ᐊᒃᓱᑕᔅ 23
23
ᒋᓴᐛᑎᓯᐅᓐ ᑭᔭ ᑯᐃᔅᑯᑐᑎᒧᐅᓐ ᐎᓱᐛᐅᓇ
1“ᒐ ᐊᑲ ᒥᒋ ᐛᐎᔭᑯᒡ ᑯᑎᑭᒡ ᐊᐛᓐᒋ᙮ ᒐ ᐊᑲ ᐎᒐᐊᒄ ᑲ ᒥᒋᑐᑕᐧᒄ ᐊᐛᓐ ᐊ ᒥᔭᒄ ᑭᑭᒋᔭᐤ-ᐃᔨᒧᐅᓂᔪᐤ᙮
2ᒐ ᐊᑲ ᐎᒐᐊᑯᒡ ᐊ ᒥᒋᑐᑕᒡ ᐊᐛᓐᒋ᙮ ᒐ ᐎᑎᒪᒄ ᑕᑈᐅᓐ ᐊᑎᓱᐧᒄ ᐊᑲ ᐎᐎᑕᑥᐛ ᐊᐛᓐᒋ ᑕᑈᐅᓂᔪᐤ᙮ 3ᐊ ᐛᓴᑭᓄᐅᑦ ᐊᐛᓐ ᐊᒋ ᒋᔅᑎᒪᑎᓯᑦ, ᒐ ᐊᑲ ᒋᔅᑎᒪᒐᔨᒪᒄ ᐊᓐ ᐊᐛᓐ ᒥᒄ ᐊᓂᔭ ᐊ ᒋᔅᑎᒪᑎᓯᑦ᙮
4ᒥᔅᑭᒧᑕᓂ ᐊᐛᓐ ᐅᑦ ᐊᐛᓯᓯᒪ ᓂᑎᒥᒄ ᐊᐱᐸᒥᐸᑕᔨᒋ, ᒐ ᒋᐛᑕᐃᑦ ᐊᓐ ᐊᐛᓯᔅ ᑕᓐᑕ ᐛᒋ ᑎᐸᐃᑕᑯᓯᑦ ᐊᑎᓱᐧᒄ ᐛᐧᑲᑎᔅᒐ ᐊᓐ ᐊᐛᓐ ᑕᐸᔨᒪᑦ᙮ 5ᐛᐱᒥᑕᓂᔾ ᐊᐛᓐ ᑲᓂᐧᑲᑎᓯᔨᒋ ᐅᑲᐸᐃᑭᔎᒪ ᐸᒋᓯᓂᔨᒐᓂ ᐊᑲ ᒋ ᐎᑲᐳᐎᓱᐅᐎᔨᒋ ᐊᑯᓯᑯᓂᔨᒡ ᐎᐅᓱᐅᓂᔪᐤ᙮ ᒐ ᐎᒋᐃᒥᑎ ᐊᑎᓱᐧᒄ ᐛᐧᑲᑎᔅᒐ ᐊᓐ ᐊᐛᓐ ᑕᐸᔨᒪᑦ, ᒐ ᐊᑲ ᒥᒄ ᐃᓯ ᔅᑐᑕᔨᓐ᙮
6ᐸᐃᑯᑕᐤ ᒋᑭ ᐎ ᐃᓯ ᐱᒥᐱᔭᐛᐤ ᐛᓴᐊᑭᓄᒐ ᐊᐛᓐ ᐊ ᒋᔅᑎᒪᑎᓯᑦ ᒧᔭᒻ ᑯᑎᑲ ᐊᐛᔪᐛ᙮ 7ᒐ ᐊᑲ ᑕᐸᔨᒥᑦ ᐊᐛᓐ ᐊᑲ ᑕᑈᔨᓐ, ᒐ ᐊᑲ ᐃᑐᑎᒪᒄ ᒐᒋ ᓂᐸᐊᑭᓄᐅᑦ ᐊᐛᓐ ᐊ ᒥᔽᑎᓯᑦ ᑭᔭ ᐊᐛᓐ ᐊ ᑯᐃᔅᑯᑕᑎᓯᑦ᙮ ᓂᔾ, ᑎᐸᔨᒋᒐᓱᐤ, ᓂᑭ ᐊᓏᔨᒪᐤ ᐊᓐ ᐊᐛᓐ ᑐᑕᒐ ᐅᔭ ᒐᒂᔪᐤ ᐊᔅᐱᔅ ᒥᒋᓂᔨᒡ᙮
8ᒐ ᐊᑲ ᐅᑎᓂᒪᒄ ᐎ ᒋᓯᐧᑲᑯᐅᔭᒂ ᓱᓇᔭᐤ ᒐᒋ ᒂᔅᑕᒐ ᐃᑕᒋᒧᔭᒄ, ᐛᔅ ᐊᓐᒡ ᐅᒋᒪᐅᒡ ᑲ ᒋᓯᐧᑯᐛᑭᓄᐅᒡ ᓇᒪ ᒋ ᐎᔭᔨᑎᒧᒡ ᒐᒋ ᑐᑕᒡ ᒐᒂᔪᐤ ᐊ ᑯᐃᔅᑯᓂᔨᒡ, ᑭᔭ ᓇᒪ ᓇᐊᔨᑎᒧᒡ ᒐᒋ ᑯᐃᔅᒄ ᐃᑐᑐᐛᑭᓄᐎᒋ ᐊᐛᔪᐛ ᑲ ᒥᔪᑥᐛᑎᓯᔨᒋ᙮
9ᒐ ᐊᑲ ᐛᐧᑲᑕᒄ ᒪᓐᑕᐤ, ᒋᔨᐛᐤ ᒋ ᒋᔅᒋᑕᓇᐛᐤ ᐊ ᑕᔨᑕᒂᒡ ᐊ ᒪᓐᑕᐅᓇᓄᒡ, ᓇᒪ ᒋ ᐅᒋ ᒥᔪᑐᑕᑯᐛᐅᒡ ᐃᒋᑉᑦ ᐃᔪᒡ ᐊᓐᑕ ᑲ ᒪᓐᑕᐅᔭᒄ᙮”
ᐊᔭᒥᐊᐅᒋᓯᒄ ᐎᓱᐛᐅᓐ
10“ᒐ ᓂᑕᐅᒋᑕᔭᒄ ᓂᑕᒋᒋᑭᓂᔅᒐ ᑭᔭ ᒐ ᒪᒧᓴᒋᓂᒪᒄ ᒐᒂᓐ ᑲ ᓂᑕᐅᒋᑕᔭᒄ ᐊᓱᑕᒡ ᑕᑐᐤ ᐱᐳᓇ ᐃᔅᐱᔅ᙮ 11ᒥᒄ ᓂᔄᐅᑕᒡ ᐱᐳᓐ ᐅᑎᒋᐱᔨᒐ ᒐ ᐊᑲ ᓂᑕᐅᒋᑕᔭᒄ ᒐᒂᓐ᙮ ᓂᑕᐅᒋᒐ ᒐᒂᓐ ᐊ ᐊᑲ ᒋᔾ ᐅᒋ ᓂᑕᐅᒋᑕᔨᓐ, ᒐ ᒥᔭᑯᒡ ᐊ ᒋᔅᑎᒪᑎᓯᒡ ᐃᔪᒡ ᒐᒋ ᒪᒧᓴᒋᓇᒡ ᑭᔭ ᒥᒋᒡ ᒐᒂᔪᐤ ᐛᒥᒋᒡ ᐊᓐᑕ ᓇᑕᐅᒋᑕᑭᓂᒡ ᑭᔭ ᓱᒥᓇᑎᑯᐤ ᓂᑕᐅᒋᒋᑭᐊᓂᒡ ᑭᔭ ᐊᓕᑉ ᒥᔅᑎᑯᒡ ᐅᒋ ᐊᓂᔭ ᐱᐳᓂᔪᐤ᙮ ᐃᔅᐱ ᐃᔅᐱᔨᑥᐛ ᐛ ᐃᔅᐱᔅ ᐊᐱᒋᑕᒡ ᒋᓂᑕᐅᒋᑕᑭᓄᐛᒡ ᐅᒡ, ᐊᑯ ᑲ ᐊᒂᑎᓯᒡ ᐊᐛᓯᓯᒡ ᒐᒥᒋᒡ ᐊᔅᑯᐱᔨᒡ᙮
