मर्कूस 9
9
1फरी, “ङा जेलाई साचो है ङादाचिज़्या, आकाव च्याँःसिद लिज़्यावरानी जे ख्वा ख्वाराए परमेस्वरए ओराज्या ओसक्तीरास उहुज़्याव जेमारँःवा पै सिन्या जेमाले,” है यादोक्यो।
येसुए ओज़गै ओसरैंःव
(मत्ती १७:१-८; लूका ९:२८-३६)
2नकिन छ दिनत येसुए पत्रुस, याकूब स़ोनो यूहन्नारालाई याबातङ तोबो झेंःव गोंत ओलस यालाँक्यो। नक याकेसोत येसुए ओक्याँर त़ोसिद, 3ओक्वार बनै मी झीःन्या, तक तकौ ताके। आव मानुवात सुए ज़ जती छेदी ब निताव तक तकौ माजैधुर। 4नाःत ज़ एलिया स़ोनो मोसानी नक ज़ सरैंःसिद येसुस पाँकिनी। 5नो रँःद पत्रुसए येसुलाई, “गुर्बा, गे आक लिन्या बनै चाव ताके। गे जेलाई स़ोम्लो पाल तङ्गैद गेयाच्यो, तोबो नँलाई, तोबो मोसालाई, तोबो एलियालाई,” है दोक्यो। 6बनै याछे·वए पत्रुसए काता पाँन्या लिन्या ब ओमासैंज़्याव। 7नाःत ज़ बादल तोबो हुद नोरालाई याकप्क्यो। नो बादल जींनी तोबो गा अइ लिद थास्के, “आव ङायुँलाव ङाज़ा ज़, जे आवए ओपाँ थैच्यो,” 8है उलिज़्याव याथैव प़ाइँना नोर आदा होदा याभाल्सिक उपुर सु ज़ यामाल्यो, येसुलाई वाज़ रँःकेर।
ख्रीसकिन ङ़ादा एलिया
(मत्ती १७:९-१३)
9नो गोंतिन याझरिज़्याक येसुए नोरालाई, “आव जेरँःव भरी ङा मिँ मिन्सिउ सिद ङामासैंसिवा पै सुलाई ज़ है तारादोच्यो,” है ओरादोक ते, 10नोराए सुलाई ज़ है मादाद या याल वाज़, “आव सिद सैंसिन्या है उलिज़्याव पाँ काता ओताव?” है यालिज़्याव। 11नोराए येसुलाई फरी, “सास्त्रीराए काराव ख्रीसकिन ङ़ादा एलिया हुन्या ले है यालिज़्याव?” है यादोक ते,#मला ४:५ 12येसुए, “हैज़, एलिया ङ़ादा ज़ हुद प़ाइँलाई ताव परिन्या मिताव जैन्या ले। हैदी मनी आव ब सर्सिउ लिज़्या — हो बेलाकाव मिँराए मिँ मिन्सिउलाई दुखर याद बीज्यात जैन्या लेर। 13खाली ङा जेलाई आव मनी है ङादाचिज़्या, एलिया ते ङ़ादा ज़ हुधुके। आलाव मिँराए झन किताव सर्सिउ ओल्यो हिताव ज़ जैद नोलाई यामन लागिउ ज़ जैकेर।”
माचाव पुरूसए ओक्योःव छोर्या
(मत्ती १७:१४-२१; लूका ९:३७-४३)
14येसु नो स़ोम्लोरास उपुर्काव उसिसराए ल्योक याकेस्नाक बनै माहोल्या मिँराए याखार्ल घिरिद सास्त्रीर नोरास याखर्लेसिज़्याव यारारँःकेर। 15हाःत ज़ नो माहोल्याराए येसु उहुज़्याव रँःद नोर बनै अचम्ब ताद ओल्योक धोंःनाद धो यादोक, 16येसुए नोरालाई, “काताए जूँनी जेखर्लेसिज़्याव?” है ओरादोक ते, 17माहोल्यारानी तोबोए, “गुर्बा, ङा नल्योक ङाज़ालाई रैद ङानै। नोलाई माचाव पुरूसए लाता जैद नैव। 