मर्कूस 11
11
येसुलाई परमेस्वरए उमिनताव राजा याजैव
(मत्ती २१:१-११; लूका १९:२८-४०; यूहन्ना १२:१२-१९)
1येसु उसिसरास यरूसलेम छ्योकाव जैतून दाँदाकिन जाँ होकसैकाव बेथफागे स़ोनो बेथानिया नाखार याकेस्नावत येसुए ऩेब्लो उसिसनिलाई अइ लिद ङ़ादा निपरींक्यो, 2“जिन आव गेङ़ाकाव नाखारल बाचिन्केदा, नल जिन्पसिउ प़ाइँना तोबो आःपै सुए ज़ यामाचेप्ताव बछेरा दैन्या जिन्ले। नोलाई पला·द रैचिन्के। 3सुवाराए, ‘काराव पला·द जिन्लाँज़्याव?’ है यादाचिन्किन, ‘गिनप्रभुलाई चाहिज़्या, बेहार ज़ फर्कैद याचिवा दी,’ है यारादोचिन,” है दाद, नोनिलाई निपरींक्यो। 4है जैद नोनी नाखारल बाद येसुए है उनिदोव मिताव ज़ बछेरालाई येमक, झ़िम ङ़ाकाव साँबिलाक सुर्सिउ दैकिनी। नोलाई निपला·ज़्याक ज़, 5नकाव च्याँःसिद लिज़्यावराए, “काराव पला·द जिन्लाँज़्याव?” है यारादोक ते, 6नोनी येसुए उनिपैव मिताव ज़ है निरादोक ते भैंःद याराएकेर।
7है जैद नोनी नो बछेरालाई येसुए ल्योक लाँद याक्वार ओतर्त याझाःवत येसुए नोलाई चेप्क्यो। 8नकाव लिज़्याव मिँराए याक्वार येमल तैंदिकेर। ख्वाराए फरी पाखाजीलाव स्यावलार फूइँद तैंदिकेर। 9नो माहोल्यार ख्वार येसुए ओङ़ात, ख्वार उछींत जैसिद अइ लिद क़िए क़िए बाकेर,
“होसन्ना! परमेस्वरए उमिनत हुव राजा धन्याकाव ओताक।#भज ११८:२५-२६
10गेपुर्खा दाऊद राजाए उमिनत हुव राज्या जय जय ओताक,
स्वर्गताव परमेस्वरए उमिन बनै ओघ्योःक।”
11है जैद नोर यरूसलेमल याकेसोत येसु ध्यान झ़िमल पसिद आदा होदा प़ाइँदा चिऊद जाँ कुबिला ओतावए ननी पुलुस्द बाह्र जना उसिसरास बेथानियादा बासिनाकेर।
ओसै माल्यो नेभारा सीं
(मत्ती २१:१८-१९)
12हो पराःती बेथानियानी पुलुस्द याबाज़्याक येसु ओकरेक, 13जाँ होकसै ओख्यार ल़पलपौ नेभारा सीं तोबो रँःद ‘ओसैर ले सैं’ लिद उचिऊनाक ओसै तोबो ब मादैक्यो। सैन्या बेला ओमातातावए ओख्या वाज़ उलिज़्याव। 14निताव रँःद येसुए नो सींलाई, “आकिनी नसै सुए ज़ ज़्याव तादैरक,” है ओदोज़्याव उसिसराए थैकेर।
येसुए बेपारीरालाई ध्यान झ़िमनी ओरापले·व
(मत्ती २१:१२-१७; लूका १९:४५-४८; यूहन्ना २:१३-२२)
15हाःत ज़ येसु उसिसरास यरूसलेमल केस्केर। ओल ध्यान झ़िमल पसिद नलाव लँःज़्यावर यो·ज़्यावरालाई पले·द, पैसा त़ोज़्यावराए यातेबलर पल्तैद्याद, कुइतम यो·ज़्यावराए याकुर्चीर ब ख्याद्याद, 16सुलाई ज़ यासमानरास ध्यान झ़िमलाव घ्याँ आदा होदा बाव मायाद, 17येसुए नोरालाई, “धर्मसास्त्रल परमेस्वरए ओपाँ इताव सर्सिउ ओमालिज़्याव रो?
