लूका 20
20
येसुए ओहक स़ोनो यूहन्नाए ओहक
(मत्ती २१:२३-२७; मर्कूस ११:२७-३३)
1हाः बेलाक तछा यरूसलेमलाव ध्यान झ़िमल येसुए चाव था ओरासथैज़्याक नलाव मुख्या पुजारीर, सास्त्रीर स़ोनो यहूदीराए यास़ेरर ओल्योक हुद, 2“गेलाई है दासिके, आव नदोज़्याव य़ेनर नँलाई सुए है उदींव, सुए हक उईंव?” है यादोक ते, 3येसुए, “ङा ब जेलाई तोबो है ङादाचिज़्या, नो पाँ है दाँचिके। 4ऱील सछैंज़्याव यूहन्नाए ओय़ेन परमेस्वरए ल्योनी ओताव सैं मिँराए ल्योनी ओताव?” है ओरादोक ते, 5या याल, “ ‘परमेस्वरए ल्योनी ओताव’ है गेद्या गेलिकिन, ‘हुकी काराव यूहन्नाए ओपाँ जेमाभैंःव?’ है दान्या ले। 6फरी ‘मिँनी’ है गेद्या गेलिकिन, मिँ भरिए यूहन्नालाई अगमबक्ता ज़ याथ·रैवए गेलाई झेःद सैःन्या ओछ्यास ब लिज़्या,” है लिकेर। 7है जैद नोराए येसुलाई, “यूहन्नाए ओय़ेन कान्नी ओताव गेमासैंए,” है यादोक ते, 8येसुए, “हो ची ताकिन्दा ङालाई आव य़ेन दान्या हक सुए ओयाँव ङा ब है ङामादाच्यो,” है यादोक्यो।
अधिया कमैज़्यावराए घर्ती
(मत्ती २१:३३-४६; मर्कूस १२:१-१२)
9नकिन नलाव मिँरालाई घर्ती तोबो झाःद अइ लिद यासथैक्यो, “तोबो मिँए ओएँः भरिल जोम्परसै झाःद मिँरालाई अधियाल याद, ओल जाँवा पै तोबो तादा देसङ लिनाके दी।#यसै ५:१ 10नो जोम्परसै किन्या बेलाक तोबो ओनोकोरलाई उजुँ च़ानाव परींक्यो। खाली नो अधिया कमैज़्यावराए झन नोलाई प़ोद रितो ज़ खेपैकेर दी। 11फरी छींनी छुत ओनोकोरलाई उपरींक नोलाई ब प़ोद बीज्यात जैद रितो ज़ खेपैकेर दी। 12छींनी फरी ब तोबोलाई उपरींक हिताव ज़ नोलाई ब प़ोद लल्यातोरो जैद ख्याकेर दी।
13“नकिन छींनी नो एँःए ओर्गेए, ‘कै जैन्या ओताव? ङायुँलाव ङाज़ालाई ज़ परींव ताके। नोलाई ताकिन ओमान नैदिर सैं’ लिद नो ओज़ालाई परींक्यो दी। 14खाली नो ओज़ा उहुज़्याव रँःद नो अधिया कमैज़्यावर झन या या पाँसिद, ‘आव ते एँः दैन्या मिँ ची, आवलाई गेसैःकिन आव एँः गेमीं ज़ तान्या ले,’ लिद, 15नो मिँलाई एँःनी पाखाङ लाँद सैःकेर दी।”
नकिन येसुए, “नो एँःए ओर्गेए अधिया कमैज़्यावरालाई कै याजैवके लिक ते, 16नोर प़ाइँलाई ज़ सैःद नो एँः छुतरालाई अधियाल यान्या ले,” है ओरादोक ते, नो पाँ थैज़्यावराए यायुँ कैद, “निताव ते खर्क ज़ ताताक,” है लिकेर।
17नकिन येसुए, “हिताव ताकिन आव धर्मसास्त्रलाव पाँए ओअर्थ किताव जेङम्सिज़्या?
