ᐊᑈᔅᑕᓇᒡ 7
7
ᔅᑎᐱᓐ ᑲ ᐃᔨᒪᐊᑦ ᐊᓂᔭᔪᐛ ᒍᐤ ᐃᔪᐛ ᑲ ᓂᑲᓂᔅᑯᐛᔨᒋ
1ᐊᑯ ᒪᒃ ᐊᓐ ᒋᓴᐊᔭᒥᐊᐅᒋᒪᐤ ᒂ ᑯᒂᒋᒪᑦ ᔅᑎᐱᓇ ᐊ ᐃᑕᑦ, “ᑕᑈᐅᒡ ᐊ ᑕᓐ ᐊ ᐃᑕᒋᒥᔅᒡ ?”
2ᐊᑯ ᔅᑎᐱᓐ ᒂ ᐃᑕᑦ, “ᓂᐧᑲᓂᓯᑐᒄ ᑭᔭ ᐅᑕᐎᒪᑐᒄ ᐸᒋ ᓂᑐᑐᐅᒄ, ᒋᓴᒪᓂᑐᐤ ᑲ ᒋᔅᑕᔨᑕᑯᓯᑦ ᒋ ᓄᑯᓯᔅᑐᐛᐤ ᐛᔅᑭᒡ ᐊᓂᔭᐧᑲ ᒍᑕᐎᓄᐛ ᐊᑉᕋᐊᒪ ᒪᒂᒡ ᑲ ᐎᒋᔨᒋ ᐊᓐᑕ ᒪᓴᐳᑕᐃᒥᔭ ᐊᔅᒋᒡ, ᐊᔅᒄ ᐊᑲ ᐦᐊᕋᓐ ᑲ ᐃᓯᓂᐧᑲᑕᔨᒡ ᐅᑕᓇᔪᐤ ᐅᒋ ᐃᓯ ᐊᑐᒐᔨᒋ᙮ 3ᒋ ᐃᑎᑯᐤ ᒪᒃ ᒋᓴᒪᓂᑐᐛ ᐊᓂᔭᐧᑲ ᐊᑉᕋᐊᒻ,
ᓂᑭᓯᒡ ᒋᐧᑲᓂᓯᒡ ᑭᔭ ᓂᑭᑕ ᐊᓐ ᐊᔅᒋᔾ ᐊᓐᑕ ᐛᒋᔨᓐ᙮ ᒐ ᐃᑐᑕᔨᓐ ᐊᓐᑕ ᐊᓐ ᐊᔅᒋᔾ ᒐ ᐛᐸᑎᔨᑕᓐ᙮”
4“ᐊᑯ ᒪᒃ ᐊᓂᔭᐧᑲ ᐊᑉᕋᐊᒻ ᒂ ᓂᑭᑕᐧᒃ ᐊᓂᔭ ᐊᔅᒋᔪᐤ ᑲᓪᑎᔭ ᑲ ᐃᓯᓂᐧᑲᑕᔨᒡ ᐊᑯ ᒂ ᐎᒋᑦ ᐊᓐᑕ ᐦᐊᕋᓐ ᑲ ᐃᓯᓂᐧᑲᑕᔨᒡ ᐅᑕᓇᔪᐤ᙮ ᐃᔅᐱ ᒪᒃ ᑲ ᓂᐱᔨᒋ ᐊᓂᔭᐧᑲ ᐊᑉᕋᐊᒻ ᐅᑕᐎᔭ, ᒋᓴᒪᓂᑐᐛ ᒋ ᐃᑐᑕᑯᐤ ᐅᑕ ᒐᒋ ᐃᓯ ᐊᑐᒐᑦ ᐅᑕ ᐅ ᐊᓄᒡ ᐛᒋᔭᒄ᙮ 5ᓇᒪ ᒪᒃ ᐅᒋ ᒥᔨᑯᐤ ᐊᓂᔭ ᐊᔅᒋᔪᐤ ᒐᒋ ᑎᐱᔨᐛᐅᓯᑦ, ᓇᒪ ᐛᐛᒡ ᐊᐱᓯᔅ ᐅᒋ ᒥᔨᑯᐤ ᒐᒋ ᑎᐱᔨᐛᐅᓯᑦ᙮ ᒥᒄ ᒪᒃ ᒋᓴᒪᓂᑐᐛ ᒋ ᐊᓱᑎᒪᑯᐤ ᐊᓂᔭ ᐊᔅᒋᔪᐤ ᐊᔅᒄ ᒐᒋ ᑎᐱᔨᐛᐅᓯᑦ ᑭᔭ ᐊᓂᔭᔪᐛ ᐊᓂᔅᒐ ᐅᑦ ᐊᐛᓯᒪ ᒐ ᑎᐱᔨᐛᐅᓯᔨᒋ᙮ ᐅᔭ ᒪᒃ ᑲ ᐃᓯ ᐊᓱᑎᒧᐛᑭᓄᐅᑦ ᐊᓂᔭᐧᑲ ᐊᑉᕋᐊᒻ ᐊᔅᒄ ᓇᒪ ᐅᒋ ᐊᔭᐛᐤ ᐊᐛᓴ᙮ 6ᒪᐅᔭᔪᐤ ᒪᒃ ᑲ ᐃᑎᑯᑦ ᐊᑉᕋᐊᒻ ᒋᓴᒪᓂᑐᐛ,
‘ᒋᑦ ᐊᐛᓯᒥᒡ ᑭᔭ ᐅᑦ ᐊᐛᓯᒧᐛᐤ ᒋᑭ ᐎᒍᐅᒡ ᐊᓐᑕ ᒪᓐᑕᐤ ᐊᔅᒋᔪᐤ ᐊᑯᑕ ᐊᓐᑕ ᒐ ᓂᓇᐧᑲᑕᔨᒧᒡ᙮ ᒋᑭ ᐊᐱᒋᐊᑭᓄᐅᒡ ᑭᔭ ᒋᑭ ᓂᓇᐧᑲᒋᐊᑭᓄᐅᒡ ᓇᐤ ᒥᑕᓯᒥᑎᓄᐤ ᐱᐳᓇ ᐃᔅᐱᔅ᙮ 7ᒥᒄ ᒪᒃ ᐊᓂᔭ ᐃᔪᐛ ᑕᑎᐸᓐ ᐊ ᐃᑎᔅᑲᓇᓯᔨᒋ ᑲ ᐊᐱᒋᐃᑯᒡ ᓂᑭ ᐛᐛᓯᒪᔪᐛ᙮ ᐃᔅᐱ ᒪᒃ ᓇᐤ ᒥᑕᓯᒥᑎᓄᐤ ᐱᐳᓇ ᐅᑎᒋᐱᔨᒐ, ᒋᑭ ᓂᑭᑎᒧᒡ ᐊᓂᔭ ᐊᔅᒋᔪᐤ ᐊᓐᑕ ᑲ ᓂᓇᐧᑲᑕᔨᒧᒡ ᐊ ᐊᐱᒋᐊᑭᓄᐎᒡ ᐊᑯ ᒪᒃ ᒐ ᐸᒋ ᐊᔭᒥᐊᔅᑐᐅᒡ ᐅᑕ ᐅ ᐊᔅᒋᔾ ᒪᒂᒡ ᐊᓄᒡ ᑲ ᓂᐳᔨᓐ᙮’ ”
8ᐊᑯ ᔅᑎᐱᓐ ᒥᓐ ᒂ ᐊᑎ ᐃᔅᒋᔄᑦ, “ᐊᑯ ᒪᒃ ᒋᓴᒪᓂᑐᐤ ᑲ ᐅᓯᑐᐛᑦ ᐊᓂᔭᐧᑲ ᐊᑉᕋᐊᒪ ᓂᔅᑯᒧᐅᓂᔪᐤ, ᐅ ᒪᒃ ᓂᔅᑯᒧᐅᓐ ᒐᒋ ᐅᒋ ᓄᑯᑕᑭᓄᐅᒡ, ᒐᒋ ᒋᔅᒋᓄᐛᒋᔄᑭᓄᐅᒡ ᓇᐸᓯᒡ᙮ ᐊᑯ ᒪᒃ ᐊᓂᔭᐧᑲ ᐊᑉᕋᐊᒻ ᑲᒋ ᒋᔅᒋᓄᐛᒋᔄᑦ ᐅᑯᓴ ᐊᐃᓯᑲ ᐃᔅᐱᔅ ᔭᓇᐤ ᒋᓯᑲᐛ ᑲ ᐃᔅᐱᔅ ᐱᒪᑎᓯᔨᒋ᙮ ᐊᐃᓯᒃ ᒪᒃ ᐊᐅᒄ ᐅᔭ ᒐᑭᐸ ᑲ ᐅᑕᐎᑦ᙮ ᒐᑭᑉ ᒪᒃ ᒋ ᓂᓱᓴᐳᔨᐛ ᐅᑯᓴ᙮ ᐊᐅᑯᓐᒡ ᐅᒡ ᓂᓱᓴᑉ ᑲ ᒋᔅᑕᔨᑕᑯᓯᒡ ᒋᑦ ᐊᓂᔅᒐ ᒍᑕᐎᓄᒡ᙮”
9“ᐸᐃᒄ ᒪᒃ ᐊᓂᔭ ᒐᑭᑉ ᐅᑯᓴ ᒍᓯᑉ ᒋ ᐃᓯᓂᐧᑲᓱᔪᐛ᙮ ᐊᓂᔭ ᒪᒃ ᑯᑎᑲ ᐅᑯᓴ ᒐᑭᑉ, ᒋ ᐅᑕᔨᒪᐅᒡ ᐊᓂᔭᔪᐛ ᐎᐧᑲᓂᓱᐛᐛ ᒍᓯᐸ᙮ ᒋ ᐊᑕᐛᒐᐅᒡ ᐊᓂᔭᔪᐛ ᐎᐧᑲᓂᓱᐛᐛ ᒐᒋ ᐊᐱᒋᐊᑭᓄᔨᒋ ᐊᓐᑕ ᐃᒋᑉᑎᒡ ᑲ ᐃᓯᓂᐧᑲᑕᔨᒡ ᐊᔅᒋᔪᐤ᙮ ᒥᒄ ᒪᒃ ᒋᓴᒪᓂᑐᐛ ᒋ ᐎᒐᐅᑯᐤ ᒍᓯᑉ᙮ 10ᒋ ᐎᒋᐃᑯᐤ ᒪᒃ ᐊᓐᑕ ᒪᒂᒡ ᓇᔅᒡ ᐊ ᐊᔨᒥᓂᔨᒡ ᐊ ᑕᑦ᙮ ᐃᔅᐱ ᒪᒃ ᒍᓯᑉ ᑲ ᐅᑎᔅᑯᑲᐳᔅᑐᐛᑦ ᐊᓂᔭ ᒋᓴᐅᒋᒪᐛ ᐸᕈᐤ ᑲ ᐃᓯᓂᐧᑲᑕᑭᓄᔨᒋ ᐊᓐᑕ ᐃᒋᑉᑎᒡ ᑲ ᑕᔨᒋ, ᒋᓴᒪᓂᑐᐛ ᒋ ᒥᔨᑯᐤ ᒍᓯᑉ ᑭᒐᑕᐛᔨᑎᒧᐅᓂᔪᐤ ᑭᔭ ᒋ ᐃᑐᑕᑯᐤ ᒐᒋ ᒥᔽᔨᑕᑯᓯᑦ᙮ ᒋ ᒥᔽᔨᒥᑯᐤ ᒪᒃ ᐸᕈᐛ, ᐊᑯ ᑲ ᐅᒋᒪᐅᐧᑲᑎᑯᑦ ᐊᓐᑕ ᐊᓂᔭ ᐅᑕᓇᔪᐤ ᐃᒋᑉᑎᒡ ᑲ ᐅᒋᒪᐅᔨᒋ ᑭᔭ ᐊᓂᔭ ᒥᓯᐛ ᑕᓐ ᐊ ᐃᓯ ᑎᐱᔨᐛᐅᓯᔨᒋ ᒋ ᒥᔨᑯᐤ ᒐᒋ ᓂᓇᑭᑐᐛᐸᑕᐧᒃ᙮”
11“ᒐᒃ ᒪᒃ ᒋ ᓄᑕᐱᔪᐤ ᒥᒋᒻ ᒥᓯᐛ ᐊᓐᑕ ᐃᒋᑉᑎᒡ ᑭᔭ ᑲᐃᓇᓐ ᐊᔅᒋᒡ᙮ ᐊᓐᑕ ᒪᒃ ᑲᐃᓇᓐ ᐊᔅᒋᒡ ᐊᑯᑕ ᑲ ᑕᔨᒋ ᒍᓯᑉ ᐅᑕᐎᔭ ᑭᔭ ᐎᐧᑲᓂᓴ᙮ ᓇᔅᒡ ᐊᒋ ᓂᓇᐧᑲᑕᔨᒧᒡ ᐊᐛᓐᒋ᙮ ᒐᑭᑉ ᑭᔭ ᐊᓂᔭᔪᐛ ᐅᑯᓴ ᐊᓐᒡ ᒋᑦ ᐊᓂᔅᒐ ᒍᑕᐎᓄᒡ ᓇᒪ ᓇᔅᒡ ᐅᒋ ᒥᔅᑭᒧᒡ ᒥᒋᒥᔪᐤ᙮ 12ᐃᔅᐱ ᒪᒃ ᐱᔭᑕᐧᒃ ᒐᑭᑉ ᐊ ᑎᑯᓂᔨᒡ ᒥᒋᒥᔪᐤ ᐊᓐᑕ ᐃᒋᑉᑎᒡ ᐊᒋ ᓇᐅᔅᑕᑭᓄᐎᒂ, ᒋ ᐃᑎᓴᐛᐤ ᐊᓐᑕ ᐊᓂᔭ ᐅᑯᓴ᙮ ᐊᐅᒄ ᐅᔭ ᓂᔅᑎᒻ ᑲ ᐃᑐᑕᒡ ᐊᓐᑕ᙮ 13ᒥᓐ ᒪᒃ ᒂ ᐃᑐᑕᒡ ᐊᓐᑕ ᐃᒋᑉᑎᒡ ᐊᑯ ᒂ ᒋᔅᒐᔨᑕᑯᐅᑦ ᒍᓯᑉ ᐊᓂᔭᔪᐛ ᐎᐧᑲᓂᓴ ᐊ ᑕᔨᒋ᙮ ᐊᑯᑕ ᒪᒃ ᐸᕈᐛ ᒂ ᐅᒋ ᒋᔅᒐᔨᒪᑦ ᐊᓂᔭᔪᐛ ᒍᓯᐸ ᐎᐧᑲᓂᓯᔪᐛ᙮ 14ᐊᑯ ᒍᓯᑉ ᒂ ᐎᓴᒪᑦ ᐊᓂᔭ ᐅᑕᐎᔭ ᑭᔭ ᒥᓯᐛ ᐎᐧᑲᓂᓯᔪᐛ ᒐᒋ ᐸᒋ ᑕᔨᒋ ᐊᓐᑕ ᐃᒋᑉᑎᒡ᙮ ᓂᔄᐅᑕᑕᑐᔪᐤ ᐊᓱ ᐱᑕᑕᒡ ᒋ ᐃᑕᑎᓯᔪᐛ ᒪᒃ ᐅᔭ ᐎᐧᑲᓂᓴ᙮ 15ᐊᑯ ᒐᑭᑉ ᒂ ᐃᑐᑕᑦ ᐊᓐᑕ ᐃᒋᑉᑎᒡ, ᐊᑯᑕ ᒪᒃ ᒐᒃ ᒂ ᐳᓂᐱᒪᑎᓯᑦ ᑭᔭ ᐊᓂᔭᔪᐛ ᒥᓯᐛ ᐅᑯᓴ ᐊᑯᑕ ᑭᔭ ᐎᔨᐛᐤ ᒐᒃ ᑲ ᐳᓂᐱᒪᑎᓯᒡ᙮ 16ᐃᔅᐱ ᒪᒃ ᑲ ᐳᓂᐱᒪᑎᓯᒡ, ᓴᑭᒻ ᑲ ᐃᓯᓂᐧᑲᑕᔨᒡ ᐅᑕᓇᔪᐤ ᐊᑯᑕ ᑲᐤ ᑲ ᐃᑐᑕᑭᓄᔨᒋ ᐎᔪᐛᐛ᙮ ᐊᑯ ᐊᓐᑕ ᑲ ᓇᐅᔅᑕᑭᓄᔨᒋ ᐊᓐᑕ ᐊᓂᔭ ᒋᐱᐃᒋᐛᐱᒡ ᐊᓂᔭᐧᑲ ᐊᑉᕋᐊᒻ ᓴᔅ ᑲ ᐃᔭᒂ ᐊᓐᑕ ᐸᒋ ᐛᔅᑭᒡ᙮ ᐊᒧᕆ ᐅᑦ ᐃᔨᒥᔪᐛ ᐊᒋ ᐊᑕᒥᑯᑦ ᐅᔭ ᒋᐱᐃᒋᐛᐱᔪᐤ᙮”
17“ᒐᒃ ᒪᒃ ᒋ ᐅᑎᒋᐱᔪᐤ ᒐᒋ ᐃᑐᑕᐧᒃ ᒋᓴᒪᓂᑐᐤ ᐊᓂᔭ ᑕᓐ ᑲ ᐃᑕᑦ ᐊᑉᕋᐊᒪ ᒐᔅᑎᓇᔅ ᒐ ᐃᑐᑎᒧᐛᑦ᙮ ᓴᔅ ᒪᒃ ᓇᔅᒡ ᒋ ᒥᒐᑐᐅᒡ ᐊᐛᓐᒋ ᐊᓐᑕ ᐃᒋᑉᑎᒡ ᐊᑉᕋᐊᒪ ᐊ ᑕᔨᒋ ᐊᒋ ᐅᒋ ᐊᓂᔅᒐ ᐱᒪᑎᓯᒡ᙮ 18ᑯᑎᒃ ᒪᒃ ᒋᓴᐅᒋᒪᐤ ᒐᒃ ᒋ ᑎᐸᔨᒋᒐᐤ ᐊᓐᑕ ᐃᒋᑉᑎᒡ ᐊᑲ ᐅᒋ ᒋᔅᒐᔨᒪᒂ ᐊᓂᔭᔪᐛ ᒍᓯᐸ᙮ 19ᐅ ᒪᒃ ᒋᓴᐅᒋᒪᐤ ᓇᔅᒡ ᒋ ᒪᔭᔨᒪᐤ ᐊᓂᔭᐧᑲ ᒋᐧᑲᓂᓯᓄᐛ, ᒋ ᐃᑐᑐᐛᐤ ᒥᔅᑎ ᒐᒋ ᓂᓇᐧᑲᒋᐊᑭᓄᔨᒋ ᑭᔭ ᒋ ᐃᑎᓱᐛᐤ ᐎᐎᑎᒥᒡ ᒐᒋ ᓂᑭᑕᑭᓄᔨᒋ ᐅᑦ ᐊᐛᓯᒥᔪᐛ ᒐᒋ ᓂᐱᔨᒋ ᐊᓐᑕ᙮”
