ᐊᒃᓱᑕᔅ 36
36
1ᒥᓯᐛ ᐊᐛᓐ ᑲ ᒥᔨᑯᑦ ᑭᔅᒋᐅᓂᔪᐤ ᑎᐸᔨᒋᒐᓱᐛ ᒧᔭᒻ ᐸᓴᓕᓪ ᑭᔭ ᐅᐦᐅᓕᐊᑉ ᑭᔭ ᑯᑎᑭᒡ ᐊᑕᒡ, ᐊᑐᔅᑲᔅᑕᒡ ᐸᔭᒋ-ᐱᒍᐎᔭᓂᒋᐛᐱᔪᐤ ᒥᓯᐛ ᒋᑭ ᐎ ᐃᑐᑎᒧᒡ ᒐᒂᔪᐤ ᑲ ᐃᑎᓱᒥᑯᒡ ᑎᐸᔨᒋᒐᓱᐛ᙮
2ᐊᑯ ᒧᓱᔅ ᒂ ᐎᓴᒪᑦ ᐸᓴᓕᓚ ᑭᔭ ᐅᐦᐅᓕᐊᐸ ᑭᔭ ᐊᓂᔭ ᐊᐛᔪᐛ ᑲ ᒥᔭᑭᓄᐎᔨᒋ ᑭᔅᒋᐅᓂᔪᐤ ᑭᔭ ᑲ ᐎ ᐊᑐᔅᑲᔅᑎᒥᔨᒋ ᐊᓂᔭ ᐸᔭᒋ-ᐱᒍᐎᔭᓂᒋᐛᐱᔪᐤ᙮ 3ᒧᓱᔅ ᒋ ᒥᔭᐤ ᒥᓯᐛ ᒐᒂᔪᐛ ᑲ ᐸᑕᔨᒋ ᐃᔪᐛ ᒐᒋ ᐎᑲᐳᐎᑕᑭᓄᐎᒡ ᐸᔭᒋ-ᐱᒍᐎᔭᓂᒋᐛᐱᔪᐤ᙮ ᐊᔅᒄ ᐃᔭᐱᒡ ᒋ ᐸᑕᐅᒡ ᐃᔪᒡ ᒐᒂᔪᐛ ᐊᓯᑯᒻ ᒋᔭᒋᓴᐸᔭᒋ᙮ 4ᒥᓯᐛ ᐊᓐᒡ ᓇᐸᐅᒡ ᑲ ᑭᔅᒋᐅᒡ ᑲ ᑐᑕᒡ ᑕᑐᐎᒡ ᒐᒂᔪᐛ ᐊ ᐅᓯᑕᑭᓄᐎᒡ ᐸᔭᒋ-ᐱᒍᐎᔭᓂᒋᐛᐱᔪᐤ ᒋᓂᑲᐱᔪᐅᒡ ᐊᑐᔅᒐᒡ᙮ 5ᒋ ᓂᑐᐛᐱᒪᐅᒡ ᒧᓱᓴ ᑭᔭ ᒋ ᐃᑕᐅᒡ, “ᐅᓴᒻ ᒥᔅᑎᐸᑕᐅᒡ ᐃᔪᒡ ᒐᒂᔪᐤ, ᓴᔅ ᒋ ᒥᔅᑎ ᑭᓄᐛᔨᑕᓇᓐ ᒐᒂᓐ ᒐᒋ ᐃᑐᑎᒪᒡ ᐊᓐ ᐊᑐᔅᒐᐅᓐ ᑲ ᐃᑎᓱᒥᔨᒥᑦ ᑎᐸᔨᒋᒐᓱᐤ᙮”
6ᐊᑯ ᒧᓱᔅ ᒂ ᐃᑎᓱᐛᑦ ᒐ ᐊᑲ ᐊᐛᓐ ᐸᑕᑦ ᒐᒂᔪᐤ ᒐᒋ ᐱᔅᑎᓂᒐᑦ ᐊ ᐅᓯᑕᑭᓄᐎᒡ ᐸᔭᒋ-ᐱᒍᐎᔭᓂᒋᐛᐱᔪᐤ, 7ᐊᓂᔭ ᒐᒂᔪᐤ ᓴᔅ ᑲ ᐸᑕᒡ ᒋ ᐃᔅᐱᔪᐤ ᒐᒋ ᑐᑕᑭᓄᐎᒡ ᒥᓯᐛ ᐊᑐᔅᒐᐅᓂᔪᐤ ᑭᔭ ᐅᔅᑕ ᒋ ᒥᓴᔪᐤ ᐃᔅᐱᔅ ᒐ ᐃᓯ ᓄᑕᐱᔨᒡ᙮
