मर्कूस 10
10
ज्यालाई माऱास्न्या
(मत्ती १९:१-१२)
1येसु ननी पुलुस्द यर्दन भै होफताव यहूदिया खन्दल बाके। नल ब मिँर बनै माहोल्या ओल्योक याहुज़्याव। येसुए पो पोक ओदोज़्याव मिताव नोरालाई मनी परमेस्वरए ओपाँ ओरासथैज़्याव। 2नल फरिसीराए येसुलाई जाँचिन्याए जूँनी ओल्योक हुद, “ज्यालाई ऱासो दैसिए सैं मादैसिए?” है यादोक ते, 3येसुए, “मोसाए ओकानुनल किताव सर्सिउ उलिज़्याव?” है ओरादोक ते, 4नोराए, “मोसाए ओकानुननी ते ऱास्न्या कागत तोबो सर्किन ऱासो दैसिए,” है दोकेर।#ब्य २४:१-४ 5येसुए फरी, “जेदिउदी ल्योर जेतावए ज़ मोसाए निताव कानुन सर्द ओयाचिउ। 6भाःङ स्रिस्तील परमेस्वरए मिँ ओजैक खेपा स़ोनो मेंमानी निजैक्यो।#उत १:२७; ५:२ 7है जैद ज़ खेपाए ओबाबु ओआमालाई ऱास्द ओज्यास सिप ताद, 8नोनी तक्याँ ज़ ताज़्यानी। हाःकिन नोनी ऩेब्लो माःक, तक्याँल गनिसिज़्यानी।#उत २:२४ 9है जैद जोनिलाई परमेस्वरए जोरैद निनैव, होनिलाई मिँराए ताराभाःरक,” है यादोक्यो।
10फरी झ़िमल उसिसराए नो पाँए उजूँनी फरी ब सुधिकेर। 11है जैद येसुए, “जोए ओज्यालाई ऱास्द छुतलाई ओरैकिन नोए जारी य़ेन ज़ दोक्यो। 12हो मिताव ज़ जो मेंमाए ओरेलाई ऱास्द छुतस ओरेस्किन हो ब हिताव ज़,” है यादोक्यो।
येसुए ल्योक हुज़्याव ल़ुज़ार
(मत्ती १९:१३-१५; लूका १८:१५-१७)
13नकिन नलाव मिँराए ज़िम्ज़ा याज़ारालाई ‘येसुए उकुइ नैद असिक घरायोक’ लिद ओल्योक यारारैकेर। नो रैज़्यावरालाई उसिसराए सिङार्द यारावैंकेर। 14येसुए निताव रँःद उसिसरालाई जाँ रसिद, “नो ज़िम्ज़ा ल़ुज़ारालाई तारावैंच्यो, ङाल्योदा हुव याराएचिके। परमेस्वरए ओराज्या नितावराए जूँनी ज़ लिज़्या। 15ङा साचो है ङादाचिज़्या, जोर आव ल़ुज़ाराए माँःती परमेस्वरए ओराज्याल पसिन्या युँ मादोर, नोर खर्क ज़ पसिउ दैन्या मालेर,” है दाद, 16नो ल़ुज़ारालाई ओघोइँल छींद याक्याँत उकुइ नैद असिक याएक्यो।
अजम्बरी जुनी खिम्ज़्याव धनी
(मत्ती १९:१६-२२; लूका १८:१८-२३)
17येसु ननी पुलुस्द येमत ओबाज़्याक तोबो मिँ धोंःहुद ओङ़ाक फुलुप्सिद, “अ धर्मी गुर्बा, ङा अजम्बरी जुनी दैन्या किताव दान्या?” है ओदोक ते, 18येसुए, “ङालाई काराव धर्मी है नदाँज़्याव? परमेस्वरकिन धर्मी सु ज़ माले। 19धर्मसास्त्रलाव सर्सिउ दान्या मादान्या य़ेन#10:19 परमेस्वरए मोसालाई ओयो कानुन चिऊन्या — प्रस २०:१-१७; ब्य ५:६-२२। नँ ज़ नसैंज़्याखेहो — मिँ मासैःन्या, अर्काए ओज्याए ल्योदा माबान्या, माकुन्या, धुत गोहाई मायान्या, धुतैद माज़्यान्या, बाबु आमाए ओमान नैद्यान्या,” है ओदोक ते, 20नोए नो पाँर थैद, “गुर्बा, आव भरी ते ज़िम्ज़ाकिन दाहुव ज़ ङानैज़्या,” है ओदोक ते, 21येसुए नोलाई रँःद मया दाद, “अझ तोबो नमासयो·ताए। नँस लिज़्याव भरी यो·द काता ज़ माल्योरालाई भाःद याएकेदा, नँ स्वर्गताव धन दैन्या नले। नो य़ेन भरी दाद नँ ङाछींत हुन्के,” 22है ओदोव भरी थैद ओङाः चुम चुमो जैद उयुँर स्यासे सतेद ओल्द बाके। नोए ओधन सम्पती बनै कुधु ज़ ओल्योए माऱास्धुक्यो।