18नो पुरूस ओक्याँत उहुव बेलाक झन नामक पछारिसिद, ओहार सजम्द, ओयाःनी फुइ गज्या पले·द बनै ख्याङग्याँ खेङ्गे जैज़्याव। ङा नसिसरालाई, ‘माचाव पुरूसलाई पले·दिचिके,’ है ङारादोक ते मापले·धुकेर,” है दोक्यो। 19हाःत ज़ येसुए, “ए जेयुँ माहुबोर, ङा जेस खा ची ङालिरिज़्याव, खा ङासहिचिके! नोलाई ङाल्योक रैचिके,” है ओरादोक ते, 20नो छोर्यालाई ओल्योक रैदिकेर। हाःत ज़ नो पुरूसए येसुलाई उरँःव प़ाइँना ज़ नो छोर्यालाई बेहार ज़ खागरा खगर॰ जैक्यो। नो छोर्या नक ज़ गुधु धलिद फलीं फलीं पल्तैसिद ओयाःनी फुइ गज्या पले·क्यो। 21येसुए छोर्याए ओबाबुलाई, “आव खर्किन अइ ओताव?” है ओदोक ते, ओबाबुए, “ज़िम्ज़ाकिन ज़,” है दोक्यो। 22फरी, “आव ङाज़ालाई सैःन्याए जूँनी कैताक मेंःल ब ख्याज़्याव, कैताक ऱील ब ख्याज़्याव। नँ कातार नदोधुकिन गेल्योदा नयुँ नाद सगराँद्याव ताके,” है ओदोक ते, 23येसुए, “नँ कै जैद ङालाई, ‘कातार नदोधुकिन,’ है नदाँज़्याव? उयुँ हुबोलाई मातान्या काता ज़ माले,” है ओदोक ते, 24नो छोर्याए ओबाबुए, “अ प्रभु, ङायुँ हुबो ज़ लिज़्या, माहुबो ङायुँलाई सुहुप्द्याँके,” है लिद बनै चोइस ज़ है दोक्यो।
25हाःत ज़ येसुए मिँर बनै काला मुलु याधोंःहुज़्याव रँःद नो माचाव पुरूसलाई सिङार्द, “ए लाता भैरा जैन्या पुरूस, नोए ओक्याँतिन पुलुस्द बान्के। फरी नल खर्क ज़ तापसिनी,” है ओदोव प़ाइँना ज़, 26नो माचाव पुरूस बनै चिर चिर क़िद नो छोर्यालाई कारापनी कुरूप जैद पुलुस्द बाके। हाःत ज़ नो छोर्या चबनै सिउ स्यासो ओतावए नो भाल्सिज़्यावराए, “उसिउ ची ओल्यो,” है लिकेर। 27खाली येसुए नोलाई उकुइनी क्योःद पोंला ओसोचोइक ते थर च्याँःसिके।
28छींनी येसु उसिसरास झ़िमल याबातङ यातावत उसिसराए, “गे कै जैद नो माचाव पुरूसलाई गेमापले·धुव?” है यादोक ते, 29येसुए, “इताव पुरूसलाई पले·न्या ते मापोंखारिवा पै मापले·सिधुइ,” है यादोक्यो।
येसु उसिन्याए जूँनी फरी ओपाँव
(मत्ती १७:२२-२३; लूका ९:४३-४५)
30येसु उसिसरास ननी पुलुस्द गालील खन्दलाव घ्याँ बाकेर। ‘आल गेलिज़्याव सुए ज़ तासैंरक’ है उलिज़्याव, 31काराव ल्यो ताकिन उसिसरालाई वाज़ पैन्या ओपैंज़्याव। नोए, “ङा मिँ मिन्सिउलाई तछा मिँराए याकुइत सूँपिनारिज़्यार। नोराए ङालाई सैःनारिज़्यार। हैदी ब ङासिउ स़ोंलात सैंसिद ङासोरिज़्या,” है यादोक्यो। 32नोराए नो पाँ यामाबुझिदी ब येसुलाई सुधिन्या छे·केर।
घेप्पा जैसिन्या पाँ
(मत्ती १८:१-५; लूका ९:४६-४८)
