ᐊᑈᔅᑕᓇᒡ 8
8
1ᓴᓪ ᒪᒃ ᒋ ᒥᔽᔨᑎᒻ ᐊᒋ ᓂᐸᐊᑭᓄᔨᒋ ᔅᑎᐱᓇ᙮
ᓴᓪ ᑲ ᓂᓇᐧᑲᒋᐊᑦ ᐊᓂᔭ ᑲ ᑕᑈᑎᒥᔨᒋ
ᐊᓂᔭ ᒪᒃ ᐊ ᐸᐃᑯᓂᔨᒡ ᐊ ᒋᓯᑲᔨᒡ ᐊᓐᒡ ᒪᒧᐤ ᑲ ᐊᔭᒥᐊᐛᑎᓯᒡ ᐊᓐᑕ ᒋᕈᓯᓕᒥᒡ ᐊᑯᑕ ᑲ ᐅᒋ ᒋᒋ ᓂᓇᐧᑲᒋᐊᑭᓄᐎᒡ᙮ ᐊᔪᐅᒄ ᐅᔭ ᐛᒋ ᓂᑭᑕᒡ ᒋᕈᓯᓕᒥᔪᐤ ᐊᑯ ᐊᓐᑕ ᒍᑎᔭᒡ ᑭᔭ ᓴᒪᕆᔭᐃᒡ ᒂ ᐎᒋᒡ᙮ ᒥᒄ ᐊᓐᒡ ᐊᑈᔅᑕᓇᒡ ᐊᑯᑕ ᐃᔭᐱᒡ ᑲ ᑕᒡ ᐎᔨᐛᐤ ᐊᓐᑕ ᒋᕈᓯᓕᒥᒡ᙮ 2ᐱᔅᒐ ᒪᒃ ᐊ ᐊᔭᒥᐊᐛᑎᓯᒡ ᓇᐸᐅᒡ ᒋ ᓇᐃᐧᑯᐛᐅᒡ ᔅᑎᐱᓇ, ᓱᒃ ᐊ ᒪᒡ᙮
3ᓴᓪ ᒪᒃ ᒋ ᐎ ᓂᓱᐅᓇᒋᐊᐤ ᐅᒪᒧᐊᔭᒥᐊᐛ᙮ ᒥᓯᐛ ᒥᒋᐛᐸ ᒋ ᐱᒐᐤ, ᐊ ᐎᐎᔅᐱᒥᑕᑦ ᐊᓂᔭ ᑲ ᑕᑈᑎᒥᒋ, ᑕᐱᔅᑯᓐ ᐃᔎᐛ ᑭᔭ ᓇᐸᐛ, ᒐᒋ ᓂᐸᐊᑭᓄᔨᒋ᙮
ᐱᓕᑉ ᑲ ᑭᒐᔅᒋᒧᑦ ᓴᒪᕆᔭᐃᒡ
4ᐊᓐᒡ ᒪᒃ ᑲ ᑕᑈᑕᒡ ᑲ ᒋᑎᓯᒧᒡ ᒋᕈᓯᓕᒥᒡ, ᒥᓯᐛ ᒋ ᐱᐸᒧᑕᐅᒡ ᐊ ᐛᐎᑕᒡ ᒥᔽᒋᒧᐅᓂᔪᐤ᙮ 5ᐱᓕᑉ ᒪᒃ, ᒋ ᐃᑐᑕᐤ ᐅᑕᓇᔪᐤ ᐊᓐᑕ ᓴᒪᕆᔭ ᐊᔅᒋᒡ ᐊ ᑎᑯᓂᔨᒡ᙮ ᐊᑯ ᒂ ᐛᐎᑎᒧᐛᑦ ᐊᓂᔭ ᐃᔪᐤ, ᒋᓴᓴ, ᐊ ᐊᐎᔨᒋ ᙭᙮ 6ᐊᑯ ᐊᓐᒡ ᐃᔪᒡ ᐃᔅᐱ ᑲ ᐸᑐᐛᒡ ᐊ ᐃᔨᒥᔨᒋ ᑭᔭ ᐊ ᐛᐸᑎᒺᒡ ᒪᒥᔅᑲᒡ ᒐᒂᔪᐤ ᐊ ᐃᑐᑎᒥᔨᒋ ᓇᔅᒡ ᓱᒃ ᒋ ᐎ ᓂᑐᑐᐛᐅᒡ᙮ 7ᒥᒋ ᐊᒐᐧᑯᒡ ᓱᒃ ᐊ ᑕᑈᒡ ᒋ ᐸᒋ ᐎᐎᔪᒡ ᒥᒐᑦ ᐊᐛᔪᐛ ᐊ ᑕᔨᒋ ᐊᓂᔭ ᐊᒋ ᐱᒋᔅᑯᐛᒡ᙮ ᐊᓐᒡ ᒪᒃ ᐊᑲ ᓂᔅᑐᓯᒡ, ᑭᔭ ᐊᓐᒡ ᑲ ᒪᔅᒋᓯᒡ, ᒋ ᒥᓏᒋᐊᑭᓄᐅᒡ᙮ 8ᒋ ᒥᔅᑎᒧᒋᒐᔨᑕᑭᓄᐤ ᒪᒃ ᐊᓐᑕ ᐊᓐ ᐅᑕᓇᐤ᙮
ᓴᐃᒥᓐ ᑲ ᒪᒥᑕᐛᑎᓯᑦ
9ᐊᓐᑕ ᒪᒃ ᐊᓐ ᐅᑕᓇᐤ ᒋ ᑕᐤ ᓇᐸᐤ ᓴᐃᒥᓐ ᐊ ᐃᓯᓂᐧᑲᓱᑦ ᐊᒋ ᒪᒥᑕᐛᑎᓯᑦ᙮ ᓴᔅ ᒪᒃ ᐛᔅᑭᒡ ᐊᓐᒡ ᓴᒪᕆᔭ ᐃᔪᒡ ᒋ ᒥᔅᑲᑕᔨᒪᐅᒡ ᑕᓐ ᐊ ᐃᑎᔨᒋ ᐊᓂᔭ ᓇᐸᐛ᙮ ᑭᔭ ᒋ ᐃᑕᒋᒥᓱᐤ ᐊᓐ ᓴᐃᒥᓐ ᒋᒋᐛ ᐊᐛᓐ ᐊ ᐊᐎᑦ᙮ 10ᒥᓯᐛ ᒪᒃ ᐊᐛᓐ ᒋᒋᐛ ᑲ ᐃᑕᔨᑕᑯᓯᑦ ᑭᔭ ᓄᑕᔅ ᑲ ᐃᑕᔨᑕᑯᓯᑦ ᐊᓐᑕ ᐅᑕᓇᒡ ᓇᔅᒡ ᒋ ᓂᑐᑐᐛᐅᒡ ᐊᓂᔭ ᓴᐃᒥᓇ, ᐊᑯ ᐊᓐᒡ ᐃᔪᒡ ᒋ ᐃᑕᐅᒡ ᐊ ᐊᔨᒧᒪᒡ ᐊᓂᔭ ᓴᐃᒥᓇ, “ᐅ ᓇᐸᐤ, ᐊᔭᐤ ᒪᒥᑕᐛᑎᓯᐅᓂᔪᐤ ᒋᓴᒪᓂᑐᐛ ᐊ ᑕᔨᒋ ᐊ ᐅᑎᓇᐧᒃ᙮ ᐊᔪᐤ ᒋ ᐃᑕᔨᒪᐅᒡ ᐊᐅᑯᓐ ᐊ ᐊᐎᔨᒋ ᒋᓴᒪᓂᑐᐛ ᑲ ᐸᒋ ᐃᑎᓴᐛᔨᒋ ᐊᓂᔭ ᐅᒋ ᐊ ᒪᒥᑕᐛᑎᓯᔨᒋ᙮” 11ᓇᔅᒡ ᒋ ᓂᑐᑕᑯᐤ ᐊᓂᔭᔪᐛ ᐃᔪᐛ ᐛᔅ ᓴᔅ ᐛᔅᑭᒡ ᒋ ᒥᔅᑲᑕᔨᑎᒥᐊᐤ ᐊᓂᔭᔪᐛ ᐃᔪᐛ ᐊ ᒪᒥᑕᐛᑎᓯᑦ᙮ 12ᐃᔅᐱ ᒪᒃ ᐱᓕᐸ ᑲ ᑎᑯᓯᓂᔨᒋ ᐊ ᐛᐎᑎᒪᑯᒡ ᒥᔽᒋᒧᐅᓂᔪᐤ, ᐊ ᑎᐸᒋᒪᔨᒋ ᒋᓴᔅ ᙭ᑕ ᑭᔭ ᒋᓴᒪᓂᑐᐛ ᐅᒋᓴᐅᒋᒪᐅᓂᔪᐤ ᐊ ᐊᔨᒧᑎᒥᔨᒋ, ᒋ ᑕᑈᑐᐛᐅᒡ, ᑕᐱᔅᑯᓐ ᒪᒃ ᓇᐸᐅᒡ ᑭᔭ ᐃᔎᐅᒡ ᒋ ᓯᑲᐃᑐᐛᑭᓄᐅᒡ᙮ 13ᐊᓐ ᒪᒃ ᓴᐃᒥᓐ ᑲ ᒪᒥᑕᐛᑎᓯᑦ ᒋ ᑕᑈᑎᒻ ᑭᔭ ᐎᔾ ᑭᔭ ᒋ ᓯᑲᐃᑐᐛᑭᓄᐤ᙮ ᐊᑯ ᒪᒃ ᒧᔅ ᑲᒋ ᐱᐸᐎᒐᐛᑦ ᐊᓂᔭ ᐱᓕᐸ, ᒋ ᒥᔅᑲᑕᔨᑎᒻ ᑭᔭ ᑕᓐ ᑲ ᐃᓯ ᒪᒥᔅᑲᒡ ᐛᐸᑕᐧᒃ᙮
Acts 8.14-17 (Epiphany-1 Year C)
14ᐃᔅᐱ ᒪᒃ ᐊᓐᒡ ᐊᑈᔅᑕᓇᒡ ᐊᓐᑕ ᒋᕈᓯᓕᒥᒡ ᑲ ᑕᒡ, ᐱᔭᑕᒡ ᐊᓂᔭᔪᐛ ᐃᔪᐛ ᐊᓐᑕ ᓴᒪᕆᔭ ᑲ ᑕᔨᒋ ᐊ ᑕᑈᑎᒥᔨᒋ ᒋᓴᒪᓂᑐᐛ ᐅᑦ ᐃᔨᒧᐅᓂᔪᐤ, ᒋ ᐃᑎᓴᐛᐅᒡ ᐊᓐᑕ ᐱᑕᕋ ᑭᔭ ᒠᓇ᙮ 15ᐃᔅᐱ ᒪᒃ ᑕᑯᓯᓂᒡ ᐊᓐᑕ, ᒋ ᐊᔭᒥᐊᔅᑎᒧᐛᐅᒡ ᐊᓂᔭ ᑲ ᑕᑈᑎᒥᔨᒋ ᒐᒋ ᐊᔭᐛᔨᒋ ᑲ ᐸᔭᒋᓯᔨᒋ ᐊᒐᒂ᙮ 16ᐛᔅ ᐊᔅᒄ ᓇᒪ ᐅᒋ ᐊᔭᐛᐅᒡ ᑲ ᐸᔭᒋᓯᔨᒋ ᐊᒐᒂ᙮ ᒥᒄ ᒋ ᓯᑲᐃᑐᐛᑭᓄᐅᒡ ᐅᑎᐸᔨᒋᒐᐛ ᒋᓴᓴ ᐅᑦ ᐃᓯᓂᐧᑲᓱᐅᓂᔪᐤ ᐅᒡ᙮ 17ᐊᑯ ᒪᒃ ᐱᑕᕐ ᑭᔭ ᒠᓐ ᒂ ᑕᒋᓇᒡ ᐊᓂᔭᔪᐛ ᐃᔪᐛ, ᐊᑯ ᒪᒃ ᑲ ᐊᔭᐛᔨᒋ ᑲ ᐸᔭᒋᓯᔨᒋ ᐊᒐᒂ᙮
18ᐃᔅᐱ ᓴᐃᒥᓐ ᐎᔭᐱᒪᑦ ᐊ ᐊᔭᐛᔨᒋ ᑲ ᐸᔭᒋᓯᔨᒋ ᐊᒐᒂ ᐊᓂᔭᔪᐛ ᐊᑈᔅᑕᓇ ᑲ ᑕᒋᓇᔨᒋ, ᒋ ᐎ ᒥᔭᐤ ᓱᓇᔭᔪᐤ ᐊᓂᔭ ᐱᑕᕋ ᑭᔭ ᒠᓇ, 19ᐊ ᐃᑕᑦ, “ᐸᒋ ᒥᔨᒄ ᐅ ᓱᐧᑲᑎᓯᐅᓐ, ᐊᑯ ᒪᒃ ᒥᒄ ᐊᐛᓐ ᐊ ᑕᒋᓂᒃ ᒐ ᐊᔭᐛᑦ ᑲ ᐸᔭᒋᓯᔨᒋ ᐊᒐᒂ᙮”