येसुए उछींत बाज़्यावर
(मत्ती १९:२३-३०; लूका १८:२४-३०)
23नो ओबावत येसु उसिसराए ल्योदा भाल्सिद, “धनी मिँ परमेस्वरए ओराज्याल पसिन्या बनै धो ताज़्या,” है ओरादोक ते, 24उसिसर नो पाँत बनै अचम्ब ताकेर। नकिन येसुए फरी, “साचो ज़ बाबुज़ार, परमेस्वरए ओराज्याल पसिन्या बनै धो ताज़्या। 25गपए उकुँल ऊँत उछिरिज़्यावकिन धनी मिँ परमेस्वरए ओराज्याल पसिन्या झन धो ताज़्या,” है ओरादोक ते, 26नोर झन ज़ अचम्ब ताद, “इताव ताकिन ते सुए ची अजम्बरी जुनी ओदैधुरिज़्याव?” है यादोक ते, 27येसुए नोरालाई चिऊद, “मिँर यानी सु ज़ माबाँचिधुर, परमेस्वरनी वाज़ ताज़्या। परमेस्वरनी मातान्या काता ज़ माले,” है यादोक्यो।
28हाःत ज़ पत्रुसए, “गे ते प़ाइँ ज़ ख्यानैद नछींत हुद गेले,” है ओदोक ते, 29येसुए, “ङा जेलाई साचो है ङादाचिज़्या, जोए ङाजूँनी स़ोनो चाव थाए उजूँनी ओएँःर उझ़िमर, ओदाज्यु भाइर, ओनाना बैंनीर, ओबाबु ओआमार स़ोनो ओज़ार ऱास्द याख्यानैज़्याव, 30होए आव उजिउत ज़ दुख दैज़्यावत ब एँःर झ़िमर, दाज्यु भाइर, नाना बैंनीर, आमार स़ोनो ज़ार सय दोबोर ब दैन्या ले। फरिकाव जुनील अजम्बरी जुनी ब दैन्या ले। 31खाली ख्वा ख्वा ङ़ातावर छींत तारिज़्यार, छींतावर ङ़ात तारिज़्यार।”#10:31 मत्ती १९:३० चिऊन्या।
येसु फरी उसिन्याए जूँनी ओपाँव
(मत्ती २०:१७-१९; लूका १८:३१-३४)
32नकिन येसु उसिसरास यरूसलेमदा याबाज़्याक ओल ङ़ात ओबाज़्याव। उसिसर अचम्ब ताद यालिज़्याव, उछीं उछीं हुज़्यावर फरी छे·द यालिज़्याव। येसुए बाह्र जना उसिसरालाई अछतङ लाँद ओललाई छींनी तान्या पाँ भरी है यादोक्यो — 33“गे यरूसलेमदा गेपुलुस्नाज़्या। नल गेकेसोत ङा मिँ मिन्सिउलाई मुख्या पुजारीर स़ोनो सास्त्रीराए याकुइत सूँपिन्या लेर। नोराए ङालाई सैःन्या ज़ थ·रैद रोमी सरकारए उकुइत याझाःनावत, 34नोराए फरी ङालाई उल्ली गिल्ली दाद, त़िल्द, यारीःनावत सैःन्या लेर। हैदी ब स़ोंलात सिउनी सैंसिद सोन्या ङाले,” है यादोक्यो।
याकूब स़ोनो यूहन्नानी निपाँ
(मत्ती २०:२०-२८)
