ᐊᒃᓱᑕᔅ 3
3
ᒋᓴᒪᓂᑐᐤ ᑲ ᐃᔨᒪᐊᑦ ᒧᓱᓴ
Exodus 3.1-15 (Proper-17 Year A)
1ᐸᐃᒂᐤ ᒐᓯᑲᔨᒡ, ᒧᓱᔅ ᒋ ᑭᓄᐛᔨᒪᐤ ᐅᒋᓴᐃᔨᒪ ᒐᑦᕈᐛ, ᒥᑎᐊᓐ ᐊᔭᒥᐊᐅᒋᒪᐛ, ᐅᒪᔭᑕᓂᓯᒥᔪᐛ᙮ ᐊᑎᒪᐱᓯᒧᒡ ᐃᑕᒐ ᐸᐧᑯᑎᔅᑭᒥᑲᒡ ᐊᑲᒥᒡ ᒋ ᐃᑐᑕᐤ ᑭᔭ ᒂ ᐅᑎᑕᐧᒃ ᓴᐃᓇᐃ, ᑲ ᐸᔭᒋᓯᐤ ᐱᔅᑯᑎᓇᔪᐤ᙮ 2ᐊᑯᑕ ᒪᒃ ᑲ ᓄᑯᓯᔅᑕᑯᑦ ᑎᐸᔨᒋᒐᓱᐛ ᐅᑦ ᐊᒋᓂᒥᔪᐛ ᐊᓐᑕ ᑕᑕᐅᒡ ᐊ ᐃᔅᑯᑕᐎᒡ ᓯᑲᒡ ᐅᒡ᙮ ᐊᑎᓱᐧᒄ ᒧᓱᔅ ᐛᐸᑕᐧᒃ ᐊ ᐛᔭᑕᔨᒋ ᓯᑲᐛ, ᓇᒪ ᐅᒋ ᐃᔎᑕᔪᐛ᙮ 3ᒧᓱᔅ ᒂ ᐃᑕᔨᑕᐧᒃ, “ᒥᔅᑲᑕᔨᑕᑯᓐ ᐅ ! ᓂᑭ ᐃᑐᑕᓐ ᓇᑕ ᑭᔭ ᓂᑭ ᐛᐸᑕᓐ ᐊᓐ ᒪᒥᔅᑲᒡ ᐛᔅᑕᐅᓐ, ᒐᒂᓐ ᐛᒋ ᐊᑲ ᐃᔎᑕᒋ ᓯᑲᐛ ?”
4ᐃᔅᐱ ᑎᐸᔨᒋᒐᓱᐤ ᐎᔭᐱᒪᑦ ᒧᓱᓴ ᒥᒋᒪ ᓂᔭᑎᒥᔨᒋ ᓯᑲᐛ ᐛ ᓇᒋ ᐛᐸᑎᒥᔨᒋ᙮ ᒋᓴᒪᓂᑐᐤ ᒂ ᑕᑈᑕᑦ ᒧᓱᓴ ᐊᓐᑕ ᑕᑕᐅᒡ ᓯᑲᐛ ᐅᒡ, ᐊ ᐃᑕᑦ, “ᒧᓱᔅ, ᒧᓱᔅ !”
ᐊᑯ ᐊᑕᑦ ᒧᓱᔅ, “ᒪᐤ ᐅᑕ ᐊ ᑕᔭᓐ᙮”
5ᒋᓴᒪᓂᑐᐤ ᒂ ᐃᑕᑦ, “ᐊᑲ ᒥᒋᒪ ᐸᑐᑕ᙮ ᒥᓇ ᒋᒥᔅᒋᓇ, ᐛᔅ ᐸᔭᐧᑭᓐ ᐊᓐ ᐊᔅᒋᔾ ᐊᓐᑕ ᑭᒋ ᓂᐳᐅᓇᐛ᙮” 6ᐃᔭᐱᒡ ᒂ ᐃᑎᑯᑦ, “ᓂᔾ ᐅ ᒋᑦ ᐊᓂᔅᑯᑕᐸᓐᒡ ᐅᒋᓴᒪᓂᑐᒧᐛᐛ᙮ ᐊᑉᕋᐊᒻ, ᐊᐃᓯᒃ ᑭᔭ ᒐᑭᑉ ᐅᒋᓴᒪᓂᑐᒧᐛᐛ᙮” ᐊᑯ ᐃᔭᑯᐛᓂᑎᓱᑦ ᒧᓱᔅ ᐛᔅ ᒋ ᑯᔅᑕᐤ ᒐᒋ ᒋᑕᐱᒪᑦ ᒋᓴᒪᓂᑐᐛ᙮