ᐸᔭᒋ-ᐱᒍᐎᔭᓂᒋᐛᑉ
8ᒥᓯᐛ ᐊᐛᓐ ᑲ ᑭᔅᒋᐅᑦ ᐊ ᐅᓯᑕᑦ ᒐᒂᔪᐤ ᒋ ᐎᒋᐃᐛᐤ ᐊ ᐅᓯᑕᑭᓂᐎᒡ ᐸᔭᒋ-ᐱᒍᐎᔭᓂᒋᐛᐱᔪᐤ᙮ ᐸᐃᑯᔪᐤ ᐊ ᒥᔽᓯᔨᒋ ᐱᒍᐎᔭᓇ ᐊ ᐊᐱᒋᑕᒡ, ᐊ ᓂᔅᑯᐛᐱᔅᑕᐛᒡ ᑲ ᐱᔅᑭᓂᓯᔨᒋ ᑭᔭ ᑲ ᐱᒋᒥᓇᑯᓯᔨᒋ ᑭᔭ ᑲ ᒥᐧᑯᓯᔨᒋ ᐊᓯᑭᓇᔭᐱᔭ᙮ ᒐ ᒥᒪᑕᐅᒂᑕᐅᒡ ᐊᓐᑕ ᐊᐛᓯᓴ ᐊ ᐅᑎᑎᑭᓄᐎᒋ᙮ 9ᐸᐃᒄ ᐊᓐᒡ ᑕᑐᐎᒡ ᐸᐃᑯᔪᐤ ᐊᑯᐛᑲᐃᑭᓐᒡ ᓇᐅᓴᑉ ᑎᐸᔎᐃᑭᓇ ᐊᔅᐱᔅ ᒋᓏᒋ ᑭᔭ ᓂᓱ ᑎᐸᔎᐃᑭᓇ ᐊᔅᐱᔅ ᐃᔨᑭᔅᑲᒋ᙮ 10ᒪᒧᐤ ᐱᑕᑕᒡ ᒋᑭ ᒪᒧᒂᑎᒧᒡ ᐱᒍᐎᔭᓇ ᒐᒋ ᐸᐃᑯᓂᔨᒡ ᑭᔭ ᐸᐃᑯᑕᐤ ᒋᑭ ᐃᑐᑎᒧᒡ ᐊᓂᔭ ᑯᑎᑲ ᐱᑕᑕᒡ᙮ 11ᐊᑯ ᒥᓐ ᐛᐅᔭᔭᐸᒋᓂᑭᓇ ᐊ ᐱᔅᑭᓇᔨᒡ ᐱᒍᐎᔭᓂᔪᐤ ᒋ ᒪᑯᐱᑕᐅᒡ ᐊᓐᑕ ᐊ ᐅᓂᔎᑭᓂᔨᒡ ᐊᑯᐛᑲᐃᑭᓂᒡ᙮ ᐸᐃᑯᑕᐤ ᒋ ᑐᑕᒧᒡ ᑯᑎᒋᔪᐤ ᐊ ᐅᓂᔎᑭᓂᔨᒡ ᐊᑯᐛᑲᐃᑭᓂᔪᐤ ᐊᓐᑕ ᐅᔅᒡ ᐊ ᐅᒋᑯᑕᔨᒡ᙮ 12ᐱᑕᑕᒡ ᑕᑐᔪᐤ ᐛᐅᔭᔭᐸᒋᓂᑭᓇ ᐊᓐᑕ ᐸᐃᒄ ᐊᑯᐛᑲᐃᑭᓂᒡ ᑭᔭ ᐱᑕᑕᒡ ᑕᑐᔪᐤ ᐛᐅᔭᔭᐸᒋᓂᑭᓇ ᐊᓐᑕ ᐊ ᐅᓂᔎᑭᓂᔨᒡ ᑯᑎᒋᔪᐤ ᐊᑯᐛᑲᐃᑭᓂᔪᐤ ᐊᓐᑕ ᐅᔅᒡ ᐊ ᐅᒋᑯᑕᔨᒡ᙮ 13ᐱᑕᑕᒡ ᑕᑐᔪᐤ ᒋ ᐅᓯᑕᐅᒡ ᐊ ᐎᔄᐅᓱᓇᔭᐱᓯᔨᒋ ᓯᒋᐸᒋᑭᓇ ᒐᒋ ᒪᒧᑯᑕᔨᒋ ᐊᑯᐛᑲᐃᑭᓇ ᐊᑯ ᐊᐸᐃᒂᒡ ᒋ ᐃᓯᓇᑯᓐ᙮