20“ᐊᑯᑕ ᒪᒃ ᐅ ᒪᒂᒡ ᐅ ᑲ ᐃᔅᐱᔨᒡ ᓇᐸᔅ ᒋ ᐱᒪᑎᓯᐤ ᒧᓱᔅ ᐊ ᐃᓯᓂᐧᑲᓱᑦ, ᓇᔅᒡ ᐊᒋ ᒥᔪᓇᑯᓯᑦ᙮ ᓂᔅᑐ ᐱᓯᒺ ᒪᒃ ᒋ ᐃᔅᐱᔅ ᑭᓄᐛᔨᒪᑭᓄᐤ ᐊᓐᑕ ᐅᑕᐎᔭ ᐊ ᑕᔨᒋ᙮ 21ᐃᔅᐱ ᒪᒃ ᑲ ᑲᔭᑭᓄᐅᑦ ᒧᓱᔅ ᐊᓐᑕ ᐎᐎᑎᒥᒡ ᐸᕈᐤ ᐅᑕᓂᓯᔪᐛ ᒋ ᒥᔅᑲᑯᐤ, ᒋ ᐅᑎᓂᑯᐤ, ᐊᑯ ᑲ ᑭᓄᐛᔨᒥᑯᑦ ᐊᓂᔭ ᐃᔎᓴ ᑭᔭ ᑲ ᓂᑕᐅᒋᓂᑯᑦ ᒧᔭᒻ ᐎᔾ ᑎᐱᔨᐛ ᐅᑯᓴ ᐊᒋ ᐃᑐᑕᑯᑦ᙮ 22ᒥᓯᐛ ᒪᒃ ᒋ ᐃᓯ ᒋᔅᑯᑎᒧᐛᑭᓄᐤ ᒧᓱᔅ ᐃᒋᑉᑦ ᐃᔪᐛ ᐅᑭᒐᑕᐛᔨᑎᒧᐅᓂᔪᐤ᙮ ᐛᐛᒡ ᓇᔅᒡ ᒋ ᑭᔅᒋᐅᐤ ᐊ ᐃᔨᒥᑦ ᑭᔭ ᒐᒂᔪᐤ ᐊ ᐃᑎᑦ᙮”
23“ᐃᔅᐱ ᒪᒃ ᑲ ᓇᐎᔪᐛᐳᓇᓯᑦ ᒧᓱᔅ ᐊᑯ ᒂ ᐃᑕᔨᑕᐧᒃ ᒐᒋ ᓂᑐ ᒋᔅᒐᔨᒪᑦ ᑕᓐ ᐊ ᐃᑐᑐᐛᑭᓄᔨᒋ ᐎᒋ ᐃᔅᕋᐃᓪ ᐃᔪᐛ᙮ 24ᒋ ᐛᐱᒪᐤ ᒪᒃ ᐸᐃᒄ ᐊᓂᔭ ᐃᔅᕋᐃᓪ ᐃᔪᐛ ᐊ ᓂᓇᐧᑲᒋᐃᑯᔨᒋ ᐃᒋᑉᑦ ᐃᔪᐛ᙮ ᐊᑯ ᑲ ᒋᔅᐸᐛᑕᑦ ᒂ ᓂᐸᐊᑦ ᐊᓂᔭ ᐃᒋᑉᑦ ᐃᔪᐛ᙮ 25ᐅᔭ ᐊᒋ ᐃᑎᑦ ᒋ ᐃᑕᔨᑎᒻ ᐊᓂᔭ ᑎᐱᔨᐛ ᐅᑦ ᐃᔨᒻ ᒐ ᓂᔅᑐᑎᒥᔨᒋ ᒋᓴᒪᓂᑐᐛ ᒐ ᐊᐱᒋᐃᑯᑦ ᒐᒋ ᐎᐧᑯᒋᐊᑦ, ᒥᒄ ᒪᒃ ᓇᒪ ᐅᒋ ᓂᔅᑐᑎᒥᔪᐛ᙮ 26ᒥᓐ ᒪᒃ ᐎᔭᐱᓂᔨᒡ, ᒧᓱᔅ ᒋ ᓇᑕᐤ ᓂᓱ ᐃᔅᕋᐃᓪ ᐃᔪᐛ ᐊ ᒪᓯᐧᑲᑐᔨᒋ, ᐊᑯ ᒂ ᐎ ᒋᐱᒋᐊᑦ᙮ ᐊᑯ ᒂ ᐃᑕᑦ, ‘ᓂᑐᑐᐅᒄ ᒪ, ᑕᐱᔅᑯᓐ ᒋ ᐎᐧᑲᓂᓯᓂᑐᓇᐛᐤ ᒐᒂᓐ ᐛᒋ ᒪᓯᐧᑲᑐᔭᒄ ?’ ”
27“ᐊᓐ ᒪᒃ ᑲ ᒋᒋᐱᔨᑕᑦ ᐊ ᒪᓯᐧᑲᑐᒡ ᐊᓂᔭᔪᐛ ᐎᐧᑲᓂᓴ ᒋ ᑯᐧᑯᓇᐤ ᐊᓂᔭ ᒧᓱᓴ᙮ ᐊᑯ ᒂ ᐃᑕᑦ,
‘ᐊᐛᓐ ᑲ ᐃᑕᐃᔅᒃ ᒐᒋ ᐅᒋᒪᒥᑕᑕᒡ ᑭᔭ ᒐᒋ ᑎᐸᔅᑯᓂᔭᒡ ? 28ᐊᑯᓐ ᐊ ᐛ ᐃᑐᑐᐎᔨᓐ ᑕᓐ ᑲ ᐃᓯ ᐃᑐᑐᐅᑦ ᐅᑕᑯᓯᔨᒡ ᐊᓐ ᐃᒋᑉᑦ ᐃᔪᐤ ᑲ ᓂᐸᐃᑦ ?’
29ᐃᔅᐱ ᒪᒃ ᐱᔭᑕᐧᒃ ᐅᔭ ᒧᓱᔅ, ᒋ ᐅᓯᒧᐤ ᐊᓐᑕ ᐃᒋᑉᑎᒡ ᐅᒋ, ᐊᑯ ᐊᓐᑕ ᒥᑎᐊᓐ ᐊᔅᒋᒡ ᑲ ᑕᑦ ᐊ ᒪᓐᑕᐅᑦ᙮ ᐊᑯᑕ ᑲ ᐎᔪᑦ ᑭᔭ ᐊᑯᑕ ᑲ ᐱᒪᑎᓯᔨᒋ ᓂᓱ ᐅᑯᓴ᙮”
