मर्कूस 12
12
अधिया कमैज़्यावराए घर्ती
(मत्ती २१:३३-४६; लूका २०:९-१९)
1येसुए घर्ती झाःद अइ लिद यासथैक्यो, “तोबो मिँए ओएँः भरिल जोम्परसै झाःद, प़ाइँनी भार्नाए घिरिद, खादर घोद जोम्परसै पीन्या कोलो तोबो झाःद, मिँ लिन्या खोपोरा ब तोबो जैद, नो एँःलाई अधियाल याद, ओल तोबो तादा देसङ लिनाके दी।#यसै ५:१-२ 2नलाव जोम्परसैर किन्या बेला ओतावत तोबो ओय़ेन दाज़्यावलाई उजुँ भरी च़ानाव परींक्यो दी। 3नो अधिया कमैज़्यावराए झन नोलाई क्योःद प़ोद रितो ज़ खेपैकेर दी। 4फरी छींनी छुत ओय़ेन दाज़्यावलाई उपरींक नोलाई मनी ओङ़ै पा·द्याद बीज्यात जैकेर दी। 5छींनी फरी तोबोलाई उपरींक नोलाई ते झन सैःकेर दी। हिताव ज़ छुत ओरापरींवर ब ख्वारालाई याराप़ोकेर दी, ख्वारालाई यारासैःकेर दी।
6“ओमापरींव जम्मा तोबो बनै उयुँलाव ओज़ा वाज़ रहिके दी। है जैद एँःए ओर्गेए, ‘आवलाई ताकिन ओमान नैदिर सैं’ लिद प़ाइँरानी छींनी नो ओज़ालाई ब परींक्यो दी। 7खाली नो ओज़ा उहुज़्याव रँःद नो अधिया कमैज़्यावर झन या या पाँसिद, ‘आव ते एँः दैन्या मिँ ची, आवलाई गेसैःकिन आव एँः गेमीं ज़ तान्या ले,’ लिद, 8नोलाई क्योःद सैःद पाखाङ ख्याकेर दी।”
9नकिन येसुए नो मुख्या पुजारीर स़ोनो सास्त्रीरालाई, “नो एँःए ओर्गेए अधिया कमैज़्यावरालाई कै याजैवके लिक ते, नोर प़ाइँलाई ज़ सैःद नो एँः छुतरालाई यान्या ले,” है दाद, 10येसुए नोरालाई फरी, “जे आव धर्मसास्त्रलाव पाँ जेप़रिखेहो,
‘भुलीराए कान्ल ज़ माज़्यासे लिद याख्याव लुँ
नो ज़ झन भुयाँरलाव लुँ ताके।
11आव ओल परमेस्वरनी ताव पाँर ज़,
इताव रँःद गे अचम्ब गेताज़्या।’ ”#भज ११८:२२-२३
12नकिन नो मुख्या पुजारीर स़ोनो सास्त्रीराए ‘आव घर्ती ते गेङ़ैत ज़ झाःद्यासिक्यो’ लिन्या सैंद येसुलाई क्योःव पैंकेर। खाली ओलस लिज़्याव माहोल्यारालाई रँःद छे·केर। है जैद कैज़ माजैद अइज़ बाकेर।
माहाराजालाई सिर्मा यान्या सैं मायान्या
(मत्ती २२:१५-२२; लूका २०:२०-२६)
13नोराए छींनी येसुए ओपाँ क्योःद्यान्याए जूँनी फरिसीर स़ोनो हेरोद राजासकावरालाई येसुए ल्योक यारापरींकेर। 14नोर ओल्योक बाद, “गुर्बा, नँ गेस नपाँज़्याव भरी साचो वाज़ लिज़्या। परमेस्वरए ल्योदा बान्या येम ब साचोस नपैसिज़्या। मिँ रँःद ब नमादोए, सुए ल्योदा ब नमाजैसिए। है जैद गेलाई तोबो पाँ है दाव ताके, माहाराजालाई गे सिर्मा यान्या सैं मायान्या? 15किताव दान्या?” है यादोक ते, येसुए नोराए याकप्तैं सैंद, “ङालाई काराव जेजाँचिनाज़्याव? पैसा तोबो रैद्याँचिकेदा, ङाचिऊरिज़्या,” है ओरादोक ते, 16नोराए पैसा तोबो रैद याएक ते, येसुए, “आत सुए उसुरूप, सुए उमिन उलिज़्याव?” है ओरादोक ते, “माहाराजाए उमीं ज़,” है दोकेर। 17“हो ची ताकिन्दा माहाराजाए उमीं भरी माहाराजालाई ज़ एच्यो, परमेस्वरए उमीं भरी परमेस्वरलाई ज़ एच्यो,” है ओरादोक ते, नोर नो पाँत बनै अचम्ब ताकेर।
