MARKA 12

Sabit Huan Neitu Tehkipnak

(Mt 21:33-46; Lk 20:9-19)

1Mah nungten Jesuh in amuh tei lakah tehkipnak tuah thu hilh hi. “Ni dang laihin, mi pa khat cu sabit huandum bawl hi. Sente umin, sabit suknak tuk lei khuk co in le ki hunnak tukin taitan sa hi. Mahceng ten a bunlawh nuamtu tei lakah pia in, amah cu khualzin hawhta hi.#Isa 5:1-2; 2Sabit ngah a thoih hun ten a co tukmi la tukin a umlawhpa khat hah hi. 3Huan nadektu ten a umlawhpa cu manin, a vahnek ceng haw ten a khut thacangin hah haw hi. 4Mahten umlawh a dangtik lehleu hi. Huan nadektu ten a lu pen vatin, mualpho le zakcazet bawl zam haw hi. 5Huan nei pa in umlawh dangtik lehleu naven that zam haw hi; umlawh dang tampi vang mahti bang lengin bawl haw hi, mi khenkhatte vatin, mi khenkhat lam cu that haw hi. 6Hah tukin a tangmi cu huan neitu pa i capa bek hi. A dawlbel ten huan bungtu tei lakah a capa cu tiikin, ‘Ka capa cu maizah deuh haw tuk,’ ti hi. 7Mahnaven mah huan bungtu ten, ‘Hi pa hi huan neitu pa i capa hi that nung inna, a neih hempoh eimuta hi tuk hi,’ tin pa khat le pa khat tidun li haw hi. 8Mahten a capa cu manin, a thah nung haw ten a luang cu huan pualamah vawk haw hi.

9“Mah thu cu huan neitu pa in iti bangin bawl kam ni?” tin Jesuh in dong hi. “Huan neitu pa cu hungin huanbun lawhtute cu that khawngin, huan bung lawhtu dang tei lakah pia tuk hi. 10Lai Thiangtho in,

“Inn satu tei manpha ma toh tin

a lawl haw mi suang cu,

a dang hempoh sangin

manphabelmi suangin

suak zo hi.

11Mahmi cu Topa i bawlmi hi;

itih zahin zoh mawi hum tih

ngatmi sial awng ma uh cim?”

tin ti hi.#Saam 118:22-23;

12Judah upa ten mah tehkipnak cu amuh a son nuamnak tih a theih haw hangin Jesuh cu mat tum haw hi. Mahnaven mipite a lau haw hangin tulin Jesuh cu hawhsan den hawta hi.

Siah Piaknak Thu

(Mt 22:15-22; Lk 20:20-26)

13Jesuh awk ngah tukin, Farasi mi khenkhat le Herod i mihing khenkhat ten thu dong tukin hung haw hi. 14Jesuh lakah a hen haw ten, “Sazapa, nangin miten iti bang ngaisung bok haw tuk nantim tih hei ngaisung ngawlin thutak son ci tih thei ung hi. Mi upa tei mitmai hei zo ngawlin le deidatnak lungmu vang nei ma ci. Pathian deihnak thutak cu mi lakah hilh ci. Mah hangin a ciang zetin hilhin hi. Rom kumpi lak a, siah piakmi hi a Daan uhin phal maw phal ma kaw? Pia tuk ung maw pia tukma ung kaw?” tin dong haw hi.

15Jesuh in, a ngitlohnak haw amuh ten, “Itakaw thangin awktik na tum uh? Ngun tangka pia hem un zo nang,” ti hi.

16Jesuh in, “Hih ngun tangka humah akua i mel le min cuang kaw?” tin dong hi.

Amuh ten “Rom kumpipa i mel le min,” tin don haw hi.

17Mah hangin Jesuh in, “Kumpipa ta cu kumpipa pia unna, Pathian ta cu Pathian na pia un,” tin ti hi.

Jesuh i donlehnakin amthongtik khawng hi.

Thihnak Pen Thawhlehnak Thu

(Mt 22:23-33; Lk 20:27-40)

18Sadusi khenkhat, thih nungten thawhleh um tukma tih a sangtu ten Jesuh lakah hung haw in,#Nung 23:8; 19“Sazapa, Moses in daan a ngatsakmi sungah, ‘Mipa pa khat cu thi in, ca nei ngawlin a zi a zamta bang ahin, cano nei a suahleh theihnak tukin a thihsan mi a zi cu a nau in huai tuk,’ tin um hi.#Daan 25:5; 20Vei khat laihin, unau salih um haw a; upabelin zi huai in, ca nei ngawlin thi hi. 21A pa nihnak pa in mah nu cu huai in, ca nei ngawl lengin thi bok hi. Mahti bang bok lengin, a pa thumnak pa in mah nu cu huai bok naven ca nei ngawl lengin thihsan lehleu hi. 22A unau salih haw in mah nu cu huai haw naven, ca nei ngawlin thi khawng haw hi. A dawlbel ten numei nu vang thi bokta hi. 23Mah hangin mithi tei thawhkik ni ten mah nu cu akua i zi tukin um kam ni? A salih haw in huai khawng haw ven,” tin dong haw hi.