7ᐊᑯ ᑎᐸᔨᒋᒐᓱᐤ ᐊᔅᒋᔄᑦ, “ᓂᒋ ᐛᐱᒪᐅᒡ ᑕᓐ ᐊᔅᐱᔅ ᓂᓇᐧᑲᑕᔨᒧᒡ ᓂᑦ ᐃᔨᒥᒡ ᐊᓐᑕ ᐃᒋᑉᑎᒡ᙮ ᓂᒋ ᐸᑎᒺᓐ ᐊ ᐱᑯᓴᔨᑕᒡ ᒐᒋ ᐎᒋᐃᒂᐤ ᐛᔅ ᐊᑲ ᒥᔪᑐᑐᐛᑭᓄᐅᒡ ᑭᔭ ᓂ ᒋᔅᒐᔨᑎᒺᓐ ᐅᒥᓯᒪᐃᑎᒧᐅᓄᐛᐛ᙮ 8ᓂᒋ ᐸᒋ ᔭᓯᓐ ᒐᒋ ᐱᒪᒋᐃᒂᐤ ᐃᒋᑉᑦ ᐃᔪᐛ ᐅᓱᐧᑲᑎᓯᐅᓂᒡ ᐅᒡ ᑭᔭ ᒐᒋ ᐸᒋ ᐎᐎᑕᐃᒂᐤ ᐃᒋᑉᑎᒡ ᐅᒡ ᑭᔭ ᐊᓐᑕ ᐊ ᒥᔽᓯᔨᒡ ᐊᔅᒋᔪᐤ ᒐ ᐃᑐᑕᐃᒂᐤ, ᐊᓐᑕ ᐊ ᐛᔪᑎᓯᔨᒋ ᒋᒋᓇᐳᔭ ᑭᔭ ᑲᓯᐛᓯᐛᐳᔪᐤ, ᐊᓐᑕ ᐛᒋᔨᒋ ᑲᐃᓇᓐ ᐃᔪᐛ, ᐊᑦ ᐃᔪᐛ, ᐊᒧᕆ ᐃᔪᐛ, ᐸᕆᔅ ᐃᔪᐛ, ᐃᑉ ᐃᔪᐛ ᑭᔭ ᒐᐱᐅᔅ ᐃᔪᐛ᙮ 9ᒋ ᐱᑯᓴᔨᑎᒧᒡ ᐃᔅᕋᐃᓪ ᐃᔪᒡ ᒐᒋ ᐎᒋᐃᒂᐤ, ᑭᔭ ᓂᒋ ᐛᐸᑕᓐ ᐊ ᐃᓯ ᓇᐧᑲᒋᐃᑯᒡ ᐃᒋᑉᑦ ᐃᔪᐛ᙮ 10ᐊᓄᒡ ᒪᒃ ᒋᑭ ᐃᑎᓴᐅᑎᓐ ᒐᒋ ᓂᑐᐛᐱᒥᑦ ᒋᓴᐅᒋᒪᐤ, ᒐᒋ ᐸᒋ ᐎᐎᑕᐃᑥᐤ ᓂᑦ ᐃᔨᒥᒡ, ᐃᔅᕋᐃᓪ ᐃᔪᒡ, ᐃᒋᑉᑎᒡ ᐅᒡ᙮” 11ᐊᑯ ᒧᓱᔅ ᐊᑕᑦ ᒋᓴᒪᓂᑐᐛ, “ᐊᐛᓐ ᐅ ᓂᔾ ᒐᒋ ᓂᑐᐛᐱᒪᑦ ᒋᓴᐅᒋᒪᐛ, ᑭᔭ ᒐᒋ ᐸᒋ ᐎᐎᑕᐃᒂᐤ ᒋᑦ ᐃᔨᒥᒡ, ᐃᔅᕋᐃᓪ ᐃᔪᒡ, ᐃᒋᑉᑎᒡ ᐅᒡ ?”