सदुकीराए यापाँ
(मत्ती २२:२३-३३; लूका २०:२७-४०)
18नकिन ख्वा सदुकीर ब येसुए ल्योक पजैना हुकेर। सदुकी है यारादोज़्यावराए ‘सिउकिन सैंसिन्या माताए’ है यालिज़्याव। 19है जैद नोराए, “गुर्बा, मोसाए ओकानुनल तोबो अइ लिद सर्सिउ लिज़्या, ‘तोबोए ज्या दाद ज़ार मादैद उसिकिन, ओभाइए ओदाज्युए ओथोर माफ्या·न्याए जूँनी ओमारूमलाई ओरैवक।’#ब्य २५:५ 20है जैद तोबोए ओज़ार सात भाइ याल्यो। यादाज्युए ज्या दाद ज़ार मादैद ज़ सिके। 21होए उधूँलावए फरी नो ओमारूमलाई रैद नो मनी ज़ार मादैद ज़ सिके। नकिन साइँला मनी हिताव ज़ ताके। 22नितावनी ज़ सात भाइ भरिए ज़ नो मेंमालाई रैद ज़ार मादैद ज़ सिकेर। प़ाइँरानी छींनी नो मेंमा ब सिके। 23है जैद नो मेंमा सात भाइए याज्या ओतावए अजम्बरी जुनील काताकावए याज्या तान्या?” है लिकेर।
24हाःत ज़ येसुए, “जे धर्मसास्त्रलाव पाँ मातीद परमेस्वरए ओसक्ती ब जेमाथ·रैधुवए ज़ चबनै बिरैद जेनै। 25सिउनी सैंसिद स्वर्गत बावर ते सुए ज़ ज्या ब मादोर, रे ब मादोर। प़ाइँ ज़ स्वर्गताव चाकर्या स्यासोर ताज़्यार। 26फरी जे ‘सिउकिन सैंसिन्या माताए’ है ल्यो पैंज़्यावर धर्मसास्त्रलाव मोसाए ओसरोल झोपोरा ओचाँःज़्याव जेमाप़रिए रो? नो चाँःज़्यावनी परमेस्वरए ओपाँ अइ लिद हुके,
‘ङा अब्राहामए ओपरमेस्वर, इसहाकए ओपरमेस्वर स़ोनो याकूबए ओपरमेस्वर ज़।’#प्रस ३:६
27ओल ते मोरोराए यापरमेस्वर माःक, जींदोराए यापरमेस्वर ची। है जैद जे चबनै बिरैद जेनै,” है यादोक्यो।
प़ाइँरानी दान्या य़ेन
(मत्ती २२:३४-४०; १०:२५-२८)
28येसु सदुकीरास याखर्लेसिज़्याव तोबो सास्त्रीए थैद, ‘येसुए थिक जवाप याएक्यो’ लिद येसुए ल्योक बाद, “गुर्बा, मिँए दान्या मादान्या य़ेन भरिनी प़ाइँरानी दान्या काताकाव उलिज़्याव?” है ओदोक ते, 29येसुए, “सर्सिउ भरिनी प़ाइँरानी दान्या आव ज़, ‘अ इस्राएलीर थैचिके, जेप्रभु परमेस्वर तोबोका तोबो वाज़ लिज़्या। 30जेयुँलाई आदा होदा मादुलैद, जेर्सा माम़ोंद, जेप्रभु परमेस्वरए ल्योदा युँ थू जैद ओललाई वाज़ मया दान्या।’#ब्य ६:४-५ 31होए उछींताव दान्या य़ेन फरी आव ज़, ‘जेक्याँलाई किताव जेसमारिज़्या, छुतलाई ब हिताव ज़ समारिन्या।’ आव ऩेब्लोकिन घेप्पा काता ज़ माले,” है ओदोक ते,#लेबी १९:१८ 32नो सास्त्रीए, “साचो ज़ है नलिके गुर्बा, परमेस्वर तोबोका तोबो ज़ लिज़्या, छुत माले।