20ᐊᑯ ᐱᑕᕐ ᒂ ᐃᑕᑦ, “ᒋᑭ ᓂᓱᐅᓇᑎᓯᓐ ᑭᔭ ᒋᓱᓇᔭᓂᒻ ᒋᑭ ᓂᓱᐅᓇᑎᓐ ᐊ ᐃᑕᔨᑎᒧᐎᓇ ᓱᓇᔭᐤ ᒐᒋ ᐊᐱᒋᑕᔨᓐ ᒐᒋ ᐅᑎᓂᒧᑦ ᒋᓴᒪᓂᑐᐤ ᐅᒥᔨᐛᐅᓐ᙮ 21ᓇᒪ ᒋᑭ ᒋ ᐎᒋᑐᔅᒐᒥᓇᓐ, ᐛᔅ ᓇᒪ ᑯᐃᔅᑯᓇᑯᓐ ᒋᐱᒪᑎᓯᐅᓐ ᐊᓐᑕ ᒋᓴᒪᓂᑐᐤ ᐊ ᑕᑦ᙮ 22ᐳᓂ ᐅ ᑕᓐ ᐊ ᐃᓯ ᒥᒋ ᒪᒥᑐᓇᔨᑎᒥᓐ, ᓇᔅᒡ ᐎᔾ ᒋᑭ ᐛᐸᔨᑎᒪᒄ ᐅᑎᐸᔨᒋᒐᐤ ᓂᑐᑎᒧᐅᑕ᙮ 23ᐛᔅ ᓂ ᐛᐸᑕᓐ ᓇᔅᒡ ᐊ ᐊᔭᔨᓐ ᐅᑕᔨᑎᒧᐅᓐ, ᑭᔭ ᒋᒥᒋᑥᐅᓐ ᐊ ᒪᒥᒋᑯᓂᑯᔨᓐ,” ᒋ ᐃᑕᐤ ᐱᑕᕐ ᐊᓂᔭ ᓴᐃᒥᓇ ᑲ ᒪᒥᑕᐛᑎᓯᔨᒋ᙮
24ᐊᑯ ᓴᐃᒥᓐ ᒂ ᐃᑕᑦ ᐊᓂᔭ ᐱᑕᕋ ᑭᔭ ᒠᓇ, “ᐊᔭᒥᐊᒄ ᐅᑎᐸᔨᒋᒐᐤ ᒐ ᐊᑲ ᒋ ᐅᑎᑕᐅᑯᔭᓐ ᐅ ᑲ ᐃᔅᒋᔄᔭᒄ᙮”
25ᐃᔅᐱ ᒪᒃ ᐱᑕᕐ ᑭᔭ ᒠᓐ ᑲᒋ ᐃᓯ ᐛᐎᑎᒧᐛᒡ ᐊᓂᔭᔪᐛ ᐃᔪᐛ ᐊᓐᑕ ᐅᑕᓇᒡ ᑲ ᑕᔨᒋ ᑕᓐ ᐊ ᐃᓯ ᒋᔅᒐᔨᒪᒡ ᐅᑎᐸᔨᒋᒐᐛ ᒋᓴᓴ, ᑭᔭ ᐊ ᐛᐎᑎᒧᐛᒡ ᒥᔽᒋᒧᐅᓂᔪᐤ ᐊᑯ ᒂ ᒋᐛᒡ ᐊᓐᑕ ᒋᕈᓯᓕᒥᒡ᙮ ᒪᒂᒡ ᒪᒃ ᐊ ᐊᑎ ᐱᒧᑕᒡ ᒋ ᐛᐎᑎᒧᒡ ᒥᔽᒋᒧᐅᓂᔪᐤ ᐊᓐᑕ ᓂᓇᐧᑯᐤ ᐅᑕᓇᐛ ᐊᓐᑕ ᓴᒪᕆᔭ ᐊᔅᒋᒡ ᑲ ᑎᑯᓂᔨᒋ᙮
ᐱᓕᑉ ᑲ ᓂᒋᔅᑯᐛᑦ ᓇᐸᐛ ᐃᑎᔪᐱᔭ ᑲ ᐅᒋᔨᒋ