30“ᐃᔅᐱ ᒪᒃ ᓇᐎᔪᐛ ᐱᐳᓇ ᑲ ᑕᑦ ᒧᓱᔅ ᐊᓐᑕ ᒥᑎᔭᓐ ᐊᔅᒋᒡ, ᐸᐃᒂᐤ ᐊ ᒋᓯᑲᔨᒡ ᒋ ᑕᐤ ᐊᓐᑕ ᐸᐧᑯᑎᔅᑭᒥᑲᒡ, ᒥᒋᒪ ᐊᓐᑕ ᐱᔅᑯᑎᓇᐤ ᓴᐃᓇᐃ ᑲ ᐃᓯᓂᐧᑲᑕᔨᒡ᙮ ᒋ ᐛᐸᑎᒻ ᐊ ᐱᔅᑯᑲᐳᐃᔨᒡ ᐊᓐᑕ ᐊ ᐃᔎᑕᐱᔨᒋ ᓂᐱᓯᔭᑎᒂ, ᐊᑯᑕ ᒪᒃ ᐊᓐᑕ ᒂ ᐅᒋ ᓄᑯᓯᔅᑕᑯᑦ ᐊᓐᒋᓇ᙮ 31ᐃᔅᐱ ᒪᒃ ᒧᓱᔅ ᑲ ᐛᐸᑕᐧᒃ ᐅᔭ ᓇᔅᒡ ᒋ ᑯᔅᑯᓯᐤ᙮ ᐊᑯ ᒂ ᓇᑎᒃ ᐊᓂᔭᔪᐤ ᐊ ᐱᔅᑯᑲᐳᐃᔨᒋ ᓂᐱᓯᔭᑎᒂ ᒥᒋᒪ ᓇᑎᒻ ᒐᒋ ᐛᐸᑕᐧᒃ᙮ ᒋ ᐸᑐᐛᐤ ᐅᑎᐸᔨᒋᒐᐛ ᐊ ᐅᒋ ᐃᔨᒥᔨᒋ ᐊᓐᑕ ᐅᒋ ᐊ ᐃᔅᒋᔄᔨᒋ, 32ᐊᐅᒄ ᓂᔾ ᐅᒋᓴᒪᓂᑐᒧᐛᐛ ᐊᓂᔭᐧᑲ ᐊᓂᔅᒐ ᒋᐧᑲᓂᓱᐛᐅᒡ ᐊᑉᕋᐊᒻ, ᐊᐃᓯᒃ ᑭᔭ ᒐᑭᑉ᙮ ᐃᔅᐱ ᒧᓱᔅ ᐱᔭᑐᐛᑦ ᐅᔭ ᐊ ᐃᔅᒋᔄᔨᒋ ᒋ ᓂᓇᒥᐱᔪᐤ ᐊ ᐃᔅᐱᔅ ᓴᒋᓯᑦ, ᓇᒪ ᐅᒋ ᐎ ᑭᓄᐛᐸᑎᒻ ᐊᓂᔭ ᑲ ᐃᔎᑕᔨᒡ᙮”
33“ᐊᑯ ᒂ ᐃᑎᑯᑦ ᒥᓐ ᐅᑎᐸᔨᒋᒐᐛ,
‘ᒥᓇ ᒋᒥᔅᒋᓇ, ᐛᔅ ᐸᔭᐧᑭᓐ ᐊᓐ ᐊᔅᒋᔾ ᐊᓐᑕ ᑲ ᓂᐳᔨᓐ᙮ 34ᓇᔅᒡ ᓂᒋ ᐛᐱᒪᐅᒡ ᑕᓐ ᐊᔅᐱᔅ ᓂᓇᐧᑲᑕᔨᒧᒡ ᓂᑦ ᐃᔨᒥᒡ ᐊᓐᑕ ᐃᒋᑉᑎᒡ᙮ ᓂ ᐸᑐᐛᐅᒡ ᐊ ᒪᒡ ᐊᑯ ᒪᒃ ᑕᑯᓯᓂᔭᓐ ᒐᒋ ᐎᐧᑯᒋᐃᒂᐤ᙮ ᐊᔅᑎᒻ ᒪᒃ, ᒥᓐ ᒋᑭ ᐃᑎᓴᐅᑎᓐ ᐊᓐᑕ ᐃᒋᑉᑎᒡ᙮’ ”
35“ᒋ ᐊᑐᐛᔨᒪᐅᒡ ᒪᒃ ᐃᔅᕋᐃᓪ ᐃᔪᒡ ᐅᔭ ᒧᓱᓴ ᐊᒋ ᐃᑕᒡ, ‘ᐊᐛᓐ ᑲ ᐃᑕᐃᔅᒃ ᒐᒋ ᐅᒋᒪᒥᑕᑕᒡ ᑭᔭ ᒐᒋ ᑎᐸᔅᑯᓂᔭᒡ᙮’ ᐊᐅᒄ ᒪᒃ ᐅᔭ ᐃᔭᐱᒡ ᑲ ᐃᑎᓴᐛᑦ ᒋᓴᒪᓂᑐᐤ ᒐᒋ ᐅᒋᒪᒥᒡ ᑭᔭ ᒐᒋ ᐎᐧᑯᒋᐃᑯᒡ᙮ ᒋᓴᒪᓂᑐᐤ ᒋ ᐃᔨᒪᐊᐤ ᒧᓱᓴ ᐊᓂᔭ ᐊᓐᒋᓇ ᐊᒋ ᐊᐱᒋᐊᑦ ᐊᓐᑕ ᐅᒋ ᑲ ᐱᔅᑯᑲᐳᐃᔨᒋ ᓂᐱᓯᔭᑎᒂ ᑲ ᐃᔎᑕᔨᒡ᙮”
36“ᐊᐅᒄ ᒪᒃ ᐅ ᒧᓱᔅ ᑲ ᐸᒋ ᐎᐎᑕᐊᑦ ᐊᓂᔭ ᐃᔪᐛ ᐊᓐᑕ ᐃᒋᑉᑎᒡ ᐅᒡ᙮ ᒋ ᒪᒥᔅᑲᒡ ᐃᑐᐤ ᒪᒃ ᐊᓐᑕ ᐃᒋᑉᑎᒡ ᑭᔭ ᐊᓐᑕ ᒥᒂᑭᒥ ᐎᓂᐸᒄ ᑭᔭ ᓇᐎᔪᐛ ᐱᐳᓇ ᒋ ᒪᒥᔅᑲᒡ ᐃᑐᐤ ᐊᓐᑕ ᐸᐧᑯᑎᔅᑭᒥᑲᒡ᙮”
37“ᐊᐅᑯᐤ ᐅ ᒧᓱᔅ ᑲ ᐃᑕᒂ ᐊᓂᔭ ᐃᔪᐛ ᐊᓐᑕ ᐃᔅᕋᐃᓪ ᑲ ᐅᒋᔨᒋ,
ᒋᓴᒪᓂᑐᐤ ᒋᑭ ᐃᑎᓴᐊᒪᑯᐛᐤ ᐊᐛᔪᐛ ᒐ ᐅᒋᔅᒋᐛᐃᒐᓱᔨᒋ ᒧᔭᒻ ᓂᔾ ᑲ ᐃᓯ ᐸᒋ ᐃᑎᓴᐅᑦ, ᐅᑕ ᒪᒃ ᐊ ᐅᒋᔭᒄ ᒋᑭ ᐅᒋᔪᐛ᙮
