MIKAH 6

Topa In Israel Siat

1 Topa in, Israel humah mawhsiatnak a neihmi hi ngai un!

Topa aw, tho inna, na thu cu hilh tehin; mual sangpi le mual niamno ten na thu cu za haw hen.

2Noh mual sangpite, noh kumkhua khomi leipi i tawphahte, Topa i thu cu ngai un! Topa in mihing tei humah thunei hi. Israel humah mawhsiatnak thu hilh tuk hi.

3 Topa in, “Ka mihingte, na hum uhah i bawlmi hum ka neih? Iti bangin kaw noh tei ca in bawmngit a ka can? Don teh hem un! 4Izipt ngam pen puitulin, saltannak sung pepan ing. Nangmuhte puitu tukin Moses, Aaron le Miriam hah ing.#Suah 4:10-16; 12:50-51; 15:20; 5Ka mihingte, Moab kumpi Balak in nangmu humah bawl a tummi le Beor i capa Balaam i thudotmi cing leleng un. Akasia khua pen Gilgal khua laklawh a, thil a piang mite cing leleng unna, nangmuh pan nuamin thil ka bawl mite cu theileh tuk uh ci,” ti hi.#Mipum 22:2-24:25; Josh 3:1-4:19;

Topa i Deihmi

6Vanhum a Pathian Topa bia tukin ka hun ten a nelah i hum ka ken tuk hi. A nelah halkang biakpiaknak pia tukin kum khat kim khuino a pha keng tung maw? 7Tuu a thawng a zain ka pia bang ahin, Topa a lungdam ni maw? Catngawl a luangmi olif sathau in, a lungdamtik ni maw? Ka sualnak hangin a nelah ka sungsuak ka ca masabel pia tung maw? 8Mah kha ma hi, Topa amah in, a phabelmi cu hilh zo hi. A deihmi cu: a dikmi bawl tuk, a kho mi itnak neih tuk le niamkhiat zetin Pathian tuah pawlkom leleng khi na hi.

9 Topa kihcak cu cihnak hi. Topa in khuapi cu samin, “Khuasung a umte ngai un. 10Mipha ngawl tei innah phatngawlnak tuah a ngah haw mi sum tampi um hi. A man ngawlmi cuai khainak mang haw, ka huatbelmi thil hi. 11A man ngawlmi tehnak le a man ngawlmi cuai khainak a mangtute cu itakaw ka ngaihthiam theih tuk? 12Khuasung a, um mihau ten mi ca-ngahte nekkei in, na venghawng uhin zolthu sontu ngeh uh ci. 13Na sual uh hangin nangmuh siatsuah tukin pan zo ing. 14An cu ei tuk nave uhcin, na von uh vah tukma hi. Na ngil uh kial leleng tuk hi. Nate na taipih uh hei in, lawhting tukma uh ci. Na taipih ngah uhmi a um hei in, ngalkhutin siatsuah leleng tung hi. 15Anci cing tuk nave uhcin, a ngah cu cawm tukma uh ci. Olif ngah pen sathau ngawi tuk nave uhcin man tuk nei awng tukma uh ci. Sabittui suuk tuk nave uhcin, in kha awng tukma uh ci. 16Kumpi Omri le a capa kumpi Ahab i bawlmi thilpha ngawl cung zo uh ci. A zam haw mi thilpha ngawl cu na zui leleng uh hangin siatnak hengtik tung a, mi hempohin zawnsak haw tuk hi. Khua hempoh ten nuihsanin, zawnsak haw tuk,” ti hi.#1Kum 16:23-34; 21:25-26;

Currently Selected:

MIKAH 6: NBF1

Highlight

Copy