Acts 8.26-40 (Easter-5 Year B)
26ᑎᐸᔨᒋᒐᓱᐤ ᐅᑦ ᐊᓐᒋᓂᒪ ᒪᒃ ᒋ ᐃᔨᒪᐊᐤ ᐱᓕᐸ, ᐊ ᐃᔅᒋᔄᔨᒋ, “ᐱᓯᑯ ᐃᑐᑕ ᒪᒃ ᓴᐅᓄᑕᒡ ᐃᔅ ᐊᓂᒪ ᒪᔅᑭᓇᒡ ᒋᕈᓯᓕᒥᒡ ᐃᔅᐱᔅ ᑲ ᐃᑎᒧᒡ ᑲᓴᐃᒡ ᑲ ᐅᑎᒧᒡ᙮” ᐸᐧᑯᑎᔅᑭᒥᑲᒡ ᒪᒃ ᐱᒧᐤ ᐊᓐ ᒪᔅᑭᓄᐤ᙮ 27ᒋ ᐱᓯᑯᐤ ᒪᒃ ᑭᔭ ᒋ ᔅᑐᑕᐤ ᐱᓕᑉ, ᒋ ᓂᔅᑯᐛᐤ ᑯᐸᓇᐛ ᐃᑎᔪᐱᔭ ᐊ ᐃᓯ ᒋᐛᔨᒋ, ᒋᕈᓯᓕᒥᒡ ᐊ ᐅᑐᑕᔨᒋ ᐊᒋ ᓇᒋ ᐊᔭᒥᐊᔨᒂᓂ ᐊᓐᑕ, ᓇᔅᒡ ᐊ ᒋᔅᑕᔨᑕᑯᓯᑦ ᑲ ᑎᐸᔨᒥᑯᑦ ᑲᓐᑕᔅ ᒋ ᐃᓯᓂᐧᑲᑕᑭᓄᐤ, ᐃᑎᔪᐱᔭ ᐃᔪᒡ ᐅᒋᓴᐅᒋᒪᔎᒧᐛᐛ, ᐊᓐ ᑲ ᓇᑭᑐᐛᔨᑎᒺᑦ ᒋᓴᐅᒋᒪᔎᐛ ᐅᓱᓇᔭᓂᒥᔪᐤ ᑭᔭ ᐊ ᐃᓯ ᑎᐸᔨᑎᒥᔨᒋ᙮ 28ᐊᑎ ᒋᐛᑦ ᐅᑎᑎᐱᑕᐸᓇᔅᑯᒡ ᐊ ᐊᐱᑦ, ᒋ ᐃᔨᒥᑕᐤ ᐊᓂᔭ ᒥᓯᓇᐃᑭᓂᔪᐤ ᑲ ᒥᓯᓇᐊᒥᔨᒋ ᐊᓂᔭᐧᑲ ᐅᒋᔅᒋᐛᐃᒐᓱᐛ ᐊᐃᓴᔭᔨᒋ᙮ 29ᐊᑯ ᒪᒃ ᑲ ᐸᔭᒋᓯᑦ ᐊᒐᐧᒄ ᐊᑕᑦ ᐱᓕᐸ, “ᒥᒋᒪ ᐃᑐᑕ ᓇᑕ ᒪᒃ ᐊᓐ ᑎᑎᐱᑕᐸᓇᔅᒄ᙮”
30ᐱᓕᑉ ᒪᒃ ᒋ ᐃᔅᐸᑕᐤ ᐊᓐᑕ ᐊᓂᔭ ᓇᐸᐛ ᐊ ᑕᔨᒋ ᑭᔭ ᒋ ᐸᑐᐛᐤ ᐊ ᐃᔨᒥᑕᔨᒋ ᒥᓯᓇᐃᑭᓂᔪᐤ ᐅᒋᔅᒋᐛᐃᒐᓱᐛ ᐊᐃᓴᔭᔨᒋ ᑲ ᒥᓯᓇᐊᒥᔨᒋ᙮ ᐊᑯ ᐱᓕᑉ ᐊᑕᑦ, “ᒋ ᓂᔅᑐᑕᓐ ᐊ ᐊᓐ ᒥᓯᓇᐃᑭᓐ ᑲ ᐃᔨᒥᑕᔨᓐ ?”