38ᐊᐅᒄ ᐅ ᒧᓱᔅ ᒋ ᑕᐤ ᒪᒧᐤ ᑭᔭ ᐎᔾ ᐊᓐᑕ ᐸᐧᑯᑎᔅᑭᒥᑲᒡ ᒪᒂᒡ ᑲ ᑕᒡ ᐊᓐᑕ ᐊᓐᒡ ᐛᔅᑭᒡ ᒋᑦ ᐃᔨᒥᓄᒡ᙮ ᑭᔭ ᒋ ᑕᐤ ᐊᓐᑕ ᓴᐃᓇᐃ ᐱᔅᑯᑎᓇᒡ ᐊᓐᑕ ᑲ ᐃᔨᒥᐃᑯᑦ ᐊᓐᒋᓇ᙮ ᐎᔾ ᒧᓱᔅ ᒋ ᒥᔭᑭᓄᐤ ᒐᒋ ᐊᓱᐎᑎᒪᑕᒄ ᒋᓴᒪᓂᑐᐤ ᐅᑦ ᐃᔨᒧᐅᓂᔪᐤ ᒐ ᐊᑲ ᓂᑕ ᐳᓂᐱᔨᒡ᙮”
39“ᒥᒄ ᒪᒃ ᐊᓐᒡ ᐊᓂᔅᒐ ᒋᐧᑲᓂᓯᓄᐅᒡ ᐃᔭᐱᒡ ᓇᒪ ᐅᒋ ᓂᑐᑐᐛᐅᒡ ᑭᔭ ᓇᒪ ᐅᒋ ᐊᐱᑕᔨᒪᐅᒡ, ᐅᔅᑕ ᒋ ᐃᑕᔨᑎᒧᒡ ᒥᓐ ᑲᐤ ᒐᒋ ᒋᐛᒡ ᐊᓐᑕ ᐃᒋᑉᑎᒡ᙮ 40ᒋ ᐃᑕᐅᒡ ᒪᒃ ᐊᓂᔭ ᐊᕋᓇ,
ᐅᓯᑎᒧᐅᓇᓐ ᒥᓂᑐᐧᑲᓐᒡ ᒐᒋ ᓂᑲᓄᑕᐊᑭᓄᐎᒡ ᐊᓐᑕ ᐊ ᐃᑐᑕᔭᒡ, ᐛᔅ ᓇᒪ ᓂ ᒋᔅᒐᔨᒪᓇᓐ ᑕᓐ ᐊ ᐃᔅᐱᔨᑦ ᒧᓱᔅ, ᐊᓐ ᑲ ᐎᐧᑯᒋᐃᔨᒥᑦ ᐊᓐᑕ ᐃᒋᑉᑎᒡ ᐅᒡ᙮
41ᐊᑯᑕ ᒪᒃ ᑲ ᐊᑎ ᐅᓯᐊᒡ ᒥᓂᑐᐧᑲᓇ ᒧᔭᒻ ᒥᔅᑐᓯᓴ ᐊ ᐃᓯᓇᑯᓯᔨᒋ ᐊᑯ ᑲ ᒥᑐᔅᑕᐊᒧᐛᒡ ᐊᓂᔭ ᒥᓂᑐᐧᑲᓇ ᑭᔭ ᑲ ᒥᑯᓴᒡ ᐊᓂᔭ ᐅᒋ ᐊᒋ ᐅᓯᑕᒪᓱᒡ ᐊᓂᔭ ᒥᓂᑐᐧᑲᓇ᙮ 42ᐊᑯ ᒪᒃ ᒋᓴᒪᓂᑐᐛ ᒂ ᓂᑭᑎᑯᒡ, ᒂ ᐱᔅᑎᓂᑯᒡ ᒐᒋ ᐅᒋᒋᐧᑯᓂᐱᔅᑐᐛᒡ ᐅᒐᑭᑕᒂ ᑭᔭ ᒋᓯᑲᐤ ᐱᓯᒺ ᑭᔭ ᑎᐱᔅᑲᐤ ᐱᓯᒺ᙮ ᒋ ᒥᓯᓇᐊᒧᒡ ᒋᓴᒪᓂᑐᐛ ᐅᒥᓯᓇᐃᑭᓂᔨᒡ ᐊᓂᔭᐧᑲ ᐅᒋᔅᒋᐛᐃᒐᓱᒡ ᐊᒋ ᐃᔅᒋᔄᒂᓂ ᒋᓴᒪᓂᑐᐛ,
ᒋᔨᐛᐤ ᐃᔅᕋᐃᓪ ᐃᔪᒡ, ᓇᐎᔪᐛ ᐱᐳᓇ ᔅᒋ ᓂᐸᐊᐛᐅᒡ ᐊᐛᓯᓯᒡ ᐊ ᒥᑐᔅᑕᐊᒧᔭᒄ, ᒪᒂᒡ ᐊᓐᑕ ᐸᐧᑯᑎᔅᑭᒥᑲᒡ ᑲ ᑕᔭᒄ, ᓇᒪᔭᐤ ᒪᒃ ᐅ ᓂᔾ ᑲ ᐃᑐᑎᒧᔭᒄ᙮ 43ᔅᒋ ᐱᐸᒧᑕᐊᐛᐤ ᒋᒥᓂᑐᐧᑲᓄᐛᐤ ᒧᓚᒃ ᐅᐱᒍᐎᔭᓂᒋᐛᐱᒡ ᑭᔭ ᐊᓂᔭ ᐅᑦ ᐅᒐᑭᑕᐧᑯᒪ ᑲ ᐅᓯᑎᒧᐛᒄ ᐊᓐ ᒋᒥᓂᑐᐧᑲᓄᐛᐤ ᕆᐸᓐ᙮ ᐊᐅᑯᓐᒡ ᐅᒡ ᒥᓂᑐᐧᑲᓐᒡ ᑲ ᐅᓯᐊᑯᒡ ᒐᒋ ᐅᒋᒋᐧᑯᓂᐱᔅᑐᐛᑯᒡ᙮ ᐊᑯ ᒪᒃ ᒐ ᐃᑐᑕᑎᑯᒡ ᐸᓱᒡ ᐸᐱᓗᓂᒡ ᒐᒋ ᐃᑐᑕᐃᑯᔭᒄ ᐊᓐᑕ ᒐ ᒋᐸᐅᑯᔭᒄ᙮
