MARKA 11

Sunloihnak Tuah Jerusalem Ah Tum

(Mt 21:1-11; Lk 19:28-40; Jn 12:12-19)

1Jerusalem khua nai dedeuh li haw tohin, Bethfage le Bethani khua el Olif mual heng haw hi. Jesuh in, a nungzuitu pa nihte cu mai ah hawhhamtikin, 2“Na matan uh a, ummi khua ah hawhta un, na hen uhten kuamah i khun awng laih ngawlmi laakno khau khihsa in mu tuk uh ci. A khau cu duk unna, hunpih un hi. 3Mi pa kha khatin ita duk nge uh cim tin a dong titale, ‘Topa in kin hi,’ sanleh paih tuk poh hi! tin ti un,” ti hi.

4Mah hangin hawh haw in, khuasung lampi el a ummi inn pa khat i kongkalah laakno pa khat khih leng cu mu haw hi, a khau a duh lih haw laihtakin, 5mahlai ah a dingmi mi khenkhat ten, “Ituk kaw laakno khau na duh lih uh?” tin ti haw hi.

6Amuh ten Jesuh i hilh hamsa bangin hilh haw a, thakhatin hawhpih paih haw hi. 7Jesuh lakah laakno cu hawhpih haw in, laak humah a puan haw a phah celh haw ten, Jesuh cu khung hi. 8Mi tampi ten a hawhnak tuk lampi ah a puan haw phahin; mi khenkhat ten thingceh la in phah bok haw hi. 9A matanah a hawhtute le nunglam pen a zuitu ten, “Pathian cu thangphat un! Topa i minin, a hungmi cu Pathian in thupha pia tahen!#Saam 118:25-26; 10A pu uh David kumpipa i Uknak a heng tukmi cu Pathian in thupha pia tahen! Pathian cu thangphat un!” tin au haw hi.

11Jesuh cu Jerusalem ah tumin, Biakinn sungah a tum ten na hempoh zo kawkawi hi. Khuanu zo toh hangin a nungzuitu sawm le pa nihte tuah Bethani khua ah hawh haw hi.

Jesuh In Theikung Tam

(Mt 21:18-19)

12A zingten Bethani khua pen a kihleh haw laihin, Jesuh cu a ngilkial hi. 13Lam khawla thimnakah a ceh sai bimbemmi theikung pa khat mu in, a ngah um nemtim maw tih zo tukin zuan hi. Mahnaven theikung bulah a hen ten a ceh bek mu hi. Itahim titale thei min hun a hih ngaw hangin hi. 14Jesuh in, “Kuamah in, na ngah cu eileh haw ma toh hen,” tin theikung cu ti hi.

A nungzuitu ten mah tin, a ot cu za bok haw hi.

Jesuh Cu Biakinn ah Hawh

(Mt 21:12-17; Lk 19:45-48; Jn 2:13-22)

15Jerusalem a hen haw ten Jesuh cu Biakinn ah hawhin, thil leitu le a zuaktute hawlvawk khawng hi. Tangka thektu tei cabuai le laileng zuaktu tei khunnakte vang linglet sak khawng hi 16Biakinn tual a, van pua vak li vang cu kham khawng hi. 17Mipite cu hi bangin hilh hi, “Lai Thiangtho sungah Pathian in, ‘Ka inn cu miphun hempoh tei ca in thungetnak inn tih hi tuk hi,’ tin ngatin um hi. Mahnaven nohten nguca tei ngelhnak suangholin bawl uh ci,” ti hi. #Isa 56:7; Jer 7:11;

18Thiampi upate le Daan zilhtu ten mah thu a zak haw ten Jesuh thah theihnak tuk lampi zei haw hi. Jesuh i thuzilhmi in mipi tei lungmu a sawh ngah leita hangin cu lau mahtak haw hi.

19Taklam ten Jesuh le a nungzuitute cu khuapi sung pen tul haw hi.

Theikung Pen Thuhilhnak

(Mt 21:20-22)

20A zingten zingtungno in lampi ah a hawhlih laih takin theikung cu a zik pen a zung tian thi khawng cu mu haw hi. 21Peter in phawk lehin, Jesuh lakah, “Sazapa, zo hemin,! Na tammi theikung cu thi zo toh hi!” tin ti hi.

22Jesuh in, “Pathian muang un! 23Thungai in hilh ing. Kua hei hihen a lungmu sungah muanmawhnak nei ngawlin a tihnak bangin piang loli tuk hi tin, a muang tatak tale, hi mual hi thawnin, tuinim sungah caak hen, a ti ahin, caak tuk hi.#Mt 17:20; 1Kor 13:2; 24Mah hangin hitin hilh ing. Thungenin, na pa kha khat na nget uhten ngah zo ing hi, tin um unna, ngah tuk uh ci. 25Thungen tukin na din toh uhten mi pa kha khat i humah lungkim ngawlnak na neih uhmi cu ngaithiam un hi, mahten vancung a um na Pa uhin, na sualnakte uh ngaithiam bok tuk,” ti hi.#Mt 6:14-15; 26(Midang sualnak na ngaithiam uh ma tale vancung a um na pa uhin, na sualnak uhte ngaithiam bok tukma hi).”

Jesuh i Thuneihnak Dong Haw

(Mt 21:23-27; Lk 20:1-8)

27Jesuh le a nungzuitute cu Jerusalem ah hengleh haw hi. Jesuh cu Biakinn sungah a hawh lih laih takin, thiampi upa, Daan zilhtu le upa dangte hung haw a, 28Jesuh cu, “Iti bang thuneihnak tuah kaw hitih bang thilte hi na bawl? Akua in kaw hitih bang thuneihnakte a pia?” tin dong haw hi.

29Jesuh in, “Thu pa khat dong hih tung, na don thei uh tale itih bang thuneihnakin kaw hi tih bang thil hi ka bawl tih hilh tung hi. 30Hilh hem un; Johan i tuiphum theihnak hi akua i lak pen kaw a ngah? Pathian lak pen maw? Mihing lak pen kaw?” tin dong hi.

31Amuh le muh eldunin, “Iti bangin ti kam nung? Pathian lak pen a ti uh ahin, ‘Mahti bang ahi tale ita Johan cu sang ma uh cim?’ tin tituk hi. 32‘Mihing lak pen,’ a ti uh ahin, ‘Mipite lauhuai sih hi, itahim titale mipi ten Johan cu profet hi tih thei khawng zo haw toh si,” tin ti haw hi. 33Mah hangin Jesuh lakah, “Thei ma ung” tin donleh haw hi.

Jesuh in amuh tei lakah, “Kei hei in iti bang thuneihnakin hum hi tih bang thil ka bawl, tih hilh bok mang,” tin ti hi.

Currently Selected:

MARKA 11: NBF1

Highlight

Copy