ᐊᒃᓱᑕᔅ 24
24
ᐃᔅᕋᐃᓪ ᐃᔪᒡ ᑲ ᑕᑈᑕᒡ ᑎᐸᔨᒋᒐᓱᐛ ᐅᓂᔅᑯᒧᐅᓂᔪᐤ᙮
1ᐊᑯ ᑎᐸᔨᒋᒐᓱᐤ ᒂ ᐃᑕᑦ ᒧᓱᓴ, “ᐸᒋ ᓴᑭᒋᐛ ᐅ ᐱᔅᑯᑎᓇᐤ, ᒐ ᐸᓱᐅᑥᐤ ᐊᕋᓐ ᑭᔭ ᐊᓂᔭ ᓂᓱ ᐅᑯᓴ, ᓇᑕᑉ ᑭᔭ ᐊᐱᐦᐅ ᑭᔭ ᐊᓐᒡ ᓂᔄᐅᑕᒡ ᑕᑐᔪᐤ ᐃᔅᕋᐃᓪ ᐅᒋᒪᐅᒡ᙮ ᐛᔪᐎᔅ ᓂᑭ ᐅᒋ ᐊᔭᒥᐊᔅᑕᑯᒡ᙮ 2ᒥᒄ ᒋᔾ ᒥᒋᒪ ᒐ ᐸᒋᓇᓯᔨᓐ, ᒐ ᐊᑲ ᑕᑈᑐᐅᑦ ᑯᑎᒃ ᐊᐛᓐ ᒐᒋ ᑎᑯᓯᐧᒄ᙮”
3ᒧᓱᔅ ᒂ ᒥᔭᑦ ᐃᔪᐛ ᑎᐸᔨᒋᒐᓱᐛ ᐅᑦ ᐃᑎᓱᐛᐅᓂᔪᐛ, ᑭᔭ ᒋ ᐊᓱᑎᒪᒐᐅᒡ ᐃᔪᒡ ᐊ ᐃᔅᒋᔄᒡ, “ᒥᓯᐛ ᒐᒂᓐ ᓂᑭ ᑐᑕᓇᓐ ᑲ ᐃᑎᓱᒥᔨᒥᑦ ᑎᐸᔨᒋᒐᓱᐤ !” 4ᐊᑯ ᒧᓱᔅ ᒋ ᒥᓯᓇᑕᐊᒻ ᒐᒂᔪᐤ ᑎᐸᔨᒋᒐᓱᐛ ᑲ ᐃᔅᒋᔄᔨᒋ᙮ ᐎᐱᒡ ᒋᔭᒋᓴᐸᔭᐱᓂᔨᒡ ᒋ ᐅᓂᔪᐤ᙮ ᒋ ᐅᓯᑕᐤ ᐱᔅᑎᓂᒐᐅᓇᐱᔅᑯᔪᐤ ᓂᑕᒥᑎᓇᒡ ᑭᔭ ᒂ ᒋᒥᑐᐛᑦ ᓂᓴᑉ ᐊ ᒪᒥᓴᔨᒋ ᐊᓯᓂᔭ, ᐸᐸᐃᒄ ᐊᓂᔭ ᒥᓯᐛ ᓂᓴᑉ ᐊ ᐃᑎᔅᑲᓇᓯᔨᒋ ᐃᔅᕋᐃᓪ ᐃᔪᐛ᙮
5ᒋ ᐃᑎᓴᐛᐤ ᐱᔅᒐ ᐅᔅᒋᓂᒋᓱᐛ ᒐᒋ ᒥᑐᔅᑕᐊᒪᒐᔨᒋ ᒥᔨᐛᐅᓇ ᑭᔭ ᒥᔅᑐᓴ ᒐᒋ ᐱᔅᑎᓂᒧᐛᔨᒋ ᑎᐸᔨᒋᒐᓱᐛ ᒧᔭᒻ ᐊ ᒋᔅᑕᔨᑕᑯᓂᔨᒡ ᐱᔅᑎᓂᒐᐅᓂᔪᐤ᙮ 6ᒧᓱᔅ ᒂ ᐅᑎᓇᐧᒄ ᐊᐱᑐᐤ ᐊᐛᓯᓴ ᐅᒥᐧᑯᔪᐤ ᑭᔭ ᒂ ᐊᓱᑕᑦ ᐊᓐᑕ ᓱᐸᐳᐎᔭᑭᓂᒡ ᐊᑯ ᒂ ᓱᐎᐧᑯᑕᑦ ᐱᔅᑎᓂᒐᐅᓇᐱᔅᑯᔪᐤ ᐊᓂᔭ ᑲ ᐃᔅᑯᐱᔨᒡ ᐊᐱᑐᐤ ᒥᐧᑯᔪᐤ᙮ 7ᒂ ᐃᔨᒥᑐᐛᑦ ᐃᔪᐛ ᐊᓂᔭ ᑲ ᒥᓯᓇᑕᐊᐧᒃ ᒥᓯᐛ ᑎᐸᔨᒋᒐᓱᐛ ᐅᑦ ᐃᑎᓱᐛᐅᓂᔨᐛ ᑭᔭ ᐅᑦ ᐊᓱᑎᒪᒐᐅᓂᔨᐛ, ᐊᑯ ᒂ ᐃᔅᒋᔄᒡ ᐊᓐᒡ ᐃᔅᕋᐃᓪ ᐃᔪᒡ, “ᓂᑭ ᓇᐃᑐᐛᓇᓐ ᑎᐸᔨᒋᒐᓱᐤ ᑭᔭ ᒥᓯᐛ ᓂᑭ ᐃᑐᑎᒺᓇᓐ ᑲ ᐃᑎᓱᒥᔨᒥᑦ !”
8ᒧᓱᔅ ᒂ ᐅᑎᓇᐧᒃ ᒥᐧᑯᔪᐤ ᒂ ᐱᓂᐱᔨᑐᐛᑦ ᐃᔪᐛ᙮ ᒥᓐ ᒂ ᐃᑕᑦ, “ᐅ ᒥᐧᒄ ᐅᒡ, ᐊᐅᑯᔪᐤ ᐅᔭ ᑎᐸᔨᒋᒐᓱᐤ ᐊᑐᑕᐧᒃ ᓂᔅᑯᒧᐅᓂᔪᐤ ᓯᒡ ᒋᔨᐛᐤ᙮”
9ᒧᓱᔅ ᑭᔭ ᐊᕋᓐ, ᒪᒧᐤ ᓯᒡ ᓇᑕᑉ ᑭᔭ ᐊᐱᐦᐅ ᑭᔭ ᓂᔄᐅᑕᒡ ᑕᑐᔪᐤ ᐃᔅᕋᐃᓪ ᐅᒋᒪᐅᒡ ᒂ ᓴᑭᒋᐛᒡ ᐱᔅᑯᑎᓇᔪᐤ᙮ 10ᑭᔭ ᒂ ᐛᐱᒪᒡ ᐃᔅᕋᐃᓪ ᒋᓴᒪᓂᑐᐛ, ᐊᓂᔭ ᐃᔅᕋᐃᓪ ᐃᔪᒡ ᑲ ᐊᔭᒥᐊᔅᑐᐛᒡ᙮ ᓴᑯ ᐅᓯᑎᔨᒡ ᒋᑎᑯᓂᔪᐤ ᒐᒂᔪᐤ ᒧᔭᒻ ᐊ ᐱᔅᑭᓇᔨᒡ ᒪᔅᑭᓇᔪᐤ ᐊ ᓴᐳᓄᑯᓂᔨᒡ ᐊ ᐃᓯᓇᑯᓂᔨᒡ᙮ 11ᐊᑯ ᒋᓴᒪᓂᑐᐤ ᓇᒪ ᐅᒋ ᐊᓏᔨᒪᐤ ᐊᓂᔭ ᐅᒋᒪᐛ ᐊᑎᓱᐧᒄ ᒋ ᐛᐱᒥᑯᑦ᙮ ᐊᑯ ᒪᒧᐤ ᒋ ᒥᒋᓱᐅᒡ ᑭᔭ ᒋ ᒥᓄᐅᒡ᙮
Exodus 24.12-18 (Transfiguration Year A)
12ᐊᑯ ᑎᐸᔨᒋᒐᓱᐤ ᐊᑕᑦ ᒧᓱᓴ, “ᐸᒋ ᓴᑭᒋᐛ ᐱᔅᑯᑎᓇᐤ ᑭᔭ ᐛᐃᐱᔅᒋᔅ ᐅᑕ ᒐ ᑕᔨᓐ᙮ ᓂᓱ ᑲ ᐱᐱᒋᓯᒡ ᐊᓯᓂᔨᒡ ᒋᑭ ᒥᔨᑎᓐ ᐊᓐᑕ ᑲ ᒥᓯᓇᐊᒪᓐ ᐃᑎᓱᐛᐅᓇ ᓂᑦ ᐃᔨᒥᒡ ᒐ ᐎ ᓇᓴᐊᒡ᙮”