ᐊᐅᒄ ᐅᔭ ᑲ ᐃᑎᓯᓇᐃᒐᒡ ᐅᒋᔅᒋᐛᐃᒐᓱᒡ ᐊᒋ ᐃᔅᒋᔄᔨᒋ ᒋᓴᒪᓂᑐᐛ᙮”
44“ᐊᑯ ᐅ ᒥᓐ ᒐ ᐎᑎᒪᑎᑯᒡ, ᐊᓐᒡ ᐸᒋ ᐊᓂᔅᒐ ᒋᐧᑲᓂᓯᓄᐅᒡ ᐊᓐᑕ ᐸᐧᑯᑎᔅᑭᒥᑲᒡ ᑲᒋ ᑕᒡ, ᒋ ᐊᔭᐅᒡ ᐊᔭᒥᐊᐅ ᒥᒋᐛᐱᔪᐤ ᐊᓐᑕ ᐊ ᑕᔨᒋ ᒋᓴᒪᓂᑐᐛ᙮ ᐊᓐ ᒪᒃ ᐊᔭᒥᐊᐅ ᒥᒋᐛᑉ ᒧᔭᒻ ᑲ ᐃᑕᑦ ᒋᓴᒪᓂᑐᐤ ᒧᓱᓴ ᒐ ᐃᓯᑕᔨᒋ ᐊᑯᓐ ᑲ ᐅᓯᑕᑭᓄᐎᒡ᙮”
45“ᒥᒐᑐᐤ ᐱᐳᓇ ᒪᒃ ᐊᓐᒡ ᐊᓂᔅᒐ ᒋᐧᑲᓂᓯᓄᐅᒡ ᒋ ᐊᔭᐅᒡ ᐊᓂᔭ ᐊᔭᒥᐊᐅ ᒥᒋᐛᐱᔪᐤ ᐊᒋ ᐊᓱᒥᔭᑭᓄᐎᒡ᙮ ᒋ ᐸᑕᐅᒡ ᐊᓂᔭ ᐊᔭᒥᐊᐅ ᒥᒋᐛᐱᔪᐤ ᐃᔅᐱᔅ ᑲ ᐎᒐᐛᒡ ᐊᓂᔭ ᒐᓱᐛᔨᒋ ᑲ ᐱᒐᒡ ᐊᓂᔭ ᐊᔅᒋᔪᐤ ᐊᓐᑕ ᒋᓴᒪᓂᑐᐤ ᑲ ᐅᒋ ᐃᑎᓴᐛᑦ ᐃᔪᐛ ᐊᓐᑕ ᑲ ᑕᔨᒋ᙮ ᓇᐅᔅ ᐊᓐᑕ ᐃᓯ ᓂᔅᑕᒥᒡ ᒋ ᑎᑯᓐ ᐊᓐ ᒥᒋᐛᑉ᙮ ᐊᔅᒄ ᒋ ᐊᐱᑎᓐ ᐅ ᐊᔭᒥᐊᐅ ᒥᒋᐛᑉ ᐅᔅᑭᒡ ᑲ ᒋᓴᐅᒋᒪᐅᑦ ᐊᓂᔭᐧᑲ ᑎᐱᑦ᙮ 46ᒋᓴᒪᓂᑐᐤ ᒪᒃ ᒋ ᓇᐊᔨᑎᒻ ᑕᓐ ᑲ ᐃᓯ ᐱᒪᑎᓯᔨᒋ ᐊᓂᔭᐧᑲ ᒋᓴᐅᒋᒪᐤ ᑎᐱᑕ᙮ ᐅ ᒪᒃ ᑎᐱᑦ ᒋ ᑯᒂᒋᒪᐤ ᒋᓴᒪᓂᑐᐛ ᐊᒋ ᐃᑕᑦ, ᒋᑭ ᐱᔅᑎᓐ ᐊ ᒐᒋ ᐅᓯᑎᒪᑕᓐ ᐊᔭᒥᐊᐅᒋᐛᑉ, ᒋᔾ ᐊᓂᔭ ᒐᑭᑉ ᑲ ᐅᒋᓴᒪᓂᑐᒥᑕᔅᒃ᙮ 47ᒥᒄ ᒪᒃ ᓇᒪᔭᐤ ᐊᓂᔭᐧᑲ ᒋᓴᐅᒋᒪᐤ ᑎᐱᑦ ᑲ ᒥᔭᑭᓄᐅᑦ ᒐᒋ ᐅᓯᑕᑦ ᐊᓂᔭ ᒋᓴᒪᓂᑐᐛ ᐅᑦ ᐊᔭᒥᐊᐅ ᒥᒋᐛᐱᔪᐤ, ᐊᓂᔭᐧᑲ ᒋᓴᐅᒋᒪᐤ ᓴᓚᒥᓐ ᐊᐅᒄ ᐊᓐ ᑲ ᐅᓯᑕᑦ᙮”
48“ᒥᒄ ᒪᒃ ᒋᓴᒪᓂᑐᐤ ᒪᐅᒡ ᑲ ᒋᔅᑕᔨᑕᑯᓯᑦ ᓇᒪ ᐎᒋᐤ ᐊᓐᑕ ᐊᔭᒥᐊᐅᒋᐛᐱᒡ ᐃᔪᐛ ᐊᒋ ᐅᓯᑕᔨᒋ᙮ ᐊᐅᒄ ᐅᔭ ᑲ ᐃᑎᔅᑕᑦ ᐊᓐ ᐸᐃᒄ ᐅᒋᔅᒋᐛᐃᒐᓱᐤ ᐊᒋ ᐃᔅᒋᔄᔨᒂᓂ, 49ᐅᑎᐸᔨᒋᒐᐤ ᐃᑕᐤ,
‘ᒋᒋᒋᓯᑯᒡ ᐊ ᐅᒋ ᐅᒋᒪᐎᔭᓐ, ᐅ ᒪᒃ ᐊᔅᒋᔾ ᒧᔭᒻ ᐊ ᐊᐱᓴᓯᒡ ᑕᑎᐳᐛᑭᓐ ᓂᑦ ᐃᑕᔨᑕᓐ ᐊᓐᑕ ᒐᒋ ᑕᑎᔅᑕᔭᓐ ᓂᓯᑕ᙮
ᑕᓐ ᒪᒃ ᒋᐸ ᒋ ᐃᓯᓇᑯᑕᓇᐛᐤ ᐊᔭᒥᐊᐅᒋᐛᑉ ᐊᓐᑕ ᒐᒋ ᐊᔅᑕᔭᔅᑯᓯᔭᓐ ? 50ᓇᒪᐎᔾ ᐊ ᓂᔾ ᓂ ᐅᒋ ᐅᓯᑕᓐ ᒥᓯᐛ ᒐᒂᓐ ?’