12ᒋᓴᒪᓂᑐᐤ ᒋ ᐃᑕᐤ, “ᒋᑭ ᐎᒐᐅᑎᓐ᙮ ᐊᐅᑯᐤ ᐅᒪ ᒪᒃ ᒐ ᐅᒋᔅᒋᓄᐛᒋᒋᑭᓂᔨᓐ ᐊᒋ ᐃᑎᓴᐅᑕᓐ᙮ ᐃᔅᐱ ᒋ ᐸᒋ ᐎᐎᑕᔨᑥᐛ ᐊᓐᒡ ᐃᔪᒡ ᐊᓐᑕ ᐃᒋᑉᑎᒡ ᐅᒡ, ᒋᑭ ᐊᔭᒥᐊᔅᑐᐅᓇᐛᐤ ᐅᑕ ᐱᔅᑯᑎᓇᒡ᙮”
13ᒧᓱᔅ ᒪᒃ ᒋ ᑯᒂᒋᒪᐤ, “ᐃᔅᐱ ᓂᑐᐛᐱᒥᒂᐛ ᐃᔅᕋᐃᓪ ᐃᔪᒡ ᑭᔭ ᐎᑎᒧᐅᒂᐛ, ‘ᐊᓂᔭ ᐅᑕᐎᐛᐛ ᐅᒋᓴᒪᓂᑐᒥᔪᐛ ᓂᒋ ᐃᑎᓴᐅᑯᔨᐛ,’ ᑕᓐ ᒐ ᐃᑎᒂᐤ ᑯᒂᒋᒥᑥᐛ ᐊᓯᓂᐧᑲᓱᐅᑦ ?”
14ᒋᓴᒪᓂᑐᐤ ᒋ ᐃᑕᐤ ᒧᓱᓴ, “ᓂᔾ ᐅ ᒧᔅ ᑲᒋᒡ ᒋᓴᒪᓂᑐᐤ᙮ ᒋᔭᒻ ᒐ ᐃᑎᑥᐤ, ‘ᓂᔾ ᓂᑦ ᐊᐎᓐ, ᓂᒋ ᐃᑎᓴᐅᒃ !’ ”
15ᒋᓴᒪᓂᑐᐤ ᐃᔭᐱᒡ ᒋ ᐃᑕᐤ ᒧᓱᓴ, “ᒐ ᐃᑎᑥᐤ ᐃᔅᕋᐃᓪ ᐃᔪᒡ, ‘ᓂᔾ ᐅᑎᐸᔨᒋᒐᓱᐤ, ᐊᑉᕋᐊᒻ, ᐊᐃᓯᒃ, ᑭᔭ ᒐᑭᑉ ᐅᒋᓴᒪᓂᑐᒧᐛᐛ, ᓂᒋ ᐸᒋ ᐃᑎᓴᐅᑯᔪᐛ ᐊᓐᑕ ᐊ ᑕᐛᒄ ᒋᔨᐛᐤ ᐃᔅᕋᐃᓪ ᐃᔪᒡ᙮’ ᐊᐅᑯᐤ ᒧᔅ ᑲᒋᒡ ᓂᑦ ᐃᓯᓂᐧᑲᓱᐅᓐ ᒐᒋ ᐅᒋ ᒋᔅᒋᑕᑯᐅᔭᓐ ᒐ ᐊᑎ ᐊᓂᔅᒐ ᐱᒪᑎᓯᓇᓄᐅᒡ᙮
16ᒐ ᒪᒧᐅᓂᑥᐤ ᒥᓯᐛ ᐅᒋᒪᐅᒡ ᐊᓐᑕ ᐃᔅᕋᐃᓕᒡ᙮ ᑭᔭ ᒐ ᐃᑎᑥᐤ, ‘ᑎᐸᔨᒋᒐᓱᐤ, ᒍᑕᐎᐛᐅᒡ ᐊᑉᕋᐊᒻ, ᐊᐃᓯᒃ, ᑭᔭ ᒐᑭᑉ ᐅᒋᓴᒪᓂᑐᒧᐛᐛ ᓂᒋ ᓄᑯᓯᔅᑕᒃ ᑭᔭ ᐃᔅᒋᔄᐤ, “ᓂᒋ ᐛᐸᑕᓐ ᐊᑐᑕᑯᐅᔭᒃ ᐊᓐᑕ ᐃᒋᑉᑎᒡ᙮ 17ᓂᒋ ᐊᓱᑎᒪᒐᓐ ᒐ ᐎᐎᑕᐃᒂᐤ ᓂᑦ ᐃᔨᒥᒡ ᐃᒋᑉᑎᒡ ᐅᒡ ᐊᓐᑕ ᑲ ᐃᔅᐱᔅ ᓂᓇᐧᑲᒋᐅᒡ ᑭᔭ ᒐ ᐃᑐᑕᐃᒂᐤ ᐊᓐᑕ ᐛᒋᔨᒋ ᑲᐃᓇᓐ ᐃᔪᐛ ᑭᔭ ᐊᑦ ᐃᔪᐛ ᑭᔭ ᐊᒧᕆ ᐃᔪᐛ ᑭᔭ ᐸᕆᔅ ᐃᔪᐛ ᑭᔭ ᐃᑉ ᐃᔪᐛ ᑭᔭ ᒐᐱᐅᔅ ᐃᔪᐛ, ᐊᓐᑕ ᐊ ᐛᔪᑎᓯᔨᒋ ᒋᒋᓇᐳᔭ ᑭᔭ ᑲᓯᐛᓯᐛᐳᔪᐤ᙮” ’