14ᒥᔅᑐᓯᓴ ᐅᐱᐎᔪᐎᐛ ᒋ ᐅᒋ ᐅᓯᑕᐅᒡ ᐊᑯᐛᑲᐃᑭᓇ ᒐ ᐊᑯᓇᐃᑭᓄᐎᒡ ᐸᔭᒋ-ᐱᒍᐎᔭᓂᒋᐛᐱᔪᐤ, ᒋ ᐸᐃᑯᓴᐳᔨᐛ᙮ 15ᐸᐃᑯᑕᐤ ᒋ ᐃᔎᑭᓇ ᐊᓂᔭ ᒥᓯᐛ ᐸᐃᑯᓴᑉ ᐊᑯᐛᑲᐃᑭᓇ᙮ ᐱᑕᑕᒡ ᑕᑐᓴᑉ ᑎᐸᔎᐃᑭᓇ ᒋ ᐃᔅᐱᔅ ᒋᓏᐤ ᐸᐃᒄ ᐊᑯᐛᑲᐃᑭᓐ ᑭᔭ ᓂᓱ ᑎᐸᔎᐃᑭᓇ ᒋ ᐃᔅᐱᔅ ᐃᔨᑭᔅᑲᐤ᙮ 16ᒋ ᓂᓱᐛᑭᓇ ᐊᑯᐛᑲᐃᑭᓇ, ᐱᑕᑕᒡ ᐊᑯᐛᑲᐃᑭᓇ ᒋ ᒪᒧᒂᑎᒧᒡ ᒐᒋ ᐸᐃᑯᓂᔨᒡ ᐸᐃᒄ ᐊᑯᐛᑲᐃᑭᓂᔪᐤ ᐊᑯ ᐊᓐ ᑯᑎᒃ ᐊᑯᐛᑲᐃᑭᓐ ᐊᓱᑕᒡ ᒋ ᒪᒧᒂᑕᑭᓄᐛ᙮ 17ᐱᑕᑕᒡ ᑕᑐᔪᐤ ᓯᒋᐸᒋᑭᓇ ᐊ ᐅᓂᔎᔨᒡ ᐊᓐᑕ ᐅᔅᒡ ᐊ ᐅᒋᑯᑕᔨᒡ ᐊᑯᐛᑲᐃᑭᓂᔪᐤ ᒋ ᐅᓯᑕᐅᒡ, ᑭᔭ ᐱᑕᑕᒡ ᑕᑐᔪᐤ ᓯᒋᐸᒋᑭᓇ ᐊᓐᑕ ᐊ ᐅᒋ ᐊᓂᔅᑯᒧᐎᒡ ᑯᑎᒋᔪᐤ ᐊᑯᐛᑲᐃᑭᓂᔪᐤ᙮ 18ᐱᑕᑕᒡ ᑕᑐᔪᐤ ᐊ ᐎᔄᐛᐱᔅᑯᔨᒋ ᓯᒋᐸᒋᑭᓇ ᒋ ᐅᓯᐊᐅᒡ ᒪᒧᐤ ᒐᒋ ᓯᒋᐸᑕᒡ ᐸᔭᒋ-ᐱᒍᐎᔭᓂᒋᐛᐱᔪᐤ ᒐᒋ ᐸᐃᑯᓂᔨᒡ ᐊᑯᐛᑲᐃᑭᓂᔪᐤ᙮ 19ᓂᓱ ᐊᑯᓇᐃᑭᓇ ᒥᓐ ᒋ ᐅᓯᑕᐅᒡ᙮ ᐸᐃᒄ ᓇᐸ ᒪᔭᑕᓂᓱᐎᔭᓇ ᐊ ᒋᓯᓇᑭᓄᐅᒋ ᐊᐱᒋᐊᒡ᙮ ᐊᑯ ᑯᑎᑲ ᐊ ᒥᔽᔨᒡ ᐱᓴᑭᓂᔪᐤ, ᐅᔅᒡ ᒐᒋ ᐅᒋ ᐱᔅᑕᑭᔅᑕᔨᒡ᙮