31ᐊᑯ ᒂ ᐃᑎᑯᑦ, “ᑕᓐᑕ ᒐᒋ ᐅᒋ ᓂᔅᑐᑎᒪᓐ ᐸᑐᔅ ᐊᐛᓐ ᐸᒋ ᒋᔅᑯᑎᒧᐅᒐ ?” ᐊᑯ ᐛᓴᒪᑦ ᐱᓕᐸ ᒐᒋ ᐎᑎᐱᒥᑯᑦ᙮ 32ᒋ ᐃᔨᒥᑕᐛᐤ ᒋᓴᒪᓂᑐᐛ ᐅᑦ ᐃᔨᒧᐅᓂᔪᐤ ᐊᓐᑕ ᑲ ᐃᑎᔅᑕᔨᒡ,
ᒋ ᐃᑐᑕᑭᓄᐤ ᒧᔭᒻ ᒪᔭᑕᓂᓴ ᒐᒋ ᓂᐸᐊᑭᓄᐅᑦ, ᑭᔭ ᒧᔭᒻ ᐊ ᐊᐱᓯᓯᑦ ᒪᔭᑕᓂᔅ ᐊᑲ ᒋᔅᑐᑦ ᐅᑎᔅᑯᐤ ᐊᓂᔭ ᑲ ᒧᓱᑯᑦ, ᓇᒪ ᐅᒋ ᐃᔅᒋᔄᐤ ᒐᒂᔪᐤ᙮
33ᒋ ᒪᔭᔨᒪᑭᓄᐤ, ᑭᔭ ᓇᒪ ᑯᐃᔅᒄ ᐅᒋ ᐃᓯ ᑎᐸᔅᑯᓇᑭᓄᐤ᙮ ᐊᐛᓐ ᒪᒃ ᒐᒋ ᐎᑎᒺᑦ ᐅᑦ ᐊᔭᓂᔅᒐ ᐱᒪᑎᓯᐅᓂᔪᐤ ᐛᔅ ᒋ ᐳᓂᐱᔪᐤ ᐊ ᐱᒪᑎᓯᑦ ᐅᑕ ᐊᔅᒋᒡ᙮
ᐊᔪᐅᒄ ᐅᔭ ᑲ ᐃᑎᔅᑕᔨᒡ ᑲ ᐃᔨᒥᑕᑦ᙮
34ᐊᓐ ᓇᐸᐤ ᒪᒃ ᒋ ᑯᒂᒋᒪᐤ ᐱᓕᐸ ᐊ ᐃᑕᑦ, “ᐸᒋ ᐎᑎᒧᐎ, ᐊᐛᔪᐛ ᑲ ᐊᔨᒧᒪᑦ ᐅ ᐅᒋᔅᒋᐛᐃᒐᓱᐤ, ᐎᔾ ᐊ ᒋ ᐊᔨᒧᒥᓱᐤ ᑭᔭ ᒪᒃ ᑯᑎᑲ ᐊᐛᔪᐛ ᒋ ᐊᔨᒧᒪᐤ ?” 35ᐊᑯ ᐱᓕᑉ ᐎᔭᐎᑎᒧᐛᑦ ᒋᒋᒥᓯᓇᐃᒐᐅᓂᔪᐤ ᐊ ᐅᒋ ᒋᒋᐱᔨᑦ, ᑭᔭ ᒋ ᐊᔨᒧᑎᒧᐛᐤ ᒥᔽᒋᒧᐅᓂᔪᐤ ᒋᓴᓴ ᐊ ᐊᔨᒧᒥᑭᓄᔨᒋ᙮