18ᐃᔅᕋᐃᓪ ᐅᒋᒪᐅᒡ ᒋᑭ ᓂᑐᑕᑯᒡ ᒐᒂᓂᔪᐤ ᒐ ᐃᑎᑥᐤ᙮ ᐊᑯ ᒋᔾ ᑭᔭ ᐊᕋᓐ ᒐ ᓂᑐᐛᐱᒪᒄ ᐃᒋᑉᑦ ᒋᓴᐅᒋᒪᐤ ᑭᔭ ᒐ ᐃᑕᒄ, ‘ᑎᐸᔨᒋᒐᓱᐤ, ᐃᑉᕈᐤ ᐃᔪᒡ ᐅᒋᓴᒪᓂᑐᒧᐛᐛ ᓂᒋ ᓄᑯᓯᔅᑕᑯᓇᓐ᙮ ᓇᐃᒥᓇᓐ ᒐᒋ ᐱᒧᑕᔭᒡ ᓂᔅᑐᒋᓯᑲᐛ ᐃᔅᐱᔅ ᐊᓐᑕ ᐸᐧᑯᑎᔅᑭᒥᑲᒡ ᒐᒋ ᒥᑐᔅᑕᐊᒧᐅᒋᒡ ᑎᐸᔨᒋᒐᓱᐤ ᓂᒋᓴᒪᓂᑐᒥᓇᓐ᙮’ 19ᓂ ᒋᔅᒐᔨᒪᐤ ᐃᒋᑉᑎᒡ ᒋᓴᐅᒋᒪᐤ ᒐ ᐊᑲ ᐱᔅᑎᓂᑕᒄ ᐸᑐᔅ ᓇᔅᒡ ᑐᑕᑯᒐ ᒐᒂᔪᐤ ᒐᒋ ᐱᔅᑎᓂᑕᒄ᙮ 20ᐊᑯ ᓂᓱᐧᑲᑎᓯᐅᓐ ᒐ ᐊᐱᒋᑕᔭᓐ ᒐᒋ ᑐᑐᐅᒂᐤ ᒪᒥᔅᑲᒡ ᒐᒂᔪᐤ, ᐊᑯ ᐸᑐᔅ ᑭᔭ ᒐ ᐱᔅᑎᓂᑕᒄ᙮”
21“ᓂᑭ ᐃᑐᑐᐛᐅᒡ ᐃᒋᑉᑦ ᐃᔪᒡ ᒐᒋ ᒥᔪᑐᑕᑯᒡ᙮ ᔅᑐᑕᔭᒂ ᒪᒃ ᓇᒪ ᒋᑭ ᐱᓯᑯᑕᓇᐛᐤ᙮ 22ᒥᓯᐛ ᐃᔅᕋᐃᓪ ᐃᔎᐤ ᒋᑭ ᓂᑐᐛᔨᑎᒧᐛᐤ ᐊᓂᔭ ᐃᒋᑉᑦ ᐃᔪᐛ ᐛᒋᒪᑭᓂᑐᐛᑦ ᑭᔭ ᒪᒃ ᐃᒋᑉᑦ ᐃᔎᐛ ᐛᒋᒥᑯᑦ ᐊᓐᑕ ᐎᒋᐛᒡ᙮ ᒐ ᑯᒂᒋᒪᑦ ᒐᒋ ᒥᔨᑯᑦ ᐎᔄᐅᓱᓇᔭᐤ ᑭᔭ ᐛᐱᓯᐅᓱᓇᔭᐤ ᐊᓯᓂᔭ ᑭᔭ ᐊ ᒥᔽᔨᒋ ᐅᑦ ᐊᐱᒋᑕᐅᓂᔪᐛ᙮ ᐃᒋᑉᑦ ᐃᔪᒡ ᒋᑭ ᒥᔨᑯᐛᐅᒡ ᐊᑯ ᒐ ᐳᔅᑯᒥᑎᔭᑯᒡ ᒋᑯᓯᐛᐅᒡ ᑭᔭ ᒋᑕᓂᓱᐛᐅᒡ᙮ ᐊᐅᑯᐤ ᒐ ᑕᐧᑯᓂᒪᒄ ᓂᑭᑎᒪᒂ ᐃᒋᑉᑦ ᐊᔅᒋᔾ᙮”
Currently Selected:
ᐊᒃᓱᑕᔅ 3: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