20ᓇᐎᔪᐤ ᐊᓱ ᔭᓇᐤ ᐛᔅᑲᔭᔅᑯᓂᑭᓇ ᒋ ᐅᓯᐊᐅᒡ ᐊᑲᓯᔭ ᒥᔅᑎᒂ ᐅᒡ ᒐᒋ ᒋᒥᑕᔨᒋ ᐸᔭᒋ-ᐱᒍᐎᔭᓂᒋᐛᐱᒡ᙮ 21ᐸᐃᒄ ᐛᔅᑲᔭᔅᑯᓂᑭᓐ ᐱᑕᑕᒡ ᒥᓯᑦ ᒋ ᐃᔎᔅᑯᓱᐤ ᑭᔭ ᓂᓱᔪᐤ ᐊᓱ ᓂᔄᐅᑕᒡ ᒥᒋᒋᓐ ᒋ ᐃᔅᐱᔅ ᐃᔨᑭᔅᒋᔪᐤ᙮ 22ᑭᔭ ᐊ ᓂᓱᑲᐳᐅᒋ ᒋᔅᑕᐸᒋᑭᓇ ᐊᓐᑕ ᐊᓇᒡ ᐛᔅᑲᔭᔅᑯᓂᑭᓂᒡ ᒐᒋ ᒪᒧᑭᒧᒋ ᐊᒋᒥᑕᒋ ᐛᔅᑲᔭᔅᑯᓂᑭᓇ᙮ ᒥᓯᐛ ᑕᑐᐤ ᑕᐱᔅᑯᓐ ᒋ ᐃᓯᓇᑯᑕᐅᒡ᙮ 23ᐊᓐᒡ ᓇᐸᐅᒡ ᒋ ᐅᓯᐊᐅᒡ ᓂᓱᔪᐤ ᐛᔅᑲᔭᔅᑯᓂᑭᓇ ᐊᓐᑕ ᓴᐅᓄᑕᒡ ᐃᑕᒐ ᐸᔭᒋ-ᐱᒍᐎᔭᓂᒋᐛᐱᒡ᙮ 24ᑭᔭ ᓇᐎᔪᐤ ᐊ ᓱᓇᔭᐱᔅᑯᔨᒋ ᑕᑕᐃᑭᓇ ᒋ ᐅᓯᐊᐅᒡ ᒐᒋ ᐅᒋ ᒋᑭᒧᐎᔨᒋ ᐊᓐᑕ ᐊᓇᒡ ᓂᓱᔪᐤ ᐛᔅᑲᔭᔅᑯᓂᑭᓇ, ᓇᓂᓱ ᑕᑕᐃᑭᓇ ᐊᓐᑕ ᓴᒄ ᐸᐃᒄ ᐛᔅᑲᔭᔅᑯᓂᑭᓂᒡ, ᒐᒋ ᒋᒥᑕᒋ ᐛᔅᑲᔭᔅᑯᓂᑭᓇ ᒐᒋ ᒥᒋᒪᔨᑭᓄᐅᒋ᙮ 25ᓂᓱᔪᐤ ᒋ ᐅᓯᑕᐅᒡ ᐛᔅᑲᔭᔅᑯᓂᑭᓇ ᒋᐛᑎᓄᒡ ᐃᑕᒐ ᐸᔭᒋ-ᐱᒍᐎᔭᓂᒋᐛᐱᒡ ᒐᒋ ᒋᒥᑕᔨᒋ᙮ 26ᑭᔭ ᓇᐎᔪᐤ ᐊ ᓱᓇᔭᐱᔅᑯᔨᒋ ᑕᑕᐃᑭᓇ, ᓂᓱ ᑕᑕᐃᑭᓇ ᐊᓇᒡ ᐸᐃᒄ ᐛᔅᑲᔭᔅᑯᓂᑭᓂᒡ᙮ 27ᑭᔭ ᐊᓱᑕᒡ ᐛᔅᑲᔭᔅᑯᓂᑭᓇ ᐊᓐᑕ ᐅᑕᒡ ᐸᔭᒋ-ᐱᒍᐎᔭᓂᒋᐛᐱᒡ, ᐊᑎᒪᐱᓯᒧᑕᒡ ᐃᑕᒐ, 28ᑭᔭ ᓂᓱ ᐛᔅᑲᔭᔅᑯᓂᑭᓇ ᐊᓐᑕ ᐊ ᒋᒐᔭᒡ ᐅᑕᒡ ᐸᔭᒋ-ᐱᒍᐎᔭᓂᒋᐛᐱᒡ᙮ 29ᒋ ᐊᓂᔅᑯᓯᒪᐅᒡ ᐊ ᒋᒐᔭᒡ ᐛᔅᑲᔭᔅᑯᓂᑭᓇ ᐊᓐᑕ ᐊᓇᒡ ᐃᔅᐱᔅ ᑕᐧᑯᒡ᙮ ᒋ ᒋᑭᒺᐅᒡ ᓯᒋᐸᒋᑭᓇ ᐊᓐᑕ ᑕᐧᑯᒡ ᐊ ᒋᒐᔭᔨᒡ ᐊ ᓂᓯᔨᒋ ᐛᔅᑲᔭᔅᑯᓂᑭᓇ ᒐᒋ ᒋᑭᒧᔨᒋ ᓯᐸᔅᑯᓂᑭᓇ᙮ 30ᐊᑯ ᒪᒧᐤ ᔭᓇᐤ ᐛᔅᑲᔭᔅᑯᓂᑭᓇ ᒋ ᐃᑕᑎᓂᔨᐛ ᑭᔭ ᐊᓱᑕᒡ ᑕᑐᓴᑉ ᑕᑕᐃᑭᓇ ᐊ ᓱᓇᔭᐱᔅᑯᔨᒋ, ᓇᓂᓱ ᐊᓇᒡ ᐛᔅᑲᔭᔅᑯᓂᑭᓂᒡ ᒋ ᑎᑯᓇ᙮ 31ᐱᑕᑕᒡ ᑕᑐᓴᑉ ᓯᐸᔅᑯᓂᑭᓇ ᒋ ᐅᓯᐊᐅᒡ ᐊᑲᓯᔭ ᒥᔅᑎᒂ ᐅᒡ, ᐱᑕᑕᒡ ᓯᐸᔅᑯᓂᑭᓇ ᐊᓐᑕ ᐛᔅᑲᔭᔅᑯᓂᑭᓂᒡ ᐊᓐᑕ ᐅᐱᒪ ᐸᔭᒋ-ᐱᒍᐎᔭᓂᒋᐛᐱᒡ ᐃᑕᒐ, 32ᑭᔭ ᐱᑕᑕᒡ ᓯᐸᔅᑯᓂᑭᓇ ᐊᓐᑕ ᐛᔅᑲᔭᔅᑯᓂᑭᓂᒡ ᒂᔅᑕᒐ ᐃᑕᒐ ᐸᔭᒋ-ᐱᒍᐎᔭᓂᒋᐛᐱᒡ᙮ ᑭᔭ ᐱᑕᑕᒡ ᓯᐸᔅᑯᓂᑭᓇ ᐊᓐᑕ ᐛᔅᑲᔭᔅᑯᓂᑭᓂᒡ ᓂᔅᐸᒋᐅᓂᒡ ᐃᑕᒐ ᐅᑕᒡ ᐸᔭᒋ-ᐱᒍᐎᔭᓂᒋᐛᐱᒡ᙮ 33ᓯᐸᔅᑯᓂᑭᓇ ᐊᓐᑕ ᒋᐛᑎᓄᒡ, ᓴᐅᓄᒡ ᑭᔭ ᐊᑎᒪᐱᓯᒧᒡ ᐃᑕᒐ ᒥᓯᐛ ᐊᔅᐱᓴᔨᒡ ᐸᔭᒋ-ᐱᒍᐎᔭᓂᒋᐛᐱᔪᐤ ᑕᑕᐅᒡ ᐛᔅᑲᔭᔅᑯᓂᑭᓂᒡ ᒋᒋᑭᒧᑕᐅᒡ᙮ 34ᐎᔄᐅᓱᓇᔭᔪᐤ ᒋ ᐎᔎᔭᒋᓂᒧᒡ ᓯᐸᔅᑯᓂᑭᓇ ᑭᔭ ᐛᔅᑲᔭᔅᑯᓂᑭᓇ ᑭᔭ ᒋ ᐅᓯᑕᐅᒡ ᐊ ᐎᔄᐅᓱᓇᔭᐎᒋ ᐛᐎᔭᐱᔎ ᐊᓐᑕ ᒐ ᑎᑯᓂᔨᒋ ᓯᐸᔅᑯᓂᑭᓇ᙮ ᐎᔄᐅᓱᓇᔭᐱᔅᑯᒡ ᐃᔭᐱᒡ ᒋ ᐎᔎᔭᒋᓂᒧᒡ ᓯᐸᔅᑯᓂᑭᓇ᙮