33नकिन येसु उसिसरास कफर्नहुमल बाकेर। झ़िमल यापसिउत येसुए उसिसरालाई, “येमत जे काता खास खासनी खुस खुस जेपाँहुज़्याव?” है ओरादोक ते, 34नोराए सुए ज़ घाइ मादोकेर, काराव ल्यो ताकिन नोर येमत, “गे सु घेप्पा गेलिज़्याव,” लिद याखर्लेसिहुज़्याव। 35है जैद येसु नक च़ुसिद बाह्र जना उसिसरालाई ओल्योक खुल्द, “जो प़ाइँरानी ङ़ात जैसिउ पैंज़्याव, हो प़ाइँराए याधूँलाव जैसिद प़ाइँए यासेवा दान्या ओजैसिक,” है दाद, 36तोबो ज़िम्ज़ा ल़ुज़ालाई रैद याङ़ाक सच्याँद, नो ल़ुज़ालाई ओघोइँल छींद, 37“जोए ङामिनत आव मिताव ज़िम्ज़ारालाई यासुम्ज़्याव, होए ङालाई ब सुम्नाज़्याव। जोए ङालाई सुम्नाज़्याव, होए ङालाई वाज़ माःक, ङालाई परींज़्यावलाई ब सुम्ज़्याव,” है यादोक्यो।
गेकिन तँदा लिज़्यावर
(लूका ९:४९-५०)
38यूहन्नाए, “गुर्बा, तोबोए नमिननी माचाव पुरूसर ओरापले·ज़्याव गेरँःके। नो गेस ओमाल्योए पले·व गेमाएके,” है ओदोक ते, 39येसुए, “नोलाई तावैंच्यो, जोए ङामिननी सक्तीलाव य़ेन दोज़्याव, होए सिती मिती ङामिन बले·द मायाँव। 40जो गेकिन तँदा माजैसिए, हो गेस ज़ लिज़्या। 41ङा जेलाई साचो है ङादाचिज़्या, जोए जेलाई ख्रीसए उमींर जेल्यो लिद सरेस्द ङामिननी तुखुरी ऱी वाज़ ओयाचिदी ब नोए उइनाम जुनी ब दैन्या ज़ ले।”
मिँलाई बले·ज़्याव खँ कुइ
(मत्ती १८:६-९; लूका १७:१-२)
42फरी, “जोए आव मिताव ङालाई यायुँ हुबो ज़िम्ज़ारालाई पापल ओरापारैकिन, नितावलाई ते बुरू ओधेंल राँथै सुर्द्याद समुन्द्रल ख्यान्या पाथ लिज़्या। 43फरी नकुइए माचावल ओपारैनिकिन नोलाई च़म्के। नो नकुइए नर्गलाव माजिप्तिन्या मेंःल ख्याव ओदोज़्याव देखा बुरू अजम्बरी जुनील थूँद्यासो पसिन्या पाथ लिज़्या। 44[नर्गलाव ऱूइराए याभोगोन ब खर्क ज़ माखेमे, मेंः ब खर्क ज़ माजिप्तिए।] 45फरी नखँए माचावल ओपारैनिकिन नोलाई ब च़म्के। नो नखँए नर्गल ख्याव ओदोज़्याव देखा बुरू अजम्बरी जुनील थूँद्यासो पसिन्या पाथ लिज़्या। 46[नर्गलाव ऱूइराए याभोगोन ब खर्क ज़ माखेमे, मेंः ब खर्क ज़ माजिप्तिए।] 47हो मिताव ज़ नमीए माचावल ओपारैनिकिन, नो नमीलाई कोला·द ख्याके। नो नमीए नर्गल ख्याव ओदोज़्याव देखा बुरू परमेस्वरए ओराज्याल काना ताद पसिन्या पाथ लिज़्या। 48नर्गलाव ऱूइराए याभोगोन ब खर्क ज़ माखेमे, मेंः ब खर्क ज़ माजिप्तिए।#यसै ६६:२४
49“मिँ भरी प़ाइँ ज़ मेंःनी सापी दार मिताव तान्या लेर। 50सापी चाव ज़ लिज़्या, खाली ओदार ओमालिकिन नोलाई कै जैद ची ओदार ल्यो जैन्या? है जैद जे ब सापी मिताव ताद जे जेल खैद लिच्यो,” है यादोक्यो।
Currently Selected:
मर्कूस 9: NKham
Highlight
Share
Copy
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