12ᒋᑭ ᒋ ᐊᑐᔅᒐᓇᐛᐤ ᐊᓱᑕᒡ ᑕᑐᐤ ᒋᓯᑲᐛ ᐃᔅᐱᔅ, ᒥᒄ ᓂᔄᐅᑕᒡ ᐊᒋᓯᑲᒡ ᒋᑭ ᐎ ᐊᔅᑕᔭᔅᑯᓯᓇᐛᐤ ᑭᔭ ᐊᓐᒡ ᑲᑐᔅᑲᐊᑯᒡ ᒋᑦ ᐊᐛᓯᓯᒧᐛᐅᒡ, ᑭᔭ ᒋᑦ ᐊᐱᒐᑭᓄᐛᐅᒡ ᑭᔭ ᐊᓐᒡ ᐊ ᒪᓐᑕᐅᒡ ᐊᑕᒡ ᐊᑕᔭᒄ᙮ ᒋᑭ ᐎ ᒥᔭᐛᐅᒡ ᒐᒋ ᐊᔅᑕᔭᔅᑯᓯᒡ᙮
13ᓇᔅᒡ ᒐ ᐎ ᐃᑐᑎᒪᒄ ᒥᓯᐛ ᒐᒂᓐ ᑲ ᐃᑎᓱᒥᑎᑯᒡ ᒐᒋ ᐃᑐᑎᒪᒄ᙮ ᒐ ᐊᑲ ᐊᔭᒥᐊᔅᑐᐛᑯᒡ ᑯᑎᑭᒡ ᒪᓂᑐᐅᒡ, ᑭᔭ ᒐ ᐊᑲ ᐃᔅᒋᔄᐛᒄ ᐅᑦ ᐃᓯᓂᐧᑲᓱᓂᐛᐛ᙮”
ᓂᔅᑐ ᒥᑯᓴᓐ-ᒋᓯᒂ ᐊᓯᑯᒻ ᐱᐳᓇ᙮
ᐊᑯ ᑎᐸᔨᒋᒐᓱᐤ ᐊᔅᒋᔄᑦ:
14“ᐊᓯᑯᒻ ᐱᐳᓇ ᒋᑭ ᐎ ᒥᑯᓴᓇᐛᐤ ᓂᔅᑐ ᒥᑯᓴᐅᓇ ᒐᒋ ᒋᔅᑕᔨᒥᔭᒄ᙮
15ᐅᔅᑭᒡ ᒥᑯᓴᓐ ᒐ ᐃᑐᑎᒪᒄ ᐊᑲ ᐅᐱᓱᑦ ᐸᒂᓯᑭᓐ ᒋᑭ ᐃᓯᓂᐧᑲᑕᓇᐛᐤ᙮ ᐊᐱᑉ ᐃᓯᓂᐧᑲᑕᐤ ᐊᓐ ᐱᓯᒻ ᒐ ᒥᑯᓴᔭᒄ ᐅ ᒥᑯᓴᓐ᙮ ᐊᐅᑯᓐ ᐅ ᐱᓯᒻ ᑲ ᒋᔅᑐᑕᔭᒄ ᐊᓐᑕ ᐃᒋᑉᑎᒡ ᐅᒡ᙮ ᒧᔭᒻ ᑲ ᐃᑎᓱᒥᑎᑯᒡ ᒐ ᐃᓯ ᒥᑯᓴᔭᒄ᙮ ᓇᓂᑎᒻ ᒐ ᐸᑕᔭᒄ ᐱᔅᑎᓂᒐᐅᓐ ᑕᑥᐤ ᑕᑯᓯᓂᔭᑯᐤ ᒐᒋ ᐊᔭᒥᐊᔅᑐᐅᔭᒄ᙮ 16ᑲ ᒪᒧᓴᒋᓂᑭᓄᐅᒡ ᑲ ᓂᑕᐅᒋᒡ ᒥᒋᒻ ᐃᓯᓂᐧᑲᑕᐤ ᓂᓱ ᐛᒋ ᑎᒂᒡ ᒪᑯᓴᐅᓐ᙮
ᒪᒂᒡ ᐊ ᒥᑯᓴᓄᐅᒡ ᒋᑭ ᐎ ᐱᔅᑎᓂᒧᐅᓇᐛᐤ ᐅᔅᑭᒡ ᑲ ᓂᑕᐅᒋᒡ ᒥᒋᒻ ᑲ ᒪᒧᓴᒋᓂᒪᒄ ᐊᓂᔭ ᑲ ᐊᐱᒋᑕᔭᒄ ᓂᑕᐅᒋᒋᑭᓂᔅᒐ᙮ ‘ᒥᑯᓴᓐ ᐛᔅᑲᐃᑭᓇ’ ᐃᓯᓂᐧᑲᑕᐤ ᓂᔅᑐ ᐛᒋ ᑎᒂᒡ ᒪᑯᓴᐅᓐ᙮ ᐊᐅᑯᓐ ᒐ ᐃᑐᑎᒪᒄ ᒋ ᒪᒧᓴᒋᓂᒪᒄ ᒋ ᒥᒋᒧᐛᐤ ᑭᔭ ᐊᓂᔭ ᒥᓂᓴ ᒥᓯᐛ ᐊ ᐃᓯᓇᒂᒋ᙮