35ᒋ ᐅᓯᑕᐅᒡ ᐊᑯᐛᑲᐃᑭᓂᔪᐤ ᐊ ᒥᔽᓯᔨᒋ ᐱᒍᐎᔭᓇ, ᐊ ᐱᔅᑭᓂᓯᔨᒋ ᑭᔭ ᐊ ᐱᒋᒥᓇᑯᓯᔨᒋ ᑭᔭ ᐊ ᒥᐧᑯᓯᔨᒋ ᐊᓯᑭᓇᔭᐱᔭ ᐅᒡ᙮ ᓇᐸᐅᒡ ᐊ ᑭᔅᒋᐅᒡ ᐊᐅᓯᑕᒡ ᒐᒂᔪᐤ ᒋ ᒥᒪᑕᐅᒂᑕᐅᒡ ᐊᓐᑕ ᐊ ᐅᑎᑎᑭᓄᐎᒋ ᐊᐛᓯᓴ᙮ 36ᓇᐤ ᓯᑥᔎᐃᑭᓇ ᒋ ᐅᓯᐊᐅᒡ ᐊᑲᓯᔭ ᒥᑎᑯᒡ ᐅᒡ ᐊᓐᑕ ᒐ ᐊᑯᑕᔨᒡ ᐊᑯᐛᑲᐃᑭᓂᔪᐤ ᑭᔭ ᐎᔄᐅᓱᓇᔭᔪᐤ ᒋ ᐎᔎᔭᒋᓇᐅᒡ, ᑭᔭ ᒂ ᒋᑭᒧᑕᒡ ᐊᓐᑕ ᐊ ᐎᔄᐅᓱᓇᔭᐎᒋ ᓯᒋᐸᒋᑭᓇ᙮ ᐊᑯ ᒥᓐ ᓇᐤ ᐊ ᓱᓇᔭᐱᔅᑯᔨᒋ ᑕᑕᐃᑭᓇ ᒋ ᐅᓯᐊᐅᒡ ᐊᓐᑕ ᒐ ᒋᒥᓱᐎᒋ ᑭᔭ ᒐ ᒥᒋᒥᓂᑯᐎᒋ ᓯᑥᔎᔨᑭᓇ᙮ 37ᐊᑯᐛᑲᐃᑭᓂᔪᐤ ᒋ ᐅᓯᑕᐅᒡ ᒐᒋ ᒋᐸᐃᑭᓄᐎᒡ ᐛᒋ ᐱᒐᓄᐎᔨᒡ ᐸᔭᒋ-ᐱᒍᐎᔭᓂᒋᐛᐱᔪᐤ ᐊ ᒥᔽᔨᒋ ᐱᒍᐎᔭᓂᔪᐤ ᐅᒡ ᐊ ᓂᔅᑯᐛᐱᔅᑕᐛᒡ ᑲ ᐱᔅᑭᓂᓯᔨᒋ ᑭᔭ ᑲ ᐱᒋᒥᓇᑯᓯᔨᒋ ᑭᔭ ᑲ ᒥᐧᑯᓯᔨᒋ ᐊᓯᑭᓇᔭᐱᔭ ᐊ ᒥᒪᑕᐅᒂᑕᒡ᙮ 38ᒋ ᐅᓯᐊᐅᒡ ᐱᑕᑕᒡ ᓯᑥᔎᐃᑭᓇ ᐊᑲᓯᐊ ᒥᔅᑎᒂ ᐅᒡ ᐊᓐᑕ ᒐ ᐊᑯᑕᐃᒡ ᐊᑯᐛᑲᐃᑭᓂᔪᐤ, ᐎᔄᐅᓱᓇᔭᔪᐤ ᒋ ᐎᔎᔭᒋᓇᐅᒡ, ᓯᒋᐸᒋᑭᓇ ᐊ ᒋᑭᒧᔨᒋ; ᐱᑕᑕᒡ ᐊ ᐎᔄᐛᐱᔅᑯᔨᒋ ᑕᑕᐃᑭᓇ ᒋ ᐅᓯᐊᐅᒡ ᐊᓐᑕ ᒐ ᒋᒥᓱᐎᔨᒋ ᓯᑥᔎᐃᑭᓇ᙮
Currently Selected:
ᐊᒃᓱᑕᔅ 36: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