24Jesuh in, “Sual tatak uh ci maw? Ita hi bangin khial thei kam hung tih thei uh cim maw? Lai Thiangtho ahimata Pathian i ngilnak na theih uh ngawl hangin hi. 25Itahim titale mithite a thawhleh haw ten vancungmite bang haw tuk a, huaidun tih umleh tukma toh hi. 26Mithi thawhlehnak thu ah Moses i laibu sung a, hampa kang thu khi sial awng ma uh cim? Mahlai pen Pathian in Moses lakah, ‘Keimah cu Abraham i Pathian, Isaak i Pathian, Jakob i Pathian ing,’ ti hi.#Suah 3:6; 27Pathian cu a nungmi tei Pathian hi in, a thi tei Pathian kha ma hi. Mah hangin khial leita lawlawm uh ci,” tin don hi.

Thukham Ngengbel

(Mt 22:34-40; Lk 10:25-28)

28Mahlai ah a thuson haw mi a za boktu Daan zilhtu pa khat um hi. Jesuh in Sadusi tei thudotmi don thiamzet tih a zak ten a nelah hungin, “Thukham hempoh sung pen ikaw a thupibel?” tin dong hi.

29Jesuh in, “A thupibelmi thukham ci hi hi, hi: Israel mite ngai un!#Daan 6:4-5; 30Topa a Pathian uh bek hi Topa hi. Topa na Pathian uh cu na lungmu hempoh, na nunnak hempoh, na ngaihsutnak uh hempoh le na zaangtha hempoh tuah it in hi. 31Mahten a pa nihnakin a thupimi thukham cu, ‘Na inn nelte khi nangmah le nangmah na ih bangin it in hi,’ tihmi hi. Hi thukham pa nih sangin a thupi saw thukham umleh ma toh,” ti hi.#Thiam 19:18;

32Jesuh lakah Daan zilhtu pa in, “Sazapa, na tihmi cu pha ngai hi. Na hilhnak bangin Topa bek hi Pathian hi a, pathian dang umma tih cu a man zetmi hi.#Daan 4:35; 33Mah hangin mihing ten Pathian cu a lungmu hempoh, a ngaihsutnak hempoh le a ngilnak hempoh tuah it in, ama pumpi a ih bangin a inn nelte cu it bok tuk hi. Hi thukham pa nih zui cu meihal biakpiaknak sangin thupi saw,” ti hi.#Hos 6:6;

34Jesuh in hi pa i donlehdan hi thiam hi tih a theih ten, “Nang cu Vancung Uknak tuah khawladun ma ci,” ti hi.

Mahnung ten Jesuh cu kuamah in thudong ngamleh haw ma toh hi.

Khrih Thu

(Mt 22:41-46; Lk 20:41-44)

35Jesuh in Biakinn sungah thu a zilh lih laihtakin, hi tin thu pa khat dong hi. “Itin kaw Daan zilhtu ten Khrih cu David casuan hi tuk hi tin, a tih theih haw? 36David cu Hawvang Thiangtho in hilhin:

‘Topa in,

ka Topa i lakah,

na ngalte na ke nuai ah

ka koih laklawh,

ka taklamah khungin,’ ti hi.#Saam 110:1;

37David amah hei in, Khrih cu, ‘Topa,’ tin, a sam tale itin kaw David i casuan a hih theih tuk?” tin ti hi.

Jesuh In Daan Zilhtute Liat

Mi honpi ten Jesuh i thuzilhmi cu lungdam thatui zetin ngai haw hi. 38Mahti bangin thu a zilh ten Jesuh in, “Daan zilhtute khi ngallingzetta un hi. Amuh ten puan cualpi silhthah vak nuamin, mihon umnak dawl tuanah mitei upatnak tuah nuksat tuk deih haw hi. 39Pumkhawm innah khunnak phabelte hamin, puai bawlnak munah mun phabelte teng haw hi. 40Meivongte khi a met zeinak mangin, a inn haw a, ngante lonsak haw hi. Miten mu haw nahen tin ngei zetin thungen haw hi. Dantatnak a tawh haw tukmi cu midang tei tawh tukmi sangin nase saw tuk!” ti hi.

Meivongnu i Sumkhiak

(Lk 21:1-4)

41Jesuh cu Biakinn ngun tangka koihnak elah khungin, mitei ngun tangka a piak lih haw laih zo leng hi. Mihau tampi ten ngun tangka tampi khia haw hi. 42Meivong ca-ngahzet nu hungin pia-nga hawng manmi ngun tangka sanno pa nih khia bok hi. 43A nungzuitute cu munkhatah samkhawmin, “Midang hempoh sangin, hi meivong ca-ngah nu in sumpi tambel khiak hi. 44Itahim titale midangte cu a neihmi haw sung pen a valmi bek khia haw. Mahnaven hi meivongnu cu ca-ngahzet naven a neihmi hempoh khia in, ama pumcawmnak tukin a man tukmi hempoh pia khawng hi,” tin ti hi.

Currently Selected:

MARKA 12: NBF1

Highlight

Copy