17ᐊᓯᑯᒻ ᐅᑎᒋᐱᔨᒐᓂ ᐅᔭ ᒥᑯᓴᐅᓇ, ᒥᓯᐛ ᓇᐸᐅᒡ ᒋᑭ ᐎ ᑎᑯᓯᓄᐅᒡ ᒐᒋ ᐊᔭᒥᐊᔅᑐᐅᒡ, ᓂᔾ ᑎᐸᔨᒋᒐᓱᐤ ᒋᓴᒪᓂᑐᐤ᙮
18ᑕᑥᐤ ᓂᐸᐊᒂ ᐊᐛᓯᔅ ᒐ ᒥᑐᔅᑕᐊᒧᐅᔭᒄ, ᒐ ᐊᑲ ᒥᑐᔅᑕᐊᒪᒐᔭᒄ ᐸᒂᓯᑭᓐ ᑲ ᐱᒥᓄᐛᔭᒄ ᓯᐅᔅᑎᒪᑭᓐ ᐊ ᐊᐱᒋᐊᒄ ᒪᑐᔅᑕᐊᒧᔭᐅᑯ ᐊᐛᓯᔅ᙮ ᐃᔅᐱ ᒥᑐᔅᑕᐊᒧᔭᒂ ᐊᐛᓯᔅ, ᒐ ᐃᔎᔄᒄ ᐊ ᐎᔪᐅᑦ ᐊᓂᔭ ᐸᐃᑯᑕᐤ ᒋᓯᑯᔪᐤ᙮
19ᐊᓯᑯᒻ ᐱᐳᓇ, ᒥᔭᒧᓴᒋᓂᒪᑯᐤ ᒋᓂᑕᐅᒋᑕᑭᓄᐛᐛ, ᒐ ᐸᑐᐅᔭᒄ, ᓂᔾ ᑎᐸᔨᒋᒐᓱᐤ ᒋᒋᓴᒪᓂᑐᒧᐛᐤ, ᐊᓐᑕ ᐊᔭᒥᐊᔅᑐᐅᔭᒄ, ᐊᓐ ᐅᔅᑭᒡ ᒥᔭᒧᓴᒋᓂᒪᒄ ᒋᓂᑕᐅᒋᑕᑭᓄᐛᐤ᙮ ᓇᐸᐊᑯᐤ ᐊ ᐊᐛᓯᐅᑦ ᐊᐛᓯᔅ ᒐ ᐊᑲ ᐅᔄᒄ ᐊᓐᑕ ᐅᑲᐎᔭ ᐅᒋᒋᓇᐳᐃᒥᔨᒡ᙮”
ᒋᓴᒪᓂᑐᐤ ᐅᑦ ᐊᓐᒋᓂᒪ ᑲ ᓂᑲᓄᑕᔨᒋ
20“ᓂᑭ ᐃᑎᓴᐛᐤ ᐊᓐᒋᓐ ᐊᓐᑕ ᓂᑲᓐ ᐊ ᑕᔭᒄ, ᒐᒋ ᓇᑭᑐᐛᔨᒥᑕᒄ ᒪᒂᒡ ᐸᒥᐱᒋᐊᑯᐤ ᑭᔭ ᒐᒋ ᐸᓱᐅᑕᒄ ᐊᓐᑕ ᐃᑕᐅᓂᒡ ᑲ ᐊᔭᔅᑯᔅᑐᐛᑎᑯᒡ᙮ 21ᑭᔭ ᒐ ᓂᑐᑐᐛᒄ ᒐᒂᔪᐤ ᒐ ᐃᑎᑕᒃ ᑭᔭ ᒐ ᓇᐃᑐᐛᒄ᙮ ᒐ ᐊᑲ ᐱᐛᔨᒪᒄ ᐛᔅ ᓂ ᒥᔭᐤ ᑎᐸᔨᒋᒐᐅᓂᔪᐤ ᑭᔭ ᓇᒪ ᒋᑭ ᐛᐸᔨᑎᒪᑯᐛᐤ ᒪᔭᔨᒪᒂ᙮ 22ᒥᒄ ᓇᐃᑐᐛᒂ ᒐᒂᔪᐤ ᐊ ᐃᑎᓱᒥᑕᒄ ᑭᔭ ᓂᔾ ᐃᑐᑎᒪᒂ ᒥᓯᐛ ᐊᐃᑎᓱᒥᑎᑯᒡ ᓂᑭ ᒪᓯᐧᑯᐛᐅᒡ ᒥᓯᐛ ᐊᓐᒡ ᑲ ᐛᐧᑲᑎᑕᑯᒡ᙮ 23ᒋᑭ ᒋᔅᒋᓄᑕᔨᑯᐛᐤ ᓂᑦ ᐊᓐᒋᓂᒻ ᑭᔭ ᒋᑭ ᐃᑐᑕᐃᑯᐛᐤ ᐊᓐᑕ ᐛᒋᔨᒋ ᐊᒧᕆ ᑭᔭ ᐊᑦ ᑭᔭ ᐸᕆᔅ ᑭᔭ ᑲᐃᓇᓐ ᑭᔭ ᐃᑉ ᑭᔭ ᒐᐱᐅᔅ ᐊ ᐃᑎᔅᑲᓇᓯᔨᒋ ᐃᔪᐛ ᑭᔭ ᓂᑭ ᓂᓱᐅᓇᒋᐊᐅᒡ᙮ 24ᒐ ᐊᑲ ᓂᐱᔅᑯᐱᔅᑐᒪᑯᐤ ᐅᒪᓂᑐᒧᐛᐛ, ᑭᔭ ᒪᒃ ᐊᔭᒥᐊᔅᑐᒪᑯᐤ᙮ ᒐ ᐊᑲ ᐃᑐᑎᒺᒄ ᐊᓂᔭ ᐊᑕᔨᑕᒡ ᐊ ᐃᑎᑯᒡ ᐅᒥᓂᑐᒧᐛᐛ ᒐᒋ ᑐᑕᒡ ᒐᒂᔪᐤ᙮ ᒥᓯᐛ ᒐ ᐱᑯᓇᒪᑯᐤ ᐅᒪᓂᑐᒧᐛᐛ ᑭᔭ ᓇᔅᒡ ᒐᐱᓴᓱᒪᑯᐤ ᐅᐸᔭᒋ ᐅᓯᓂᒧᐛᐛ᙮ 25ᓂᔾ, ᒥᒄ ᒋᑭ ᐎ ᐊᔭᒥᐊᔅᑐᐅᓇᐛᐤ, ᑎᐸᔨᒋᒐᓱᐤ ᒋᓴᒪᓂᑐᐤ, ᐃᑐᑎᒪᒂ ᐅ ᒋᑭ ᓱᐛᔨᑕᑯᐃᑎᓇᐛᐤ ᐊ ᒥᔨᑎᑯᒡ ᓂᐱᔾ ᑭᔭ ᒥᒋᒻ, ᑭᔭ ᒋᑭ ᑭᓄᐛᔨᒥᑎᓇᐛᐤ ᒐ ᐊᑲ ᒋ ᐊᐧᑯᓯᔭᒄ᙮ 26ᓇᒪ ᒋᑭ ᐅᓂᑕᓱᐤ ᐃᔎᐤ ᑭᔭ ᒐᒋ ᐃᓯᓇᑯᓯᑦ ᒐ ᐊᑲ ᒋ ᓱᐛᐱᒪᐅᓱᑦ᙮ ᓂᑭ ᑐᑕᓐ ᓇᐅᔅ ᒐᒋ ᐱᒪᑎᓯᔭᒄ᙮”
27ᓂᑭ ᐃᑐᑐᐛᐅᒡ ᐊᐛᓐᒋ ᑲ ᐛᐧᑲᑎᑕᑯᒡ ᒐᒋ ᑯᓯᒡ᙮ ᓂᑭ ᐃᑐᑐᐛᐅᒡ ᒐᒋ ᒋᔎᔭᑕᑯᓯᒡ ᐊᐛᓐᒋ ᐊ ᒪᓯᐧᑲᑕᑯᒡ᙮ ᑭᔭ ᓂᑭ ᐃᑐᑐᐛᐅᒡ ᒐᒋ ᒋᐛᐱᔪᐅᒡ ᑭᔭ ᒋᑎᓯᒥᑕᑯᒡ᙮ 28ᓂᑭ ᐃᑐᑐᐛᐅᒡ ᓇᔅᒡ ᒐᒋ ᓴᒋᓯᒡ ᐊᓐᒡ ᑲ ᐛᐧᑲᑎᑕᑯᒡ᙮ ᑭᔭ ᓂᑭ ᐃᑲᑎᓴᐛᐅᒡ ᒋᑦ ᐊᔅᒋᐛᒡ ᐅᒡ ᐊᓐᒡ ᐃᑉ, ᑲᐃᓇᓐ, ᑭᔭ ᐊᑦ ᑲ ᐃᑎᔅᑲᓇᓯᒡ ᐃᔪᒡ᙮ 29ᒥᒄ ᓇᒪ ᒥᓯᐛ ᓂᑭ ᐃᑲᑎᓴᐛᐅᒡ ᐊ ᐸᐃᑯᐳᓂᐃᒡ ᐅᓴᒻ ᒋᒋᐛ ᒋᐸ ᐱᓯᒂᐤ ᒋᑦ ᐊᔅᒋᐛᐤ ᑭᔭ ᒥᓯᐛ ᐊᓐᑕ ᒋᐸ ᐃᑕᐅᒡ ᐊᒂᑎᓯᒡ ᐊᐛᓯᓯᒡ᙮ 30ᒪᑎᐧᑲᒡ ᓂᑭ ᐃᑐᑐᐛᐅᒡ ᐊᓐᒡ ᐃᔪᒡ ᒐᒋ ᓂᑭᑕᒡ ᐅᔭ ᐊᔅᒋᔪᐤ, ᐸᐱᓯᔅ ᒋᑭ ᒋᔅᑐᑕᐅᒡ, ᐸᑐᔅ ᒋᔨᐛᐤ ᒥᒐᑎᔭᒂ ᑭᔭ ᒋ ᐎᒋᔭᒂ ᐊᓐᑕ ᒥᓯᐛ ᐊᔅᒋᒡ᙮
31ᓂᑭ ᑐᑕᓐ ᒐᒋ ᒥᓴᒡ ᒋᑦ ᐊᔅᒋᐛᐤ ᐊᓐᑕ ᐅᒡ ᒥᒂᑭᒥ ᐎᓂᐸᒄ ᐃᔅᐱᔅ ᐊᓐᑕ ᒥᑎᑐᕋᓂᔭᓐ ᐎᓂᐸᑯᒡ ᑭᔭ ᔪᑉᕆᑎᔅ ᓯᐱᔾ ᐃᔅᐱᔅ ᓴᐃᓇᐃ ᐸᐧᑯᔅᑎᔅᑭᒥᑲᒡ᙮ ᒋᑭ ᒥᔨᑎᓇᐛᐤ ᓱᐧᑲᑎᓯᐅᓐ ᒐᒋ ᓴᒂᐊᑯᒡ ᑭᔭ ᒐᒋ ᐃᑲᑎᓴᐛᑯᒡ ᐃᔪᒡ ᐊᓐᑕ ᐊᔅᒋᒡ ᐅᒡ᙮ 32ᓇᒪ ᒋᑭ ᐎ ᑐᑕᓇᐛᐤ ᓂᔅᑯᒧᐅᓇ ᐊᓯᒡ ᐊᓐᒡ ᐃᔪᒡ ᑭᔭ ᒪᒃ ᐅᒪᓂᑐᒧᐛᐛ᙮ 33ᒐ ᐊᑲ ᑕᑈᑐᐛᑯᒡ ᒐᒋ ᐎᒋᒡ ᐊᓐᑕ ᒋᑦ ᐊᔅᒋᐛᒡ ᐛᔅ ᓂᑭ ᓂᔅᑯᔅᑕᑯᒡ ᑭᔭ ᒋᑭ ᑐᑕᑯᐛᐅᒡ ᒐᒋ ᐊᔭᒥᐊᔅᑐᒪᑯᐤ ᐊᓂᔭ ᐅᒪᓂᑐᒧᐛᐛ, ᒧᔭᒻ ᒥᔭᑯᓂᑯᔭᑯᐤ ᒋᑭ ᐃᓯᓇᑯᓯᓇᐛᐤ᙮
Currently Selected:
ᐊᒃᓱᑕᔅ 23: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