ᒋ ᐃᔅᒋᔄᐤ ᒋᓴᒪᓂᑐᐤ᙮”
51ᔅᑎᐱᓐ ᐊᑐᐎᔅ ᑲ ᐊᑎ ᐃᔅᒋᔄᑦ, “ᒋᔅᒋᓯᑕᐤ ᒪ, ᐊᓂᔭ ᑕᓐ ᑲ ᐃᔅᐱᔅ ᓱᒋᔅᑎᒂᓇᒡ ᐊᓂᔭᐧᑲ ᐛᔅᑭᒡ ᒋᐧᑲᓂᓯᓄᐅᒡ ᐊᑯᓐ ᒧᔭᒻ ᑭᔭ ᒋᔨᐛᐤ ᐊ ᐃᔅᐱᔅ ᓱᒋᔅᑎᒂᓇᔭᒄ᙮ ᐊᑲ ᑕᑈᑎᒪᒄ ᐊᓐᑕ ᒋᑕᐃᐛᒡ, ᑭᔭ ᐊᑲ ᐎ ᓂᑐᑎᒺᒄ ᒋᓴᒪᓂᑐᐤ ᐅᑦ ᐃᔨᒧᐅᓐ᙮ ᒧᔭᒻ ᐊᓂᔭᐧᑲ ᒋᐧᑲᓂᓱᐛᐅᒡ ᐊ ᐃᑕᔨᑕᑯᓯᔭᒄ ᐊᑲ ᐅᒋ ᐎ ᓂᓇᐃᑐᐛᒡ ᑲ ᐸᔭᒋᓯᔨᒋ ᐊᒐᒂ᙮ 52ᐊᓂᔭᐧᑲ ᐛᔅᑭᒡ ᒋᐧᑲᓂᓱᐛᐅᒡ, ᒥᓯᐛ ᐅᒋᔅᒋᐛᐃᒐᓱᐛ ᒋ ᓂᓇᐧᑲᒋᐊᐅᒡ᙮ ᑭᔭ ᒋ ᓂᐸᐊᐅᒡ ᐊᓂᔭᐧᑲ ᑲ ᐸᒋ ᓂᑲᓐ ᐎᑎᒥᒋ ᒐ ᑎᑯᓯᓂᔨᒋ ᐊᓂᔭ ᐅᑯᐃᔅᑯᑕᑎᓯᐤ ᑲ ᐃᓯᓂᐧᑲᓱᔨᒋ᙮ ᐊᐅᒄ ᒪᒃ ᐅ ᑲ ᐎᔭᓯᐱᔅᑎᓇᒄ ᑭᔭ ᑲ ᓂᐸᐊᒄ᙮ 53ᐊᓐᒋᓐᒡ ᔅᒋ ᐸᑥᑯᐛᐅᒡ ᒋᓴᒪᓂᑐᐛ ᐅᐎᓱᐛᐅᓂᔪᐤ ᒥᒄ ᒪᒃ ᓇᒪ ᐃᔭᐱᒡ ᒋ ᐅᒋ ᓂᓇᐃᑎᒺᓇᐛᐤ᙮”
ᔅᑎᐱᓐ ᑲ ᐸᐱᒧᓯᓇᑕᐛᑭᓄᐅᑦ
54ᐃᔅᐱ ᒪᒃ ᐊᓐᒡ ᑲ ᒪᒧᐎᒡ ᑲ ᐸᑐᐛᒡ ᐊᓂᔭ ᔅᑎᐱᓇ ᐅᔭ ᐊ ᐃᔅᒋᔄᔨᒋ, ᒋ ᒥᔅᑎᒋᔄᐃᑯᒡ᙮
Acts 7.55-60 (Easter-5 Year A)
55ᒥᒄ ᒪᒃ ᔅᑎᐱᓐ ᐊ ᓴᑭᔅᒋᓇᔅᑲᑯᑦ ᑲ ᐸᔭᒋᓯᔨᒋ ᐊᒐᒂ ᒋ ᑎᔅᑎᓴᐳᐤ ᐊᓐᑕ ᒋᒋᒋᓯᑯᒡ ᐃᔅ, ᐊᑯ ᒂ ᐛᐸᑎᒺᑦ ᒋᓴᒪᓂᑐᐛ ᐅᒋᔅᑕᔨᑕᑯᓱᐅᓂᔪᐤ ᑭᔭ ᒂ ᐛᐱᒪᑦ ᒋᓴᓴ ᐊ ᓂᐳᔨᒋ ᐊᓐᑕ ᒋᓴᒪᓂᑐᐛ ᐅᒥᔪᓂᔨᒡ᙮ 56ᒋ ᐃᑕᐤ ᒪᒃ ᔅᑎᐱᓐ, “ᑭᓄᐛᐸᑎᒧᒄ ᒪ, ᓂ ᐛᐸᑕᓐ ᒋᒋᒋᓯᒄ ᐊ ᔪᑕᐱᔨᒡ ᑭᔭ ᓂ ᐛᐱᒪᐤ ᐃᔪᐤ ᐅᑯᓯᓴᓐ ᐊ ᓂᐳᐅᑦ ᐊᓐᑕ ᒋᓴᒪᓂᑐᐛ ᐅᒥᔪᓂᔨᒡ ᐃᑕᒐ᙮”
57ᒋ ᒋᐳᓂᒧᒡ ᐎᑐᑭᐛᐛ ᐊ ᐊᓯᒂᒡ ᐊᓐᒡ ᑲ ᐸᑐᐛᒡ ᐅᔭ ᐊ ᐃᔅᒋᔄᔨᒋ᙮ ᐊᑯ ᒥᓯᐛ ᒪᒧᐤ ᒂ ᐃᔅᐸᔨᑐᒡ ᐊᓐᑕ ᐊ ᑕᔨᒋ᙮ 58ᐊᑯ ᒂ ᐎᐎᑎᓴᐛᒡ ᐊᓐᑕ ᐊᓂᔭ ᐅᑕᓇᔪᐤ ᐊᑯ ᒂ ᐎ ᓂᐸᐊᒡ ᐊ ᐸᐱᐳᒧᓯᓇᑕᐛᒡ᙮ ᐊᓐᒡ ᒪᒃ ᑲ ᐸᑐᐛᒡ ᑕᓐ ᑲ ᐃᔅᒋᔄᔨᒋ ᔅᑎᐱᓇ ᒋ ᓂᑭᑎᒧᒡ ᐅᑦ ᐊᑯᐳᐛᐛ ᒐᒋ ᓇᑭᑐᐛᐸᑎᒥᔨᒋ ᐅᔅᒋᓂᒋᓱᐛ ᓴᓪ ᐊ ᐃᓯᓂᐧᑲᓱᔨᒋ᙮
59ᒋ ᐸᐱᐳᒧᓯᓇᑕᐛᐅᒡ ᒪᒃ ᐃᔭᐱᒡ ᐊᓂᔭ ᔅᑎᐱᓇ ᐊᑎ ᒪᒂᒡ ᐊ ᑕᑈᑕᔨᒋ ᐅᑎᐸᔨᒋᒐᐛ ᐊ ᐃᔅᒋᔄᔨᒋ, “ᐅᑎᐸᔨᒋᒐᐤ ᒋᓴᔅ, ᐅᑎᓐ ᓂᑦ ᐊᒐᐧᒄ᙮” 60ᔅᑎᐱᓐ ᒋ ᓂᐱᔅᑯᐳᐤ, ᐊ ᒋᔄᐛ ᑕᑈᑦ ᐊ ᐃᔅᒋᔄᑦ, “ᐅᑎᐸᔨᒋᒐᐤ, ᐛᐸᔨᑎᒧᐅᒡ ᐅᒥᒋᑥᐅᓄᐛᐤ᙮ ᐅᔭᔪᐤ ᑲ ᐃᑐᑐᐅᒡ ᐊᑲᐎᔾ ᒋᑭ ᐎ ᒪᑎᑯᔅᑲᑯᐅᒡ᙮” ᐊᐅᑯᐤ ᐅᔭ ᑲ ᐃᔅᒋᔄᑦ, ᐊᑯ ᒪᒃ ᒂ ᓂᐱᑦ᙮
Currently Selected:
ᐊᑈᔅᑕᓇᒡ 7: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