13ᒧᓱᔅ ᑭᔭ ᐊᓂᔭᔪᐛ ᐎᔭᐎᒋᐃᑯᑦ ᒐᓱᐛᔨᒋ ᒋ ᐊᔭᔅᑯᐎᔪᒡ᙮ ᐊᑯ ᒧᓱᔅ ᐊᑎ ᓴᑭᒋᐛᑦ ᐱᔅᑯᑎᓇᔪᐤ ᒐᒋ ᓂᒋᔅᑯᐛᑦ ᒋᓴᒪᓂᑐᐛ᙮ 14ᐊᑯ ᒧᓱᔅ ᐊᑕᑦ ᐊᓂᔭ ᐃᔅᕋᐃᓪ ᐅᒋᒪᐛ, “ᐊᑯᑕ ᐅᑕ ᐊᓱᐛᐱᒥᓇᓐ ᐸᑎᒪ ᑲᐤ ᓂᑐᐛᐱᒥᑕᒐ᙮ ᐊᕋᓐ ᑭᔭ ᐦᐅᕐ ᒋᑭ ᑕᐅᒡ ᐊ ᑕᐛᒄ, ᑭᔭ ᒥᒄ ᐊᐛᓐ ᐊᑕᒪᔨᒪᒐ ᑯᑎᑲ ᐊᐛᔪᐛ, ᐊᐅᑯᔪᐛ ᒐ ᓇᑕᒡ᙮”
15ᐃᔅᐱ ᒧᓱᔅ ᓯᔭᑭᒋᐛᑦ ᐱᔅᑯᑎᓇᔪᐤ, ᑭᔅᑯᐅᓂᒡ ᒋ ᐊᑯᓇᐃᐱᔪᐤ᙮ 16ᑭᔭ ᐊᑯᑕ ᑲ ᑎᑯᓂᔨᒡ ᐊ ᒋᐧᑲᔭᔅᑕᔨᒡ ᑎᐸᔨᒋᒐᓱᐤ ᐅᒋᔅᑕᔨᑕᑯᓱᐅᓐ ᓴᐃᓇᐃ ᐱᔅᑯᑎᓇᒡ᙮ ᐊᓱᑕᒡ ᑕᑐᐤ ᒋᓯᑲᐛ ᐃᔅᐱᔅ ᐊᑯᓇᐃᐱᔪᐤ ᐱᔅᑯᑎᓇᔪᐤ ᑭᔅᑯᐅᓂᒡ ᑭᔭ ᐊᓂᔭ ᓂᔄᐅᑕᒡ ᒋᓯᑯᔪᐤ ᑎᐸᔨᒋᒐᓱᐤ ᒋ ᑕᑈᑕᐤ ᒧᓱᓴ ᑭᔅᑯᐅᓂᒡ ᐅᒡ᙮ 17ᐃᔅᐱ ᐃᔅᕋᐃᓪ ᐃᔪᒡ ᐊᑕᐱᒡ ᑕᐧᑯᒡ ᐱᔅᑯᑎᓇᒡ, ᒧᔭᒻ ᐊ ᒥᔅᑎ ᐃᔅᑯᑕᔨᒡ ᒋ ᐃᓯᓂᒧᐛᐅᒡ ᑎᐸᔨᒋᒐᓱᐛ ᐅᒋᔅᑕᔨᑕᑯᓱᐅᓂᔪᐤ᙮ 18ᐊᑯ ᒧᓱᔅ ᓯᔭᑭᒋᐛᑦ ᑲ ᑭᔅᑯᐅᓄᐎᒡ ᐱᔅᑯᑎᓇᔪᐤ ᑭᔭ ᓇᐎᔪᐛ ᒋᓯᑲᐛ ᑭᔭ ᓇᐎᔪᐛ ᑎᐱᔅᑲᐛ ᒋ ᐃᔅᐱᔅ ᑕᐤ ᐊᓐᑕ ᐱᔅᑯᑎᓇᒡ᙮
Currently Selected:
ᐊᒃᓱᑕᔅ 24: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
