙮ 30ᑕᑕᐃᑭᓇ ᒋ ᐅᓯᐊᐅᒡ ᑲ ᐎᔄᐛᐱᔅᑲᔨᒡ ᐅᒡ ᐊᓐᑕ ᒐ ᒋᒥᓱᐎᒋ ᓯᑥᔎᔨᑭᓇ ᐊᓐᑕ ᐛᒋ ᐱᔨᒐᓄᐎᒡ ᐸᔭᒋ-ᐱᒍᐎᔭᓂᒋᐛᐱᔪᐤ᙮ ᐱᔅᑎᓂᒐᐅᓇᐱᔅᑯᔪᐤ ᐊ ᐎᔄᐛᐱᔅᑯᔨᒡ ᐃᔭᐱᒡ ᒋ ᐅᓯᑕᐅᒡ ᐊᓯᒡ ᑭᔭ ᐃᐸᐱᔅᑯᔪᐤ ᑭᔭ ᐃᔭᐱᒋᑕᑭᓂᐎᒋ ᒐᒂᔪᐛ ᐱᔅᑎᓂᒐᐅᓇᐱᔅᑯᒡ᙮ 31ᑭᔭ ᑕᑕᐃᑭᓇ ᐊᓐᑕ ᒐ ᒋᒥᓱᐎᒋ ᓯᑥᔎᔨᑭᓇ ᐊᓐᑕ ᒐ ᐊᑯᑕᔨᒋ ᐊᑯᐛᑲᐃᑭᓇ ᐊᑐᐛᔨᒡ ᐛᔅᑲ ᐸᔭᒋ-ᐱᒍᐎᔭᓂᒋᐛᐱᔪᐤ ᑭᔭ ᑕᑕᐃᑭᓇ ᐊᓐᑕ ᐛᒋ ᐱᒐᓄᐎᔨᒡ ᐸᔭᒋ-ᐱᒍᐎᔭᓂᒋᐛᐱᔪᐤ ᑭᔭ ᒥᓯᐛ ᒋᔅᑕᐸᒋᑭᓇ ᐸᔭᒋ-ᐱᒍᐎᔭᓂᒋᐛᐱᒡ ᑭᔭ ᐊᓐᑕ ᐛᔅᑲ ᐊᑐᐛᔨᒡ ᑲ ᐱᐸᒧᑕᓄᐎᒡ᙮
Currently Selected:
ᐊᒃᓱᑕᔅ 38: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