‘ङा ङाझ़िम प़ाइँ जातलाव मिँराए जूँनी
पोंखारिन्या झ़िम जैसिउ लिज़्या।’#यसै ५६:७; यर ७:११
जे ते झन आवलाई चोरराए पुप मिताव जैद जेनै,” है लिद यासथैक्यो।
18नो पाँ नलाव मुख्या पुजारीर स़ोनो सास्त्रीराए थैद यारिस चोद, ‘आवलाई कै जैद गेसैःके?’ लिद निउँ खिम्केर। खाली माहोल्या भरी येसुए ओपाँत बनै अचम्ब ताद यालिज़्यावए नो सैःव पैंज़्यावर येसुलाई रँःद याछे·ज़्याव।
19ऱिमदा ऱिमदा येसु उसिसरास सहरनी पुलुस्द बाकेर।
युँ सुहुप्द पोंखारिन्या
(मत्ती २१:२०-२२)
20हो पराःती छकाल्न्या येसु उसिसरास नो नेभारा सीं लिज़्याव येमलाव घ्याँ याबाज़्याक नो सीं ओजरानी थँद उलिज़्याव रँःकेर। 21पत्रुसए नो ङ़ादाङाव चेतैद, “गुर्बा चिऊसाँकी, सराप नयो नेभारा सीं ते उथँव ची ओल्यो,” है ओदोक ते, 22येसुए उसिसरालाई, “परमेस्वरए ल्योदा जेयुँ उहुप्क। 23ङा जेलाई साचो है ङादाचिज़्या, जोए उयुँ आदा होदा माजैद, ‘जुनी ब ङादैया ज़’ लिद उयुँ उहुप्किन, तोबो हाँलाई, ‘नँ नतिन भोस्द समुन्द्रल ख्यासिन्के,’ है ओदोकिन, नो हैज़ तान्या ले। 24है जैद ङा जेलाई है ङादाचिज़्या, जोत जेयुँ हुप्द ‘ङादैया ज़’ है लिद जेपोंखारिकिन नो दैन्या ज़ जेले। 25परमेस्वरलाई जेपोंखारिन्या बेलाक सुवारास माखैव काता पाँर जेयुँल जेनैकिन, ङ़ादा होलाई ऱास्द बल्ल पोंखारिच्यो। हो ताकिन ची स्वर्गताव जेबाबुए जेलाई मनी जेदोव पाप भरी ऱास्न्या ले। 26[फरी नो मिँलाई ऱासो जेमाभैंःकिन स्वर्गताव जेबाबुए जेलाई ब ऱास्न्या माले,”] है यादोक्यो।
येसुए ओहक स़ोनो यूहन्नाए ओहक
(मत्ती २१:२३-२७; लूका २०:१-८)
27येसु उसिसरास फरी यरूसलेमल बाद ध्यान झ़िमल यालिज़्याक नलाव मुख्या पुजारीर, सास्त्रीर स़ोनो यहूदीराए यास़ेरर येसुए ल्योक हुद, 28“आव नदोज़्याव य़ेनर नँलाई सुए है उदींव, सुए हक उईंव?” है यादोक ते, 29येसुए, “ङा ब जेलाई तोबो है ङादाचिदा, नोए ओजवाप जेयाँकिन ङा ब आव य़ेन दान्या हक सुए ओयाँव है ङादाचिया,” है दाद, 30“ऱील सछैंज़्याव यूहन्नाए ओय़ेन परमेस्वरए ल्योनी ताव सैं मिँराए ल्योनी ताव? है दाँचिके,” है ओरादोक ते, 31नोर या याल, “ ‘यूहन्नाए ओय़ेन परमेस्वरनी ताव’ है गेद्या गेलिकिन, ‘हुकी काराव यूहन्नाए ओपाँ जेमाभैंःव?’ है दान्या ले। 32फरी ‘मिँनी’ है गेद्या गेलिकिन मिँराए ल्योनी ओछ्यास लिज़्या,” है लिकेर। मिँ भरिए यूहन्नालाई अगमबक्ता ज़ है लिद थ·रैद यानैज़्यावए छे·द नै यालिज़्याव। 33है जैद नोराए येसुलाई, “गेमासैंए,” है दोकेर। हाःत ज़ येसुए मनी, “हो ची ताकिन्दा ङालाई आव य़ेन दान्या हक सुए ओयाँव ङा ब है ङामादाच्यो,” है यादोक्यो।
Currently Selected:
मर्कूस 11: NKham
Highlight
Share
Copy
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