#ब्य ४:३५ 33फरी नँ है नलिज़्याव मिताव युँलाई मादुलैद, सा माम़ोंद, परमेस्वरए ल्योदा युँ थू जैद ओललाई वाज़ मया दान्या, स़ोनो छुतलाई समारिन्या बनै ओचाहित ल्यो ज़ लिज़्या। निताव य़ेन दान्या मेंःनी चरैःन्या पुजा स़ोनो पाथा पल्द चरैःन्या पुजाकिन घेप्पा लिज़्या,” है ओदोक ते,#होसे ६:६ 34येसुए नोए नाः सैंद ओपाँव थैद, “नँ परमेस्वरए ओराज्याकिन तादाङ नमाले,” है दोक्यो। हाःकिन सुए ज़ येसुस पाँन्या आँत मादोकेर।
ख्रीस दाऊद राजाए ओप्रभु ज़
(मत्ती २२:४१-४६; लूका २०:४१-४४)
35येसुए ध्यान झ़िमल लिज़्यावरालाई अइ लिद यासथैक्यो, “सास्त्रीराए ‘ख्रीस दाऊदए ओथोलाव’ कातानी है यालिज़्याव? 36ओल दाऊदए मनी छैंव पुरूसनी अइ लिद पाँद ले,
‘परमेस्वरए ङाप्रभुलाई,
‘नसुतुररालाई नखँ धूँल झाःद ङामाईंवा पै,
ङावोर्दा च़ुसिद लिन्के,’ है दोक्यो।’#भज ११०:१
37है जैद ओल दाऊदए मनी ख्रीसलाई ‘ङाप्रभु ज़’ है ओदोकिन नो कै जैद होए ओथोलाव ओताज़्याव?” है यादोक्यो। माहोल्याराए येसुए निताव ओपाँ बनै थै थै ङम्सिउ याथ·रैज़्याव।
येसुए सास्त्रीराए यापाहा झाःद ओरायो
(मत्ती २३:१-३६; लूका २०:४५-४७)
38येसुए ओपाँ ओरासथैज़्याक अइ लिद यासथैक्यो, “सास्त्रीराए याय़ेननी जोगोइसिद लिच्यो। नोर रेरे बेन्बेनो क्वा क्वाइसिद ‘प़ाइँए धो घदासिरक’ लिन्या युँ दाद बजार जीदा दुलिरिज़्यार। 39नोर फरी धर्मसास्त्र झ़िमराल, घ्योःव घ्योःव भत्यारल ब प़ाइँए रँःन्याक ओमान ल्यो पोल वाज़ च़ुसिउ पैंज़्यार। 40नो सास्त्रीराए झन राँदी मेंमारालाई तँनी छाम छुम याराख्याज़्यार, मिँराए ङ़ाक वाज़ बनै चाव चाव पोंखारिउ जैसिज़्यार। नोराए ते प़ाइँरानी घ्योःव सजा ज़ दैरिज़्यार,” है लिद यासथैक्यो।
राँदी मेंमाए ओचरैःव भिती
(लूका २१:१-४)
41नल ध्यान झ़िमल येसुए भिती याचरैःज़्याव बाकस छ्योक च़ुसिद मिँराए भिती याचरैःज़्याव ओराचिऊज़्याव। धनी धनीराए बनै कुधु कुधु याझाःज़्याव। 42नो बेलाक तोबो काता ज़ माल्यो राँदी मेंमा हुद ऩेब्लो पैसा चरैःक्यो। नो ऩेब्लो थोम्द तपैसावाकाव ओल्यो। 43नो रँःद येसुए उसिसरालाई ओल्योक खुल्द, “ङा साचो है ङादाचिज़्या, आव काता ज़ माल्यो राँदी मेंमाए छुतराकिन कुधु चरैःक्यो। 44धनीराए ते यासय़ेलोनी वाज़ चरैःकेर। नो राँदी मेंमाए ते ओललाई ओमाथैंज़्यावत ब ओलस लिज़्याव भरी प़ाइँ ज़ चरैःक्यो,” है यादोक्यो।
Currently Selected:
मर्कूस 12: NKham
Highlight
Share
Copy
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