35नकिन जब्दियाए ओज़ानी याकूब स़ोनो यूहन्नानी येसुए ल्योक हुद, “गुर्बा, नँस जो गिन्ऩिज़्या हो ज़ नयासिने सैं है गिन्लिज़्या,” है निदोक ते, 36येसुए, “ङा जिनजूँनी काता दाद्यान्या जिन्पैंज़्याव?” है उनिदोक ते, 37नोनी फरी, “स्वर्गत नँस तोबो नवोर्दा, तोबो नदाबर्यादा च़ुसिउ गिन्दैक,” है दोकिनी। 38येसुए फरी, “जिन आव जिन्ऩिज़्यावए जूँनी जिन्मासैंए। ङा जाँवाक धो सहिउ दुखर ङासहिरिज़्या। जिन जिन्मासहिधुरिज़्या नी? ऱीए ओरागदैज़्याव मिताव, ङा ब दुखल ङागदिरिज़्या। जिन जिन्मागदिधुरिज़्या नी?” है उनिदोक ते, 39“गिन्धुया ज़,” है दोकिनी। हाःत ज़ येसुए, “हैज़, ङा ङादैरिज़्याव धो सहिउ दुखर जिन मनी दैन्या ज़ जिन्ले, दुखल ङागदिज़्याव मिताव जिन ब गदिन्या जिन्ले। 40खाली ङावोर्दा ङादाबर्यादा च़ुसिउ यान्या ते ङा ङाकुइत माले। निताव दैन्या जोलाई यासिउ लिज़्या, होए उजूँनी वाज़ लिज़्या,” है निदोक्यो।
41उपुर्काव दस जना उसिसराए नो पाँ थैद याकूब स़ोनो यूहन्नानिलाई रँःद यारिस चोके। 42नाःत ज़ येसुए उसिस भरिरालाई ओल्योदा खुल्द, “जे ज़ जेसैंज़्याखेहो, आव मानुवाताव घेप्पा है यारादोज़्यावर याधूँलावराए ङ़ैत बनै अखत्यासोर ताद हाप हाप ख्याज़्यार। 43जे जेल ते निताव जैसिन्या माताए। खाली जे ते जो स़ेर जैसिउ जेपैंज़्या, हो प़ाइँए यासेवा दान्या ओजैसिक। 44स़ोनो जेनी जो घेप्पा जैसिउ जेपैंज़्या, हो प़ाइँए याबाँदा ओजैसिक। 45ङा मिँ मिन्सिउ ब ‘ङासेवा घदोरक’ लिद ङाहुव माःक, कुधुलाई बाँचैन्याए जूँनी ङाजिउ झाःद यासेवा ङादोहुव ची,” है यादोक्यो।
येसुए उमी मारैंःवलाई रँःधुन्या ओजैव
(मत्ती २०:२९-३४; लूका १८:३५-४३)
46नकिन येसु उसिसरास यरीहो सहरल बाकेर। छींनी ते बनै माहोल्यारास ननी पुलुस्द याबाज़्याक तोबो तिमैए ओज़ा बारतिमै उमी मारैंःव ऩिद ङासिज़्याव येमक च़ुसिद उलिज़्याव। 47नोए ‘नासरतलाव येसु हुज़्या दी’ लिन्या थैद बनै चोइस, “अ दाऊदए ओथोलाव येसु, ङालाई नयुँ ओनाक,” है लिद उक़िज़्याक, 48नो माहोल्याराए, “झ्याउँ तालिनी,” लिद सिङार्केर। नोए झन ज़ चोइस क़िद, “अ दाऊदए ओथोलाव, ङालाई नयुँ ओनाक,” है उलिक ते, 49येसु नक च्याँःसिद, “नोलाई आदा रैचिके,” है ओरादोक ते, नो माहोल्याराए नो उमी मारैंःवलाई, “नयुँ सुहुप्द च्याँःसिन्के, प्रभुए खुल्निज़्याव,” है यादोव प़ाइँना ज़, 50नो मिँ ओकाँःबुलर ह्या ह्यी ख्याद थर च्याँःसिद येसुए ल्योक बाके। 51हाःत ज़ येसुए, “ङा नजूँनी काता दाद्यान्या?” है ओदोक ते, नो उमी मारैंःवए, “गुर्बा, ङा रँःधुन्या ङाताक,” है ओदोक ते, 52येसुए, “बान्के, नयुँ उहुबोए ज़ नगराँके,” है ओदोव प़ाइँना नो मिँ रँःधुन्या ताद येमत येसुए उछीं उछीं ज़ बाके।
Currently Selected:
मर्कूस 10: NKham
Highlight
Share
Copy
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