‘भुलीराए कान्ल ज़ माज़्यासे लिद याख्याव लुँ
नो ज़ झन भुयाँरलाव लुँ ताके।’#भज ११८:२२
18नो लुँत पाज़्याव भरी कुतु कुतु ज़ तान्या लेर। नो लुँ फरी यातर्त उहुकिन झन नप नप ज़ तान्या लेर।”
माहाराजालाई सिर्मा यान्या सैं मायान्या
(मत्ती २२:१५-२२; मर्कूस १२:१३-१७)
19नाःत ज़ सास्त्रीर स़ोनो मुख्या पुजारीराए ‘आव घर्ती ते गेङ़ैत ज़ झाःद्यासिक्यो’ लिन्या सैंद येसुलाई हो प़ाइँना ज़ क्योःव पैंकेर। खाली मिँर रँःद छे·केर। 20है जैद नोराए, ‘आवलाई ओपाँ क्योःद्याद हाकिमए उकुइत सूँपिउ ताके’ लिद मौका चिऊद, यासकावर ऩेबरेंवा येसुस खैव मिताव जैसिउ परींद येसुए ओय़ेन साँना यारापरींकेर। 21नो साँना बावराए येसुलाई, “गुर्बा, नँ गेस नपाँज़्याव भरी साचो वाज़ लिज़्या। परमेस्वरए ल्योदा बान्या येम नपैसिक ब मिँ रँःद नमादोए, सोजोनी ज़ नदोज़्या। 22है जैद गेलाई है दाव ताके, माहाराजालाई गे सिर्मा यान्या सैं मायान्या?” है यादोक ते, 23येसुए नोराए याचाल सैंद, 24“तोबो पैसा सतैंचिसाँकी। नत सुए उसुरूप, सुए उमिन उलिज़्याव?” है ओरादोक ते, “माहाराजाए उमीं ज़,” है दोकेर। 25“हो ची ताकिन्दा माहाराजाए उमीं भरी माहाराजालाई ज़ एच्यो, परमेस्वरए उमीं भरी परमेस्वरलाई ज़ एच्यो,” है यादोक्यो। 26है जैद नोराए मिँराए ङ़ाक येसुए ओपाँ क्योःव मादैद, झन अचम्ब ताद च़िम दाद लिकेर।
सदुकीराए यापाँ
(मत्ती २२:२३-३३; मर्कूस १२:१८-२७)
27नकिन सदुकीराए ब येसुलाई पजैना हुकेर। सदुकी है यारादोज़्यावराए ‘सिउकिन सैंसिन्या माताए’ है यालिज़्याव। 28है जैद नोर हुद, “गुर्बा, मोसाए ओकानुनल इताव सर्सिउ लिज़्या, ‘तोबोए ज्या दाद ज़ार मादैद उसिकिन, ओभाइए ओदाज्युए ओथोर माफ्या·न्याए जूँनी ओमारूमलाई ओरैवक।’#ब्य २५:५ 29है जैद तोबोए ओज़ार सात भाइ याल्यो। यादाज्युए ज्या दाद ज़ार मादैद ज़ सिके। 30होए उधूँलावए ओमारूमलाई रैद, नो ब ज़ार मादैद ज़ सिके। 31नकिन साइँला मनी हिताव ज़ ताके। नितावनी ज़ सात भाइ भरिए ज़ नोलाई रैद ज़ार मादैद ज़ सिकेर। 32प़ाइँरानी छींनी नो मेंमा ब सिके। 33है जैद नो मेंमा सात भाइए याज्या ओतावए अजम्बरी जुनील काताकावए याज्या तान्या?” है लिकेर।
34हाःत ज़ येसुए, “आव मानुवाताव मिँराए ज्या ब दोज़्यार, रे ब दोज़्यार। 35अजम्बरी जुनी दैन्या तावराए ते स्वर्गत ज्या ब मादोर, रे ब मादोर। 36नोर सिउनी यासैंसिउत परमेस्वरए ओज़ार ताद ओचाकर्या स्यासोर यातावए फरी खर्क ज़ सिन्या मालेर। 37है जैद सिउकिन सैंसिन्या ओताज़्याव सैं ओमाताज़्याव मोसाए ओसरोनी ब सैंच्यो। नोए झोपोरा ओचाँःज़्यावनी परमेस्वरए ओर्गा थैद अइ लिद सर्क्यो,
‘ङा अब्राहामए ओपरमेस्वर, इसहाकए ओपरमेस्वर स़ोनो याकूबए ओपरमेस्वर ज़।’#प्रस ३:६
38ओल ते मोरोराए यापरमेस्वर माःक, जींदोराए यापरमेस्वर ची। है जैद ओलस लिज़्याव भरी जींदो ज़ ताज़्यार।”
39नो पाँ थैद नलाव सास्त्रीराए येसुलाई, “थिक ज़ है नरादोके, गुर्बा,” है दोकेर। 40हाःकिन सुए ज़ येसुस पाँन्या आँत मादोकेर।
ख्रीस दाऊद राजाकिन घेप्पा लिज़्या
(मत्ती २२:४१-४६; मर्कूस १२:३५-३७)
41नकिन येसुए है यादोक्यो, “मिँराए कै जैद ख्रीसलाई दाऊदए ओथोलाव है यादोज़्याव? 42-43ओल दाऊदए ज़ ख्रीसए उजूँनी भजन पोस्तोकोल अइ लिद सर्द नैव,
‘परमेस्वरए ङाप्रभुलाई,
‘नसुतुररालाई नखँ धूँल झाःद ङामाईंवा पै,
ङावोर्दा च़ुसिद लिन्के,’ है दोक्यो।’#भज ११०:१
44है जैद ओल दाऊदए मनी ख्रीसलाई ‘ङाप्रभु ज़’ है ओदोकिन नो कै जैद ओल ओथोलाव ओताज़्याव?” है यादोक्यो।
येसुए सास्त्रीराए यापाहा झाःद ओरायो
(मत्ती २३:१-३६; मर्कूस १२:३८-४०)
45मिँ भरिए येसुए ओपाँ याथैज़्याक उसिसरालाई, 46“जे ते सास्त्रीराए यादोज़्याव मिताव य़ेन दान्या माःक। नोर रेरे बेन्बेनो क्वा क्वाइसिद ‘प़ाइँए धो घदासिरक’ लिद बजार जीदा दुलिरिज़्यार, स़ोनो धर्मसास्त्र झ़िमराल, घ्योःव घ्योःव भत्यारल प़ाइँए रँःन्याक ओमान ल्यो पोल वाज़ च़ुसिउ पैंज़्यार। 47नो सास्त्रीराए झन राँदी मेंमारालाई तँनी छाम छुम याराख्याज़्यार, मिँराए ङ़ाक वाज़ बनै चाव चाव पोंखारिउ जैसिज़्यार। नोराए ते प़ाइँरानी घ्योःव सजा ज़ दैरिज़्यार,” है लिद यासथैक्यो।
Currently Selected:
लूका 20: NKham
Highlight
Share
Copy
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
