MIKAH 2

Mi Ca-ngah Nuainemtu Tei Matan

1A zaunak humah zau in, thilpha ngawl bawl tuk a ngaisung litute, na matan uh lauhuai lawlawm si! Khuavakin, hunpha a ngah bek haw ten thilpha ngawl a ngaihsutte cu bawl haw hi. 2Lo le lam a deih haw ten mi lo lonsak haw hi. Inn a deih haw ten mi inn luahsak haw hi. Kuamah i innkua le nate a him um haw ma. 3Mah hangin Topa in hi bangin ti hi, “Na hum uhah thilpha ngawl hengtik tung a, kuamah suakca thei tukma uh ci. Haksa mangbang zetin um tuk uh ci a, ultung zetin vak tukma toh ci. 4Mah hun a hen ten siatnak na tawh uhmi cu mi tampi ten tehkipnakah mangin, hi na lungkhamnak uh cu la in sa haw tuk hi.

Siatsuah khawngmi hi zo hung!

Topa in, a ngam uh la zo hi;

Sal a mantu tei nelah pia zo hi,”

5Mah hangin hi ngam cu Topa i mihing tei nelah a piak kikleh ten noh tei ca in, cotuk imah um tukma hi.

6Mipi ten ka nelah, “Thu hilhnuam pahsun. Mah thute cu a son hei son pahsun. Pathian in zahcaknak hengtik viang tukma. 7Israel mite hi tamsiatnak nuai ah um haw tin, ngaisung cim maw? Pathian cu a thinsau zo lehma toh tin ngaisung cim maw? Mahtibang na cu bawl ngangai a ni maw? Thilpha a bawltu tei nelah awnkam humno tuah awn lehcet hi ma maw?”

8 Topa in, “Ka mihingte cu na ngal uhte bangin do uh ci, ngaldonak pen pinin, innah himdamno um hung tin ngaisung haw naven nohte cu a angkicual hei ngu tukin pang uh ci. 9Ka mihing numeite cu a deihzet haw mi a innkua haw pen hawlvawkin, a canote ka muicu piak tukmi co ngah ngawlin lonsak uh ci. 10Tho unna, hawh un; hilai munah humhimnak dawmno hei umma toh hi. Na sualnak uhin hi mun cu siatsuah khawng zo hi. 11Mihing tei deihmi profet pa cu a suk le to ah vak kawkawi in, thuman ngawl le mizolnak bek sonin, ‘Na ca uhin sabittui le zu luang leleng tuk poh a ti haw huahtu khi hi.’

12“Mahnaven a tang calam Israel miphunte cu munkhatah hulawm khawm tung hi. Tuu inn sungah a pin mi tuu bangin munkhatah pintik tung hi. Ngantatnak hamhing munah tuute a dim bangin na ngam uh cu mihingin dimleh tuk,” ti hi.

13Pathian in lampi sialleh tukin salah a tannak mun haw pen puitulleh tuk hi. Khuapi kongkhahte cu kalhletin tul haw tuk hi. A kumpi haw Topa amah loli in tulpih tuk hi.

Currently Selected:

MIKAH 2: NBF1

Highlight

Copy