36ᒪᒂᒡ ᒪᒃ ᐊ ᐊᑎ ᐱᒥᐱᔨᒡ ᑎᑎᐱᑕᐸᓇᔅᑯᒡ, ᒋ ᐅᑎᑎᒧᒡ ᐊᓐᑕ ᐊ ᑎᑯᓂᔨᒡ ᓂᐱᔪᐤ, ᐊᓐ ᓇᐸᐤ ᒪᒃ ᒋ ᐃᑕᐤ, “ᐛᐸᑕ, ᒪᐅ ᓂᐱᔾ, ᒐᒂᓐ ᒐ ᓂᑲᓂᑯᔭᓐ ᐊ ᓂᑐᐛᔨᑎᒪᓐ ᒐᒋ ᓯᑲᐃᑐᐛᑯᐅᔭᓐ ?” 37ᐱᓕᑉ ᒪᒃ ᒋ ᐃᑕᐤ, “ᑕᑈ ᑎᔭᑈᐅᒐᔨᒪᐅᑕ ᒋᓴᔅ ᒥᓯᐛ ᒋᑕᐃᒡ ᐅᒡ, ᒋᑭ ᒋ ᐃᑐᑕᑯᐅᓐ᙮” ᐊᑯ ᐊᓐ ᓇᐸᐤ ᒂ ᐃᔅᒋᔄᑦ, “ᓂ ᑕᑈᑕᓐ ᒋᓴᔅ ᙭ ᐊ ᐊᐎᑦ ᒋᓴᒪᓂᑐᐤ ᐅᑯᓯᓴ᙮” 38ᒋ ᐃᔅᒋᔄᐤ ᒐᒋ ᒋᒥᐱᔨᒋ ᑎᑎᐱᑕᐸᓇᔎ, ᑭᔭ ᑕᐱᔅᑯᓐ ᓂᔭᓯᐸᒡ ᒂ ᐊᑎ ᐱᑭᔅᑐᐛᑕᒡ᙮ ᐊᑯ ᐱᓕᑉ ᓴᑲᐃᑐᐛᑦ ᐊᓂᔭ ᓇᐸᐛ᙮ 39ᐃᔅᐱ ᒪᒃ ᑲᒋ ᐸᒋ ᑲᐸᒡ ᓂᐱᒡ ᐅᒋ, ᐱᓕᑉ ᒋ ᐅᑎᓂᑯᐤ ᑎᐸᔨᒋᒐᓱᐛ ᐅᑦ ᐊᒐᐧᑯᔪᐛ᙮ ᓇᒪ ᒪᒃ ᒥᓐ ᐅᒋ ᐛᐱᒪᐤ ᐊᓐ ᓇᐸᐤ ᐊᓂᔭ ᐱᓕᐸ, ᒂ ᐊᑎ ᒋᐛᑦ, ᐊ ᒧᒋᒐᔨᑕᐧᒃ᙮ 40ᐱᓕᑉ ᒪᒃ ᐊᓱᑕᓯᒡ ᒋ ᐅᒋ ᑕᐤ, ᐊᑯᑕ ᐊᓐᑕ ᐅᒋ ᐊᓱᑕᓯᒡ ᐊ ᐛᐎᑕᐧᒃ ᒥᔽᒋᒧᐅᓂᔪᐤ ᐊᓐᑕ ᒥᓯᐛ ᐅᑕᓇᐛ ᐱᐃᒻ ᑲ ᑎᑯᓯᐧᒃ ᓯᓴᕆᔭᒡ᙮
Currently Selected:
ᐊᑈᔅᑕᓇᒡ 8: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
